Pikja droing blong Rebeka we i kam long Dilleen Marsh

21–27 Febwari

Jenesis 24–27

Kavenan Ia I Kam Niu Bakegen

Taem yu stap ridim Jenesis 24–27, lisin gud long eni niu tingting long saed blong spirit, we yu kasem. Prea blong save olsem wanem ol prinsipol ia we yu faenem, oli stret blong laef blong yu.

Raetemdaon Ol Filing mo Tingting blong Yu

Kavenan blong God wetem Ebraham i tekem promes ia se, tru long Ebraham mo famli laen blong hem “evri famli long wol ia bae i kasem blesing” (Ebraham 2:11). Hemia i no wan promes we bae i save kamtru tru long wan jeneresen nomo: long plante wei, Baebol hem i stori we God i stap gohed blong mekem promes ia i kamtru. Mo Hem i bin stat taem hem i bin mekem kavenan ia i kam niu wetem famli blong Aesak mo Rebeka. Tru long ol eksperiens blong olgeta, yumi lanem wan samting abaot fasin blong stap pat long kavenan ia. Eksampol blong tufala i tijim yumi abaot fasin blong stap kaen, save wet longtaem, mo gat tras long ol blesing we God i bin promesem. Mo yumi lanem se hemia i gud inaf i bitim eni “supsup” blong wol ia (Jenesis 25:30) blong save meksua se yumi kasem ol blesing ia yumiwan, mo tu ol pikinini blong yumi blong ol jeneresen we oli stap kam.

Ol Aedia blong Skripja Stadi blong Yuwan

Jenesis 24

Mared i wan stamba samting folem plan ia blong God we i no save finis.

Tedei, plante pipol oli mekem mared i kam olsem wan namba tu samting, o wan samting we givim tumas wok. Ebraham i bin gat wan defren lukluk—long hem, mared blong boe blong hem, Aesak, i bin impoten tumas. ?From wanem nao yu ting se mared i bin impoten long hem? Taem yu stap ridim Jenesis 24, tingting abaot hamas mared i impoten long plan blong God blong fasin blong sevem man. Mo tu, yu save ridim mesej blong Elda D. Todd Christofferson “Why Marriage, Why Family” (Liahona, May 2015, 50–53) mo tingting long from wanem “mared, we i stanap long mared blong wan man mo wan woman, i givim bes ples blong plan blong God i stap gogohed insaed long hem” (pej 52).

Ol kwestin, olsem olgeta kwestin ia we oli kam afta, oli save helpem yu blong tingting long ol nara impoten prinsipol insaed long japta ia:

Jenesis 24:1–14. ?Wanem Ebraham mo wokman blong hem i bin mekem blong putum Lod insaed long ol hadwok blong tufala blong faenem wan waef blong Aesak?

Jenesis 24:15–28, 55–60. ?Wanem kwaliti yu faenem long Rebeka we bae yu wantem mekem semmak?

?Wanem ol nara niu lukluk o tingting yu faenem?

Luk long Doktrin mo Ol Kavenan 131:1–4; “Famli: Wan Ofisol Toktok I Go long Wol,” ChurchofJesusChrist.org.

Jenesis 25:29–34

Mi save jusum bitwin fasin blong kasem wanem mi wantem tumas naoia mo ol samting we oli gat bigfala valiu.

Long kalja blong Ebraham, fasbon boe insaed long famli, i kasem lidasip posisen mo ol spesel janis, we oli singaotem raet blong fasbon. Boe ia, i kasem wan bigfala pat moa blong ol samting blong papa mo mama blong hem, wetem moa responsabiliti blong stap kea long haf blong famli we i stap.

Taem yu stap ridim Jenesis 25:29–34, tingting long from wanem Esao bae i wantem salem raet blong hem blong kasem wan supsup. ?Wanem lesen yu faenem se oli blong yu insaed long stori ia? Eksampol: i gat eni “supsup” we i stap pulum tingting blong yu aot long ol blesing we oli gat moa valiu long yu? ?Wanem nao yu stap mekem blong lukluk nomo mo stap talem tangkyu from ol blesing ia?

Luk tu long Matiu 6:19–33; 2 Nifae 9:51; M. Russell Ballard, “What Matters Most Is What Lasts Longest,” Liahona, Nov. 2005, 41–44.

Jenesis 26:1–5

Kavenan blong Ebraham i bin kam niu bakegen tru long Aesak.

Kavenan ia we God i bin mekem wetem Ebraham, tingting biaen long hem i blong gohed truaot long plante jeneresen, blong mekem se histri blong Ebraham mo Sara blong kipim kavenan bae i nid blong pas i go daon i go long Aesak, Jekob, mo ol nara fetful woman mo man blong laen blong tufala afta long tufala. Taem yu stap ridim Jenesis 26:1–5, lukaotem samfala blesing blong kavenan ia we God i bin tokbaot. ?Wanem nao yu lanem abaot God aot long ol ves ia?

Jenesis 26:18–25, 32–33

Jisas Kraes i wel blong wota we i givim laef.

Bae yu luk se ol wel blong wota, mo ol spring blong wota, o eni nara ples we wota i kamaot long hem, oli plei ol impoten rol long plante stori blong OlTesteman. Hemia i no wan sapraes, from se plante long ol stori ia, oli stap hapen long ol ples we oli drae evriwan. Taem yu stap ridim, insaed long Jenesis 26 abaot ol wel blong Aesak, tingting hevi long wanem simbol nao wota i ripresentem insaed long ol skripja. ?Wanem niu lukluk nao yu yu faenem abaot ol wel long saed blong spirit we oli ol wel blong “wota we i givim laef”? (Luk long Jon 4:10–15). ?Olsem wanem nao yu yu stap digim ol wel long saed blong spirit insaed long laef blong yu? ?Long yu, olsem wanem nao Sevya i olsem wota we i givim laef? Tekem not se Ol Man Filistia oli bin “blokem” ol wel (luk long Jenesis 26:18). ?I gat eni samting insaed long laef blong yu we i stap stopem ol wel blong wota blong givim laef?

Wan wel long taem blong Bereseba, ples we Ebraham mo Aesak tufala i digim wel long hem.

Jenesis 27

?Olsem wanem? ?Rebeka mo Jekob oli bin rong blong giaman long Aesak?

Yumi no save ol risen biaen long fasin blong Rebeka mo Jekob we tufala i bin yusum blong kasem wan blesing blong Jekob. Hem i help blong tingbaot se OlTesteman olsem we yumi gat tedei, i no fulwan i stap (luk long Moses 1:23, 41). I gat plante infomesen we i no stap tedei, we oli bin stap long fas histri, we bae i save eksplenem wanem i stap trabolem yumi. Be, yumi save se i bin tingting blong God blong Jekob i kasem blesing long Aesak from se Rebeka i bin kasem wan revelesen se Jekob nao bae i mas rul ova long Esao (luk long Jenesis 25:23). Afta we Jekob i bin luksave mo talem se hem i bin blesem Jekob be i no Esao, hem i bin talem se “hem i blesem” Jekob finis (Jenesis 27:33)—mo i talem se tingting blong God i bin kamtru.

Ol Aedia blong Famli Skripja Stadi mo Haos Naet

Jenesis 24:2–4, 32–48.Ebraham i bin askem wan wokman we hem i bin trastem blong faenem wan waef blong Aesak, mo wokman ia i bin mekem kavenan wetem Ebraham se bae hem i mekem; ?Olsem wanem nao wokman blong Ebraham i bin soem se hem i fetful blong stap kipim kavenan ia blong hem? ?Olsem wanem nao yumi save folem eksampol blong hem?

Jenesis 24:15–28, 55–60.Famli blong yu i save lukluk long ol ves ia blong faenem ol fasin we i mekem se Rebeka i wan kompanion we i klin inaf mo i blong taem we i no save finis, blong Aesak. Leftemap tingting blong ol memba blong famli blong pikimap wan long ol fasin ia we oli filim se oli mas developem.

Jenesis 25:19–34; 27.Blong luklukbak long ol stori blong hao raet blong fasbon mo blesing blong Esao i go long Jekob be i no hem, yu save raetem ol sentens we oli stap long “Jacob and Esau” (insaed long Old Testament Stories) long ol defren pis pepa. Ol memba blong famli oli save wok tugeta blong putum ol sentens ia long stret oda.

Taem yufala i stap toktok raon long Esao we i salem raet blong hem olsem fasbon, yufala i save tokbaot wanem i moa impoten long famli blong yu, olsem ol rilesensip blong yufala wetem Papa long Heven mo Jisas Kraes. Maet ol memba blong famli oli save faenem ol samting o ol pikja we oli ripresentem wanem we oli ting se oli impoten long olgeta. Letem olgeta oli eksplenem from wanem oli jusum olgeta samting ia.

Jenesis 26:3–5.Blong helpem famli blong yu i andastanem kavenan ia blong Ebraham, yu save invaetem olgeta blong faenem ol promes we oli tokbaot long ol ves ia. ?From wanem i impoten blong yumi save abaot ol promes ia tedei? (Luk long “Ol Tingting blong Kipim long Maen: Kavenan Ia”,” insaed long buk ia.

Jenesis 26:18–25, 32–33.?From wanem ol wel oli impoten? ?Olsem wanem nao Jisas Kraes i olsem wan wel blong wota?

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “Choose the Right,” Hymns, no. 239.

Stap Kam Antap long Stadi blong Yuwan

Lanem wan skripja baehat Elda Richard G. Scott i tijim: “Wan skripja we yu lanem baehat i wan fren we i stap strong wetem yu, we i no kam slak wetem taem” (“The Power of Scripture,” Liahona, Nov. 2011, 6).

Esao I Salem Raet blong Hem olsem Fasbon i Go long Jekob, i kam long Glen S. Hopkinson