Pikja droing blong Josef blong Ijip, i kam long Robert T. Barrett

14–20 Maj.

Jenesis 42–50

“God I Kapsaetem Plan Ya blong Yufala, I Mekem we Gudfala Samting I Kamaot long Hem”

Taem yu ridim ol skripja, i stap invaetem Spirit. Lisin long ol kwaet toktok blong Hem taem yu stap rid, iven we yu luk se i no go wetem wanem we yu stap ridim.

Raetemdaon Ol Filing mo Tingting blong Yu

Hem i samples 22 yia stat long taem we ol brata blong Josef oli bin salem Josef long Ijip. Hem i bin safa long plante tes, mo wan i we oli bin giaman mo talem se hem i rong long wan samting, mo oli sarem hem long kalabus. Taem we hem i bin luk ol brata blong hem bakegen, Josef i bin gavna blong ful Ijip, hem i nambatu long king blong Ijip. Bae i isi nomo long hem blong givimbak long olgeta, mo taem yumi skelem wanem we oli bin mekem long Josef, bae man i save andastanem hemia. Be yet, Josef i bin fogivim ol brata blong hem. I no hemia nomo, be hem i bin helpem olgeta blong oli luk tabu stamba tingting blong safaring blong hem. “God i mekem we gudfala samting i kamaot long hem” (Jenesis 50:20), hem i bin talem long olgeta, from se hemia i bin putum hem long wan posisen blong save sevem “ful haos blong papa blong Hem” (Jenesis 47:12) aot long bigfala hanggri we i stap.

Long plante wei, laef blong Josef we i gat ol samting we oli folem hemia blong Jisas Kraes. I nomata we ol sin blong yumi i mekem se Hem i safa bigwan, Sevya i bin givim fogivnes, i mekem se yumi evriwan i fri aot long wan samting we i mowas bitim blong stap hanggri. I nomata sapos yumi nidim blong kasem fogivnes o blong givim fogivnes—long wan poen, yumi evriwan i nidim blong mekem tugeta—eksampol blong Josef i poenem yumi i go long Sevya, wan tru ples blong hiling mo stretem ol samting.

Ol Aedia blong Skripja Stadi blong Yuwan

Jenesis 45:1–8; 50:20

“Hemia i no wok blong yufala, i wok blong God ya, we hem i sanem mi mi kam fastaem long yufala long ples ya, blong mi save sevem laef blong ol man.”

Taem yu stap ridim abaot Josef, ?yu bin tekem not long eni semmak samting bitwin stori blong hem mo misin blong Jisas Kraes we i pem praes from sin? Yu save tingting hevi long wei we rol blong Josef insaed long famli blong hem, i semmak long rol blong Sevya insaed long famli blong God. ?Wanem semmak samting yu yu luk bitwin ol eksperiens blong Josef mo misin blong Sevya, we God i bin sendem Hem i kam blong sevem olgeta.” (Jenesis 45:7).

Jenesis 45; 50:15–21

Fasin blong fogiv i tekem fasin blong kam gud bakegen i kam.

Blong stap rid abaot Josef we i stap fogivim ol brata blong hem from ol rabis samting we oli bin mekem long hem, i save pusum yu blong tingbaot wan we yu yu stap traehad blong fogiv. O maet wan had tes blong stap fogivim man i stap wet long yu long fiuja. Long eni wei, bae i save help blong tingting hevi long from wanem Josef i bin save fogiv. ?Wanem samting long fasin blong maen mo bodi blong Josef we yu yu faenem insaed long Jenesis 45; 50:15–21? ?Olsem wanem ol eksperiens blong hem oli bin jenisim ol tingting blong hem blong hem i fogivim man plante moa? ?Wanem nao eksampol blong Josef we i putumaot blong save kam olsem wanem o yu save stap fogiv moa wetem help blong Sevya?

Teknot tu long ol blesing we oli kam long famli blong Josef from Josef i bin fogivim olgeta. ?Wanem blesing yu yu bin kasem afta we yu bin fogivim man? ?Yu yu filim insperesen blong go aot long wan we i bin mekem nogud long yu?

Luk tu long Jenesis 33:1–4; Doktrin mo Ol Kavenan 64:9–11; Larry J. Echo Hawk, “Yufala I Mas Fofogivim Yufala long Sem Fasin we Kraes I Fogivim Yufala,” Liahona, Mei 2018, 15–16.

Jenesis 49

?Simbol ia long ol blesing blong Jekob i minim wanem?

Ol blesing blong laen blong Jekob we i gat ol laef pikja long hem, be samfala man o woman we oli stap rid, oli save faenem i had tu blong andastanem olgeta. Bigfala Tangkyu se, gospel we i kambak i givim yumi sam moa andastaning. Taem we yu ridim ol blesing blong Josef long Jenesis 49:22–26, ridim olgeta ves ia tu, mo luk wanem niu tingting oli givim i kam: 1 Nifae 15:12; 2 Nifae 3:4–5; Jekob 2:25; Doktrin mo Ol Kavenan 50:44.

Taem yu stap ridim abaot blesing blong Juda long Jenesis 49:8–12, tingbaot se tugeta, King Deved mo Jisas Kraes, tufala i kamaot long laen blong Juda. ?Wanem ol toktok mo sentens we oli stap insaed long ol ves ia we bae oli rimaenem yu abaot Sevya? Taem yu stap stadi long blesing blong Juda, bae i save help tu blong ridim Revelesen 5:5–6, 9; 1 Nifae 15:14–15; Doktrin mo Ol Kavenan 45:59; 133:46–50.

Sapos yu wantem lanem moa abaot ol boe blong Jekob mo ol traeb blong Isrel, we oli kamaot long laen blong olgeta i gat toksave long wan wan long olgeta long Gaed long Ol Skripja (ol skripja.ChurchofJesusChrist.org).

Jenesis 50:24–25; Josef Smit Translesen, Jenesis 50:24–38 (insaed long Baebol apendiks)

“Lod we i God blong mi bae i resemap wan sia.”

Tru long ol drim blong Josef (luk long Jenesis 37:5–11) mo olsem wanem hem i stap talem mining blong ol drim blong ol narawan (luk long Jenesis 40–41), Lod i bin soemaot ol samting we bae oli hapen sam dei o yia long fiuja. Be Lod i bin talemaot tu long Josef wanem bae i hapen long ol handred yia we oli stap kam. Speseli, hem i bin lanem abaot ol misin blong Moses mo Josef Smit olsem ol profet. Taem yus tap ridim ol toktok blong Josef long Jenesis 50:24–25 mo long Josef Smit Translesen, Jenesis 50:24–38 (insaed long Baebol apendiks), askem yuwan olsem wanem we blong save ol samting ia bae i blesem Josef mo ol pikinini blong Isrel. ?From wanem nao yu ting se i impoten blong Lod i putumbak profesi ia tru long Josef Smit (luk long 2 Nifae 3).

?Olsem wanem nao Josef Smit i bin mekem ol profesi long Josef Smit Translesen, Jenesis 50: 27–28, 30–33, oli kamtru? (Luk long Doktrin mo Ol Kavenan 1:17–23; 20:7–12; 39:11; 135:3).

Pikja droing blong Josef blong Ijip, we i kam long Paul Mann

Ol Aedia blong Famli Skripja Stadi mo Haos Naet

Jenesis 42–46.Maet bae famli blong yu i laekem blong aktem stori blong Josef we i joen bakegen wetem ol brata blong hem? (“Joseph and the Famine,” insaed long Ol Testeman stori bae i save help.) Gat wan gud taem wetem hemia—yusum ol dresap klos mo sam materiol sapos yu laekem. Leftemap tingting blong ol memba blong famli blong oli traem blong andastanem ol filing mo ol lukluk blong wanwan insaed long stori ia. Maet bae yu lukluk nomo long ol filing blong Josef long ol brata blong hem mo olsem oli bin filim taem we hem i bin fogivim olgeta. Hemia i save lidim yufala blong toktok raon long wei we fogivnes i save blesem famli blong yu.

Taem we Josef i bin mitim ol brata blong hem bakegen afta long plante yia, ?olsem wanem nao oli bin soem se oli bin jenis stat long taem we hem i bin luk olgeta long las taem? ?Wanem nao yumi save lanem abaot fasin blong sakem sin aot long ol eksperiens blong olgeta?

Jenesis 45:3–11; 50:19–21.Josef i bin luksave se i nomata long ol eksperiens blong hem long Ijip we oli bin had tumas “God i mekem we gudfala samting i kamaot long hem” (Jenesis 50:20). ?Famli blong yu i bin gotru long eni tes we God i bin tanem i kam ol blesing?

Wan hym abaot gud fasin blong God long ol taem blong tes (olsem “Tijing blong Jisas Oli Stamba blong Yumi” [STSP, pej 6]) i save givhan long toktok storian ia. ?Wanem nao ol lesen we oli kamaot long ol eksperiens blong Josef we oli save stap olsem wan eksampol blong wan hym i tijim?

Jenesis 49:9–11, 24–25.?Wanem nao yumi faenem insaed long ol ves ia we i stap tijim yumi abaot ol rol mo misin blong Jisas Kraes? (Blong gat sam help blong stap andastanem ol ves ia, luk long buk ia abaot Jenesis 49 we i stap long “Ol Aedia blong Skripja Stadi blong Yuwan.”)

Blong gat moa aedia blong stap tijim ol pikinini, luk long aotlaen blong wik ia insaed long Kam Folem Mi—Blong Praemeri.

Wan singsing: “Tijing blong Jisas Oli Stamba blong Yumi,” STSP, pej 6

Stap Kam Antap long Fasin blong Yumi blong Stap Tij

Yusum miusik. Helpem ol pikinini blong luksave ol trutok blong gospel insaed long ol toktok blog ol hym mo ol singsing blong Praemeri. Lukaotem sam wei blong mekem tabu miusik i kam wan pat we i stap oltaem insaed long gospel stadi blong yufala.

Jekob I Stap Blesem Ol Boe blong Hem, i kam long Harry Anderson