Pikja blong hol blong ston ia we i emti i kam long Maryna Kriuchenko

5–11 Epril

Ista

“Hem Bambae I Mekem we Ded Bambae I Go Lus Olgeta”

Taem we yu stap rid mo tingting hevi long Atonmen blong Sevya long wik ia, tingting blong raetemdaon ol tingting mo filing blong yu abaot sakrifaes blong Hem long jenol blong yu o long spes we oli provaedem long aotlaen ia.

Raetemdaon Ol Filing mo Tingting blong Yu

Laef blong Jisas Kraes “i stamba blong histri blong ol man” (“Kraes we I Laef: Testemoni blong Olgeta Aposol,” ChurchofJesusChrist.org). ?Hemia i minim wanem? Long pat ia, i minim se laef blong Sevya i plei wan bigfala pat blong kasem rod ia we i no save finis long evri man we oli stap laef long wol o bae oli kam yet blong laef long hem. Yu maet talem tu se laef mo misin blong Jisas Kraes,kasem long taem blong laef bakegen long ded blong Hem long Ista Sandei ia, i konektem evri pipol blong God truaot long histri. Olgeta we oli bon bifo Kraes oli lukluk i go fored mo wet long Hem wetem fet.(luk long Jekob 4:4), mo olgeta we oli bon afta oli lukluk i go bak mo tingbaot Hem wetem fet. Taem we yumi stap ridim ol stori mo profesi long OlTesteman, yumi neva luk nem blong Jisas Kraes, be yumi luk pruf blong fet blong olgeta blong bifo we oli gat fet long mo wet blong luk Mesaea mo Ridima blong olgeta. Mekem se yumi we oli invaetem blong tingbaot Hem, yumi save filim wan koneksen wetem olgeta we oli lukluk i go fored mo wet long Hem. From i tru Jisas Kraes i karem “ol sin blong yumi evriwan” (Aesea 53:6; italik oli ademap), mo “olgeta man we i joen long Kraes oli save laef bakegen long ded ”(1 Korin 15:22; italik oli ademap).

Ol Aedia blong Skripja Stadi blong Yuwan

OlTesteman i testifae long sakrifaes blong Sevya we i pem praes blong sin.

Plante skripja long OlTesteman i poenemaot seves blong Sevya mo sakrifaes blong Hem we i pem praes blong sin. Tebol daon ia i soem sam skripja ia. Taem we yu ridim ol ves ia, ?Wanem tingting i kam long maen blong yu abaot Sevya?

OlTesteman	Niu Testeman
OlTesteman Sekaraea 9:9	Niu Testeman Matiu 21:1–11
OlTesteman Sekaraea 11:12-13	Niu Testeman Matiu 26:14–16
OlTesteman Aesea 53:4 .	Niu Testeman Matiu 8:16–17; 26:36–39
OlTesteman Aesea 53:7.	Niu Testeman Mak 14:6, 8;
OlTesteman Ol Sam 22:16	Niu Testeman Jon 19:17–18; 20:25–27
OlTesteman Sam 22:18	Niu Testeman Matiu 27:35
OlTesteman Ol Sam 69:21	Niu Testeman Matiu 27:34,48
OlTesteman Ol Sam 118:22	Niu Testeman Matiu 21:42
OlTesteman Aesea 53:9,12	Niu Testeman Matiu 27:57–60; Mak 15:27–28
OlTesteman Aesea 25:8	Niu Testeman Mak 16:1–6; Luk 24:6
OlTesteman Daniel 12:2	Niu Testeman Matiu 27: 52– 53

Ol profesi mo ol tijing abaot Sevya oli fulap mo oli klia insaed long Buk long Momon. Tingting long hao nao fet blong yu i kam strong tru long ol skripja olsem olgeta ia: 1 Nifae 11:31–33; 2 Nifae 25:13; Mosaea 3:2–11.

Mi save faenem pis mo glad tru long Atonmen blong Sevya.

Truaot taem, Jisas Kraes, tru long sakrifaes blong Hem we i pem praes blong sin, i givim pis mo glad i go long olgeta we oli go long Hem (luk long Moses 5:9–12). Tingting blong stadi olgeta skripja ia we oli testifae long pis mo glad we Hem i givim, mo taem yu mekem, tingting long olsem wanem yu save kasem pis mo glad ia we Hem i karem i kam: Ol Sam 16:8–11; 30:2–5; Aesea 12; 25:8–9; 40:28–31; Jon 14:27; 16:33; Alma 26:11–22.

Luk long Dallin H. Oaks, “Kam Strong Moa Tru long Atomen blong Jisas Kraes,” Jeneral Konfrens, Okt 2015; Sharon Eubank, “Kraes: Laet Ia we I Stap Saen long Tudak,” Liahona, Mei 2019, 73–76; “Mi Sapraes Tumas we Jisas I Lavem Mi,” STSP no. 22.

Grei Dei long Golgota, i kam long J. Kirk Richards

Tru long Atonmen blong Hem, Jisas Kraes i gat paoa blong helpem mi blong winim sin, ded, ol hadtaem mo ol wiknes.

Truaot long olgeta skripja, ol profet oli testifae se Jisas Kraes i gat paoa blong sevem yumi aot long sin mo ded mo blong helpem yumi winim olgeta hadtaem blong yumi mo ol wiknes blong yumi. ?Olsem wanem nao Kraes i mekem wan samting i defren long laef blong yu? ?From wanem Hem i impoten long yu? Tingting hevi long ol kwestin taem yu stap ridim ol ves ia, mo raetemdaon ol tingting mo filing blong yu abaot Sevya.

• Aesea 61:1– 3

• Esikel 36:26–28

• Matiu 11:28–30

• Luk 1:46–55

• Rom 8:35 –39

• Alma 7:10–13

• Alma 11:42 –45

• Alma 58:11

• Moronae 10:32–33

• Doktrin mo Ol Kavenan 19:15–19

• Moses 5:9 –12

Luk tu long Walter F. González, “Hiling Han blong Sevya,” Liahona, Nov 2019, 90– 92.

Sam Aedia blong Famli Skripja Stadi mo Haos Naet

Eksodas 12:1–28Taem yu stap selebretem Ista, famli blong yu i save lukluk bak long wanem yu lanem abaot Pasova long stat blong manis ia. ?From wanem i impoten se sakrifaes blong Sevya i hapen long sem taem olsem long hemia blong Pasova?

Blong sot storian long wanem i hapen long las wik long laef blong Sevya, luk long “Holy Week” long ComeuntoChrist.org/2016/easter/easter-week. Blong ol skripja abaot wanem i hapen long las wik blong Sevya, luk long “The Last Week: Atonement and Resurrection” insaed long Harmony of the Gospels (insaed long Bible appendix).

Aesea 53.Sapos yufala i ridim ol profesi abaot Jisas Kraes long Aesea 53 i save helpem ol famli memba blong oli andastanem sakrifaes blong Sevya we i pem praes blong sin. ?Wijwan long ol ves o ol toktok famli blong yu i save faenem we i gat moa paoa? Tingting blong gat wan famli testemoni we bae yu save serem ol testemoni blong yufalawan abaot atonmen blong Sevya.

“Ol Spesel Witnes blong Kraes.”Gospel Laebri ap mo ChurchofJesusChrist.org i gat wan koleksen vidio we oli singaotem “Special Witnesses of Christ,” we wanwan long ol memba blong Fas Presidensi mo Kworom blong Olgeta Twelef Aposol i serem spesel witnes blong hem abaot Jisas Kraes. Ating famli blong yu i save wajem sam long ol vidio ia mo tokabaot wanem yu lanem abaot Jisas Kraes tru long ol wok man blong Hem we Hem i jusum. Olsem wan famli, tokbaot ol wei we yu save serem witnes blong yu abaot Kraes. Eksampol, yu save invaetem wan man blong kam wosip wetem yu long Jos long Ista Sandei ia.

Singsing Tabu mo Singsing blong Pikinini Miusik i wan wei we i gat moa paoa blong tingbaot Sevya mo invaetem Spirit i kam long haos blong yumi. Ol memba blong famli i save serem o singsing tugeta ol hym o singsing abaot Ista o abaot Jisas Kraes, olsem “Christ the Lord Is Risen Today” (Hymns, no. 200) o “Did Jesus Really Live Again?” (Children’s Songbook,64). Blong faenem ol narafala hym o ol singsing blong praemeri, lukaotem long topik indeks blong Hym mo Children’s Songbook.

Blong gat moa aedia blong stap tijim ol pikinini, luk long aotlaen blong wik ia insaed long Kam Folem Mi—Blong Praemeri.

Wan singsing: “Did Jesus Really Live Again?” Children’s Songbook, 64.

Stap Kam Antap long Fasin blong Yumi blong Stap Tij

Laef folem gospel blong Jisas Kraes. “Blong kam wan tija we i olsem Kraes [long haos blong yu], ating samting we i moa impoten lon yu i blong … laef folem gospel wetem ful hat blong yu. … Hemia i bes wei blong kwalifae blong gat Tabu Spirit olsem kompanion blong yu. Yu no nid blong yu stret evriwan, jes gohed blong traem wetem tru tingting—mo askem fogivnes tru long Atonmen blong Sevya eni taem yu foldaon” (Teaching in the Savior’s Way, 13).

Mi Mi Kam From Stamba Tingting Ia Nao, i kam long Yongsung Kim