pikja droing blong Moses long Hil Nebo © Providence Collection/oli karem laesens long goodsalt.com

16–22 Mei

Dutronome 6–8; 15; 18; 29–30; 34

“Yufala I Mas Lukaot Gud blong Yufala I No Fogetem Lod”

Moses i bin givim komanmen blong ol pikinini blong Isrel blong ol tijim ol toktok blong Lod long ol pikinini blong olgeta (luk long Dutronome 6:7). Taem yu stap stadi long Dutronome blong wik ia, faenem ol wei blong yu serem wanem yu lanem wetem ol memba blong famli blong yu.

Raetemdaon Ol Filing mo Tingting blong Yu

Seves blong Moses long wol ia i stat long wan hil, taem we Lod i toktok long hem long wan smol tri wetem faea (luk long Eksodas 3:1–10). Mo i en 40 yia afta, taem we God i givim long Moses wan lukluk blong promes graon ia antap long hil blong Neboho (luk long Dutronome 34:1–4). Moses i spendem ful laef blong hem blong i rere ol pikinini blong Isrel blong oli go long promes graon, mo buk blong Dutronome i rekodem las instraksen, rimaenda, tok blong askem strong, mo ol strong plis blong hem wetem Ol Man Isrel. Taem yu ridim ol toktok blong hem, i klia se stamba tingting long seves blong Moses—wok blong rere we ol pipol oli nidim blong mekem—i no blong oli mas laef long draeples, blong winim ol nesen, o bildim wan komuniti. Hem i abaot blong oli lanem blong lavem God, obei long Hem, mo stap tru long Hem. Hemia nao wanem yumi nidim blong rere blong yumi save go long promes graon blong taem we i no save finis. Moses we i neva putum leg blong hem long “graon blong hem i gud tumas, oltaem i karem fulap kaekae” (Eksodas 3:8), from fet blong hem mo hem i stap fetful, hem i go long promes graon we God i rere blong olgeta we oli folem Hem.

Blong gat wan bigfala lukluk long Buk blong Dutronome, luk long “Deuteronomy” insaed long Bible Dictionary.

Ol Aedia blong Skripja Stadi blong Yuwan

Dutronome 6:4–7; 8:2–5, 11–17; 29:18–20; 30:6–10, 15–20

Lod i wantem mi blong mi lavem Hem wetem ful hat blong mi.

Long ol las tijing blong hem, Moses i rimaenem ol pikinini blong Isrel, “Long ol foti yia ya we yumi stap wokbaot long bigfala draeples ya, hem i stap lukaot long yumi, mo long taem ya, yumi no sot long wan samting nating” (Dutronome 2:7). Naoia we Ol Man Isrel oli stap go insaed long promes graon we oli gat “ol haos blong [olgeta] we oli fulap long ol gudgudfala samting we [oli] no bin putum” (Dutronome 6:10–11), Moses i fraet se bae oli mekem hat blong olgeta i kam strong mo bae oli fogetem Lod.

Tingting long situesen blong hat blong yuwan taem yu stap ridim kaonsel blong Moses. Yu save lukluk nomo long ol ves ia mo raetemdaon ol filing mo tingting blong yu:

• Dutronome 6:4–7:

• Dutronome 8:2–5:

• Dutronome 8:11–17:

• Dutronome 29:18–20:

• Dutronome 30:6–10:

• Dutronome 30:15–20:

?Wanem nao yu save mekem blong mekem hat blong yu i no kam strong mo blong lavem Lod wetem ful hat blong yu? ?Wanem koneksen nao yu luk bitwin Dutronome 6:5–6 mo Matiu 22:35–40? (Luk tu long Levitikas 19:18).

Luk tu long Dieter F. Uchtdorf,“A Yearning for Home,” Liahona, Nov. 2017, 21– 24.

Dutronome 6:4–12, 20–25

“Yufala i mas lukaot gud blong yufala i no fogetem Lod.”

Plante long ol jeneresen blong Ol Man Isrel we oli go long promes graon oli no fesem ol bigfala sik long Ijip o krosem Red Si. Moses i save se olgeta—mo ol fiuja jeneresen—bae oli nidim blong tingbaot ol merikel blong God mo ol loa blong God sapos oli wantem gohed blong stap olsem ol pipol blong God.

?Wanem kaonsel nao Moses i givim long Dutronome 6:4–12, 20–25 we bae i helpem yu blong tingbaot ol bigfala samting we Lod i bin mekem blong yu? ?Wanem nao i givim yu insperesen blong mekem se tok blong Lod bae oltaem i stap “[long olgeta tingting blong yufala]”? (ves [5]).

?Hao nao bae yu pasem fet blong yu i go long fiuja jeneresen?

Luk long Dutronome 11:18–21; Gerrit W. Gong, “Always Remember Him,” Liahona, May 2016, 108–11; Bible Dictionary, “Frontlets or phylacteries.”

Dutronome 15:1–15

Blong helpem olgeta we i stap long nid i nidim bigfala han mo hat we i wantem.

Dutronome 15:1–15 i givim kaonsel blong helpem olgeta we i pua mo olgeta we oli stap long nid, we i tekem tu sam long ol spesifik praktis we oli no folem tedei. Be luksave wanem nao ol ves ia oli tijim abaot from wanem yumi sud helpem olgeta we i pua mo olsem wanem ol fasin blong yumi blong helpem olgeta i mata long Lod. ?Wanem nao yu filim se Lod i wantem yu blong lanem long ol ves ia abaot blong givim seves long ol narafalawan?

Luk tu long Russell M. Nelson, “Seken Hae Komanmen,” Liahona, Nov. 2019, 96–100.

Dutronome 18:15–19

Jisas Kraes i Profet we bae i kam antap, i semmak olsem Moses.

Pita, Nifae, Moronae, mo Sevya Hemwan evriwan oli bin tokbaot profesi we i stap long Dutronome 18:15–19 (luk long Ol Wok 3:20–23; 1 Nifae 22:20–21; Josef Smit—Histri 1:40; 3 Nifae 20:23). ?Wanem nao yu lanem abaot Sevya long ol ves ia? ?Olsem wanem nao Sevya i “stap olsem” Moses? (Dutronome 18:15).

Jisas Kraes i Profet we bae i stap olsem Moses.

Dutronome 34:5–8

?Wanem i hapen long Moses?

Iven we Dutronome 34:5–8 i talem se Moses i ded, andastaning blong lata‑dei i talem i klia se God i tekemaot hem taem hem i stap laef yet, o hem i jenis blong hem i no safa long ol harem nogud blong ded kasem taem hem i girap bakegen long ded (luk long Alma 45:18–19; Bible Dictionary, “Moses”; Gaed long Ol Skripja, “Man, We I No Testem Ded,” olskripja.ChurchofJesusChrist.org). I nid blong Moses i no testem ded from hem i nidim blong gat wan bodi blong mit bun blong save givim ol prishud ki ia long Pita, Jemes, mo Jon long Hil we Jisas i Jenis i Kam Narafala (luk long Matiu 17:1–13).

Ol Aedia blong Famli Skripja Stadi mo Haos Naet

Dutronome 6:10–15.Olgeta ves ia i save pusum ol memba blong famli blong yu i tingting long ol wei we famli blong yu i bin kasem blesing. ?Olsem wanem nao yumi save folem kaonsel blong “yufala i mas lukaot gud blong yufala i no fogetem Lod”? (Dutronome 6:12). Yu save raetemdaon ol filing blong yu abaot ol blesing blong yu, ating long wan jenol o long FamilySearch.

Dutronome 6:13, 16; 8:3.Ol ves ia oli helpem Sevya long impoten taem long laef blong Hem; blong save olsem wanem hemia i hapen, tugeta, yufala i ridim Matiu 4:1–10. ?Wanem skripja nao i bin helpem yumi long taem blong nid?

Dutronome 7:6–9.Mekem wan samting blong i helpem ol memba blong famli blong yu oli filim se oli spesel, olsem rere wan fevret kaekae. Afta yu save rid long Dutronome 7:6–9 mo toktok raon long wanem yu filim i minim blong “yumi spesel long fes blong hem” (ves 6).

Dutronome 29:12–13.Stap tokbaot Dutronome 29:12–13 i givim wan janis long yu mo ol memba blong famli blong yu blong toktok raon long ol kavenan we bae oli mekem o mekem finis wetem Papa long Heven. ?Hem i minim wanem blong stap olsem ol pipol blong God? ?Hao nao ol kavenan blong yumi “se [yumi] ol man blong Hem”? (ves 13).

Blong gat moa aedia blong stap tijim ol pikinini, luk long aotlaen blong wik ia insaed long Kam Folem Mi—Blong Praemeri.

Wan singsing: “I Want to Live the Gospel,” Children’s Songbook, 148.

Stap Kam Antap long Stadi blong Yuwan

Lukaotem ol niu wei blong yu blong lukluk ol samting long saed blong spirit. Aotlaen ia i stap givim samfala ples long skripja mo samfala prinsipol we yumi save lukluk moa long olgeta, be yu no letem ol tingting ia oli stopem yu blong mekem moa samting long stadi blong yu. Taem yu stap stadi, lukaotem ol trutok mo ol prinsipol we oli no tokbaot long ples ia. Tabu Spirit bae i gaedem yu long ol trutok we yu nidim blong lanem.

Lod I Soem long Hem Ful Graon, i kam long Walter Rane