Jehova i kamaot long Moses mo ol elda blong Isrel

Pikja i soem Jehova i kamaot long Moses mo ol 70 elda blong blong Isrel, i kam long Jerry Harston

25 Epril–1 Mei

Eksodas 24; 31–34

“Mi Bambae Mi Go Wetem Yu”

Taem we Moses i rere blong lidim ol pikinini blong Isrel i go blong kasem promes graon, Lod i talem, “Mi Bambae Mi Go wetem Yu” (Eksodas 33:14). Taem yu rere blong tijim ol pikinini long klas blong yu, tingting long olsem wanem yu save invaetem Lod blong “go wetem [yu].”

Raetemdaon Ol Filing mo Tingting blong Yu

serem pikja bokis

Invaetem Ol Pikinini blong Serem Wanem Oli Gat

Askem wanwan pikinini blong jusum wan pis pepa we i gat namba long hem be i not folem oda. Yusum ol namba ia blong faenemaot oda we bae ol pikinini oli save serem wan samting we oli stap lanem long ol skripja, long hom o long praemeri.

tijing pikja bokis

Tijim Doktrin: Ol Smol Pikinini

Eksodas 31:13, 17

Blong stap ona long Sabat i wan saen blong soem lav blong mi long Lod.

Lod i bin talem long Moses se taem ol pikinini blong Isrel oli kipim Sabat dei i tabu, oli stap soem long Hem se oli wantem stap ol pipol blong Hem.

Samfala Aktiviti we Yu Save Mekem

• Droem wan sep blong hat long bod, mo askem ol pikinini wanem simbol ia i save minim. Helpem olgeta blong tingting long sam nara samting we i save stap olsem wan saen blong lav, olsem wan hag o wan aksen blong seves. Ridim long olgeta Eksodas 31:13. Helpem olgeta blong andastanem se taem yumi kipim Sabat dei i tabu, hem i wan saen i go long Lod se yumi lavem Hem.

• Talem long ol pikinini sam long ol wei we yu traem blong soem lav blong yu long Lod long Sabat. Letem olgeta oli serem olsem wanem olgeta, mo ol famli blong olgeta oli mekem hemia. Invaetem olgeta blong yusum aktiviti pej blong wik ia blong serem moa aedia.

  Ol pikinini mo ol papa mo mama blong olgeta long hom.

  Taem yumi stap onarem Sabat, yumi soem lav blong yumi long Lod.

Eksodas 32: 1–8, 19-24

Mi save putum Lod faswan long laef blong mi.

Taem we Moses i stap toktok long Lod long Bigfala Hil Sinae, ol pikinini blong Isrel oli jusum blong wosipim wan aedol we oli mekem long gol be i no blong wosipim Hem. Stori ia i save mekem ol pikinini we yu tijim oli tingbaot se yumi no mas letem ol nara samting oli kam moa impoten long yumi bitim Lod.

Samfala Aktiviti we Yu Save Mekem

• Blong sot taem luklukbak long Ol Ten Komanmen wetem ol pikinini, mo tokbaot bigwan tufala faswan (luk long Eksodas 20:3–6). Yusum “Ol Ten Komanmen” (insaed long Ol Stori long OlTesteman) blong serem long olgeta stori we i kamaot long Eksodas 32:1–8, 19–24. Sapos i posibol, letem ol pikinini oli helpem yu blong talem stori. Helpem ol pikinini blong luk wanem ol laen blong Isrel, oli bin mekem i rong insaed long stori ia (bae yu wantem blong rimaenem ol pikinini long tufala fasfala komanmen blong Ol Ten Komanmen). ?Wanem nao ol laen blong Isrel oli sapos blong mekem?

• Soem wan pikja blong Jisas Kraes folem wetem ol pikja blong ol nara samting we maet ol pikinini oli stap spendem taem long hem, olsem ol pleiplei, ol gem mo sam moa. Askem ol pikinini blong faenem ol pikja we oli soem ol samting we oli moa impoten long yumi. Serem wetem ol pikinini ol wei we yu kasem blesing taem yu putum Lod i kam faswan long laef blong yu—iven bifo ol nara samting we oli gud.

Eksodas 33:11

Lod i toktok wetem Moses fes tu fes.

Afta we Moses i prapa spolem gud wan yang buluk we oli wokem long gol, “Hae God i stap toktok wetem Moses olsem we man i stap toktok wetem fren blong hem nomo.” Blong save hemia, i save bildimap fet blong ol pikinini se Lod i wan ril man we i lavem olgeta.

Samfala Aktiviti we Yu Save Mekem

• Talem long ol pikinini wanem yu filim taem yu toktok wetem wan gudfala fren mo askem wanem oli filim. Ridim long olgeta fasfala sentens long Eksodas 33:11. Askem ol pikinini olsem wanem nao oli ting se Moses i bin filim. Talem long ol pikinini abaot ol taem we yu bin filim kolosap long Lod, iven sapos yu no luk hem wetem ae blong yu.

• Singsing tugeta wan singsing we i soem olsem wanem Papa long Heven o Jisas Kraes i filim abaot yumi, olsem “Jesus Is Our Loving Friend” (Children’s Songbook, 58). Soem ol pikja blong Sevya we oli stap soem lav long ol narawan (luk long Gospel Art Buk, ol namba 36, 41–43, 46–47). Leftemap tingting blong ol pikinini blong serem olsem wanem oli filim abaot Papa long Heven mo Jisas Kraes.

tijing pikja bokis

Stap Tijim Doktrin: Ol Bigfala Pikinini

Eksodas 31:12–17

Taem yumi stap ona long Sabat, yumi soem lav blong yumi long Lod.

Blong stap kipim Sabat dei i tabu, i save kam moa isi—mo gat moa glad—long ol pikinini taem oli luksave se i wan saen blong komitmen blong olgeta i go long Lod.

Samfala Aktiviti we Yu Save Mekem

• Askem ol pikinini sam kwestin blong helpem olgeta blong andastanem wanem i wan saen—eksampol: “?Wanem nao ol saen we oli letem yu save se Springtaem i stap kam, o se bae yu kasem flu? Invaetem olgeta blong ridim Eksodas 31:13, 16–17 mo faenem toktok ia “saen.” ?Wanem nao Lod i talem se bae i wan saen bitwin yumi mo Hem? ?From wanem nao saen ia i impoten tumas?

• Invaetem ol pikinini, wan afta wan, blong eksplenem ?from wanem oli jusum blong ona long Sabat?. Ol vidio olsem “The Sabbath Is for You” o “Upon My Holy Day—Honoring the Sabbath” (ChurchofJesusChrist.org) oli save help.

• Invaetem ol pikinini blong raetemdaon evri samting we oli save tingting long hem blong mekem long Sandei blong soem long Lod se oli lavem Hem. Leftemap tingting blong olgeta blong serem sam samting long ol lis blong olgeta. Invaetem olgeta blong tekem ol lis blong olgeta i go long haos, mo serem wetem ol famli blong olgeta, mo luklukbak long hem taem we oli nidim ol aedia abaot wanem blong mekem long Sabat dei.

Eksodas 32:1–8, 19–24

Mi save putum Lod faswan long laef blong mi.

Wan mesej aot long stori insaed long Eksodas 32 i tokbaot from wanem i impoten blong kipim tufala fas komanmen aot long Ol Ten Komanmen—yu no save wosipim eniwan o eni samting be Lod nomo.

Samfala Aktiviti we Yu Save Mekem

• Askem ol pikinini blong serem eni samting oli save abaot stori blong Eron we i stap mekem wan yang buluk we oli wokem long gol blong ol laen blong Isrel oli wosipim. Sapos oli nidim help, tekem olgeta oli go long Eksodas 32:1–8, 19–24, o serem wetem olgeta “Ol Ten Komanmen” (insaed long Ol Stori long OlTesteman). ?From wanem i rong blong ol laen blong Isrel blong wosipim wan aedol? (Yu save tekem ol pikinini oli go long tufala fas komanmen blong Ol Ten Komanmen insaed long Eksodas 20:3–6.)

• Helpem ol pikinini blong tingbaot ol eksampol blong ol samting we ol pipol oli save kasem temtesen blong wosipim be i no blong wosipim Lod—ol samting we oli pulum intres blong yumi aot long Hem. Afta, askem olgeta blong serem ol eksampol blong ol samting we oli save helpem olgeta blong lukluk nomo long Sevya mo wosipim Hem.

Eksodas 32:1–5, 21–24

Mi save stanap from fasin blong stap stret mo gud.

Taem ol laen blong Isrel oli talem long Eron blong mekem aedol long gol, hem i agri blong mekem, i nomata hemia i rong (luk long Dutronome 9:20). Tingting long olsem wanem blong leftemap tingting blong ol pikinini blong stanap from fasin blong stap stret mo gud, iven sapos ol narawan oli fosem olgeta blong no mekem.

Samfala Aktiviti we Yu Save Mekem

• Invaetem ol pikinini blong ridim Eksodas 32:1–5, 21–24, olgetawan o tutu pikinini, mo serem wanem oli ting se Eron i sapos blong mekem taem ol laen blong Isrel oli bin askem hem blong mekem wan yang buluk we oli wokem long gol. ?Olsem wanem nao Eron i sapos blong helpem ol pipol?

• Helpem ol pikinini blong tingting long ol situesen we maet oli fesem, taem ol nara pipol oli askem olgeta blong mekem wan samting we i rong. Askem ol pikinini blong serem ol aedia wetem wanwan long olgeta abaot wanem blong mekem long ol situesen ia.

stap lanem samting pikja bokis

Stap Leftemap Tingting blong Lanem Samting long Hom

Invaetem ol pikinini blong serem eni aedia we oli harem tedei abaot wei blong kipim Sabat dei i tabu wetem famli blong olgeta.

Kam Antap long Fasin blong Yumi blong Stap Tij

Invaetem ol pikinini blong talemaot testemoni blong olgeta. Ol kwestin we yu askem i save leftemap tingting blong ol pikinini blong serem olsem wanem ol filim abaot Sevya, mo olsem wanem nao taem oli laef folem gospel i bin blesem olgeta. Taem oli mekem hemia, oli stap talemaot testemoni blong olgeta. (Luk long Teaching in the Savior’s Way, 11, 32.)

aktiviti pej: Blong stap givim ona long Sabat i wan saen blong soem lav blong mi long Lod.