“4–10 Epril. Eksodas 14–17: ‘!Yufala i mas stanap strong! Tedei Bambae Yufala I Luk Ol Samting we Hae God Bambae I Mekem blong Sevem Yumi,’” Kam Folem Mi—Blong Praemeri: OlTesteman 2022 (2021)
“4–10 Epril. Eksodas 14–17” Kam Folem Mi—Blong Praemeri: 2022
Hemia Red Si
4–10 Epril.
Eksodas 14–17
“!Yufala i mas stanap strong! Tedei Bambae Yufala I Luk Ol Samting we Hae God Bambae I Mekem blong Sevem Yumi”
Taem yu ridim Eksodas 14–17, raetemdaon ol filing mo tingting blong yu long saed blong spirit. Ol filing ia bae i helpem yu blong mekem plan blong tijim ol skripja mo ol trutok we yu lanem long ol pikinini.
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Eksodas 14–17 i fulap long ol stori we i gat memori. Invaetem ol pikinini blong serem wan stori we oli save aot long ol japta ia, folem wetem samting we oli lanem aot long stori ia.
Tijim Doktrin: Ol Smol Pikinini
Lod i tekemaot Moses mo ol pipol blong hem.
Blong divaedem Red Si i wan merikel we i bin soem Moses mo Laen blong Isrel bigfala paoa blong Lod. Blong save abaot paoa blong Hem i save helpem ol pikinini blong trastem Hem.
Samfala Aktiviti we Yu Save Mekem
-
Tingting long ol wei blong serem stori blong ol Laen blong Isrel we oli stap krosem Red Si long wan wei we i pulum tingting blong olgeta mo oli no save fogetem. Eksampol, yu o wan memba blong nara wod i save werem ol klos olsem Moses blong talem stori aot long Eksodas 14:5, 9–10, 13–16, 19–22. Ol pikinini oli save putum ol jea tugeta olsem Red Si, mo oli save folem man we i werem ol klos blong Moses ia taem we hem i stap mekem wan rod long medel blong ol jea ia. O, ol pikinini oli save mekem olsem se olgeta nao wota mo muv i go long tufala saed blong rum olsem we Moses i seperetem olgeta. Tokbaot bigwan se Lod i bin givim paoa long Moses blong divaedem wota mekem se ol Laen blong Isrel oli save kamaot long kalabus.
-
Invaetem ol pikinini blong kalarem aktiviti pej taem yu stap go tru wetem olgeta stori long Eksodas 14:5–22. Afta oli save wok tugeta blong talem stori mo yusum aktiviti pej.
Eksodas 15:23–25; 16:14–15; 17:1–6
Lod bae i lukluk long ol nid blong mi.
Ol stori blong Lod we i stap givim kaekae mo wota blong ol Laen blong Isrel long waelples i tijim yumi se Hem i save lukluk long ol nid blong yumi. Tingting Hevi long wanem yu save mekem blong ol pikinini oli pat blong lanem ol stori ia.
Mana we i kam long God i fidim Isrel long saed blong bodi; Yumi tu yumi nidim evri dei kaekae long saed blong spirit. Peinting i kam long Leopold Bruckner
Samfala Aktiviti we Yu Save Mekem
-
Helpem ol pikinini aktem ol impoten samting we i hapen insaed long Eksodas 15:23–25; 16:14–15; 17:1–6, mo mekem olsem Moses o ol Laen blong Isrel. Sapos i posibol, karem wan samting blong helpem yu taem yu tijim wanwan stori, olsem wan branj blong tri (blong hilim wota long Mara), wan jag o sospen ( blong fulap mana insaed), mo wan wud mo ston (blong wota long Horeb). ?Olsem wanem nao God i lukaot gud long ol Laen blong Isrel? ?Olsem wanem nao Hem i lukaot long yumi evri dei?
-
Talem i sot ol stori insaed long Eksodas 15:23–25; 16:14–15; 17:1–6 (luk tu long “Moses Leads Israel,” insaed long Old Testament Stories). Taem yu stap serem hemia, invaetem ol pikinini blong dro ol pikja blong wanwan stori. ?Wanem nao yu lanem abaot God long ol stori ia?
Mi save sapotem profet blong yumi.
Stori blong Eron mo Huru, tufala i stap holem han blong profet Moses antap i semmak olsem ol efot blong yumi blong sapotem profet blong yumi we i stap laef
Samfala Aktiviti we Yu Save Mekem
-
Invaetem tri pikinini blong stanap long fored blong rum mo ripresentem Moses, Eron, Huru, taem bae yu stap talem stori aot long Eksodas 17:8–16. ?Wanem nao yumi save mekem tedei blong helpem profet blong yumi, semmak olsem Eron mo Huru i bin helpem profet Moses?
-
Soem wan pikja blong profet we i stap laef, mo askem ol pikinini blong talem huia hem? Helpem ol pikinini blong tingbaot sam long ol samting we profet i bin tijim yumi i no longtaem i pas. Askem long ol pikinini blong tokbaot sam samting we oli luk long ol pikja ia. Singim tugeta sam ves long singsing ia “Follow the Prophet,” wetem las ves tu (Children’s Songbook, 110–11).
Stap Tijim Doktrin: Ol Bigfala Pikinini
Mi save lanem blong oltaem folem Spirit.
Moses i bin save tru long revelesen olsem wanem blong lidim ol Laen blong Isrel i krosem Red Si (luk long Doktrin mo Ol Kavenan 8:2–3). ?Olsem wanem nao stori ia i save helpem ol pikinini we yu tijim blong lanem blong tekem aksen folem revelesen?
Samfala Aktiviti we Yu Save Mekem
-
Soem pikja blong Moses we i divaedem Red Si insaed long aotlaen blong wik ia long Kam Folem Mi—Blong Wanwan Man, Woman mo Famli. Askem ol pikinini blong lukluk tru long Eksodas 14:5–22 mo serem wan samting we oli save abaot stori ia. ?Wanem nao Doktrin mo Ol Kavenan 8:2–3 i ademap long save blong yumi abaot stori ia? Talem abaot wan eksperiens taem we Tabu Spirit i talem wan samting long maen o hat blong yu, mo invaetem ol pikinini blong serem ol eksperiens blong olgeta.
-
Rimaenem ol pikinini long stori blong Nifae we i bin folem Spirit, taem hem i go blong karem ol buk we oli mekem wetem bras (luk long 1 Nifae 4:1–6). Helpem ol pikinini blong luk se Moses tu i mas folem Spirit taem hem i lidim ol pipol blong hem oli krosem Red Si. Helpem ol pikinini raetem wan niu ves we i go wetem singsing ia “Nephi’s Courage” (Children’s Songbook, 120–21) abaot olsem wanem Lod i provaedem wan wei long Moses taem hem i soem strong paoa long tingting mo folem Spirit. Singim niufala ves ia tugeta.
Eksodas 15:23–25; 16:14–15; 17:1–6
Lod bae i lukluk long ol nid blong mi.
Sapos yumi luk long Jisas Kraes, bae Hem i helpem yumi long ol had taem long laef blong yumi, olsem we Hem i bin helpem ol pikinini blong Isrel.
Samfala Aktiviti we Yu Save Mekem
-
Divaedem ol pikinini, tu long wan grup o ol smol grup, mo askem long wanwan grup ridim wan sentens long: Eksodas 15:23–25; 16:14–15; 17:1–6. Askem ol pikinini long wanwan grup blong dro ol pikja we i ripresentem wanem oli ridim long ol ves ia, mo afta askem ol nara memba blong klas blong talemaot wanem ia oli droem. Helpem ol pikinini talemaot wanem nao ol stori ia oli tijim abaot Jisas Kraes. ?Wanem nao ol tes blong laef we oli pipol oli stap fesem tedei? ?Olsem wanem nao Papa long Heven mo Jisas Kraes i helpem yumi wetem ol tes blong laef blong yumi?
-
Taem yu stap lukluk tru long ol stori ia, askem ol pikinini from wanem bred mo wota i impoten tumas long olgeta Laen blong Isrel. ?Wanem bae i hapen sapos oli no bin gat ol samting ia? Helpem ol pikinini blong andastanem se bred mo wota blong sakramen oli impoten long yumi long saed blong spirit (luk long Jon 4:13–14; 6:35, 48–51). Yu save askem ol pikinini blong serem ol filing blong olgeta abaot sakramen.
Yumi gat blesing taem yumi stap sapotem ol Jos lida blong yumi.
Olgeta Laen blong Isrel oli bin win long faet agensem Amalek nomo taem Moses i leftemap han blong hem i go antap long ea. ?Wanem nao yumi lanem abaot fasin blong stap leftemap han blong sapotem ol lida blong yumi long stori ia?
Samfala Aktiviti we Yu Save Mekem
-
Blong helpem ol pikinini lukluk tru long stori insaed long Eksodas 17:8–16, raetem long Bod ol toktok ia: ?Huia i helpem Moses long taem blong faet? ?Wanem nao oli mekem? ?Wanem nao risal? Invaetem ol pikinini blong lukaotem ol ansa long ol ves ia. ?Wanem nao stori ia i tijim abaot olsem wanem yumi save helpem Kingdom blong God i gat sakses? ?Wanem nao yumi save mekem blong sapotem, sastenem mo folem ol Jos lida?
-
Invaetem ol pikinini blong ridim Eksodas 17:8–16 mo droem pikja blong wanem oli ridim. Leftemap tingting blong olgeta blong raetem long ol droing blong olgeta wan mesej we oli lanem aot long stori. ?From wanem hemia i wan impoten mesej blong yumi tedei?
Stap Leftemap Tingting blong Lanem Samting long Hom
Invaetem ol pikinini blong jusum wan long ol stori we oli bin toktok raon long olgeta tedei. Helpem ol pikinini blong tingting long wan samting we oli save mekem nekis wik blong save praktisim wanem we stori i stap tijim.
Stap Kam Antap long Fasin blong Yumi blong Stap Tij
Ol pikinini oli lavem ol stori. Ol pikinini oli save andastanem gud ol gospel prinsipol taem oli luk olgeta prinsipol ia long laef blong ol ril pipol. Taem yu serem ol skripja stori,tingting blong stap serem ol eksperiens long laef blong yu we i tijim ol semmak prinsipol. Yu save invaetem ol pikinini tu blong serem ol eksperiens blong olgeta.