Pikja blong Moses i odenem Josua, i kam long Darrell Thomas

23–29 Mei

Josua 1–8; 23–24

“Tingting blong Yu I Mas Strong, Mo Yu No Mas Fraet, Yu Mas Stanap Strong Oltaem”

Taem yu stap stadi long buk blong Josua, tingting long wei we ol samting we yu lanem abaot Ol Man Isrel oli save mekem fet blong yu long Jisas Kraes i kam antap.

Raetemdaon Ol Filing mo Tingting blong Yu

I tekem sam jeneresen, be promes blong Lod bae i kamtru i no longtaem: ol pikinini blong Isrel oli stap long ples we oli rere blong kasem promes graon. Be i gat ol samting we oli blokem rod blong olgeta, olsem Jodan Reva, bigfala ston wol blong taon ia Jeriko, mo wan pipol we oli gat paoa mo oli moa nogud we oli sakemaot Lod (luk long 1 Nifae 17:35). Antap long hemia, lida blong olgeta, Moses, we oli lavem tumas, i ded. Situesen ia i mekem sam long Ol Man Isrel oli filim se oli no strong mo oli fraet, be Lod i talem se: “Tingting blong yu i mas strong, mo yu no mas fraet, yu mas stanap strong oltaem.” ?From wanem oli bin filim olsem? I no from paoa blong olgetawan—o blong Moses o Josua—be “from we mi bambae mi stap wetem yu long wea bambae yu go long hem” (Josua 1:9). Taem yumi gat ol reva blong miwan blong krosem mo ol ston wol blong karem i kam daon, ol naesfala samting i save hapen long laef blong yumi, from se “tumora hem, bae i mekem merikel long medel blong yumi” (Josua 3:5).

Blong gat wan bigfala lukluk long buk blong Eksodas, luk long “Joshua, book ofinsaed long Bible Dictionary.

Ol Aedia blong Skripja Stadi blong Yuwan

Josua 1:1–9

God bae i stap wetem mi sapos mi mi fetful long Hem.

Pikjarem se bae i olsem wanem long Josua blong God i singaotem hem blong i tekem ples blong Moses. Lukluk long wanem Lod i talem long Josua 1:1–9 blong i leftemap tingting blong hem. Tingbaot wan jalenj we yu fesem, ?wanem long ol ves ia i givim strong tingting long yu?

Bae hem i intresting blong save se nem ia Josua (Yehoshua o Yeshua long lanwis Hibru) i minim “Jehova i sevem.” Mo nem ia Jisas i kam long Yeshua. Mekem se taem yu stap rid long Josua, tingting long olsem wanem nao misin blong hem blong i lidim ol pipol blong Isrel i go long promes lan i rimaenem yu long misin blong Sevya.

Luk tu long Ann M. Dibb, “Be of a Good Courage,” Liahona, May 2010, 114–16.

Josua 2

I nid blong gat tugeta samting ia, fet mo ol wok, blong kasem fasin blong sevem man.

Ol Kristin blong bifo oli luk Rehab olsem wan eksampol blong paoa blong tugeta fet mo ol wok (luk long Hibrus 11:31; Jemes 2:25). Taem yu stap rid long Josua 2, tingting long rol blong fet blong Rehab mo ol wok blong sevem hemwan, famli blong hem, ol skaot blong Ol Man Isrel. ?Wanem nao hem i tijim yumi abaot wei we fet blong yu long Jisas Kraes mo ol wok blong yu oli save lidim tingting blong yuwan mo blong ol narawan?

Maet bae yu intres blong save se Rehab i wan bubu blong tugeta King Deved mo Jisas Kraes (luk long Matiu 1:5). ?Wanem nao ol posibol lesen we yumi save lanem aot long hemia?

Rehab long windo blong hem. Stap Wet long Promes, i kam long Elspeth Young.

Josua 3–4

Mi save gat eksperiens long ol “merikel” blong God taem mi gat fet long Jisas Kraes.

Lod i wantem tumas “olgeta man long wol bambae oli save we paoa blong hem i bigwan tumas” (Josua 4:24). Taem yu stap ridim Josua 3–4, tingting hevi long olsem wanem nao yu save we paoa blong Lod i bigwan tumas. ?Hao nao Lod i mekem “ol merikel” insaed long laef blong yu? (Josua 3:5). Olsem wanem nao yu eksperiens—o luksave—ol merikel ia oltaem? (eksampol, luk long Josua 3:17).

?From wanem yu ting se Ol Man Isrel oli nidim blong mekem olgeta oli kam tabu bifo oli save krosem Jodan Reva ? ?Wanem mining we yu faenem long hemia we reva i seraot long tu afta we “taem we oli pris oli karem bokis ya oli purumbut long wota”? (Josua 3:13, 15).

Blong ol narafala mining long taem ia long Jodan Reva, luk long 2 King 2:6–15; 5:1–14; mo long Mak 1:9–11. Taem yu stap tingting hevi long olgeta skripja ia, ?wanem nao ol koneksen nao bitwin ol samting we i hapen long taem ia?

Luk tu long Gérald Caussé, “Is It Still Wonderful to You?” Liahona, May 2015, 98–100; “Exercise Faith in Christ” (vidio), ChurchofJesusChrist.org.

Josua 6–8

Fasin blong stap obei i karem paoa blong God i kam long laef blong mi.

Ol japta ia i dil wetem ol faet ova long ol graon blong Jeriko mo Eae. Taem yu stap ridim olgeta, tingting long olsem wanem yu save faetem ol temtesen long laef blong yu (eksampol, luk long Josua 7:10–13). ?Wanem nao yu lanem abaot God i save helpem yu mo wanem yu nid blong mekem blong gat akses long paoa blong hem? Eksampol, ?wanem nao i tajem yu abaot ol instraksen blong Lod taem hem kontrolem Jeriko? (luk long Josua 6:1–5). Maet stori long Josua 7 bae i givim yu insperesen blong luksave “sapos yu no tekemaot ol samting ia” long laef blong yu we i nid blong yu tekemaot (Josua 7:13).

Josua 23–24

“Bae tingting blong yufala i mas strong long Hae God.”

Afta we oli serem promes lan long olgeta twelef traeb blong Isrel (luk long Josua 13–21), Josua i givim ol las tijing blong hem. Taem yu stap ridim ol tijing ia long Josua 23–24, yu wantem kipim wan lis blong ol woning, kaonsel, mo ol promes blesing we yu faenem. Tingting long evri samting we Ol Man Isrel oli bin go tru long hem, ?from wanem yu ting se Josua i jusum blong talem ol samting ia long en blong laef blong hem? ?Wanem nao i givim yu insperesen long yu blong “bae tingting blong yufala i mas strong long Hae God”? (Josua 23:8).

Ol Aedia blong Famli Skripja Stadi mo Haos Naet

Josua 1:8.?Wanem nao ves ia i talem abaot wei we yumi stap mekem ol skripja stadi, tugeta, yumiwan mo olsem wan famli? ?Olsem wanem nao ol skripja i mekem “ol wok blong yu i gat frut blong hem” mo karem fasin we “yu save win”?

Josua 4:3, 6–9.Afta we yu ridim wanem God i wantem Ol Man Isrel i mekem wetem ol ston blong Jodan Reva, famli blong yu save tokbaot sam long ol bigfala samting we Lod i bin mekem blong yu. Mo yu save givim wan ston long wanwan memba blong famli mo invaetem olgeta blong raet o dro wan samting long hem, we Lod i bin mekem blong olgeta.

Josua 6:2–5.Famli blong yu maet bae i gat wan gud taem blong aktem ol instraksen we Lod i givim long Ol Man Isrel blong oli save winim Jeriko. ?Wanem nao Lod i wantem yumi blong lanem long stori ia?

Josua 24:15.Afta yu ridim ves ia, ol memba blong famli oli save serem sam eksperiens abaot wan taem we oli jusum blong givim seves long Lod iven we i had. ?From wanem hem i impoten blong yu mekem joes ia blong givim seves long Hem “tedei,” be i no blong wet kasem taem wan problem i kam? ?Olsem wanem nao yumi save sapotem ol memba blong “haos” blong yumi taem yumi stap traehad blong “givim seves long Lod”?

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “Choose the Right,” Hymns, no. 239.

Stap Kam Antap long Fasin blong Yumi blong Stap Tij

Serem testemoni blong yu plante taem. Simpol mo tru witnes blong yu abaot wan trutok i save gat paoa blong lidim tingting blong olgeta famli blong yu. Hem i no nid blong toktok blong yu i flas o i longfala. Wan testemoni i gat moa paoa taem we yumi talem long fasin blong tok stret mo fasin blong talem wetem ful hat. (Luk long Teaching in the Savior’s Way, 11.)

Lod i mekem ol ston wol blong Jeriko oli foldaon © Providence Collection/oli karem laesens long goodsalt.com