“28 Maj–3 Epril. Eksodas 7–13: ‘Bambae Yumi Mas Tingbaot Dei we Yumi Aot long Ijip,’” Kam Folem Mi—Blong Wanwan Man, Woman mo Famli: OlTesteman 2022 (2021)
“28 Maj–3 Epril. Eksodas 7–13,” Kam Folem Mi—Blong Wanwan Man, Woman mo Famli: 2022
Pikja droing blong Moses mo Eron insaed long ples blong miting blong King blong Ijip, i kam long Robert T. Barrett
28 Maj–3 Epril
Eksodas 7–13
“Bambae Yumi Mas Tingbaot Dei we Yumi Aot long Ijip”
So taem yu stap ridim mo tingting hevi long Eksodas 7–13, raetemdaon ol tingting mo filing we oli kam long yu. Taem yu stap mekem hemia oltaem, bae paoa blong yu blong luksave ol kwaet toktok blong Tabu Spirit, bae i kam antap
Raetemdaon Ol Filing mo Tingting blong Yu
Ol bigfala panis we oli folfolem olgeta oli spolem Ijip, be King blong Ijip i no wantem nating blong lego Ol Man Isrel oli go fri. Be yet, God i bin gohed blong soemaot paoa blong Hem mo givim long King blong Ijip ol janis blong hem i akseptem se “mi mi Hae God” mo “blong mekem yu yu save we i no gat narafala god nating long wol ya we i olsem mi” (Eksodas 7:5; 9:14). Taem we hemia i stap hapen, Moses mo Ol Man Isrel oli mas stap lukluk wetem sapraes evriwan long ol wei we God i soemaot paoa blong Hem long bihaf blong olgeta. I tru, ol saen ia we oli bin gogohed oli bin konfemem strong bilif blong olgeta long God mo oli bin gat strong tingting blong wantem folem profet blong God. Nao, afta we naen bigfala panis i no save mekem Ol Man Isrel oli go fri, nambaten bigfala panis i kam—we i ded blong ol fasbon, wetem fasbon blong King blong Ijip—mo hemia i bin en blong fasin blong olgeta blong stap olsem prisena. I luk se hemia i oraet from se long evri kes we man i prisena long saed blong spirit, i rili gat wan wei nomo blong save ronwe. I nomata wanem bakegen yumi bin traem bifo, hemia i stap wetem yumi semmak olsem we i bin stap wetem ol pikinini blong Isrel. Hem i sakrifaes nomo blong Jisas Kraes, we i Fasbon—blad blong Smol Sipsip we i no gat mak—we bae i sevem yumi.
Ol Aedia blong Skripja Stadi blong Yuwan
Mi save jusum blong mekem hat blong mi i stap daon.
Hop i stap se, tingting blong yu, bae i neva agensem bigwan tingting blong God, olsem we King blong Ijip i bin mekem. Be yet, yumi gat ol taem we hat blong yumi i no stap daon tumas olsem we i sapos blong hapen, mekem se i gat wan samting blong lanem aot long ol aksen blong King blong Ijip we oli rekodem long Eksodas 7–10. Taem yu stap rid abaot ol bigfala panis long ol japta ia, ?wanem i kamaot klia long yu abaot ol ansa we king blong Ijip i bin givim? ?Yu yu luk sam samting we oli semsemmak long wei we yu stap mekem hat blong yu i stap strong? Tingting hevi long wanem yu stap lanem aot long ol japta ia abaot wanem i mining blong gat wan hat we i stap daon.
Tekem not se Josef Smit Translesen blong Eksodas 7:3, 13; 9:12; 10:1, 20, 27; 11:10 i mekem i klia se Lod i no bin mekem hat blong king blong Ijip i kam strong—king blong Ijip hemwan i mekem hat blong hem i kam strong moa (luk long ol futnot blong wanwan ves).
?Wanem nao yu lanem aot long olgeta skripja ia abaot fasin blong stap kam blong gat wan hat we i stap daon? 1 Nifae 2:16; Mosaea 3:19; Alma 24:7–8; 62:41; Ita 12:27.
Luk tu long Michael T. Ringwood, “An Easiness and Willingness to Believe,” Liahona, Nov. 2009, 100–102.
Pasova i simbol blong Atonmen blong Jisas Kraes.
Wan wei ia nomo blong Ol Man Isrel oli fri long nambaten bigfala panis ia, oli tokbaot long Eksodas 11:4–5, mo oli mas folem stret evriwan instraksen we Lod i bin givim long Moses long Eksodas 12, we i wan seremoni we oli save olsem Pasova. Pasova i stap tijim yumi tru long ol simbol, se, semmak olsem we Lod i bin mekem Ol Man Isrel oli kam fri long fasin blong slef long Ijip, Hem i save mekem yumi kam fri tu long fasin blong stap slef long sin. ?Wanem nao yu faenem insaed long ol instraksen mo simbol blong Pasova we i mekem yu yu tingbaot Jisas Kraes mo Atonmen ia blong Hem? ?Wanem nao ol simbol mo instraksen ia oli talem long yu abaot wei blong kasem ol blesing blong Atonmen blong Hem? Eksampol: blong stap putum blad blong smol sipsip long ol pos blong doa ?i ripresentem wanem? (ves 7). ?Hem i minim wanem blong “yufala i mas putum ol klos blong wokbaot, wetem sandel blong yufala, mo yufala i mas karem stik blong wokbaot long han blong yufala” (ves 11).
Luk tu long Doktrin mo Ol Kavenan 89:21.
Sakramen i helpem yumi blong tingbaot Man we I Sevem yumi, Jisas Kraes.
Eksodas 12:14–17, 24–27; 13:1–16
Sakramen i helpem mi blong tingbaot we mi mi kam fri tru long Jisas Kraes.
Sevya i bin wantem blong Ol Man Isrel oli oltaem tingbaot se Hem i bin sevem olgeta, iven afta we fasin blong oli stap prisena i pas mo i kam olsem wan memori. From hemia nao Hem i bin givim komanmen long yumi blong stap folem lafet blong Pasova evri yia. Taem yu stap ridim instraksen blong Hem long Eksodas 12:14–17, 24–27; 13:1–16, tingbaot wanem yu stap mekem blong tingbaot ol blesing we God i bin givim long yu. ?Olsem wanem yu save gohed blong tingbaot hemia “truaot long ol jeneresen blong yu”? (luk long Eksodas 12:14, 26–27).
?Wanem semmak samting nao yu luk bitwin ol stamba tingting blong lafet blong Pasova mo sakramen? ?Long wanem wei nao, taem yu rid abaot Pasova, i rimaenem yu long sakramen mo i tekem moa mining long odinens ia? Tingting long wanem yu save mekem blong “oltaem tingbaot” Jisas Kraes (Moronae 4:3; 5:2; luk tu long Luk 22:7–8, 19–20).
Mo tu, yu maet tingting hevi long ol nara samting we Lod i wantem yu blong tingbaot; eksampol, Hileman 5:6–12; Moronae 10:3; Doktrin mo Ol Kavenan 3:3–5, 10; 18:10; 52:40.
Luk tu long Jon 6:54; “Always Remember Him” (vidio), ChurchofJesusChrist.org; “The Sacrament of the Lord’s Supper,” insaed long Teachings of Presidents of the Church: Howard W. Hunter (2015), 197–206.
Ol Aedia blong Famli Skripja Stadi mo Haos Naet
-
Eksodas 7–12.Maet, afta we yu rid abaot ol bigfala panis we Lod i bin sendem i go long Ol Man Ijip olsem ol saen blong paoa blong Hem, bae famli blong yu i save serem ol wei we Lod i bin soemaot paoa blong Hem tedei.
-
Eksodas8:28, 32; 9:27–28, 34–35.Ol ves ia, oli save yusum blong statem wan toktok storian abaot hamas i impoten blong stap kipim ol toktok blong yumi. Mebi ol memba blong famli oli save serem ol eksperiens blong ol taem we oli bin luk ol narawan oli stap mekem wanem we oli bin agri blong mekem.
-
Eksodas 12:1–42.Afta we yu ridim Eksodas 12:1–42 tugeta, yu save raet long ol pis pepa, ol samting we yu save mekem olsem wan famli blong tingbaot Atonmen blong Jisas Kraes. From se blad blong smol sipsip long pos blong ol doa (luk long ves 23) i ripresentem Sevya, yu save putum ol pepa ia raon long doa insaed long hom blong yu. Mo tu, yu save kakae sam long ol kaekae ia blong Pasova, olsem bred ia we i no gat yis long hem (ol kraka o totila) o ol konkon gras (pasli o hosradis), mo toktok raon long wei we Pasova i helpem yumi blong tingbaot olsem wanem nao God i bin mekem ol pipol blong Hem oli kam fri. Eksampol, bred ia we i no gat yis long hem, i mekem olgeta oli tingbaot se i no gat taem blong bred blong olgeta i solap bifo oli aot long fasin blong stap slef. Ol konkon gras blong kuk ia i blong mekem oli tingbaot se fasin blong stap slef o prisena, i wan konkonwan.
-
Eksodas 12:14, 24–27.Maet yu save luklukbak long ol ves ia olsem wan famli bifo nekis sakramen miting blong yufala. ?Olsem wanem nao ol ves ia oli go wetem sakramen? ?Olsem wanem nao yumi mekem sakramen i wan “seremoni blong tingbaot” wanem we Sevya i bin mekem blong yumi?
Blong gat moa aedia blong stap tijim ol pikinini, luk long aotlaen blong wik ia insaed long Kam Folem Mi—Blong Praemeri.
Wan singsing: “In Memory of the Crucified,” Hymns, no. 190.
Stap Kam Antap long Fasin blong Yumi blong Stap Tij
Serem ol lesen we yu yusum wan samting long hem. Invaetem ol memba blong famli blong faenem sam samting we bae i helpem olgeta blong andastanem ol prinsipol insaed long ol skripja we yufala i stap ridim. Eksampol, ol sofsof mo strong samting we i save helpem ol famli memba oli toktok raon long wanem i defren blong gat wan sofsof hat mo wan strong hat.
Pikja we i soem Kakae blong Pasova, we i kam long Brian Call