Whither Thou Goest, i kam long Sandy Freckleton Gagon

6–12 Jun

Rut; 1 Samuel 1–3

“!Hae God! Yu Yu Mekem Tingting blong Mi I Glad We I Glad!”

Taem yu ridim Rut mo 1 Samuel 1–3, askem Papa long Heven olsem wanem yu save helpem ol pikinini blong lanem aot long ol trutok insaed long ol japta ia. Raetemdaon ol filing mo tingting we yu kasem.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Askem ol pikinini blong serem wanem oli save abaot Rut, Naomi, Hana o Samuel. Hem i save helpem olgeta bigwan blong soem ol pikja long olgeta olsem olgeta ia long aotlaen blong wik ia insaed long Kam Folem Mi—Blong Wanwan Man Woman mo Famli.

Tijim Doktrin: Ol Smol Pikinini

Rut

Mi save soem lav mo fasin blong stap kaen long olgeta raon long mi.

Taem hasban blong Rut i ded, hem i save stap nomo long kantri blong hem, be hem i jusum blong go wetem mama blong hasban blong hem, Nomi, mo kea long hem. Tingting long olsem wanem eksampol blong Rut blong gat ol fasin olsem hemia blong Kraes i save givim insperesen long ol pikinini we yu tijim blong oli stap kaen long olgeta raon long olgeta.

Samfala Aktiviti we Yu Save Mekem

• Invaetem ol pikinini blong ripresentem Nomi, Rut, Boas o ol narafala man insaed long stori taem yu stap talem stori blong olgeta long Buk blong Rut (luk tu long “Rut mo Nomi” insaed long Ol Stori long OlTesteman). Invaetem ol pikinini blong leftemap han blong olgeta evri taem oli harem wan fasin blong stap kaen insaed long stori. ?Olsem wanem nao yumi filim taem ol pipol oli stap kaen long yumi? ?Olsem wanem nao yumi filim taem yumi stap kaen long ol narafala man?

• Singsing tugeta wan singsing abaot fasin blong stap kaen, olsem: “Kindness Begins with Me” (Children’s Songbook, 145). Helpem ol pikinini blong tingting long ol wei we oli save stap kaen long ol famli mo ol fren blong olgeta. Sapos oli nidim help, soem ol pikja blong ol pipol we oli stap soem fasin blong stap kaen. Blong evri aedia we oli talem, letem ol pikinini oli droem wan hat long bod.

1 Samuel 1:1–18

Papa long Heven i harem mo ansarem ol prea blong mi.

Taem we Hana i stap harem nogud from se hem i no save gat pikinini, hem i tanem hem i go long Lod wetem fet mo Hem i ansarem prea blong hem. Helpem ol pikinini blong oli save luksave se oli save prea long Papa long Heven, speseli taem oli harem nogud.

Samfala Aktiviti we Yu Save Mekem

• Long ol toktok blong yuwan, talem long ol pikinini from wanem Hana i bin harem nogud (luk long 1 Samuel 1:2–8; luk tu long “Hana” insaed Ol Stori blong OlTesteman). ?Wanem nao yumi save mekem taem yumi harem nogud? Ridim long ol pikinini 1 Samuel 1:10, mo askem ol pikinini blong lisin long wanem we Hana i bin mekem. Askem ol pikinini olsem wanem nao oli filim taem oli prea. Ridim long ves 18 blong eksplenem se, afta long prea blong hem, Hana i “nomo bin harem nogud.”

  

  Mi Bin Prea From Pikinini Ia i kam long Elspeth Young

• Yusum aktiviti pej blong wik ia blong tijim ol pikinini se oli save prea long Papa long Heven mo bae Hem i helpem olgeta. Taem we oli pikinini oli stap kala, singsing o plei wan singsing we oli rekodem abaot prea olsem: “A Child’s Prayer” (Children’s Songbook, 12–13).

1 Samuel 2:1–10

Lod i bin mekem plante naesfala samting blong mi.

Hana i bin soem fasin blong talem tangkyu long Lod wetem wan naesfala poem blong presem Lod. Eksampol blong hem i save helpem ol pikinini blong tingbaot plante samting we oli save talem tangkyu from long Papa long Heven.

Samfala Aktiviti we Yu Save Mekem

• Ridim long ol pikinini sam samting we Hana i bin talem afta we Lod i bin blesem hem wetem wan boe (luk long 1 Samuel 2:1–2). Serem, wetem ol pikinini, wan blesing we yu bin kasem long Lod, mo i mekem yu bin filim olsem wanem. Afta, invaetem ol pikinini blong tokbaot ol blesing we Lod i bin givim long olgeta. ?Olsem wanem nao yumi save soem fasin blong talem tangkyu long Hem?

• Singsing wan singsing tugeta we i tokbaot ol blesing we Lod i givim long yumi olsem: “My Heavenly Father Loves Me” (Children’s Songbook, 228–29). Invaetem ol pikinini blong droem ol pikja blong ol blesing we oli bin kasem long Lod.

Stap Tijim Doktrin: Ol Bigfala Pikinini

Rut

Mi save gat fet long Lod.

Rut i bin mekem ol sakrifaes blong stap fetful long Lod, mo stap tru long Nomi. ?Olsem wanem nao yu save helpem ol pikinini blong lanem samting aot long aksen blong fet we Rut i bin gat?

Samfala Aktiviti we Yu Save Mekem

• Soem wan pikja blong Rut mo Nomi (luk long aotlaen blong wik ia we i stap long Kam Folem Mi—Blong Wanwan Man, Woman mo Famli). Afta raetem trifala heding long bod: Ol Tes, Ol Aksen, Ol Blesing. Invaetem ol pikinini blong ridim Rut 1:3–5, 8, 16; 2:1–3, 8–12; 4:13–17, mo raetem andanit long ol heding ia wanem we oli faenem long ol ves ia. ?Olsem wanem nao Rut i soem fet blong hem long Lod? Serem wan eksperiens long hao yu bin kasem blesing mo letem wanwan pikinini oli serem ol eksperiens blong olgeta.

• Singsing tugeta wan singsing abaot fet, olsem: “The Lord Is My Light” (Hymns, namba 89) o “Faith” (Children’s Songbook, 96–97). ?Wanem nao singsing ia i tijim yumi blong stap trastem Lod? ?Olsem wanem nao yumi save gat fet long Jisas Kraes iven long ol hadtaem?

1 Samuel 1

Papa long Heven i harem mo ansarem ol prea blong mi.

Taem we Hana “ i bin stap long bigfala konkon we i kam long sol blong hem,” hem i tanem hem i go long Papa long Heven tru long prea (1 Samuel 1:10). ?Olsem wanem nao yu save leftemap tingting blong ol pikinini we yu tijim blong oli mekem semmak?

Samfala Aktiviti we Yu Save Mekem

• Blong helpem ol pikinini lanem abaot Hana aot long 1 Samuel 1, givim sam ves long wanwan pikinini blong ridim aot long japta (o soem vidio “Hannah’s Faith,” ChurchofJesusChrist.org). Afta hemia, sakem wan balong o wan samting i go long wan pikinini mo invaetem hem blong talem pat blong stori bifo balong i pas i go long nekis pikinini blong talem narafala pat blong stori. Taem we stori i finis, askem ol pikinini blong serem wanem oli bin lanem aot long eksampol blong Hana.

• Ridim tugeta 1 Samuel 1:15, mo toktok raon long wanem i minim blong poremaot sol blong yumi long Lod. Mekem wan lis wetem ol pikinini blong ol samting we yumi save tokbaot wetem God taem yumi prea. Singsing tugeta wan singsing abaot prea olsem: “A Child’s Prayer” (Children’s Songbook, 12–13). Testifae abaot lav blong God we Hem i gat long evri pikinini blong Hem mo wanem we hat blong Hem i wantem i blong harem mo ansarem ol prea blong olgeta.

• Askem ol pikinini blong raetem wan lis (olgeta wanwan o long ol grup) eksampol blong ol pipol long ol skripja we oli prea i go long Papa long Heven. (Sapos oli nidim help, yu save soem long olgeta skripja ia Luk 22:41–43; Inos 1:2–6; Josef Smith—Histri 1:14–17.) Askem olgeta blong serem wanem we oli lanem aot long ol stori ia.

1 Samuel 3:1–10

Mi save harem mo obei long voes blong Lod.

Taem Samuel i bin wan yangfala boe, hem i bin harem voes blong Lod be i no bin harem save long fastaem. ?Olsem wanem nao yu save helpem ol pikinini we yu tijim, oli save harem mo tekem aksen folem kwaet voes blong Tabu Spirit we oli kasem?

Samfala Aktiviti we Yu Save Mekem

• Invaetem wan pikinini blong mekem olsem se hem i Samuel mo wan narawan blong i mekem olsem se hem i Ilae taem yu stap ridim 1 Samuel 3:1–10 (o soem vidio “Samuel mo Eli,” ChurchofJesusChrist.org). ?Wanem nao yumi lanem aot long Samuel abaot taem we hem i lisin long long voes blong Lod? ?Olsem wanem nao yumi soem se yumi wantem blong lisin taem we Lod i toktok long yumi?

• Invaetem ol pikinini blong tingting long olsem wanem nao bae oli eksplenem long wan narafala man, olsem wanem Lod i toktok long olgeta. Invaetem olgeta blong lukaotem ol ansa long wan o plante skripja ia we i stap ia: Doktrin mo Ol Kavenan 6:22–23; 8:2–3; 9:7–9.

Stap Leftemap Tingting blong Lanem Samting long Hom

Leftemap tingting blong ol pikinini blong tingting long wan man o wan samting we oli save prea from long wik ia. Givim, long olgeta, ol janis we bae oli stap kam blong serem olsem wanem Papa long Heven i bin ansarem ol prea blong olgeta.

Kam Antap long Fasin blong Yumi blong Stap Tij

Ol pikinini we oli disebol. Plis visitim disability.ChurchofJesusChrist.org blong faenemaot olsem wanem yu save lukluk moa gud long ol nid blong ol pikinini we oli disebol.