“30 Mei–5 Jun. Jajes 2–4; 6–8; 13–16: ‘Hae God I Jusumaot Wan blong Tekemaot Olgeta long Han blong King,’” Kam Folem Mi—Blong Praemeri: OlTesteman 2022 (2021)
“30 Mei–5 Jun. Jajes 2–4; 6–8; 13–16: ‘Hae God I Jusumaot Wan blong Tekemaot Olgeta long Han blong King,’” Kam Folem Mi—Blong Praemeri: OlTesteman 2022
Pikja blong Debra we i stap lidim ol ami blong Isrel, © Lifeway Collection/oli karem laesens long goodsalt.com
30 Mei–5 Jun
Jajes 2–4; 6–8; 13–16
“Hae God i Jusumaot Wan blong Tekemaot Olgeta long Han blong King”
Yu save faenem plante stori we i givim insperesen insaed long Jajes 2–4; 6–8; 13–16. Tingting hevi long olsem wanem yu save yusum ol stori ia blong helpem ol pikinini blong kam moa kolosap long Sevya mo wantem blong folem Hem.
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Invaetem wanwan pikinini blong serem wan stori insaed long ol skripja we oli jes stap lanem. Mo afta askem olgeta blong serem wanem we oli lanem aot long ol stori ia.
Tijim Doktrin: Ol Smol Pikinini
Jisas Kraes i Sevya blong mi.
Taem we ol laen blong Isrel oli bin prea long Lod, Hem i resemap wan blong mekem olgeta oli kam fri. Helpem ol pikinini blong luk se Jisas Kraes i Man Ia blong Mekem Yumi Fri we God i resemap blong yumi.
Samfala Aktiviti we Yu Save Mekem
-
Eksplenem long ol pikinini se, taem we ol laen blong Isrel oli bin stop blong folem ol komanmen blong God, oli lusum proteksen blong Hem mo ol enemi blong olgeta oli stap winim olgeta. Ridim long Jajes 3:9 sentens ia: “ol pikinini blong Isrel oli krae i go long Lod.” ?Wanem nao ol laen blong Isrel oli bin mekem taem oli nidim help? Serem wan eksperiens blong wan taem we yu bin prea blong kasem help, mo Lod i bin ansarem prea blong yu.
-
Long Jajes 3:9, ridim sentens ia: “[Lod] i jusumaot wan man blong i tekemaot olgeta long han blong king ya” mo invaetem ol pikinini blong ripitim wetem yu plante taem. Eksplenem se wan man we i tekemaot yumi long han blong king, i wan man we i stap sevem yumi. Soem long ol pikinini sam pikja blong ol pipol, mo wan Long ol pikja ia, i wan pikja blong Jisas Kraes, mo putum ol pikja ia oli fes i go daon long floa. Letem ol pikinini oli gat janis blong tanem ova ol pikja blong faenem pikja blong Jisas, mo leftemap i go antap. Testifae se Jisas Kraes nao i Man Ia blong Mekem Yumi Kam Fri we God i bin resemap blong sevem yumi long sin mo ded.
Gideon i gat tras long Lod. © Lifeway Collection/oli karem laesens long goodsalt.com
Lod i save yusum ol smolsmol samting blong mekem ol bigfala wok.
Gideon i tingting long hemwan olsem wan puaman mo hem i no impoten, be God i luk hem olsem wan “strong man blong faet” (Jajes 6:12). Helpem ol pikinini blong save se nomata oli filim se oli smol (no inaf blong mekem), God i save wok tru long olgeta blong mekem ol impoten samting (luk long Alma 37:6–7).
Samfala Aktiviti we Yu Save Mekem
-
Talem long ol pikinini se Lod i nidim wan man blong helpem Hem sevem Isrel long ol enemi blong olgeta, Ol Man Midian, mo Hem oli jusum Gidion. Ridim Jajes 6:15 long ol pikinini, mo askem olgeta from wanem Gideon i filim se hem i no save mekem wanem we Lod i wantem. Ridim ves 16, mo askem olgeta huia nao Lod i bin talem se bae i helpem Gideon. Talem long ol pikinini abaot wan taem we Lod i bin askem yu blong mekem wan samting we i had tumas blong givim seves long Hem mo yu bin filim se Hem i stap wetem yu.
-
Soemaot ol pikja blong ol pikinini o ol yut we oli stap mekem ol bigfala samting insaed long wok blong God (luk long Gospel Art Buk, ol namba 19, 23, 90, 102), o tokbaot ol eksampol we yu bin luk. Helpem ol pikinini blong oli tingting long ol wei we oli save tekpat long wok blong God, mo askem olgeta blong droem ol pikja blong olgetawan we oli stap mekem ol samting ia.
-
Yusum aktiviti pej blong wik ia blong tijim ol pikinini olsem wanem Lod i mekem ol ami blong Isrel oli kam smol blong mekem se ol laen blong Isrel bae oli save se paoa blong Hem i bin sevem olgeta long ol enemi blong olgeta. Tokbaot long olgeta ol smolsmol samting we i mekem ol bigfala wok, olsem ol bi we oli stap karem tugeta smolsmol jus blong floa blong mekem hani. Serem testemoni blong yu se God i save helpem yumi blong mekem ol bigfala wok iven long taem we yumi filim se yumi smol[no inaf blong mekem].
Stap Tijim Doktrin: Ol Bigfala Pikinini
Jisas Kraes i Sevya blong mi.
Jajes 3 i tokbaot wan paten we yu save yusum blong tijim ol pikinini se God i mekem yumi kam fri long sin tru long Sevya Jisas Kraes.
Samfala Aktiviti we Yu Save Mekem
-
Raetem hemia long bod: “mekem ivel,” “i krae i go long Lod,” mo “resemap wan sevya.” Askem sam long ol pikinini blong faenem ol sentens ia insaed long Jajes 3:7–9, mo invaetem ol narawan blong faenem olgeta insaed long Jajes 3:12–15. Eksplenem long ol pikinini se plante taem insaed long Buk blong Jajes, ol laen blong Isrel oli “mekem ivel.” Mo afta taem ol enemi oli atakem olgeta, oli “singaot i go long Lod,” mo Lod i bin “[resemap wan sevya]” blong helpem olgeta. ?Wanem nao yumi lanem abaot Lod long ol paten ia?
-
Singsing tugeta wan singsing we i save helpem ol pikinini blong andastanem se Jisas Kraes i Ridima mo Sevya, olsem hemia: “He Sent His Son” (Children’s Songbook, 34–35). Invaetem ol pikinini blong serem ol filing blong olgeta abaot wanem we Sevya i bin mekem blong mekem yumi yumi kam fri aot long sin, ol tes blong laef, harem nogud mo ded.
Mi save stap fetful long Lod iven sapos ol narawan oli no stap fetful.
I nomata plante long ol laen blong Isrel we oli bin foldaon mo stap longwe long Lod, sam long olgeta oli bin stap tru long Hem mo oli bin save helpem plante oli kambak long stret mo gud fasin. ?Olsem wanem nao yu save leftemap tingting blong ol pikinini blong stap tru long Lod nomata wanem ol narawan oli stap mekem?
Samfala Aktiviti we Yu Save Mekem
-
Talem long pikinini se, long wan taem we ol laen blong Isrel oli bin stap mekem ol rabis fasin, wan woman we i stap stret mo gud we nem blong hem Debra mo komanda blong ami blong ol laen blong Isrel, tufala i mekem ol laen blong Isrel oli kam fri aot long ol enemi blong olgeta (luk long Jajes 4:1–15). Ridim Jajes 4:14, mo askem ol pikinini blong faenem wan samting we Debra i bin talem we i soem se fet blong olgeta long Lod i bin strong. Mo afta, askem olgeta blong ridim Doktrin mo Ol Kavenan 84:88 blong faenem wan prinsipol we i stap tu insaed long Jajes 4:14. Leftemap tingting blong olgeta blong serem wanem promes ia blong Lod, “bambae mi go long fored blong yufala,” i minim long olgeta.
-
Singsing wan singsing abaot fasin blong stap obei long ol komanmen olsem: “Choose the Right” (Hymns, namba 239) o “Choose the Right Way” (Children’s Songbook, 160–61). ?Olsem wanem nao yumi save stanap from stret mo gud fasin mo obei ol komanmen iven taem olgeta raon long yumi oli no stap mekem?
Ol wei blong God oli defren long ol wei blong wol.
Lod i bin askem Gideon blong mekem ol samting we maet hem i no andastanem long tetaem ia. ?Wanem nao i givim insperesen long yu abaot stori ia? ?Olsem wanem nao yu filim se insperesen ia i save blesem laef blong ol pikinini we yu tijim?
Samfala Aktiviti we Yu Save Mekem
-
Askem ol pikinini blong pikjarem se oli nidim blong karem tugeta wan ami blong go long wan faet. ?Hamas pipol nao bae oli wantem blong stap long ami blong olgeta? Yusum Jajes 7:4–7, mo invaetem ol pikinini blong aktem olsem wanem Lod i helpem Gideon blong jusum ami ia we bae i mekem Isrel i go fri long Ol Man Midian. ?From wanem Lod i wantem ami blong Gideon blong i wan smol ami nomo? (luk long Jajes 7:2). ?From wanem blong stap folem wanem we Lod i komandem i bin had long Gideon mo ami blong hem? Invaetem ol pikinini blong serem ol eksperiens blong taem we oli bin lanem blong trastem Lod nomata se, blong mekem samting ia, i bin had.
-
Invaetem ol pikinini blong droem ol pikja blong wan naef blong faet, wan aean sil, wan pupu, wan laet, mo bigfala graonpot blong kasem wota. Askem ol pikinini se wijwan long ol tul ia bae oli wantem tekem wetem olgeta i go long faet. Invaetem olgeta blong ridim Jajes 7:16 blong lanem wanem nao ol ami blong Gideon oli bin karem wetem olgeta. ?From wanem i mas tekem strong paoa long tingting blong mekem hemia? Ridim tugeta Jajes 7:19–21 blong lanem olsem wanem ol ami oli yusum ol pupu mo ol bigfala graonpot blong winim Ol Man Midian long taem blong faet. ?Wanem nao yumi lanem abaot Lod aot long stori ia?
Stap Leftemap Tingting blong Lanem Samting long Hom
Invaetem ol pikinini blong serem wetem wan memba blong famli, wan samting we oli bin lanem tedei we i mekem olgeta i wantem blong obei ol komanmen.
Stap Kam Antap long Fasin blong Yumi blong Stap Tij
Stretem ol aktiviti folem ol nid we i stap. No tekem se ol aotlaen ia oli ol instraksen we yu mas folem. Be, yusum olgeta olsem wan ples blong kasem sam aedia blong givim laet long insperesen blong yuwan taem yu stap tingting hevi long ol nid blong ol pikinini we yu stap tijim. Eksampol: long sam situesen, maet bae yu filim insperesen blong stretem wan aktiviti blong ol smol pikinini blong tijim i go long ol pikinini we oli moa bigwan, o nara wei raon.