Deved mo Golaeat, i kam long Steve Nethercott

13–19 Jun

1 Samuel 8–10; 13; 15–18

“Hem I Gat Paoa blong Win long Faet”

I nomata ol aktiviti andanit ia oli disaenem blong tugeta ol yangfala o olgeta we oli pikinini we oli bigwan, yu save stretem eniwan long olgeta blong i save go stret wetem ol nid blong olgeta we yu tijim.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Soem pikja blong Deved mo Golaeat aot long aotlaen blong wik ia insaed long Kam Folem Mi—Blong Wanwan Man, Woman mo Famli. Invaetem ol pikinini blong serem wanem we oli save abaot stori, mo askem ol kwestin blong helpem olgeta blong tingbaot ol pat blong stori we oli no bin tokbaot.

Tijim Doktrin: Ol Smol Pikinini

1 Samuel 16:1–13

Lod i save wanem i stap insaed long hat blong mi.

Blong stap serem stori blong olsem wanem Lod i bin talem long Samuel blong jusum Deved, i save helpem ol pikinini blong save se Lod i save yumi wanwan.

Samfala Aktiviti we Yu Save Mekem

• Serem olsem wanem Lod i bin talem long Samuel se Deved bae i kam king blong Isrel (luk long 1 Samuel 16:1–13). Taem yu stap talem stori, yu save askem wan pikinini blong ripresentem Samuel. Hem i save givim wan hat blong king we oli mekem long pepa long wan narafala pikinini we i ripresentem Deved. Serem testemoni blong yu se Lod i bin save finis hat blong Deved mo we Hem i save wanwan long yumi.

• Serem wan eksperiens long taem we yu bin filim se Lod i save gud yu. Singsing wan singsing we i tijim se Sevya i save mo lavem yumi olsem: “Jesus Is Our Loving Friend” (Children’s Songbook, 58).

1 Samuel 17:10–54

Fet long Jisas Kraes i save helpem mi blong gat strong paoa long tingting.

Ol pikinini oli konek gud wetem yangfala Deved from se nomata se Deved i smol, hem i bin winim wan bigfala jalenj. Helpem olgeta blong luksave se stamba blong fasin blong gat strong paoa long tingting blong hem mo paoa i bin fet blong hem long Jisas Kraes.

Samfala Aktiviti we Yu Save Mekem

• Luklukbak long stori blong Deved mo Golaeat wetem ol pikinini (luk long “Deved mo Golaeat” insaed long Ol Stori long OlTesteman), mo letem olgeta i gat janis blong aktemaot stori ia. Gaedem pikinini we i mekem hem olsem Golaeat blong talem, “Yufala i traem jusumaot wan man! !Tedei nao bambae mitufala i faet!”” (1 Samuel 17:10). Gaedem wan pikinini blong mekem olsem se hem i Deved mo talem, “mi mi kam blong faet long yu long nem blong Hae God” (1 Samuel 17:45). Testifae se taem we yumi gat fet long Lod, Hem bae i helpem yumi blong gat paoa long tingting olsem we Deved i bin gat.

• Yusum aktiviti pej blong wik ia blong soem olsem wanem Golaeat i longfala komperem wetem wan yangfala boe olsem Deved. Eksplenem se ol ami blong Isrel oli bin fraet long Golaeat. Askem ol pikinini blong mekem olsem se oli fraet. Afta soem wan pikja blong Jisas Kraes, mo talem long ol pikinini se, from we Deved i bin gat fet long Lod, hem i no stap fraet. Askem olgeta blong stanap stret olsem se oli nogat fraet.

• Invaetem ol pikinini blong maj olsem Deved we i stap go blong faet wetem Golaeat, mo semtaem, oli singsing wan singsing abaot fasin blong no gat fraet olsem hemia, “I Will Be Valiant” (Children’s Songbook, 162).

1 Samuel 18:1–4

Ol gudfala fren oli save kam wan blesing long mi.

Frensip blong Jonatan mo Deved i wan bigfala eksampol blong ol blesing we i save kam aot long ol gudfala fren.

Samfala Aktiviti we Yu Save Mekem

• Droem tu (2) pikja long bod, wan i ripresentem Deved mo narawan i ripresentem Jonatan. Ridim sam sentens long ol pikinini, 1 Samuel 18:1–4 we i tokbaot bigwan lav we tufala fren ia i gat long wanwan long tufala. Givim long wanwan pikinini wan pepa we i sep blong hat, mo askem olgeta olsem wanem oli save soem lav long wan fren. Afta we wanwan pikinini i serem wan aedia, invaetem pikinini ia blong stikim pepa ia long bod.

• Talem long ol pikinini abaot wan gudfala fren we i helpem yu blong laef folem gospel o blong bildim fet blong yu long Jisas Kraes, mo invaetem ol pikinini blong serem huia i helpem olgeta. Invaetem ol pikinini blong aktem wan naes samting we oli save mekem blong wan fren.

Stap Tijim Doktrin: Ol Bigfala Pikinini

1 Samuel 8:6; 9:15–17; 10:1–24; 16:1–13

Olgeta we oli stap givim seves insaed long Jos, God nao i singaotem olgeta.

Stori blong God we i stap jusum Sol mo Deved blong kam ol king i save helpem klas blong yu blong andastanem olsem wanem God i stap singaotem ol pipol blong givim seves insaed long Jos tedei. Ol stori ia i save bildim fet, se ol koling, oli kam long God tru long ol wokman blong Hem we oli gat atoriti.

Pikja blong Samuel i stap anoentem Sol, © Lifeway Collection/oli karem laesens long goodsalt.com

Samfala Aktiviti we Yu Save Mekem

• Long ol seperet pis blong pepa, raetem ol stetmen mo ol skripja ia: ol pipol oli wantem wan king (1 Samuel 8:6); Lod i bin talem long Samuel se Sol bae i kam king (1 Samuel 9:15–17); Samuel anoentem Sol (1 Samuel 10:1); Samuel i presentem Sol long ol pipol (1 Samuel 10:24). Askem ol pikinini blong ridim ol sentens blong skripja ves ia mo putum olgeta long stret oda.

• Lanem tugeta nambafaef toktok blong bilif. Tokbaot smol long ol pikinini olsem wanem yu kasem koling blong tij long Praemeri. ?Olsem wanem nao yu save se God i singaotem yu? Testifae se God i givim insperesen long ol lida blong singaotem ol pipol blong givim seves.

1 Samuel 16:1–13

“Lod i stap lukluk long hat.”

I nomol blong jajem ol narafala man long wanem we yumi save luk long olgeta, be pat ia blong kam moa olsem Jisas Kraes, i blong lanem olsem wanem blong lukluk olsem we Hem bae i lukluk—blong stap lukluk “long hat” (1 Samuel 16:7).

Samfala Aktiviti we Yu Save Mekem

• Invaetem ol pikinini blong pikjarem se oli askem olgeta blong jusum wan blong kam wan king. ?Wanem ol kwaliti nao bae oli lukaotem long olgeta? Ridim tugeta 1 Samuel 16:6–7 blong faenemaot wanem Lod i bin talem long Samuel taem hem i stap lukaotem wan niufala king blong Isrel. ?Wanem nao yumi lanem long ol instraksen blong Lod?

• Presentem wan lesen we i yusum ol tul blong soem long ol pikinini se ol jajmen we yumi mekem folem wanem “ we yu save luk aotsaed” (ves 7) maet i no stret. Eksampol yu save soem long olgeta sam kaekae o wan buk wetem wan plastik o kova we i no majem stret ol samting we i stap insaed. Wanem nao 1 Samuel 16:7 mo samting we yu yusum long lesen i givim tingting long olsem wanem yumi mas lukluk long yumi wanwan mo ol narafala man?

• Serem wan eksperiens we yu bin lanem from wanem yu mas “lukluk long hat,” i no jes “long wanem yu luk long aotsaed blong olgeta” (ves 7). Letem ol pikinini oli serem eni eksperiens we i semmak olsem blong yu, we oli bin gat. Singsing wan singsing we i tokbaot bigwan prinsipol ia olsem: “I’ll Walk with You” o “We Are Different” (Children’s Songbook, 140–41, 263).

1 Samuel 17:20–54

Jisas Kraes i save helpem mi blong winim eni jalenj.

Maet ol pikinini oli stap fesem ol jalenj we i luk olsem se i had tumas blong winim wan bigfala man olsem Golaeat. Eksampol: blong Deved i save givim hop se bae Lod bae i help blong faetem ol faet blong olgeta.

Samfala Aktiviti we Yu Save Mekem

• Asaenem ol pikinini blong droem ol pikja blong ol defdefren pat blong stori insaed long 1 Samuel 17:20–54. Putum ol pikja long oda long bod mo invaetem ol pikinini blong serem stori taem oli stap tokbaot wanwan long ol pikja we oli bin droem. ?Wanem nao Lod i wantem yumi blong lanem long stori ia?

• Helpem ol pikinini blong mekem lis blong ol jalenj we i had we maet wan man i stap fesem. Invaetem olgeta blong faenem ol samting we Deved i bin talem we i save leftemap tingting blong wan narafala man we i stap fesem ol semmak jalenj olsem (luk long 1 Samuel 17:26, 32, 34–37, 45–47). Talem long ol pikinini olsem wanem Jisas Kraes i bin helpem yu long taem blong ol jalenj.

Stap Leftemap Tingting blong Lanem Samting long Hom

Askem wan kwestin long ol pikinini abaot wan samting we oli bin lanem tedei. Raetemdaon kwestin ia mo givim wan kopi long wanwan pikinini blong tekem i go long haos mo toktok raon long hem wetem famli blong olgeta.

Kam Antap long Fasin blong Yumi blong Stap Tij

Helpem ol pikinini blong pikjarem ol skripja. Plante taem, ol pikinini oli gat bigfala intres long wan lesen taem oli save lukluk ol pikja we oli go wetem ol stori long skripja o ol tijing. Tingting blong stap yusum ol pikja insaed long Gospel Art Buk o long ChurchofJesusChrist.org.