Pikja blong Moses mo Eron long kot blong King blong Ijip, i kam long Robert T. Barrett

28 Maj–3 Epril.

Eksodas 7–13

“Bambae Yumi Mas Tingbaot Dei we Yumi Aot long Ijip”

Taem yu stap ridim Eksodas 7–13tingting abaot olsem wanem ol trutok long ol japta ia i mekem fet blong yu long Jisas Kraes i kam moa strong. ?Olsem wanem nao yu save helpem ol pikinini we yu tijim blong gat wan semmak eksperiens olsem?

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Putum sam pikja we i ripresentem ol samting insaed long Eksodas 7–13 (olsem wan frog, ol flae, mo wan sipsip) andanit long wan kaliko long tebol. Invaetem sam long ol pikinini blong tekem wan long ol pikja andanit long kaliko ia, mo invaetem klas blong serem wanem oli lanem abaot pikja ia long hom long wik ia.

Tijim Doktrin: Ol Smol Pikinini

Eksodas 7–11

Lod i gat paoa ova long evri samting.

Laen blong Isrel oli stap long kalabus mo oli no save mekem olgetawan i go fri, be Lod i soem paoa blong Hem mo karemaot olgeta. ?Olsem wanem yu save yusum stori ia blong helpem ol pikinini blong trastem Lod mo paoa blong Hem?

Samfala Aktiviti we Yu Save Mekem

• Ridim ol ves we oli jusum aot long Eksodas 7–11 blong tijim ol pikinini abaot ol ten panis we Lod i sendem i kam long ol man Ijip (luk tu long “Moses the Prophet,” insaed Old Testament Stories). Invaetem ol pikinini blong dro ol pikja we i ripresentem sam long ol panismen ia. Askem ol pikinini blong holem pikja blong olgeta antap taem yu stap tokbaot ol panismen ia bakegen. Ridim sam long ol sentens aot long Eksodas 7:5 mo 9:14 blong eksplenem from wanem Lod i sendem ol panismen ia long Ijip.

• Serem wetem ol pikinini olsem wanem Lod i bin soem long yu “ i no gat narafala God nating long wol ya we i olsem [Hem]” (Eksodas 9:14). Letem ol pikinini oli serem olsem wanem oli save se God i gat plante paoa.

Eksodas 12:1–13; 13:10

Sakramen i helpem mi blong tingbaot Jisas.

Pasova i bin tijim ol Laen blong Isrel abaot Sevya mo sakrifaes we wan dei bae Hem i mekem from yumi. Tedei, yumi tekem sakramen blong tingbaot sakrifaes blong Jisas.

Sakramen i helpem yumi blong tingbaot Jisas Kraes.

Samfala Aktiviti we Yu Save Mekem

• Yusum Eksodas 12:1–13, talem long ol pikinini wanem Lod i bin talem long ol Laen blong Isrel blong mekem blong oli save sef long las panis ia (luk tu long “The Passover,” insaed long Old Testament Stories). Soem pikja blong Jisas we i sta Karem wan Sipsip we i Lus (Gospel Art Buk, namba 64), mo poenemaot ol samting we i semmak bitwin smol sipsip we oli yusum long Pasova mo Jisas Kraes, Smol Sipsip blong God.

• Askem ol pikinini blong talem nem blong ol samting we yumi mekem blong tingbaot ol impoten selebresen olsem ol dei we wan i bon, mo ol holidei. Ridim Eksodas 13:10, mo eksplenem se Lod i bin askem ol pikinini blong Isrel blong selebretem Pasova evri yia blong helpem olgeta blong tingbaot se Hem i sevem olgeta long ol man blong Ijip. ?Wanem nao samfala wei we yumi tingbaot se Jisas i sevem yumi aot long sin mo ded?

• Sapos i posibol,visitim sakramen tebol wetem ol pikinini, mo tokbaot olsem wanem sakramen i helpem yumi blong tingbaot Jisas Kraes. Singsing tugeta “The Sacrament” (Children’s Songbook, 72) o wan narawan singsing we soem respek abaot Jisas Kraes. Helpem ol pikinini blong luksave ol filing blong pis we oli gat taem oli tingbaot Sevya, mo invaetem olgeta blong lukaotem semmak filing ia taem oli tekem mo kakae long sakramen.

• Givim long ol pikinini ol pis blong pepa we i gat ol toktok ia “Mi save tingbaot Jisas Kraes long taem blong sakramen tru long …” raetem antap long pepa. Invaetem olgeta blong droem ol pikja we oli save luk long hem long taem blong sakramen blong helpem olgeta blong tingbaot Jisas.

Stap Tijim Doktrin: Ol Bigfala Pikinini

Eksodas 7–11

Lod i gat paoa blong sevem mi.

Ol pikinini oli fesem ol jalenj mo nidim Lod blong helpem olgeta. Stori blong ol ten panismen ia we Lod i sendem i kam blong mekem ol Laen blong Isrel i go fri i save helpem ol pikinini oli andastanem se Hem i gat paoa tu blong helpem olgeta.

Samfala Aktiviti we Yu Save Mekem

• Givim long wanwan pikinini wan pepa we oli divaedem long ten pat, mo invaetem ol pikinini blong droem ol pikja blong ol panismen we ol ves ia oli tokbaot: Eksodas 7:17–18; 8:1–4; 8:16–17; 8:20–22; 9:1–6; 9:8–9; 9:22–23; 10:4–5; 10:21–22; 11:4–7. ?Wanem nao ol panismen ia i tijim yumi abaot paoa blong God? ?From wanem hem i impoten blong save abaot paoa blong Hem?

• Askem ol pikinini abaot ol taem we oli filim se oli nidim help blong Lod? ?Olsem wanem nao Hem i save helpem yumi long ol situesen ia? Leftemap tingting blong olgeta blong tokbaot ol taem we olgeta o famli blong olgeta i bin eksperiensem paoa blong Lod long laef blong olgeta. Serem testemoni blong yu se Lod i gat paoa blong helpem yumi.

Eksodas 8:28–32; 9:7

Lod i save helpem mi blong gat wan sofsof hat.

King blong Ijip i jusum blong mekem hat blong hem i strong taem we Lod i bin talem long hem blong lego ol pikinini blong Isrel i go fri. ?Olsem wanem nao yu givim insperesen long ol pikinini we yu tijim blong jusum blong gat wan sofsof hat mekem se oli wantem blong givim seves long Lod mo mekem tingting blong Hem?

Samfala Aktiviti we Yu Save Mekem

• Karem i kam long klas wan samting we i strong, olsem wan ston, mo wan narawan we i sofsof olsem wan sponj blong wasem plet. Ridim wetem ol pikinini sam ves we i tokbaot olsem wanem King blong Ijip i ak long ol panismen we Lod i sendem long olgeta (luk long Eksodas 8:28–32; 9:7), mo askem ol pikinini wijwan i bes samting nao we i ripresentem hat mo fasin blong King blong Ijip. ? I minim wanem blong gat wan hat we sofsof? (luk long Mosaea 3:17).

• Wetem klas, mekem wan lis blong ol aksen we soem se yumi gat wan strong hat (eksampol, stap faet wetem brata o sista o blong no wantem blong talem prea). ?Olsem wanem nao yumi save soem long Lod se yumi wantem gat sofsof hat?

Eksodas 11:5–6; 12:1–13

Pasova i saen blong paoa blong atonmen blong Jisas Kraes.

Pasova i tijim ol pikinini blong Isrel se Lod nao i karemaot olgeta long Ijip. Pasova i saen tu blong atonmen mo sakrifaes blong Jisas Kraes, we i karemaot yumi long sin mo ded. Tedei sakramen i helpem yumi blong tingbaot sakrifaes blong Jisas Kraes we i mekem from yumi. Blong stap tijim ol pikinini abaot Pasova i save helpem olgeta blong gat moa eksperiens we i gat mining wetem sakramen.

Samfala Aktiviti we Yu Save Mekem

• Askem sam long ol pikinini blong ridim Eksodas 11:5–6 blong lanem abaot ol las panismen we Lod i bin sendem i kam long ol man Ijip. Askem ol narafala pikinini blong ridim Eksodas 12:3, 5–7, 13 blong lanem olsem wanem ol pikinini blong Isrel oli bin sef aot long panis ia.

• Blong helpem ol pikinini andastanem se Sevya i Smol Sipsip we i sevem yumi, soem wan pikja blong wan smol sipsip. Invaetem ol pikinini blong ridim Eksodas 12:3–7 blong faenemaot wanem kaen blong smol sipsip nao God i wantem ol pipol blong yusum blong lafet blong Pasova. ?Olsem wanem smol sipsip ia i olsem Jisas Kraes? (Eksampol, Jisas i stret evriwan, mo Jisas i ded long kros blong sevem yumi.) ?Wanem ol narafala saen we i helpem yumi blong tingbaot Jisas Kraes?

• Ridim sakramen prea tugeta (luk long Doktrin mo Ol Kavenan 20:77, 79), mo wajem vidio ia “Always Remember Him” (ChurchofJesusChrist.org). ?Olsem wanem sakramen i semmak olsem Pasova? ?Wanem nao yumi save mekem blong tingbaot Jisas long taem blong sakramen?

• Serem wetem ol pikinini wan long ol fevret sakramen hym blong yu (luk long Hymns, ol namba 169–96), mo tokbaot olsem wanem i helpem yu blong tingbaot sakrifaes blong Sevya. Invaetem ol pikinini blong serem wan hym we i mekem semmak olsem long olgeta.

Stap Leftemap Tingting blong Lanem Samting long Hom

Invaetem ol pikinini blong serem wetem ol famli blong olgeta samting we oli bin lanem abaot Jisas Kraes long taem blong Praemeri tedei.

Stap Kam Antap long Fasin blong Yumi blong Stap Tij

Helpem ol pikinini blong pikjarem stori long maen blong olgeta. Taem ol pikinini oli gat wan pikja long maen blong olgeta long wanem we oli stap lanem, moa bae oli save tingbaot samting ia. Faenem ol wei blong helpem ol pikinini blong pikjarem ol stori long ol skripja yusum ol pikja, ol droing, ol vidio,ol papet(doli) o ol drama.