Moses mo smol tri wetem faea, i kam long Harry Anderson

21–27 Maj.

Eksodas 1–6

“Mi Stap Tingbaot Promes Ya blong Mi Yet”

Stat rere blong tij taem yu stap ridim Eksodas 1–6. Aotlaen blong wik ia insaed long Kam Folem—Blong Wanwan Man,Woman mo Famli i save helpem yu andastanem ol japta ia mo aotlaen ia i save givim yu ol aedia blong tij.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Soem sam samting we i go wetem ol stori long ol japta ia—eksampol, wan bigfala basket o wan bebi doli. Invaetem ol pikinini blong yusum ol samting ia blong serem ol pat blong stori blong Moses we oli laekem tumas.

Tijim Doktrin: Ol Smol Pikinini

Eksodas 1–2

God i save wok tru long mi blong mekem ol stamba tingting blong Hem i hapen.

Moses i gat wan bigfala wok blong karemaot ol pipol blong Isrel long slef i go fri. Be bae hem i no save mekem hemia i hapen sapos mama blong hem, sista blong hem, gel blong king blong Ijip mo ol narafala fetful woman oli no bin protektem mo kea long hem.

Samfala Aktiviti we Yu Save Mekem

• Yusum aktiviti pej blong wik ia mo “Miriam” (long Old Testament Stories) blong talem long ol pikinini olsem wanem Jokebed (Mama blong Moses), Miriam (sista blong hem), mo gel blong king blong Ijip i lukaotem Moses. Mekem i klia se from olgeta ia mo ol narafala fetful woman, Moses i stap sef mo we wan dei bae i lidim ol pipol blong Isrel i go long sefti. Invaetem ol pikinini blong dro wan pikja blong ol pipol we oli kea long olgeta.

  

  Moses insaed long Basket © Providence Collection/licensed from goodsalt.com

• Singim tugeta wan singsing abaot lav, olsem “‘Give,’ Said the Little Stream” (Children’s Songbook, 236). Helpem ol pikinini blong oli tingting long ol simpol samting we oli save mekem blong helpem ol narawan long hom, long Jos mo long skul.

Eksodas 3

Jisas bae i helpem mi blong mekem ol gud samting.

Moses i wari se hem i save karemaot ol pipol blong Isrel long Ijip o nogat. Be Lod i promes se bae Hem i helpem Moses. Helpem ol pikinini gat fet se Sevya bae i helpem olgeta tu.

Samfala Aktiviti we Yu Save Mekem

• Talem long ol pikinini olsem wanem Lod i givim Moses wan impoten wok blong mekem. Ridim ol ves we oli jusum aot long Eksodas 3, o ridim “Moses the Prophet” (insaed long Old Testament Stories). Serem olsem wanem Moses i bin filim (luk long Eksodas 3:6, 11) mo wanem Lod i bin talem long hem (luk long ves 12 mo 14). Invaetem ol pikinini blong ripitim wetem yu sentens ia “Yu no fraet! Mi bambae mi stap wetem yu,” mo serem wetem olgeta wan taem we Lod i bin stap wetem yu taem we yu gat wan samting we i impoten blong mekem blong Hem.

• Helpem ol pikinini blong tingting long ol situesen taem we maet oli askem olgeta blong mekem wan samting we i luk olsem se i had blong mekem. Eksplenem se, olsem we Jisas i helpem Moses, Jisas bae i helpem olgeta tu. Singim wan singsing long olsem wanem Jisas i helpem yumi olsem “I Will Walk with Jesus” (ChurchofJesusChrist.org). Testifae se bae Sevya i helpem yumi taem we yumi wari mo fraet

• Katemaot ol pepa hat mo raetem long olgeta ol wei we Lod i stap helpem ol pikinini. Putum ol hat ia i fes i go daon long flo. Invaetem ol pikinini blong jusum ol hat ia, wan afta wan, mo helpem olgeta ridim wanem we oli raetem long olgeta.

Eksodas 3:1–5

Mi save stap soem respek long ol tabu ples.

Yusum stori blong Moses mo smol tri wetem faea blong helpem ol pikinini andastanem from wanem yumi tritim ol tabu samting wetem fasin blong stap respek.

Samfala Aktiviti we Yu Save Mekem

• Ridim Eksodas 3:1–5, mo eksplenem se Moses i bin soem fasin blong stap respek taem hem i karemaot sus blong hem. ?Wanem nao yumi mekem blong soem fasin blong stap respek long Jos? Sing wan singsing abaot respek olsem “Reverence Is Love” (Children’s Songbook, 31). Helpem ol pikinini blong oli talemaot ol toktok long singsing ia we i tijim yumi olsem wanem blong soem respek. ?From wanem nao Lod i wantem yumi blong gat fasin blong respek?

• Soem sam pikja blong ol situesen long ol ples we yumi mas soem respek mo sam ples we yumi no nid blong soem respek, olsem wan sakramen miting, wan prea, wan bigfala ples blong stap spel mo wan lafet blong selebretem dei we wan i bon long hem. Askem ol pikinini blong putum tugeta ol pikja blong soem wea ples yumi mas stap soem respek.

• Invaetem ol pikinini blong droem ol pikja blong olgetawan, mo poenem ol pikja blong olgeta taem yu stap tokbaot ol wei we oli save stap soem respek wetem ol defren pat blong bodi blong olgeta, olsem, wetem ae blong olgeta, sora, maot, ol han mo leg.

Stap Tijim Doktrin: Ol Bigfala Pikinini

Eksodas 1–2

God i wok tru long wanwan long yumi blong mekem ol stamba tingting blong Hem i hapen.

Plante pipol oli help blong mekem i hapen ol stamba tingting blong God, taem oli lukaotem gud laef blong yang Moses. ?Olsem wanem yu save helpem ol pikinini we yu stap tijim blong oli andastanem impoten wok we yumi pat long hem blong mekem tingting blong God i hapen?

Samfala Aktiviti we Yu Save Mekem

• Invaetem ol pikinini blong serem wanem oli save abaot Moses taem hem i wan bebi. Yusum aktiviti pej blong wik ia mo Eksodas 1:22; 2:1–10 blong talem long wan sot toktok stori blong Moses taem hem wan pikinini. Ridim ol skripja refrens long aktiviti pej mo askem ol pikinini wanem wanwan woman ia i mekem blong lukaotem gud laef blong Moses.

• Talem long ol pikinini abaot ol pipol we yu stap glad long olgeta from ol stap fetful blong givim seves long God mo olgeta raon long hem, iven sapos oli givim seves long ol smolsmol wei. Askem olgeta blong oli tokbaot ol pipol we oli save we oli bin stap fetful blong givim seves long God mo ol narawan. ?Wanem pat blong yumi long wok blong God?

Eksodas 3–4

Lod bae i helpem mi blong mekem i hapen tingting blong Hem.

Moses i filim se hem i no inaf blong koling blong hem, be Lod i promes se Hem bae i stap wetem Moses mo helpem hem. ?Olsem wanem nao stori ia i givim insperesen long ol pikinini we yu tijim?

Samfala Aktiviti we Yu Save Mekem

• Yusum stori ia long Eksodas 3; 4:1–17, letem wanwan pikinini i mekem olsem se hem nao Moses. Sapos i posibol, karem ol samting blong yusum, olsem wan toj mo wan smol tri blong ripresentem smol tri wetem faea .

• Invaetem ol pikinini blong ridim Eksodas 3:11; 4:1, 10 mo faenemaot olsem wanem Moses i bin filim abaot taem ia blong askem King blong Ijip blong lego ol pipol blong Isrel oli go fri. ?Wetaem nao oli gat ol semmak filing olsem? ?Wanem advaes nao bae ol pikinini oli serem wetem Moses blong helpem hem? Helpem olgeta blong faenemaot olsem wanem Lod i leftemap tingting blong Moses (luk long Eksodas 3:12; 4:2–9, 11–12).

• Serem wan eksperiens blong wan taem we yu bin filim se God i stap helpem yu blong mekem wan koling o givim seves long Hem long sam wei. Askem ol pikinini blong serem wan taem we Lod i helpem olgeta.

Eksodas 3:1 -5

Mi save stap soem respek long ol tabu ples.

Lod i askem Moses blong karemaot sus blong hem long ples we smol tri wetem faea i stap laet olsem wan saen blong respek mo ona. ?Olsem wanem nao yumi save yusum stori ia blong tijim ol pikinini abaot fasin blong soem respek?

Samfala Aktiviti we Yu Save Mekem

• Ridim Eksodas 3:1–5, mo askem ol pikinini blong talem long wan sot toktok ol ves ia long toktok blong olgetawan. ?Wanem nao yumi save mekem blong soem respek long ol tabu ples olsem, jos o tempol? Helpem ol pikinini blong krietem ol “smol basket” blong karem i go hom we i gat insaed ol pis blong pepa we oli raetem ol aedia blong stap soem respek. Invaetem olgeta blong serem ol aedia ia wetem ol famli blong olgeta.

• Singim tugeta wan singsing abaot respek, olsem “Reverence Is Love” (Children’s Songbook, 31), mo askem wanwan pikinini blong raetem mo serem wetem olgeta mining blong stap respek, folem wanem ol toktok long singsing ia i stap talem.

• Yusum pikja blong Jisas I Klinim Tempol (Gospel Art Book, namba 51) blong talem stori long Matiu 21:12–13. ?Olsem wanem nao fasin blong Moses long Eksodas 3:1–5 i defren long fasin blong ol man we oli stap jenisim mane? ?From wanem Sevya i wantem yumi blong tritim ol tabu samting wetem respek?

Stap Leftemap Tingting blong Lanem Samting long Hom

Blong helpem ol pikinini serem wanem we oli bin lanem aot long Eksodas 1–6, leftemap tingting blong olgeta blong droem wan pikja blong wan long ol pipol we oli lanem abaot hem long klas blong serem wetem famli blong olgeta.

Stap Kam Antap long Fasin blong Yumi blong Stap Tij

Ol pikinini oli lanem samting aot long fasin blong stap ripitim samting. No fraet blong ripitim ol aktiviti plante taem, speseli wetem ol smol pikinini. Hemia bae i helpem ol pikinini blong tingbaot wanem we yu tijim.