“11–17 Epril. Ista: ‘Hae God Bambae I Mekem we Ded Bambae I Go Lus Olgeta,’” Kam, Folem Mi—Blong Praemeri: OlTesteman 2022 (2021)
“11–17 Epril. Ista,” Kam Folem Mi—Blong Praemeri: 2022
Pikja droing blong hol blong ston ia we i emti we i kam long Maryna Kriuchenko
11–17 Epril
Ista
“Hae God Bambae I Mekem we Ded Bambae I Go Lus Olgeta”
Taem yu stap rere blong tij, tingting hevi long olsem wanem yu save helpem ol pikinini blong kasem wan save we i dip mo wan testemoni long Atonmen blong Jisas Kraes.
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Askem ol pikinini se wanem nao ol famli blong olgeta oli mekem blong selebretem Ista. ?Wanem nao oli stap mekem blong tingbaot Laef Bakegen long Ded blong Jisas Kraes?
Tijim Doktrin: Ol Smol Pikinini
Jisas Kraes Hem I Sevya blong Mi.
Ista Sandei i wan gud taem blong tijim ol pikinini abaot Atonmen blong Sevya long Getsemane mo ded blong Hem long kros. Hemia i save helpem olgeta blong oli filim lav ia we Sevya i gat long olgeta.
Samfala Aktiviti we Yu Save Mekem
-
Soem ol pikja blong Sevya insaed long aotlaen blong wik ia insaed long Kam, Folem Mi—Blong Wanwan Man, Woman mo Famli o ol nara pikja blong sakrifaes blong Sevya (luk long Gospel Art Buk, ol namba 56, 57, 58), mo askem ol pikinini blong serem wetem yu wanem oli save abaot ol defren taem ia we i stap long ol pikja ia. Talem long ol pikinini abaot taem we Jisas i safa long Getsemane mo long kros (luk long Matiu 26:36–46; 27:35–50; Luk 22:39–46; Jon 19:16–30; “Japta 51: Jisas I Safa long Garen blong Getsemane,”insaed long Ol Niu Testeman Stori, 129–32). Serem testemoni blong yu se, Jisas i bin agri mo glad blong safa mo ded from yumi from Hem i lavem yumi. Invaetem ol pikinini blong serem olsem wanem nao oli stap filim abaot Jisas Kraes.
-
Ridim Jon 10:9 i go long ol pikinini, mo mekem i klia gud ol toktok blong Jisas “Mi nao, get ya.” From Jisas i safa from ol sin blong yumi, i ded, mo i girap bakegen long ded, Hem i bin mekem se wanwan long yumi i save go stap wetem God bakegen. Yusum doa blong klasrum blong yu blong tijim se Jisas i olsem wan doa we i letem yumi blong pas tru blong gobak long Papa long Heven.
-
Ridim Aesea 53:6 i go long ol pikinini, mo soem long olgeta wan pikja o droing blong wan sipsip. Letem wan long ol pikinini i putum pikja ia long wan kona long en blong rum. Eksplenem se taem yumi mekem ol rong joes, yumi stap go longwe long Papa long Heven olsem wan sipsip we i stap go lus. Afta invaetem wan pikinini blong karem i kambak sipsip ia, mo serem testemoni blong yu se from Jisas Kraes i bin safa mo ded from yumi, Hem i save karembak yumi i go long Papa long Heven. (Yu save soem wan pikja blong Jisas olsem wan man blong lukaot sipsip olsem pikja 64 insaed Gospel Art Buk.)
-
Singim tugeta wan singsing abaot Jisas Kraes olsem “I Feel My Savior’s Love” (Children’s Songbook, 74–75). Helpem olgeta luksave eni filing blong pis mo lav taem oli stap singsing. Mo tu poenemaot ol toktok insaed long singsing ia we i tokbaot lav blong Sevya. ?Olsem wanem nao yumi save serem lav blong Hem wetem ol narafala man?
Jisas i bin ded mo i bin laef bakegen long ded from mi.
?Olsem wanem nao yu save helpem ol pikinini i lanem se from Laef Bakegen long Ded blong Jisas Kraes, yumi mo olgeta we yumi lavem bae yumi save girap bakegen long ded sam dei?
Gray Day Golgotha, i kam long J. Kirk Richards
Samfala Aktiviti we Yu Save Mekem
-
Talem long ol pikinini abaot ded mo Laef Bakegen long Ded blong Jisas (luk long Mak 15–16). Yusum ol pikja long aotlaen blong wik ia, ol pikja 57–60 insaed long Gospel Art Buk, o “Japta 54: Jisas I Bin Girap Bakegen” insaed long Ol Niu Testeman Stori (ol pej139–44) blong helpem ol pikinini i save gat pikja blong stori ia.
-
Helpem ol pikinini i andastanem se laef bakegen long ded i minim se afta we yumi ded, bae yumi laef bakegen blong oltaem wetem bodi blong mit mo bun we i stret gud evriwan mo bae i nomo save ded bakegen. Serem testemoni blong yu abaot Laef Bakegen long Ded, mo letem ol pikinini i wok long aktiviti pej blong wik ia. Invaetem ol pikinini blong yusum aktiviti pej blong wik ia blong serem wetem ol famli blong olgeta stori blong Laef Bakegen long Ded blong Jisas.
-
Ridim Alma 4:23 wetem ol pikinini. Soem long olgeta han blong yu insaed long hanglav. Talem long olgeta se han blong yu i olsem wan spirit mo hanglav i olsem wan bodi blong mit mo bun. Tekemaot hanglav blong soem se taem yumi ded, spirit blong yumi i lego bodi blong yumi. Putumbak hanglav blong soem Laef Bakegen long Ded.
-
Singim wan singsing abaot Laef Bakegen long Ded blong Jisas Kraes, olsem “Did Jesus Really Live Again?”o “Jesus Has Risen” (Children’s Songbook, 64, 70). Serem testemoni blong yu se from Jisas Kraes, bae yumi save laef bakegen mo gat ol bodi we i stret evriwan afta we yumi ded.
Stap Tijim Doktrin: Ol Bigfala Pikinini
Jisas Kraes i bin safa from mi.
Taem yu stadi Atonmen blong Sevya, tingting hevi long olsem wanem yu save helpem ol pikinini andastanem olsem wanem Sevya i save blesem mo mekem olgeta i kam strong moa.
Samfala Aktiviti we Yu Save Mekem
-
Seraotem ol pikinini i go long tri grup, mo givim ol skripja ia long wanwan grup: Aesea 53:4–12; Alma 7:11–13; mo Doktrin mo Ol Kavenan 19:16–19. Invaetem ol pikinini blong lukaotem ol toktok we i tokbaot ol samting we Jisas Kraes i safa from. Askem olgeta blong raetemdaon ansa blong olgeta long bod, mo serem olsem wanem oli filim abaot Sevya afta we oli ridim ol skripja ia.
-
Rere ol pepa we oli katem Haf long ol pepa ia, raetem ol profesi insaed ol skripja long OlTesteman abaot Jisas Kraes. Long nara haf, raetem ol sapot skripja insaed Niu Testeman abaot olsem wanem ol profesi ia oli fulfil. (Aaotlaen blong wik ia insaed long Kam, Folem Mi—Blong Wanwan Man mo Wanwan Woman mo Famli Mekem lis blong sam eksampol.) Invaetem ol pikinini blong ridim ol ves mo putum stret wetem ol profesi we oli fulfil.
-
Helpem ol pikinini blong lanem baehat nambatri toktok blong bilif. ?Wanem nao skripja ia i stap tijim yumi abaot Atonmen blong Jisas Kraes mo plan blong Papa long Heven blong ol pikinini blong Hem?
-
Askem ol pikinini olsem wanem nao oli save tokbaot Atonmen blong Jisas Kraes long wan narawan. Leftemap tingting blong olgeta blong yusum ol skripja, ol hym, o ol pikja blong soemaot se atonmen mo sakrifaes blong Sevya i minim wanem long olgeta. ?Olsem wanem yumi kasem blesing from Atonmen Jisas Kraes?
Jisas i bin ded mo i bin laef bakegen long ded from mi.
Trutok ia abaot Laef Bakegen long Ded blong Jisas Kraes i save givim yumi bigfala hop mo glad—speseli taem yumi eksperiensem ded blong wan we yumi lavem. ?Olsem wanem nao yu save helpem ol pikinini blong faenem kamfot long Laef Bakegen long Ded?
Samfala Aktiviti we Yu Save Mekem
-
Soem ol pikja 57–59 insaed long Gospel Art Buk. Askem ol pikinini blong putum stret ol pikja ia wetem ol skripja ia: Matiu 27:29–38; Matiu 27:59–60; mo Jon 20:10–18. Invaetem ol pikinini blong oli stori abaot taem we Jisas i ded, taem oli putum Hem insaed hol blong ston, mo taem Hem i Laef Bakegen long Ded.
-
Ridim Job 14:14 wetem ol pikinini. Invaetem ol pikinini blong serem olsem wanem oli save ansarem kwestin blong Job. Helpem olgeta blong faenem ol skripja we i testifae long Laef Bakegen long Ded (luk long Gaed long Ol Skripja, “Laef Bakegen long Ded,” olskripja.ChurchofJesusChrist.org).
-
Ridim Moses 1:39 wetem ol pikinini. Askem long olgeta sapos oli save olsem wanem “bodi we i nomo save ded” mo “laef we i no save finis” i defdefren. Invaetem olgeta blong lukaotem ol ansa long fas paragraf blong “Eternal Life” (Gospel Topics, topics.ChurchofJesusChrist.org). ?Huia nao bae i kasem bodi we i nomo save ded? ?Wanem nao man i nidim blong kasem laef we i no save finis? Serem testemoni blong yu se tufala spesel presen ia tugeta i stap tedei from Atonmen blong Jisas Kraes.
-
Singim tugeta wan Ista singsing o hym olsem “He Sent His Son” (Children’s Songbook, 34–35) o “He Is Risen!” (Hymns, namba 199). Invaetem ol pikinini blong serem olsem wanem nao oli filim taem oli singim ol singsing ia. ?Wanem nao ol singsing ia i stap tijim yumi abaot Papa long Heven mo Jisas Kraes? Invaetem ol pikinini blong raetem ol testemoni blong olgeta abaot Sevya mo serem long hom wetem ol famli blong olgeta.
Stap Leftemap Tingting blong Lanem Samting long Hom
Blong helpem ol pikinini blong serem wetem ol famli blong olgeta wanem oli bin lanem long klas, leftemap tingting blong olgeta blong singim wan singsing long hom long wiken ia abaot Atonmen blong Jisas Kraes.
Stap Kam Antap long Fasin blong Yumi blong Stap Tij
Ol pikinini oli save luksave paoa blong Spirit. Tijim ol pikinini se ol filing we oli gat taem oli tokbaot o singim abaot Jisas Kraes mo gospel blong Hem i kam long Tabu Spirit mo we ol filing ia i save bildimap ol testemoni blong olgeta.