13–19 Jun. 1 Samuel 8–10; 13; 15–18: ‘Hem i Gat Paoa blong Win long Faet,’” Kam Folem Mi—Blong Wanwan Man, Woman mo Famli: OlTesteman 2022 (2021)
“13–19 Jun. 1 Samuel 8–10; 13; 15–18,” Kam Folem Mi—Blong Wanwan Man, Woman: 2022
Deved mo Golaeat, i kam long Steve Nethercott
13–19 Jun
1 Samuel 8–10; 13; 15–18
“Hem i Gat Paoa blong Win long Faet”
Ol aedia insaed long aotlaen ia i save helpem yu blong luksave ol impoten prinsipol long ol japta ia. Maet bae yu faenem ol narafala prinsipol taem yu stap stadi.
Raetemdaon Ol Filing mo Tingting blong Yu
Iven taem ol traeb blong Isrel oli stanemap olgeta long promes graon, Ol Man Filistia oli gohed blong stap olsem wan denja long sefti blong olgeta. Plante taem long taem bifo, Lod i bin mekem Ol Man Isrel oli kam fri long ol enemi blong olgeta. Be naoia Ol Man Isrel oli askem: “Mifala i wantem king … mo bambae hem i lidim mifala long taem blong faet” (1 Samuel 8:19–20). Lod i letem, mo Sol nao oli jusum hem i kam king. Be yet, taem nogud bigfala Golaeat i sakem jalenj blong hem i go long ol ami blong Isrel, Sol—semmak olsem ol ami blong hem—“oli fraet we oli fraet” (1 Samuel 17:11). Long dei ia, i no King Sol we i sevem Isrel be wan man blong lukaotem sipsip we nem blong hem Deved, we i no werem klos blong faet be hem i werem fet blong hem long Lod. Faet ia i pruvum se Isrel, mo long eniwan we i stap faetem ol faet long saed blong spirit, se “hem i no nidim naef blong faet mo spia” mo se “hem i gat paoa blong win long faet” (1 Samuel 17:47).
Ol Aedia blong Skripja Stadi blong Yuwan
Jisas Kraes i King blong mi.
Taem yu stap ridim 1 Samuel 8, luksave olsem Lod i filim abaot Ol Man Isrel we oli gat strong tingting blong gat wan king bitim Hemwan. ?Wanem i minim blong jusum Lod blong i “King [blong yufala]”? (1 Samuel 8:7). Yu maet tingting long ol wei we yu kasem temtesen blong folem ol fasin we i no stret be i no blong folem Lod. ?Olsem wanem nao yu save soem se yu wantem Jisas Kraes bae i King blong yu we I No Save Finis?
Luk tu long Jajes 8:22–23; Mosaea 29:1–36; Neil L. Andersen, “Overcoming the World,” Liahona, May 2017, 58–62.
1 Samuel 9:15–17; 10:1–12; 16:1–13
God i singaotem ol pipol blong hem tru long profesi blong givim seves long kingdom blong Hem.
Tru long profesi mo revelesen, God i jusum Sol mo Deved blong oli kam king (luk long 1 Samuel 9:15–17; 10:1–12; 16:1–13). Hemia i olsem wanem hem i singaotem ol man mo woman blong givim seves long Jos blong Hem tedei. ?Wanem nao yu lanem long ol stori ia abaot wanem i minim blong “God i mas singaotem wan man, tru long profesi”? (Ol Toktok blong Bilif 1:5). ?Wanem nao ol blesing we oli bin singaotem mo setem apat yu we i kam long ol wok man blong Lod we oli givim raet long olgeta?
Pikja blong Samuel i stap anoentem Sol, © Lifeway Collection/i karem laesens long goodsalt.com
“Hem i wantem yu blong obei ol tok blong hem … [bitim] blong mekem sakrifaes long hem”
Iven we Sol i tolfala, hem i filim “yu yu ting se yu man nating nomo” taem hem i kam king (1 Samuel 15:17). Be, taem oli blesem hem wetem sakses, hem i stat blong trastem hemwan moa bitim we hem i trastem God. ?Wanem pruf nao yu luk long 1 Samuel 13:5–14; 15? Sapos yu stap wetem Sol long taem ia, ?wanem nao bae yu talem long hem we bae i save helpem blong winim “stronghed” mo “flas” blong hem”? (1 Samuel 15:23).
Luk tu long 2 Nifae 9:28–29; Hileman 12:4–5; Doktrin mo Ol Kavenan 121:39–40; Thomas S. Monson, “Ponder the Path of Thy Feet,” Liahona, Nov. 2014, 86–88.
“Lod i lukluk long hat.”
?Wanem nao sam long ol wei we pipol oli jajem narawan “long olsem nao oli luk”? ?Hem i minim wanem blong “lukluk long hat,” olsem we Lod i mekem? (1 Samuel 16:7). Tingting hevi long olsem wanem yu save praktisim prinsipol ia long wei we yu long ol narafala man—mo yuwan. ?Olsem wanem nao i save afektem storian mo rilesensip blong yu wetem ol narawan?
Wetem help blong Lod, mi save winim eni jalenj we mi fesem.
Taem yu stap rid long 1 Samuel 17, tingting hevi long ol toktok blong defren pipol long japta ia (luk lis ia andanit). ?Wanem nao ol toktok ia i soem strong tingting mo fet blong olgeta long Lod? ?Olsem wanem nao ol toktok blong Deved i soem strong tingting mo fet blong hem long Lod?
-
Golaeat: ol ves 8–10, 43–44
-
Eliab: ves 28
-
Sol: ves 33
Tingting hevi long ol faet blong yuwan we yu stap fesem. ?Wanem nao yu save faenem long 1 Samuel 17 we i mekem fet blong yu long Lod i kam strong moa blong i helpem yu?
Luk tu long Gordon B. Hinckley, “Overpowering the Goliaths in Our Lives,” Ensign, Mei 1983, 46, 51– 52.
Ol Aedia blong Famli Skripja Stadi mo Haos Naet
-
1 Samuel 9:15–21; 16:7.Taem yu stap ridim ol ves ia wetem ol toktok ia we oli kam long Elda Dieter F. Uchtdorf, i save givim insperesen blong gat wan toktok storian abaot from wanem Lod i jusum Sol mo Deved: “Sapos yumi luk long yumiwan tru long ae blong wol blong yumi, bae yumi luk yumiwan se yumi i no gud inaf. Be Papa blong yumi long Heven i luk huia yumi tru mo huia yumi save kam ” (“It Works Wonderfully!” Liahona, Nov. 2015, 23). Maet wan memba blong famli i gat janis blong tokbaot wanem nao ol gudfala kwaliti oli luk long hat blong olgeta wanwan (luk long 1 Samuel 16:7).
-
1 Samuel 10:6–12.?Wetaem nao yumi luk God i blesem wan man wetem paoa long saed blong spirit blong mekem wan asaenmen o koling i kam tru olsem we Hem i blesem Sol? ?Wanem nao ol eksperiens yumi save serem taem we “God i mekem [yumi] kam niuwan olgeta” o “Spirit blong God i kam long [yumi]” long seves blong Hem? (ol ves 9–10).
-
1 Samuel 17:20–54.Maet famli blong i glad blong rid tugeta stori blong Deved mo Golaeat” (Deved mo Golaeat long Ol Stori long OlTesteman i save help) o wajem vidio ia: “The Lord Will Deliver Me” (ChurchofJesusChrist.org). Hemia i save lidim yumi blong toktok raon long ol jalenj we yumi stap fesem we, long yumi, yu filim se oli olsem “ol Golaeat”. Iven yu save raetem daon ol jalenj ia insaed long wan sekol we yu droem o wan droing blong Golaeat mo wan afta wan yufala sakem ol samting (olsem ol pepa balong we yufala i skwisim) long hem.
Bae i intresting tu blong ridim abaot klos blong faet mo ol tul blong faet blong Golaeat i gat (luk long ol ves:4–7). ?Wanem nao Deved i gat (luk long ol ves 38–40, 45–47). ?Wanem nao Lod i givim long yumi blong i helpem yu faet agensem ol Golaeat blong yumi?
-
1 Samuel 18:1–4.?Olsem wanem nao Deved mo Jonatan tufala i ol gudfala fren? ?Olsem wanem ol gudfala fren oli blesem yumi? ?Wanem nao yu save mekem blong kam ol gudfala fren—we i tekem tu ol memba blong famli blong yumi?
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Wan singsing: “I Will Be Valiant,” Children’s Songbook, 162.
Stap Kam Antap long Fasin blong Yumi blong Stap Tij
Serem testemoni blong yu plante taem. “Simpol mo tru witnes blong yu abaot wan trutok i save gat paoa blong lidim tingting blong [olgeta famli blong yu]. Wan testemoni i gat moa paoa taem we yumi talem long fasin blong tok stret mo fasin blong talem wetem ful hat. Hem i no nid blong i gat ol flas toktok o i longfala” (Teaching in the Savior’s Way, 11).
Pikja blong Deved i kam long Dilleen Marsh