28 Febwari–6 Maj

Jenesis 28–33

“Tru, Ples Ya, Hae God I Stap long Hem”

Taem yus tap ridim Jenesis 28–33, tingting hevi long wanem yu lanem aot long ol eksampol blong Jekob mo famli blong hem. Raetemdaon ol filing mo tingting we yu kasem.

Raetemdaon Ol Filing mo Tingting blong Yu

Ol japta 28 mo 32 blong buk blong Jenesis oli tokbaot tufala eksperiens, long saed blong spirit, we profet Jekob i bin gat. Tufala eksperiens ia, i bin hapen long waelples be long ol defren situesen. Long fasfala eksperiens, Jekob i bin stap travel i go long homples blong mama blong hem, blong hem i faenem wan waef, mo folem rod ia, hem i bin spendem wan naet i pilo long wan ston. Hem i no bin ting se bae hem i faenem Lod long wan kaen drae ples olsem, be God i bin soemaot Hem long Jekob, long wan drim we bae i jenisim laef blong hem, mo Jekob i talem: “Tru, ples ya, Hae God i stap long hem, be mi mi no save” (Jenesis 28:16). Sam yia afta, Jekob i stap long waelples bakegen. Long tetaem ia, hem i stap gobak long Kenan, bae i fesem wan nogud taem wetem brata blong hem we i kros tumas, Esao. Be Jekob i bin save se taem hem i nidim wan blesing, hem i save askem Lod, iven long wan waelples (luk long Jenesis 32).

Maet bae yu faenem se yu stap yuwan long waelples blong yuwan, we yu stap askem wan blesing long God. Maet waelples blong yu i wan famli rilesensip we i had, olsem we Jekob i bin gat. Mebi yu harem se yu stap longwe long God, o yu harem se yu nidim wan blesing. Samtaem, blesing i kam we yu sek long hem; sam nara taem, yu mas gat wan smol faet bifo blesing i kam. I nomata wanem nao i nid blong yu, yu save faenem se iven long waelples blong yu, “Lod i stap long ples ya.”

Ol Aedia blong Skripja Stadi blong Yuwan

Jenesis 28; 29:1–18

Mi kasem promes blong kasem ol blesing blong Ebraham insaed long tempol.

Long wei blong hem i go long Haran blong faenem wan waef, Jekob i bin drim long wan lada, we stamba blong hem i stap long wol daon mo en blong hem i stap kasem heven antap, mo God i stanap antap long lada ia. Insaed long drim ia, God i bin riniu wetem Jekob ol semfala kavenan we Hem i bin mekem wetem Ebraham mo Aesak (luk long Jenesis 28:10–17; luk tu long Jenesis 12:2–3; 26:1–4). Presiden Marion G. Romney i bin serem tingting ia abaot wanem lada i save ripresentem: “Jekob i bin luksave se ol kavenan we hem i bin mekem wetem Lod oli bin ol step ia long lada ia, we hem, hemwan i mas klaem long ol blong save kasem ol blesing we God i promesem—ol blesing we bae i mekem se hem i gat raet blong go insaed long heven mo stap wetem Lod. … Ol tempol long yumi. oli wanem we Betel i bin long Jekob” (“Temples—The Gates to Heaven,” Ensign, Mar. 1971, 16).

?Wanem nara toktok mo sentens insaed long Jenesis 28:10–22 i talem long yu se i gat wan samting i joenem eksperiens blong Jekob mo ol blesing blong tempol? Taem yu stap ridim ol ves ia, tingting long ol kavenan we yu bin mekem; ?Wanem tingting mo filing nao oli kam long yu?

Taem yus tap ridim Jenesis 29:1–18, tingting hevi long hao nao mared blong Jekob long Rejel i bin impoten long kavenan ia we God i bin mekem i kam niu bakegen wetem Jekob long Betel (“haos blong God”; luk long Jenesis 28:10–19). Kipim eksperiens ia long maen taem yu stap gohed blong ridim abaot laef blong Jekob insaed long Jenesis 29–33. ?Olsem wanem nao haos blong Lod i tekem yu yu go kolosap moa long God?

Luk tu long Yoon Hwan Choi, “!No lukluk Olbaot, Lukluk Antap!” Jeneral Konfrens, Epril 2017.

Jenesis 29:31–35; 30:1–24

Lod i tingbaot mi long ol tes blong mi.

Iven we Rejel mo Lea i bin laef long wan taem mo wan kalja we i defren long hemia blong yumi, yumi evriwan i save andastanem sam long ol filing we tufala i bin gat. Taem yu stap ridim Jenesis 29:31–35 mo 30:1–24, mo lukaotem ol toktok mo ol sentens we oli tokbaot sore we God i gat long Rejel mo Lea. Tingting hevi long wei we God i bin lukluk long ol hadtaem [blong yu] mo i bin “tingbaot” yu (Jenesis 29:32; 30:22).

Hem i impoten tu blong tingbaot se i nomata we God i stap lisin long yumi, long waes tingting blong Hem, Hem i no stap givim stret wanem we yumi stap askem long Hem. Tingting blong stap stadi long mesej blong Elda Brook P. Hales “Ol Ansa long Prea” (Liahona, Mei 2019, 11–14) blong lanem abaot ol defren wei we Papa long Heven i stap ansa long yumi.

Blong gat moa abaot kalja bakgraon blong stori ia, luk long Old Testament Student Manual: Genesis–2 Samuel (2003), 86–88.

Pikja droing blong Jekob mo Esao we tufala i stap haggem tufala, i kam long Robert T. Barrett

Jenesis 32–33

Sevya i save helpem yumi blong winim ol smol raorao insaed long ol famli blong yumi.

Taem we Jekob i bin gobak long Kenan, hem i bin fraet bigwan mo tingting blong hem i fasfas abaot wei we bae Esao i welkamem hem (Jenesis 32:7). Taem yus tap ridim Jenesis 32–33 abaot taem we Jekob i mit wetem Esao, mo ol filing blong hem we i go kasem taem ia, maet bae yu tingting hevi abaot ol stret famli rilesensip blong yu—maet wan we i nidim hiling. Ating stori ia, i save givim insperesen long yu blong go toktok long wan. Ol kwestin olsem oli save help lidim yu taem yu stap rid:

• ?Olsem wanem Jekob i bin rere blong mitim Esao?

• ?Wanem nao i kamaot klia long yu abaot prea blong Jekob we i stap long Jenesis 32:9–12?

• ?Wanem nao yumi lanem abaot fogivnes aot long eksampol blong Esao?

• ?Olsem wanem Sevya i helpem yumi blong hilim ol famli rilesensip?

Luk tu long Luk 15:11–32; Jeffrey R. Holland, “Seves Ia blong Man I Stretem Hemwan,” Liahona, Nov 2018, 77–79.

Ol Aedia blong Famli Skripja Stadi mo Haos Naet

Jenesis 28–33.Yusum “Jacob and His Family” (insaed long Old Testament Stories) blong helpem ol pikinini blong oli andastanem ol samting we oli bin hapen aot long ol japta ia. Mebi ol memba blong famli oli save stop smol long wanwan pikja mo talem wanem nao oli stap tijim, olsem hamas mared i impoten, wetem ol kavenan, wok mo fogivnes.

Jenesis 28:10–22.Yu save yusum wan lada (o pikja blong wan lada) blong tokbaot olsem wanem ol kavenan blong yumi oli olsem wan lada. ?Wanem kavenan nao yumi bin mekem, mo olsem wanem oli tekem yumi i go kolosap moa long God? Ol memba blong famli, maet bae oli laekem blong droem drim blong Jekob, we oli tokbaot insaed long Jenesis 28:10–22.

Hym ia, “Nearer, My God, to Thee” (Hymns, no. 100) i kam tru long insperesen ia blong drim blong Jekob. Famli blong yu i save singsing long hym ia mo toktok raon long wanem nao wanwan ves i stap tijim.

Jenesis 32:24–32.Maet yu gat sam memba blong famli we oli laekem blong traehad o faet insaed long wan ring. ?From wanem nao “traehad” i wan gud wei blong tokbaot fasin blong stap lukaotem ol blesing we oli kam long Lod? ?Wanem nao Inos 1:1–5; Alma 8:9–10 i talem abaot wanem i minim blong “stap traehad long fored blong God”?

Jenesis 33:1–12.Afta long plante yia blong strong filing, Jekob mo Esao, tufala i kam wan bakegen. Sapos Jekob mo Esao, tufala i save toktok long yumi tedei, ?wanem nao bae tufala i talem blong stap helpem yumi taem we i gat smol raorao insaed long famli blong yumi?

Blong gat moa aedia blong stap tijim ol pikinini, luk long aotlaen blong wik ia insaed long Kam Folem Mi—Blong Praemeri.

Wan singsing: “Dearest Children, God Is Near You,” Hymns, no. 96.

Stap Kam Antap long Stadi blong Yuwan

Lukaotem Jisas Kraes. OlTesteman i testifae abaot Jisas Kraes tru long ol stori mo ol simbol insaed long hem. Tingting blong raetemdaon, o makem olgeta ves we oli stap tij abaot Sevya mo oli gat spesel mining long yu.

Drim blong Jekob long Betel, i kam long J. Ken Spencer