“14–20 Maj. Jenesis 42–50: “God I Kapsaetem Plan Ya blong Yufala, I Mekem we Gudfala Samting I Kamaot long Hem,’” Kam Folem Mi—Blong Praemeri: OlTesteman 2022 (2021)
“14–20 Maj. Jenesis 42–50,” Kam Folem Mi—Blong Praemeri: 2022
Pikja blong Josef blong Ijip, i kam long Robert T. Barrett
14–20 Maj.
Jenesis 42–50
“God I Kapsaetem Plan Ya blong Yufala, I Mekem we Gudfala Samting I Kamaot long Hem”
Hem i impoten blong save ol skripja we yu stap tijim be i impoten tu blong save ol pikinini we yu stap tijim. Tekem taem blong tingting hevi abaot tufala samting ia.
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
From se stori ia insaed long Jenesis 42–50 i pat blong stori long lesen blong las wik hemia long Jenesis 37–41, tekem taem long stat blong klas blong letem ol pikinini serem wanem oli tingbaot abaot Josef wetem wanem oli lanem long Praemeri mo long hom.
Tijim Doktrin: Ol Smol Pikinini
Mi save soem lav long famli blong mi.
Blong ol yang pikinini, maet yu wantem tokbaot bigwan ol pat blong stori ia we Josef i bin soem lav long famli blong hem.
Samfala Aktiviti we Yu Save Mekem
-
Yusum “Joseph and the Famine” (insaed long Old Testament Stories) o ol pikja insaed long Kam Folem Mi—Blong Wanwan Man, Woman mo Famli, blong talem long ol pikinini abaot taem we Josef mo ol brata blong hem oli kambak tugeta afta we oli no luk olgeta blong longtaem. Mekem i klia gud olsem wanem Josef i bin soem lav long ol brata blong hem.
-
Ridim ol sentens long Jenesis 45:4–15 we i soem ol samting we Josef i mekem blong soem se hem i lavem famli blong hem. Invaetem ol pikinini blong stap mekem wanem we ol ves ia i stap tokbaot. Eksampol, oli save mekem olsem se oli askem wan memba blong famli blong “yufala i kam kolosap” (ves 4) o givim kaekae long wan memba blong famli (luk long ves 11).
-
Singim wan singsing olsem “Love One Another” (Children’s Songbook, 136). Helpem ol pikinini blong droem wan pikja blong han blong olgeta mo raet insaed long pikja ia wan samting we oli save mekem blong soem lav long famli blong olgeta.
Ol Prishud blesing i helpem mi.
Jekob i blesem ol boe blong hem mo ol apu pikinini boe blong hem (luk long Jenesis 48–49). Tedei yumi save kasem ol prishud blesing we i givim kamfot, hiling, proteksen mo paoa long saed blong spirit.
Yumi save kasem blesing long olgeta we oli holem prishud.
Samfala Aktiviti we Yu Save Mekem
-
Soem long ol pikinini wan pikja blong Jekob we i stap givim blesing long ol boe blong hem o ol narafala pikja blong ol prishud blesing (luk ol pikja long aotlaen ia, luk tu long Gospel Art Buk, no. 12). Letem ol pikinini oli tokbaot wanem i stap hapen long ol pikja ia.
-
Ridim long ol pikinini Jenesis 48:8–9. Eksplenem se Isrel we oli singaotem tu se Jekob, i papa blong Josef mo we hem i wantem blong givim long ol pikinini blong Josef wan blesing. Sapos eni long ol pikinini we i bin kasem prishud blesing, invaetem olgeta blong talem eksperiens blong olgeta. O serem wan eksperiens blong yuwan.
-
Helpem ol pikinini blong tingting long ol samting we i mekem se oli askem wan prishud blesing. Mo tu, helpem olgeta blong talem nem blong olgeta we oli holem prishud we oli save askem, olsem wan papa, pupu man o givhan brata.
Mi save fogivim narafala man.
?Wanem nao ol pikinini oli save lanem abaot fasin blong fogiv long eksampol blong Josef we i fogivim ol brata blong hem?
Samfala Aktiviti we Yu Save Mekem
-
Yusum aktiviti pej blong wik ia blong helpem ol pikinini blong tingbaot olsem wanem ol brata blong Josef oli no bin kaen long hem. Ridim long ol pikinini Jenesis 50:17, mekem i klia se ol brata blong Josef oli bin sori from wanem oli bin mekem mo wantem Josef blong fogivim olgeta. Ridim ves 21 blong soem se Josef i fogivim ol brata blong hem—hem i nomo kros long olgeta.
-
Tugeta, singim “Help Me, Dear Father” (Children’s Songbook, 99). Taem yu singsing abaot fasin blong fogiv, invaetem ol pikinini blong poenem Josef long aktiviti pej. Taem yu singsing abaot fasin blong sakem sin, invaetem olgeta blong poenem ol brata blong hem.
-
Helpem ol pikinini blong tingting long ol situesen we maet oli nid blong fogivim wan narafala man. Invaetem ol pikinini blong praktisim wanem bae oli talem o mekem blong soem fogivnes long man ia.
Stap Tijim Doktrin: Ol Bigfala Pikinini
Fasin blong Fogiv i givim pis.
Ol brata blong Josef oli bin mekem plante nogud samting long hem. Be yet, Josef i bin fogivim olgeta mo karem pis i kam long famli blong hem.
Samfala Aktiviti we Yu Save Mekem
-
Helpem ol pikinini oli aktem ol pat ia long Jenesis 42–44. Taem oli mekem, askem olgeta wanem tingting blong olgeta abaot filing blong Josef taem hem i luk ol brata blong hem bakegen o olsem wanem ol brata blong hem oli filim taem oli luksave bakegen se hem i Josef.
-
Askem ol pikinini minim blong fogivim wan narafala man. Helpem olgeta andastanem se blong fogivim wan narafala man i minim tu se blong tritim olgeta wetem lav olsem hemia blong Kraes. Askem ol pikinini wanem oli save abaot stori blong Josef we i fogivim ol brata blong hem o ridim wetem ol pikinini ol ves ia aot long Jenesis 45:1–15. ?Wanem nao Josef i mekem o talem blong letem ol brata blong hem oli save se hem i fogivim olgeta? ?Wanem nao yumi save talem o mekem taem ol narafala man oli askem yumi blong fogivim olgeta?
-
Askem ol pikinini blong tingting long wan taem we oli bin fogivim wan man o taem wan man i fogivim olgeta. Blong givim taem long olgeta blong tingting, serem wan eksperiens blong yuwan mo testifae long ol blesing we i bin kam tru long fasin blong fogivim ol narafala man. Invaetem ol pikinini blong oli serem ol eksperiens blong olgeta sapos oli wantem. ?Oli bin filim olsem wanem? ?Wanem nao yumi lanem abaot fogivnes long eksampol blong Sevya? (luk long Luk 23:33–34).
Papa long Heven i sendem Jisas Kraes i kam blong sevem mi long wol ia.
Stori blong Josef we i sevem ol brata blong hem aot long hadtaem blong kasem kaekae i save tijim yumi abaot Jisas Kraes we i sevem yumi aot long sin mo ded.
Samfala Aktiviti we Yu Save Mekem
-
Raetem long bod Josef mo Jisas Kraes. Helpem ol pikinini blong lukluk long tu skripja mo raetem long bod ol samting we Josef mo Jisas i gat we i semsemmak: Jenesis 37:3 mo Matiu 3:17; Jenesis 37:26–28 mo Matiu 26:14–16; Jenesis 45:5–7 mo Luk 4:18; mo Jenesis 47:12 mo Jon 6:35.
-
Askem ol pikinini se i minim wanem blong helpem o sevem wan man. Sapos eni wan long olgeta i bin gat wan eksperiens we wan man i bin sevem hem o karemaot hem long denja,invaetem olgeta blong serem. ?Olsem wanem nao Josef i sevem ol brata blong hem? (luk long Jenesis 42:1–3; 45:5–7). Soem wan pikja blong Sevya. ?Olsem wanem nao Jisas i sevem yumi?
Josef Smit Translesen, Jenesis 50:27–33 (long Baebol apendiks)
Papa long Heven i mekem rere Josef blong kam wan profet long dei blong yumi.
Taosen yia i pas finis, Josef blong Ijip i bin luk we Lod bae i singaotem Josef Smit blong mekem wan bigfala wok long ol las dei ia. Tijim ol pikinini long olsem wanem Lod i bin blesem yumi tru long Profet Josef Smit.
Samfala Aktiviti we Yu Save Mekem
-
Givim long ol pikinini sam ki toktok we oli tokabaot Josef Smit, mo invaetem olgeta blong talemaot huia yu stap tokbaot. Yusum tu ol ki toktok aot long Josef Smit Translesen, Jenesis 50:27–33 (insaed long Baebol apendiks olsem “Hem Tijim Yumi abaot Kavenan” (luk long ves 28), “Hem givim yumi trutok blong Lod” (luk long ves 30), mo “Oli Kolem nem blong Hem afta Papa ” (luk long ves 33). Afta ol pikinini ol talemaot stret ansa, invaetem olgeta blong faenem ol ki toktok ia long ol ves ia. ?Wanem bakegen yumi lanem abaot Josef Smit long profesi blong Josef long Ijip?
-
Soem long ol pikinini ol pikja we i ripresentem ol impoten samting we Josef i bin mekem o tijim (lukaotem eksampol long, Gospel Art Buk, ol namba 89–95, 97, 98, 117, 118). Helpem ol pikinini blong oli tingting long ol blesing we yu gat tru long Josef Smit. Eksampol,?olsem wanem nao wok blong hem i helpem yumi kam kolosap long Jisas Kraes.
Stap Leftemap Tingting blong Lanem Samting long Hom
Invaetem ol pikinini blong serem aktiviti pej blong wik ia wetem ol famli blong olgeta long hom blong olgeta. Oli save yusum blong lukluk bak long stori blong Josef mo ol brata blong hem mo blong toktok raon long hamas lav mo fogivnes i impoten insaed long ol famli blong yumi.
Stap Kam Antap long Fasin blong Yumi blong Stap Tij
Testifae abaot Jisas Kraes. Nomata se OlTesteman i no talem nem blong Jisas Kraes, i gat ol narafala nem we i talem Hem mo oli testifae long Hem tru long ol saen mo ol stori. Helpem ol pikinini blong lukaot ol trutok abaot Sevya long ol taem we oli stap ridim ol skripja.