“30 Mei–5 Jun. Jajes 2–4; 6–8; 13–16: ‘Hae God I Jusumaot Wan blong Tekemaot Olgeta long Han blong King,’” Kam Folem Mi—Blong Wanwan Man, Woman mo Famli: OlTesteman 2022 (2021)
“30 Mei–5 Jun. Jajes 2–4; 6–8; 13–16,” Kam Folem Mi—Blong Wanwan Man, Woman mo Famli: 2022
Pikja droing blong Debora we i lidim ol ami blong Isrel, © Lifeway Collection/licensed from goodsalt.com
30 Mei–5 Jun
Jajes 2–4; 6–8; 13–16
“Hae God I Jusumaot Wan blong Tekemaot Olgeta long Han blong King”
Ol skripja oli testifae abaot Jisas Kraes. Tingting hevi long hao nao ol stori we yu ridim long Jajes oli save helpem yu blong kam moa kolosap long Hem.
Raetemdaon Ol Filing mo Tingting blong Yu
Yumi evriwan i save se i olsem wanem taem yumi mekem wan mistek, yumi harem nogud from, mo afta sakem sin mo mekem strong tingting blong jenisim ol fasin blong yumi. Be samtaem, yumi foget blong jenisim fasin blong yumi blong bifo, mo, taem yumi fesem temtesen, yumi faenem se yumi stap mekem sem mistek ia bakegen. Paten ia i soemaot ol eksperiens we Ol Man Isrel oli stap gotru long hem we oli tokbaot long Buk blong Jajes. Ol bilif mo wosip praktis blong Ol Man Kenan—we oli ronemaot olgeta long graon blong olgeta—i mekem Ol Man Isrel oli brekem kavenan blong olgeta we oli mekem wetem Lod mo oli tanem baksaed blong olgeta long Hem blong no wosipim Hem. From hemia, oli lusum proteksen blong Hem mo oli kam ol prisena. Mo evri taem hemia i hapen, Lod i givim janis long olgeta blong sakem sin mo i jusum wan blong tekemaot olgeta long han blong king, wan lida blong militeri we oli singaotem “jaj.” I no evri jaj long Buk blong Jajes we oli man we oli gat stret mo gud fasin, be sam long olgeta i soemaot bigfala fet blong mekem ol pikinini blong Isrel oli kasem fri, mo putumbak ol kavenan rilesensip blong olgeta wetem Lod. Ol stori ia, oli rimaenem yumi se nomata wanem i lidim yumi longwe long Jisas Kraes, Hem i Ridima blong Isrel mo oltaem bae Hem i wantem blong mekem yumi kam fri mo welkamem yumi i gobak long Hem.
Blong gat wan bigfala lukluk long Buk blong Jajes, luk long “Judges, book of” insaed long Bible Dictionary.
Ol Aedia blong Skripja Stadi blong Yuwan
Lod i wantem mekem mi kam fri, taem mi lusum rod.
Buk blong Jajes i stap blong givim woning long yumi, iven afta we mi eksperiensem paoa blong Lod long ol laef blong yumi, oltaem hem i posibol blong yumi lusum rod. Buk ia i save leftemap tingting blong olgeta we oli lusum rod, from Lod i givim wan rod blong tekembak evriwan. Eksampol, taem yu stap rid long Jajes 2:1–19, lukaotem ol samting we Ol Man Isrel oli mekem blong oli nomo folem Lod mo olsem wanem nao Lod i bin tekemaot olgeta. ?Wanem nao ol ves ia oli stap tijim yumi abaot Lod? ?Olsem wanem nao yumi save gogohed blong stap moa fetful long Hem?
Bae yu fanem wan paten blong fasin blong go agens, harem nogud, mo kam fri we oli gohed blong ripitim truaot long Buk blong Jajes (speseli luk long ol japta 3, 4, 6, mo 13). Taem yu stap rid long Buk blong Jajes, tingting hevi long wanem ol jaj oli mekem blong mekem Isrel i kam fri, mo olsem wanem Sevya i helpem yu taem yu nidim blong kam fri.
Wan gudfala eksampol blong wan man we i help blong mekem Isrel i kam fri i Debora. Ridim abaot hem long Jajes 4:1–16, mo teknot long paoa blong hem we hem i gat long ol pipol raon long hem. ?Wanem ol toktok o aksen blong Debora i soem yu se hem i gat fet long Lod? Wanem nao yu filim Debora i minim long kwestin blong hem long ves 14: “Hae God i stap go fastaem long yufala i lidim yufala.”
Luk tu long Alma 7:13; Doktrin mo Ol Kavenan 84:87–88.
?Huia i Bal mo Astate?
Bal hem i wan Kenan god blong hariken, mo Astate hem i wan Kenan god blong mekem graon i karem frut. Wosip blong tufala god ia i soem hamas impoten blong gat wan graon mo wan pipol we i save tekem frut, hemia long Ol Man Kenan. Ol wei we ol pipol oli wosipim olgeta ia mo ol narafala god we oli no tru—we samtaem i tekem tu fasin blong no stap klin long saed blong seks mo sakrifaes blong ol pikinini—oli ol samting we Lod i no glad nating long hem.
Lod bambae i save mekem ol merikel taem yumi trastem ol wei blong Hem.
Blong kasem ol merikel blong Lod long ol laef blong yumi, yumi mas traem blong trastem ol wei blong Hem, iven sapos ol wei blong Hem oli defren smol. Stori blong Gidion, we oli faenem long Jajes 6–8, i wan gud eksampol blong hemia. ?Olsem wanem nao Lod i wokem wan merikel taem ami blong Gideon i winim ol man blong Midian? ?Wanem nao yu filim we Lod i stap traem blong tijim yu? ?Hao nao yu bin luk Lod i mekem wok blong Hem long ol wei yu no save pikjarem?
Luk tu long Russell M. Nelson, “With God Nothing Shall Be Impossible,” Ensign, May 1988, 33–35.
Strong paoa i kam taem mi fetful long ol kavenan blong mi wetem God.
Samson i lusum tugeta ,paoa long saed blong bodi mo long saed blong spirit blong hem from se hem i brekem kavenan blong hem wetem God, wetem ol kavenan ia we oli speseli blong Ol Man Nasaret (blong moa infomesen abaot Ol Man Nasaret, luk long Namba 6:1–6; Jajes 13:7). Taem yu stap ridim stori blong Samson long Jajes 13–16, tingting hevi long wanwan kavenan yu bin mekem. ?Olsem wanem yu bin kasem blesing blong kasem moa paoa from we yu stap kipim ol kavenan ia? ?Wanem nao yu bin lanem long stori blong Samson we i givim yu insperesen blong stap tru long ol kavenan blong yu wetem God?
Samson I Brekemdaon Ol Bigfala Pos, i kam long James Tissot ol narawan
Ol Aedia blong Famli Skripja Stadi mo Haos Naet
-
Jajes 2:10.Afta we Josua i ded, ol nekis jeneresen blong Ol Man Isrel “oli nomo tingbaot Hae God.” Toktok wetem famli blong yu abaot olsem wanem oli save Lod mo “ol bigbigfala samting ya we hem i mekem” blong olgeta. ?Hao nao bae yu mekem sua se save bae oli holemtaet blong fiuja jeneresen?
-
Jajes 3:7–10.Ol ves ia i tokbaot sot wan paten we i hapen truaot long Buk blong Jajes. Taem yu mo ol memba blong famli blong yu i ridim ol ves ia, oli save talem wanem Isrel i bin mekem blong oli no folem stret rod mo wanem Lod i bin mekem blong mekem olgeta oli kam fri. ?Wanem nao bae i lidim yu blong save fogetem Lod? ?Hao nao bae Hem i mekem yu fri? ?Hao nao bae yumi save blong gogohed moa blong stap fetful long Hem?
-
Jajes 6:13–16, 25–30.Gidion i soem strong tingting ia blong obei long Lod, iven ol aksen blong hem oli no save gud long hem. ?Wanem nao Lod i stap askem yumi blong mekem we sam man oli no agri long hem? ?Olsem wanem nao ol toktok blong Gideon long ol ves 13–16 i givim yumi insperesen blong mekem wan samting we i raet?
-
Jajes 7.?Yu save mekem wan rolplei o wan narafala aktiviti blong save helpem famli blong yu long eksperiens blong ami blong Gidion we oli tokabaot long japta ia? Olsem wanem nao ol toktok blong Lod long japta ia (luk long, eksampol, ves 2 mo 15) yumi save yusum long laef blong yumi?
-
Jajes 13:5.Kavenan blong Samson wetem Lod i givim hem paoa, olsem we kavenan blong yumi i givim paoa long yumi. Famli blong yu i maet glad blong mekem eksasaes mo tokbaot olsem wanem ol eksasaes ia oli save helpem yumi blong yumi strong. ?Wanem yumi save mekem blong help blong yumi kam moa strong long saed blong spirit? Blong sam aedia, ol memba blong famli oli save ridim Mosaea 18:8–10; Doktrin mo Ol Kavenan 20:77, 79. ?Olsem wanem nao taem yumi kipim ol kavenan blong yumi i givim yumi moa paoa long saed blong spirit?
Blong gat moa aedia blong stap tijim ol pikinini, luk long aotlaen blong wik ia insaed long Kam Folem Mi—Blong Praemeri.
Wan singsing: “Ridima blong Isrel,” STSP, pej 5.
Stap Kam Antap long Stadi blong Yuwan
Tekem aksen folem wanem yu lanem. Taem yu stap stadi, askem yuwan olsem wanem nao yu save yusum wanem yu lanem, mo komitim yuwan blong go mo mekem. Letem Spirit i lidim yu. (Luk long Teaching in the Savior’s Way, 35.)
Ami blong Gidion, i kam long Daniel A. Lewis