bigfala hil

Wan hil we long kastom blong Ijip oli bilif se i bigfala hil ia blong Sinae.

18–24 Epril.

Eksodas 18–20

“Bambae Mifala I Mekem Olgeta Samting we Hae God I Talem”

Taem yu ridim Eksodas 18–20, tingting long ol prinsipol we bae i gat moa mining long ol pikinini. Maet yu gat insperesen blong mekem i klia wan prinsipol we i no olsem olgeta daon ia.

Raetemdaon Ol Filing mo Tingting blong Yu

serem pikja bokis

Invaetem Ol Pikinini blong Serem Wanem Oli Gat

Invaetem ol pikinini blong serem wan long Ol Ten Komanmen (o lukluk tru long sam komanmen wetem olgeta) mo from wanem oli filim se i impoten blong obei ol komanmen.

tijing pikja bokis

Tijim Doktrin: Ol Smol Pikinini

Eksodas 18:8–12

Blong stap serem testemoni blong mi i save blesem ol narafala man.

Jetro i glad taem Moses i bin serem wanem Lod i bin mekem long ol Laen blong Isrel. Stori ia i save givim insperesen long ol pikinini we yu tijim blong serem wetem ol narawan wanem we oli save se i tru.

Samfala Aktiviti we Yu Save Mekem

• Ridim long ol pikinini olgeta toktok ia aot long Eksodas 18:8: “Moses i go blong mitim olgeta, mo taem hem i luk palika blong hem nao hem i talemaot olgeta samting ya we Hae God i bin mekem blong tekemaot olgeta.” Askem ol pikinini sapos oli tingbaot wanem Lod i bin mekem blong helpem olgeta laen blong Isrel blong ronwe aot long Ijip. (Blong helpem olgeta tingbaot, soem ol pikja o ol aktiviti pej aot long ol lesen we i pas finis). ?Wanem ol samting we Lod i bin mekem blong helpem yumi? Helpem ol pikinini blong save se olsem Moses, yumi save talem long ol narafala pipol abaot ol bigfala samting we Lod i bin mekem blong yumi.

• Praemeri klas i wan gudfala ples blong ol pikinini oli praktisim blong serem wan simpol testemoni. Serem testemoni blong yu wetem olgeta mo helpem olgeta blong serem wetem wanwan long olgeta ol gospel tru tok we oli bilivim.

Eksodas 20:3–17

God i givim ol komanmen from se Hem i wantem mi blong stap hapi.

Ol Komanmen oli ol instraksen blong Papa long Heven blong faenem pis long laef ia mo glad long ol taem we i no save finis. ?Olsem wanem nao yu save leftemap tingting blong ol pikinini blong obei long ol komanmen blong God?

Samfala Aktiviti we Yu Save Mekem

• Soem ol pikja aot long “The Ten Commandments” (insaed long Old Testament Stories), mo invaetem ol pikinini blong serem wanem oli save abaot stori ia. Helpem olgeta blong oli andastanem eni pat blong stori ia we oli no bin save bifo.

• Taem yu ridim sam long ol komanmen aot long Eksodas 20:3–17 long ol pikinini (o talem long long wan wei we bae oli andastanem gud), invaetem olgeta blong putum fingga i go antap sapos komanmen ia i abaot wan samting we yumi mas mekem mo fingga i go daon sapos i no wan samting we yumi mas mekem. Serem testemoni blong yu abaot bigfala glad we i kam taem yumi stap obei ol komanmen blong God (luk long Mosaea 2:41).

• Singim wetem ol pikinini wan singsing abaot olsem wanem Papa long Heven i blesem yumi taem yumi obei ol komanmen, olsem long “Keep the Commandments” (Children’s Songbook, 146–47). Invaetem ol pikinini blong lisin long ol toktok blong faenemaot wanem ol blesing we yumi save kasem taem yumi obei.

Eksodas 20:12

Mi save ona long papa mo mama blong mi.

Blong stap ona long papa mo mama i moa bitim blong jes obei nomo long olgeta. Helpem ol pikinini blong andastanem ol nara wei we oli save ona long papa mo mama blong olgeta.

Samfala Aktiviti we Yu Save Mekem

• Helpem ol pikinini lanem sentens ia “Yufala i mas ona long papa mo mama blong yufala” (Eksodas 20:12). Sapos i gat nid, eksplenem se blong blong “ona” wan narafala man i save minim blong soem respek long olgeta o karem glad i kam long olgeta. ?Wanem nao Jisas i bin mekem blong ona long Papa blong Hem long Heven. ?Olsem wanem nao Hem i ona long mama blong Hem? (luk long Luk 2:48–51; Jon 19:26–27). Helpem ol pikinini blong tingting long ol samting we oli save mekem blong ona long papa mo mama blong olgeta, mo invaetem olgeta blong aktem ol aedia blong olgeta ia.

• Invaetem ol pikinini blong mekem wan tangkyu kad blong papa mo mama blong olgeta. Oli save raet o dro insaed long kad ia wan samting we bae oli mekem blong ona long papa mo mama blong olgeta.

tijing pikja bokis

Stap Tijim Doktrin: Ol Bigfala Pikinini

Eksodas 18:13–26

Mi save help blong “mekem ol hevi samting long solda blong yufala i nomo hevi,” blong mekem wok blong Lod.

Moses i lanem se blong traem blong lidim ol Laen blong Isrel hem wan nomo “i no gud” (Eksodas 18:17). Stap lavem mo givim seves long wanwan long yumi i save helpem karemaot ol hevi samting long solda blong ol lida blong yumi.

Samfala Aktiviti we Yu Save Mekem

• Invaetem ol pikinini blong droem plante sekol long bod blong ripresentem ol memba blong wod. Dro wan sekol we i gat toktok ia bisop. ?From wanem bae hemia i wan problem sapos ol bisop nomo oli stap helpem evriwan? Ridim tugeta Eksodas 18:13–26 blong faenemaot wanem advaes nao Jetro i givim taem Moses i stap traem blong mekem evri samting hemwan. Askem ol pikinini blong raetem nem long ol nara sekol we i ripresentem ol nara lida long wod mo ol memba we oli helpem bisop blong givim seves long ol narafala man. ?Olsem wanem ol nara lida mo ol memba oli mekem ol hevi samting long solda blong bisop i kam moa laet? ?Olsem wanem nao yumi save mekem sem samting blong ol lida blong yumi long wod? mo blong papa mo mama long hom?

• Helpem ol pikinini mekem wan lis blong ol lida long wod blong yu. Olsem wan klas, jusum wan mo toktok raon long wanem man ia i mekem blong mekem wok blong Lod mo wanem ol pikinini oli save mekem blong help.

  man we i stap sekhan wetem wan woman

  Givim seves long ol narafala pipol i wan wei yumi save helpem wok blong Lod.

Eksodas 20:1–7

Hem i impoten blong putum Lod faswan long laef blong mi.

Yumi evriwan i gat ol samting we maet i temtem yumi long laef blong yumi, blong putum olgeta i kam faswan long God. ?Olsem wanem nao yu save helpem ol pikinini blong andastanem se i minim wanem blong putum Papa long Heven i kam faswan?

Samfala Aktiviti we Yu Save Mekem

• Ridim tugeta Eksodas 20:1–7, mo eksplenem se eni samting we yumi putum faswan bifo God long laef blong yumi, bae oli olsem “ol narafala god” mo “pikja blong ol samting” we i stap long ol ves 3–4. Askem ol pikinini from wanem Papa long Heven i wantem yumi blong putum Hem faswan? ?Wanem blesing Hem i promes blong givim long yumi sapos yumi mekem? Askem ol pikinini olsem wanem yumi save soem long Papa long Heven se Hem i moa impoten bitim eni samting long laef blong yumi.

• Tingting long wan wok we fas step blong mekem i impoten, olsem blong wasem han blong yumi bifo yumi kakae o blong werem soks bifo yumi putum sus. ?Wanem i save hapen sapos yumi no mekem ol impoten samting fastaem? ?Olsem wanem hemia i olsem blong putum Papa long Heven faswan long laef blong yumi? Serem testemoni blong yu long olsem wanem taem yu putum God faswan i bin blesem yu, mo invaetem ol pikinini blong serem ol testemoni blong olgeta tu.

• Singim wan singsing abaot Papa olsem hemia “My Heavenly Father Loves Me” (Children’s Songbook, 228–29). ?Wanem nao yumi lanem aot long singsing ia mo from wanem i impoten blong putum Papa long Heven faswan long laef blong yumi?

Eksodas 20:3–17

God i givim ol komanmen from se Hem i wantem mi blong stap hapi

Ol pikinini bae oli wantem blong kipim ol komanmen moa sapos oli lukim olgeta olsem wan wei blong soem lav blong God mo olsem ol janis blong oli soem lav blong olgeta long Hem.

Samfala Aktiviti we Yu Save Mekem

• Rere long ol pis blong pepa wetem ol komanmen long Eksodas 20:3–17 long olgeta. Raetem namba wan kasem ten long bod, mo invaetem ol pikinini blong putum ol pis pepa ia long stret oda folem ol namba blong olgeta long bod. Tokbaot olsem wanem yumi save folem ol komanmen ia. Blong sam aedia, oli save lukluk long Gospel Topics article “Ten Commandments” (topics.ChurchofJesusChrist.org).

• Invaetem ol pikinini blong droem ol pikja blong ol ki toktok aot long ol komanmen blong helpem olgeta blong tingbaot olgeta komanmen ia.

• Talem stori abaot Chloe we i kam long mesej blong Sista Carole M. Stephens “If Ye Love Me, Keep My Commandments” (Liahona, Nov. 2015, 118–20). ?Olsem wanem stori ia i helpem yumi andastanem from wanem Lod i givim ol komanmen long yumi? ?Olsem wanem taem yumi stap obei i soem lav blong yumi long God?

stap lanem samting pikja bokis

Stap Leftemap Tingting blong Lanem Samting long Hom

Invaetem ol pikinini blong tingting long wan samting we oli laekem blong mekem from we oli bin lanem long klas. Helpem olgeta blong mekem wan simpol rimaenda blong wanem bae oli mekem blong oli save tekem i go hom.

Stap Kam Antap long Fasin blong Yumi blong Stap Tij

Helpem ol pikinini blong luksave Spirit. Ol pikinini oli save luksave paoa blong Spirit. Tijim olgeta se ol filing blong pis, lav, mo wom filing we oli filim taem oli stap tokbaot o singsing abaot Jisas Kraes mo gospel blong Hem i kam long Tabu Spirit.

aktiviti pej: Mi save obei ol komanmen