“6–12 Jun. Rut; 1 Samuel 1–3: !Hae God! Yu Yu Mekem Tingting blong Mi I Glad We I Glad’” Kam Folem Mi—Blong Wanwan Man, Woman mo Famli: OlTesteman 2022 (2021)
“6–12 Jun. Rut; 1 Samuel 1–3,” Kam Folem Mi—Blong Wanwan Man, Woman mo Famli: 2022
Wea Ples Bae Yu Go, i kam long Sandy Freckleton Gagon
Jun 6–12
Rut; 1 Samuel 1–3
“!Hae God! Yu Yu Mekem Tingting blong Mi I Glad We I Glad!”
Taem yu stap stadi long laef blong Rut, Nomi, Hana, mo ol narafalawan long wik ia, lisin gud long Spirit mo raetemdaon ol filing mo tingting we yu kasem. ?Wanem insperesen yu kasem blong go mekem?
Raetemdaon Ol Filing mo Tingting blong Yu
Samtaem yumi pikjarem laef blong yumi se yumi mas folem klia rod ia stat long stat go kasem en. Rod bitwin tufala dot ia i wan stret laen,wan taem. Be yet samtaem i gat fulap blong pusumbak mo tantanem raon we i tekem yumi go long ol daereksen we yumi ting se bae yumi no go long hem. Bae yumi faenem se ol laef blong yumi i defren smol long hemia we bae yumi ting se i olsem.
Rut mo Hana tufala i andastanem hemia. Rut hem i no wan woman blong Isrel, be hem i maredem wan, mo taem we man blong hem i ded, hem i gat wan joes blong mekem. ?Bae hem i gobak long famli blong hem mo olfala laef blong hem, o bae bae hem i kam blong lavem fet blong Ol Man Isrel ia mo niufala haos blong hem wetem mama blong man blong hem? (Luk long Rut 1:4–18). Plan blong Hana long laef blong hem i blong gat pikinini, mo from se hem i no save gat pikinini i mekem hem “harem nogud” (luk long 1 Samuel 1:1–10). Taem yu stap rid abaot Rut mo Hana, tingting long fet we oli gat blong oli putum laef blong olgeta long han blong Lod mo travel long rod we oli no save wea ples oli stap go long hem. Afta, yu maet tingbaot rod blong yuwan. Bae hem i defren long hemia blong Rut mo Hana—mo blong eniwan. Be truaot long ol hadtaem mo ol sapraes bitwin ples ia mo rod we bae yu go long hem we bae i no save finis, yu save lanem blong talem wetem Hana, “!Yu Yu mekem tingting blong mi i glad we i glad” (1 Samuel 2:1).
Blong wan bigfala lukluk long buk blong Rut and 1 Samuel, luk long “Ruth” mo “Samuel, books of” long Bible Dictionary.
Ol Aedia blong Skripja Stadi blong Yuwan
Kraes bae i save helpem yumi taem yumi fesem ol hadtaem.
Taem we man blong Rut i ded, hadtaem ia we hem i fesem i moa nogud bitim blong wan wido blong tedei i fesem. Long kalja blong Ol Man Isrel long taem ia, wan woman we i no gat man o boe oli no gat raet long wan propeti, mo i no gat wan wei blong oli save mekem mane. Taem yu stap ridim stori blong Rut, luk olsem wanem Lod i mekem ol hadtaem ia oli kam ol bigfala blesing. ?Wanem nao yu luk save long Rut we i bin helpem hem? ?Wanem nao rol blong Boas blong i pemaot Rut long situesen we hem i stap long hem? (Luk long Rut 4:4–7). ?Wanem fasin nao olsem hemia blong Kraes, we yu yu luk long tugeta Rut mo Boas?
Mi save trastem Papa long Heven blong i lidim mo helpem mi long eni situesen we mi gat.
?Yu save luk yuwan bakegen insaed long ol stori blong Rut, Nomi, mo Hana? Ating yu safa bigwan from yu lusum wan, semmak olsem Rut mo Nomi (luk long Rut 1:1–5). O mebi, olsem Hana, yu wantem wan blesing we yu no kasem yet (luk long 1 Samuel 1:1–10). Tingting hevi long ol mesej we yu lanem long ol eksampol blong ol fetful woman ia. ?Olsem wanem nao Rut mo Hana i soem fet blong tufala long God? ?Wanem blesing nao oli bin kasem? ?Olsem wanem nao yu save folem eksampol blong olgeta? Tingting long olsem wanem nao yu save “kam blong trastem” Lod (Rut 2:12) iven sapos laef i had tumas.
Luk tu long Reyna I. Aburto, “!Tru long Klaod mo San I Saen, Lod, Stap Wetem Mi!” Liahona, Nov. 2019, 57–60.
Mi Prea From Pikinini Ia, i kam long Elspeth Young
Hat blong mi i save glad wetem Lod.
Afta we Hana i tekem yangfala Samuel i go long tempol, hem i talem ol naes toktok i go long Lod, oli raetem long 1 Samuel 2:1–10. Ol toktok ia gat moa paoa taem yu tingting long hemia blong bifo, “hem i stap harem nogud yet, i stap krae” (1 Samuel 1:10). Taem yu stap stadi ves ia, ?wanem mesej nao yu faenemaot blong i save leftemap ol filing blong yu blong givim pres mo tangkyu i go long Lod? Ating singsing blong Hana bae i givim yu insperesen long olsem wanem yu save mekem wan gudfala plan blong talem tangkyu i go long Lod—wan singsing, wan peinting, givim seves, o eni samting we i mekem yu storian long Hem ol filing blong yu.
I tru, i no evri strong prea bae oli ansarem olsem hemia we oli ansarem blong Hana. ?Wanem nao yu faenem long mesej blong Presiden Dieter F. Uchtdorf “Grateful in Any Circumstances” i save helpem yu taem ol prea blong yu oli no ansarem long wei we yu wantem? (Liahona, May 2014, 70–77).
Mi save harem mo obei voes blong Lod.
Olsem yumi evriwan, Samuel i mas lanem olsem wanem blong luksave voes blong Lod. Taem yu stap stadi long 1 Samuel 3,?wanem nao yu lanem long yangfala boe ia abaot blong stap harem mo obei voes blong Lod? ?Wanem nao ol eksperiens yu bin gat wetem blong harem Voes blong Hem? ?Wanem janis yu gat, olsem Ilae,i helpem ol narafala wan blong luksave wetaem God i stap toktok long olgeta? (Luk long 1 Samuel 3:7).
Luk tu long Jon 14:14–21; David P. Homer, “Stap Harem Voes blong Hem,” Liahona, Mei 2019, 41–43.
Ol Aedia blong Famli Skripja Stadi mo Haos Naet
-
Rut 1:16–18; 2:5–8, 11–12.Famli blong yu save lukaotem ol eksampol blong fasin blong stap kaen mo stap tru long ol ves ia. ?Olsem wanem nao yumi save soem kaen fasin long famli blong yumi mo ol narawan mo stap tru long Jisas Kraes? Japta blong “Rut mo Nomi” (long Ol Stori long OlTesteman) i save helpem famli blong yu i lanem abaot eksampol blong Rut.
-
1 Samuel 1:15.Mebi, yu save kapsaetem wan samting aot long kontena blong helpem wan memba blong famli i luk wanem Hana i minim taem hem i talem “Mi … prea long Hae God ya” ?From wanem hemia i wan gud wei blong tokbaot olsem wanem nao prea blong yumi bae i mas olsem? ?Olsem wanem nao yumi save mekem ol prea blong yumiwan mo ol famli prea blong yumi oli kam moa gud?
-
1 Samuel 2:1–10.Poem blong Hana blong i presem God bae i save lidim tingting blong yu blong tingbaot ol singsing we yumi yusum blong presem God. Yufala i save singsing sam singsing tugeta. Ol memba blong famli maet bae oli tingbaot wan narafala wei we oli save soem ol filing blong olgeta blong Jisas Kraes. Eksampol, oli save yusum ol pikja we i soem lav blong olgeta long Sevya.
-
1 Samuel 3:1–11.Bae i wan hapi samting we yumi aktem stori blong Lod we i stap singaotem Samuel, o famli blong yu i save wajem vidio ia “Samuel and Eli” (ChurchofJesusChrist.org). Ol memba blong famli oli save tokbaot ol taem we oli filim se Lod i stap toktok long olgeta mo olsem wanem oli tekem aksen folem ol toktok blong Hem.
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Wan Singsing: “There Is Sunshine in My Soul Today,” Hymns, no. 227.
Stap Kam Antap long Stadi blong Yuwan
Letem Spirit i lidim yu long stadi blong yu. Prea se tabu Spirit bae i lidim yu i go long samting we yu nidim blong lanem. Stap lisingud long ol kwaet toktok blong Hem, iven sapos i lidim yu i go blong ridim wan topik we yu no tingting nating o blong stadi long hem long wan defren wei.
Pikja blong Samuel i harem Lod, i kam long Sam Lawlor