“16–22 Mei. Dutronome 6–8; 15; 18; 29–30; 34: ‘Yufala I Mas Lukaot Gud blong Yufala I No Fogetem Lod,’” Kam Folem Mi—Blong Praemeri: OlTesteman 2022 (2021)
“16–22 Mei. Dutronome 6–8; 15; 18; 29–30; 34,” Kam Folem Mi—Blong Praemeri: 2022
Pikja blong Moses long Bigfala Hil Nebo, © Providence Collection/oli karem laesens long goodsalt.com
16–22 Mei
Dutronome 6–8; 15; 18; 29–30; 34
“Yufala I Mas Lukaot Gud blong Yufala I No Fogetem Lod”
Tingting hevi long olsem wanem yu save yusum ol aktiviti long aotlaen ia folem ol nid blong ol pikinini we yu tijim. Eksampol, sapos yu tijim ol yangfala pikinini, yu helpem olgeta blong rere from baptaes taem yu yusum ol aktiviti anda long seksen ia: “Blong stap kipim ol kavenan blong mi i karem ol bigfala blesing oli kam”
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Invaetem ol pikinini blong serem wanem we oli bin lanem abaot Moses long Praemeri o long hom long ol wik we i pas. Sapos i gat nid, soem ol pikja blong ol samting we i hapen long laef blong Moses blong helpem olgeta tingbaot. Talem long olgeta se tedei bae yu tokbaot ol samting we Moses i bin tijim long en blong laef blong hem long wol.
Tijim Doktrin: Ol Smol Pikinini
Mi save lavem Lod wetem ful hat blong mi.
Moses i bin tijim ol pikinini blong Isrel se oli mas lavem Lod wetem ful hat blong olgeta, sol mo paoa blong olgeta. Tingting long ol wei we yu save helpem ol pikinini we yu tijim blong mekem i kam antap lav blong olgeta long Papa long Heven mo Sevya.
Samfala Aktiviti we Yu Save Mekem
-
Droem long bod wan hat, wan ful sep blong wan bodi mo wan strong han. Ridim Dutronome 6:5, mo poenem ol pikja taem yu stap ridim ol toktok ia “hat,” “sol,” mo “paoa.” Invaetem ol pikinini blong wanwan i gat janis blong stap poenem ol pikja taem we klas i ripitim ol toktok ia wetem yu.
-
Singsing wan singsing we i tij abaot lav blong God olsem “My Heavenly Father Loves Me” (Children’s Songbook, 228–29). Helpem ol pikinini blong faenem ol toktok ia insaed long singsing ia we i soem se Papa long Heven i lavem yumi. Helpem olgeta blong tingbaot ol wei we yumi save soem long Hem se yumi lavem Hem tu.
Ol skripja oli toktok blong God.
Kaonsel ia, insaed long Dutronome 6:6–9, i nidim blong stap blong helpem ol laen blong Isrel blong “[oli] mas lukaotgud blong [oli] no Fogetem hem [Lod]” mo toktok blong Hem (ves 12). ?Olsem wanem nao yu save helpem ol pikinini blong mekem ol skripja i oltaem stap olsem pat blong laef blong olgeta?
Samfala Aktiviti we Yu Save Mekem
-
Invaetem wan pikinini blong haedem wan kopi blong skripja insaed long rum, mo ol narafala pikinini oli sarem ae blong olgeta. Afta, talem ol pikinini blong openem ae blong olgeta mo traem blong faenem ol skripja. Yusum ol ki toktok aot long Dutronome 6:6–9, serem wetem ol pikinini se Moses i bin talem long ol Laen blong Isrel blong putum ol toktok blong skripja long ol ples we oli save lukluk long hem mo lanem evri dei. Helpem ol pikinini blong tingting long ol ples we oli save putum ol skripja long wan ples we oli save lukluk long olgeta evri dei.
-
Singsing long wan singsing abaot ol skripja olsem hemia: “Search, Ponder, and Pray” (Children’s Songbook, 109). Serem testemoni blong yu se ol skripja oli toktok blong God mo talem long ol pikinini olsem wanem oli blesem laef blong yu.
Jisas Kraes i profet olsem Moses.
Ol profet oli tij abaot Jisas Kraes.
Moses i bin profesae se Jisas Kraes bae i kam, mo we yumi mas lisin long ol toktok we Jisas bae i tijim.
Samfala Aktiviti we Yu Save Mekem
-
Helpem wan pikinini blong ridim Dutronome 18:18, mo talem long ol pikinini se Profet ia olsem Moses we God bae i leftemap i Jisas Kraes. Blong helpem ol pikinini blong luk se ol wei we Moses mo Jisas i semmak, karem ol pikja blong ol samting we Moses i bin mekem, mo ol samting we Jisas i bin mekem, mo letem ol pikinini oli majem olgeta. Eksampol, yu save karem ol pikja blong Moses mo Jisas we oli stap odenem ol narafala man mo stap tij (luk long Gospel Art Buk, ol namba 15, 16, 38, 39).
-
Soem long ol pikinini wan pikja blong profet blong yumi tedei, mo serem wan samting we hem i bin tijim abaot Sevya. Invaetem ol pikinini blong droem wan pikja blong profet blong oli serem wetem ol famli blong olgeta.
Stap Tijim Doktrin: Ol Bigfala Pikinini
Mi save kipim toktok blong God insaed long hat blong mi.
Moses i bin tijim se yumi mas kipim tok blong God insaed long hat blong yumi, mo hem i givim kaonsel long ol laen blong Isrel long olsem wanem blong kipim toktok blong God faswan oltaem long olgeta. ?Wanem insperesen nao bae yu givim long ol pikinini blong lanem aot long toktok blong God evri dei?
Samfala Aktiviti we Yu Save Mekem
-
Long bod, raetem ol toktok mo ol sentens aot long Dutronome 6:6–9 we i talem stret wetaem mo olsem wanem ol laen blong Isrel oli mas tingbaot toktok blong God (olsem yufala i stap long haos, yufala i stap wokbaot, yufala i go blong slip, han, mo haos). Invaetem ol pikinini blong lukaotem ol toktok ia long ol ves ia. ?Wanem nao ol toktok ia oli tijim abaot olsem wanem blong mekem ol skripja oli kam pat blong evri dei laef blong yumi? Askem ol pikinini wanem oli save mekem blong tingbaot toktok blong God long evri dei laef blong olgeta.
-
Givim wan pis pepa long wanwan pikinini mo askem olgeta blong raetemdaon wan sentens aot long Dutronome 6 we i gat bigfala mining long olgeta. Askem olgeta blong serem from wanem oli bin jusum sentens blong olgeta ia. Givim wan tingting blong oli flasem pepa blong olgeta mo putum long wan ples we evriwan i save luk blong oli tingbaot long hom blong olgeta. Leftemap tingting blong ol pikinini blong raetemdaon mo soem ol narafala sentens we olgeta oli faenem insaed long ol skripja.
Mi save givim seves wetem bigfala glad long olgeta we oli stap long nid.
Ol tijing long Dutronome 15:7–11 oli save helpem ol pikinini we yu tijim blong andastanem se blong stap helpem ol narafala man i moa bitim blong mekem aksen. I mas hapen wetem wan hat we i wantem mekem.
Samfala Aktiviti we Yu Save Mekem
-
Raetem huia, from wanem, mo olsem wanem long bod. Invaetem ol pikinini blong ridim Dutronome 15:7–11 blong faenemaot huia nao yumi sapos blong helpem, from wanem yumi sapos blong help mo olsem wanem hat blong yumi i sapos blong filim taem yumi stap help. Letem olgeta oli raetem long bod wanem oli faenem. Singsing wan singsing we i sapotem mesej we i stap long ol ves ia, olsem hemia: “Have I Done Any Good?” (Hymns, namba 223).
-
Askem ol pikinini blong oli tingting long wan we oli save helpem—speseli insaed long hom blong olgeta. Givim taem long olgeta blong raetemdaon wanem bae oli mekem long wik ia blong helpem man ia. Sapos i posibol, mekem ol plan blong go aot, olsem wan klas, long wan man we i stap long nid.
Taem mi stap kipim ol kavenan blong mi, i karem ol bigfala blesing oli kam.
Olsem ol pikinini blong Isrel, yumi nidim ol samting we i stap mekem yumi tingbaot oltaem blong stap laef folem ol kavenan blong yumi. Sapos yufala i ridim Dutronome 30:8–10, i save helpem ol pikinini blong andastanem moa gud wanem i wan kavenan, mo givim insperesen long olgeta blong kipim ol kavenan blong olgeta.
Samfala Aktiviti we Yu Save Mekem
-
Askem ol pikinini wanem i wan kavenan (sapos oli nidim help, yu save talem se oli faenem wan mining blong “Kavenan” insaed long Gaed long Ol Skripja [olskripja.ChurchofJesusChrist.org]). Yu save droem tu kolom long bod wetem ol heding ia: ol promes blong ol laen blong Isrel mo ol promes blong God. Invaetem ol pikinini blong ridim Dutronome 30:8–10 mo fulumap jat ia. (Sapos i posibol, helpem ol pikinini blong oli andastanem ol mining blong ol sentens insaed long ves 9.) Testifae long ol blesing we i bin kam long yu taem yu stap kipim ol kavenan blong yu.
-
Invaetem ol pikinini blong mekem lis, long bod, blong ol promes we yumi mekem taem yumi baptaes mo ol promes we Papa long Heven i mekem long yumi (luk long Doktrin mo Ol Kavenan 20:37, 77). ?Wanem nao yumi save mekem blong oltaem tingbaot Sevya mo kipim ol kavenan blong yumi?
Stap Leftemap Tingting blong Lanem Samting long Hom
Invaetem ol pikinini blong tingting olsem se yu yu wan memba blong famli blong olgeta, mo askem long olgeta blong talem long yu wan samting we oli lanem long klas tedei. Leftemap tingting blong olgeta blong serem wanem we oli talem long yu wetem wan long ol famli memba blong olgeta taem oli kasem hom.
Stap Kam Antap long Fasin blong Yumi blong Stap Tij
Askem ol kwestin we oli givim insperesen. Askem ol kwestin we oli invaetem ol pikinini blong no jes ripotem ol tru samting nomo, be blong serem testemoni blong olgeta abaot ol trutok blong gospel. Eksampol, sapos yu stap tokbaot ol komanmen, yu save askem long ol pikinini blong serem olsem wanem fasin blong kipim ol komanmen i bin blesem olgeta.