Ol Tingting blong Kipim long Maen

Haos blong Isrel

Samples long waelples long Is blong Kenan, Jekob i wet wetem fraet blong i mitim twin brata blong hem, Esao. Laswan we Jekob i bin luk Esao, hem i 20 yia i pas finis, Esao tok long hem se i wantem blong kilim hem i ded. Jekob i bin spendem ful naet blong traehad, long waelples, blong lukaotem blesing long God. From fasin blong Jekob, blong gat fet, blong gogohed, mo strong tingting blong hem, God i ansa long ol prea blong hem. Mo long naet ia nem blong Jekob i bin jenis i go long Isrel, wan nem we i minim “hem i faet agensem God” (Jenesis 32:28, futnotb; luk tu long Jenesis 32:24–32).¹

Kolosap long reva Jabok, Jekob i kasem nem ia Isrel.

Hemia i fas taem we nem ia, Isrel, i kamaot long Baebol, mo nem ia i gohed blong kamaot truaot long buk mo long histri. Nem ia i kam blong i no nem blong wan man nomo. Isrel i gat 12 pikinini boe, mo ol laen blong olgeta, oli save olgeta olsem “haos blong Isrel,” “laen blong Isrel,” “ol pikinini blong Isrel,” o “ol man blong Isrel.”

Truaot long histri, ol pikinini blong Isrel oli filim se hem i impoten tumas blong stap olsem wan we i kamaot long wan long olgeta twelef laen blong Isrel. Laen blong olgeta i wan impoten pat blong kavenan aedentiti blong olgeta. Aposol Pol i talem se hem i kamaot long “laen blong Benjamin” (Rom 11:1). Taem we Lihae i sendem ol pikinini boe blong hem oli go long Jerusalem blong karem buk ia we oli mekem wetem bras, wan risen, hem i we ol buk ia oli gat ”wan famli laen blong papa blong hem” (1 Nifae 5:14; luk tu long 1 Nifae 3:3). Lihae i faenemaot se hem i kamaot long famli laen blong Josef, mo save long laen blong hem se oli joen long haos blong Isrel i stap olsem wan impoten samting long ol yia we oli kam afta (luk long Alma 26:36; 3 Nifae 20:25).

Long Jos tedei, yu save harem ol toktok ia abaot Isrel olsem “kam tugeta blong Isrel.” Yumi singsing abaot, “Ridima blong Isrel,” “Hop blong Isrel,” mo “Yufala, Ol Elda blong Isrel.”² Long kes ia, yumi no stap toktok o singsing abaot kingdom blong Isrel blong bifo o Isrel nesen blong tedei. Be, yumi stap tokbaot olgeta we oli karem olgeta long ol nesen long wol oli kam long Jos Ia blong Jisas Kraes. Yumi stap tokbaot ol pipol we oli go mo traehad wetem God, olgeta we oli wantem tumas blong lukaotem ol blesing blong Hem, mo olgeta we tru long baptaes, oli bin kam ol kavenan pipol blong Hem.

Petriakel blesing blong yu i talemaot olsem wanem yu yu joen long wan long ol laen blong haos blong Isrel. Be i gat bitim moa long wan pis blong famli histri infomesen. Blong pat blong haos blong Isrel i minim se yu gat wan kavenan rilesensip wetem Papa long Heven mo Jisas Kraes. Hemia i minim se yufala, olsem Ebraham, yufala i gat janis ia blong “stap olsem wan blesing” long ol pikinini blong God (Jenesis12:2; Ebraham 2:9–11). I minim se, long ol toktok blong Pita, se “yufala God i jusum yufala i laen blong hem.Yufala i pris blong King.Yufala i man blong wan kantri nomo,we yufala i wan tabu man blong God, mo yufala i man blong hem nomo. Hem i mekem olsem long yufala,blong yufala i save talemaot ol gudgudfala wok blong hem. Hem i singaotem yufala finis blong yufala i aot long tudak, yufala i kam ol gudfala laet blong hem” (1 Pita 2:9)). I minim se yu yu wan we “yu gohed, o yu faet wetem God” taem yu stap ona long kavenan blong yu wetem Hem.

Ol Not

1. I gat ol nara posibol mining long nem blong Isrel, mo sam oli “God i rul” o “God i faet o i stap gohed.”

2. Hymns, ol namba 6, 259, mo 319.

Pikja droing blong famli tri blong Jekob, i kam long Keith L. Beavers