“20–26 Jun. 2 Samuel 5–7; 11–12; 1 King 3; 8; 11: ‘Hem i Gat Paoa blong Win long Faet,’” Kam Folem Mi—Blong Wanwan Man, Woman mo Famli: OlTesteman 2022 (2021)
“20–26 Jun. 2 Samuel 5–7; 11–12; 1 King 3; 8; 11,” Kam Folem Mi—Blong Wanwan Man, Woman mo Famli: 2022
King Deved I Sidaon long Jea blong King i kam long Jerry Miles Harston
20–26 Jun
2 Samuel 5–7; 11–12; 1 King 3; 8; 11
“Kingdom blong Yu I Stap Oltaem, Gogo I No Save Finis”
“Olgeta tok blong Baebol oli kamaot long God fastaem. Hem i putum long tingting blong ol man ia bifo nao oli raetem long buk. Ol tok ya i stret gud blong tijim yumi long ol trutok, mo blong blokem ol krangke tok. Mo i stret gud blong stretem ol krangke fasin” (2 Timoti 3:16).
Raetemdaon Ol Filing mo Tingting blong Yu
Rul blong King Deved i stat wetem plante promes. Fet blong hem we i no slak, we i winim Golaeat, i wan fet we bae oli tingabaot oltaem. Olsem wan king, hem i sevem Jerusalem olsem kapitol blong hem mo mekem Isrel i kam wan (luk long 2 Samuel 5). Kingdom ia i kam moa strong. Be yet Deved i foldaon long temtesen mo lusum paoa blong hem long saed blong spirit.
Rul blong pikinini boe blong Deved Solomon i semmak tu i stat wetem plante promes. Tabu save blong hem mo fasin blong save luk samting oli save gud long hem. Olsem king, hem i mekem boda blong Isrel i go moa bigwan mo bildim wan naesfala tempol blong Lod. Kingdom ia i kam moa strong. Be yet Solomon i folem tingting blong hat blong hem blong tanem hem i go long narafala god.
?Wanem nao yumi lanem aot long ol trabol stori ia? Ating wan lesen hem i we i nomata long ol pas eksperiens blong yumi, ol paoa blong yumi long saed blong spirit i dipen long ol joes we yumi mekem tedei. Yumi save luk tu long ol stori ia se i no paoa blong yumiwan o strong tingting o save blong yumi bae i sevem yumi—hem i Lod. Ol stori ia oli soem se tru hop blong Isrel—mo blong yumi—i no stap long Deved, Solomon, o eni king blong wol ia, be long wan narafala wan “pikinini boe blong Deved”: Jisas Kraes (Matiu 1:1), King We I No Save Finis we bae i “fogivim sin blong [ol pipol blong Hem]” sapos yumi “kambak long [Hem]” (1 King 8:33–34).
Blong ridim wan bigfala lukluk long buk blong 2 Samuel mo 1 King, luk long “Samuel, books of” mo “King, books of” long Bible Dictionary.
Ol Aedia blong Skripja Stadi blong Yuwan
Lod i save givim mi daereksen.
Taem Deved i save mekem Isrel i kam tugeta ( luk long 2 Samuel 5: 1–5), hem mas difendem ol pipol blong Filistia. Taem yu stap rid long 2 Samuel 5:17–25, tingting long olsem wanem eksampol blong Deved i save helpem yu long ol jalenj we yu fesem (luk tu long 1 Samuel 23:2, 10–11; 30:8; 2 Samuel 2:1). ?Hao nao yu stap lukaotem daereksen blong Lod long laef blong yu? ?Olsem wanem nao yu bin kasem blesing taem yu stap tekem aksen long revelesen we yu bin kasem?
Luk tu long 1 Kronikel 12; Richard G. Scott, “How to Obtain Revelation and Inspiration for Your Personal Life,” Liahona, May 2012, 45–47.
?Wanem “haos” nao Lod i promesem long Deved?
Taem we Deved i talem se bae hem i bildim wan haos, we i wan tempol, blong Lod (Luk 2 Samuel 7: 1–3), Lod i ansa se pikinini boe blong Deved bae i bildim haos ia (luk long ol ves ia 12–15; luk tu long 1 Kronikel 17:1–15). Lod i talem tu se bae Hem tu bae i bildim wan “haos” blong Deved, minim ol laen, mo se jea blong king blong hem bae i stap foreva ( luk long 2 Samuel 7:11, 16, 25–29; Sam 89:3–4, 35–37). Promes ia Jisas Kraes i fulfilim, King blong yumi we I No Save Finis, we i wan laen blong Deved (luk long Matiu 1:1; Luk 1:32–33; Jon 18:33–37).
Oltaem mi sud waj aot long sin.
Deved we i stap fetful long Lod long bifo i no mekem hem i faet agensem temtesen taem we “hem i wekap, i go antap long ruf long haos blong hem” mo “hem i luk wan woman i stap swim long haos blong hem” (2 Samuel 11:2). Tingting long ol lesen we yu save lanem long eksperiens blong hem. Ol kwestin olsem oli save help lidim yu taem yu stap stadi long stori ia:
-
?Wanem ol joes nao Deved i bin mekem we i lidim hem blong folem rod blong sin? ?Wanem ol raet joes we hem i sud mekem?
-
?Olsem wanem nao enemi bae i traem long lidim yu go long rod blong mekem sin long laef blong yuwan? ?Wanem ol joes yu save mekem naoia blong gobak long sef rod?
Luk tu long 2 Nifae 28:20–24; “To Look Upon” (vidio), churchofJesusChrist.org.
Presen blong fasin blong luksave samting i helpem mi save samting we i raet mo i rong.
Sapos Lod i askem yu, “Yu askem wanem yu wantem blong Mi givim long yu” (1 King 3:5), ?bae yu askem wanem? ?Wanem nao i tajem yu abaot rikwes blong Solomon? Tingting hevi from wanem “wan hat we i save andastanem” blong “luksave wanem i gud mo nogud” (ves 9) hem i wan presen we i gat valiu. ?Wanem nao yu save mekem blong lukaotem presen ia?
Luk tu long 2 Kronikel 1; Moronae 7:12–19; David A. Bednar, “Quick to Observe,” Ensign, Dec. 2006, 30–36.
Tempol hem i haos blong Lod.
Plante handred yia, tabenakol we Moses i bildim i ripresentem ples we God i stap long hem. Iven we Deved i wantem blong bildim wan ples blong God we i stap blong oltaem, be God i jusum boe blong Deved Solomon blong bildim tempol blong Lod. Taem yu ridim prea blong Solomon mo ol toktok we hem i talem long ol pipol blong hem taem hem i finis blong bildim tempol, luk olsem wanem hao hem i filim abaot Lod mo haos blong Hem. Yu save mekem wan lis blong ol blesing blong Solomon we hem i bin askem long prea blong hem. ?Wanem nao yu luk save abaot ol blesing ia? ?Hao nao yu gat blesing from haos blong Lod i stap long dei blong yumi tedei?
Luk tu long 2 Kronikel 6.
Barankuila Kolombia Tempol
Ol Aedia blong Famli Skripja Stadi mo Haos Naet
-
2 Samuel 5:19, 23.?Wetaem yumi “askem Lod” blong i gaedem mo givim daereksen long yumi? ?Olsem wanem nao Hem i ansarem yumi?
-
2 Samuel 7:16.Taem we Lod i talem long Deved: “Kingdom blong yu i stap oltaem gogo i no save finis,” Hem i stap tokbaot fiuja king ia long famli blong Deved we bae i rul blong oltaem: Jisas Kraes. Ating ol memba blong famli blong yu oli wantem mekem ol hat blong king long sem taem we oli stap tokbaot from wanem yufala i glad se Jisas Kraes i King blong yufala we I No Save Finis.
-
2 Samuel 11.Sapos yufala i ridim abaot ol sin blong Deved, maet bae i wan gudfala janis blong toktok raon long ol denja blong ponografi, ol rabis tingting, mo fasin blong no stap klin long seks. Ol risos ia bae oli save helpem yu long storian blong yu: Oktoba 2019 namba blong Liahona, we Jos i stap Tokbaot ol risos blong Ponografi (ChurchofJesusChrist.org/addressing-pornography), mo ol vidio “What Should I Do When I See Pornography?” mo “Watch Your Steps” (ChurchofJesusChrist.org). Ol nara memba blong famli oli save mekem wan plan abaot wanem nao oli sud mekem taem oli luk ponografi.
-
1 King 11:9–11.?Wanem nao sam “narafala god” (ves 10) we oli save tanem blong yumi i go longwe long Lod? ?Olsem wanem nao yumi save kipim hat blong yumi i lukluk nomo long Papa long Heven mo Jisas Kraes?
Blong gat moa tingting blong tijim ol pikinini, luk long aotlaen blong wik ia long Kam Folem Mi—Blong Praemeri.
Luk long “More Holiness Give Me,” Hymns, no. 131.
Stap Kam Antap long Fasin blong Yumi blong Stap Tij
Lukluk nomo long ol prinsipol we bae i blesem famli blong yu. Taem yu stap prea mo stadi long toktok blong God, askem yuwan: “?Wanem nao mi faenem long ples ia we bae i gat mining speseli long famli blong mi?” (luk long Teaching in the Savior’s Way, 17).
Pikja droing blong Tempol blong Solomon, i kam long Sam Lawlor