Rebeka

Pikja blong Rebeka i kam long Dilleen Marsh

21-27 Febwari

Jenesis 24–27

Kavenan Ia I Kam Niu Bakegen

Taem yu stap rid long Genesis 24–27 mo rere blong tij, tingting abaot ol pikinini long klas blong yu. ?Wanem nao oli nidim blong lanem? ?Wijwan long ol aktiviti ia bae i gat moa mining long olgeta? Folem ol nid blong olgeta, yu save tekem eni long ol aktiviti we i stap ia o olgeta we yu save faenem insaed long Kam Folem Mi—Blong Wanwan Man, Woman mo Famli.

Raetemdaon Ol Filing mo Tingting blong Yu

serem pikja bokis

Invaetem Ol Pikinini blong Serem Wanem Oli Gat

Andanit long jea blong wanwan pikinini, putum wan kwestin abaot wan samting we i bin hapen o wan prinsipol insaed long Jenesis 24–27. Letem ol pikinini oli ansarem ol kwestin sapos oli save, o invaetem olgeta blong lisin long ol ansa long taem blong lesen.

tijing pikja bokis

Tijim Doktrin: Ol Smol Pikinini

Jenesis 24:10–21

Mi save stap kaen long ol narawan.

Wokman blong Ebraham i filim glad tumas long fasin blong stap kaen we i bigwan we Rebeka i bin soem long hem taem hem i givim wota long hem, mo i no long hem nomo, be tu, long ol 10 kamel blong hem. Eksampol blong hem i save stap rimaenem ol pikinini blong stap kaen long ol narawan.

wan wel blong longtaem bifo

Wan wel blong bifo long Bereseba, ples we Ebraham mo Aesak i digim ol wel long hem.

Samfala Aktiviti we Yu Save Mekem

• Soem pikja blong Rebeka long aktiviti pej blong wik ia. Poenemaot ol ditel long pikja ia taem yu talem long wan sot stori abaot stori long Jenesis 24:10–21, we Rebeka i soem fasin blong stap kaen long wokman blong Ebraham. Poenemaot se ol toktok blong hem mo aksen blong fasin blong stap kaen i ol saen se Rebeka i wan ia nao we God i wantem blong i maredem boe blong Ebraham, Aesak. Invaetem ol pikinini blong mekem se olgeta nao oli wok man ia we i kam wetem ol kamel blong hem mo Rebeka i stap kasem wota blong olgeta. Givim long olgeta ol sentens blong oli lanem baehat insaed long ol skripja olsem “Yu save … givim smol wota” (ves 17) mo “Bambae mi go karem wota i kam, blong ol kamel blong yu tu ” (ves 19). ?From wanem hem i impoten blong yumi mas stap kaen long ol narawan?

• Talem wan stori abaot olsem wanem Sevya i soem fasin blong stap kaen long wan man. Invaetem sam long ol pikinini blong serem ol eksperiens blong olgetawan we oli stap soem fasin blong stap kaen.

• Givim sam tingting blong oli gat ol pat blong aktemaot we wan pikinini i save soem fasin blong stap kaen, olsem blong stap pleiplei wetem ol fren o blong mitim wan we i niu long skul. Askem ol pikinini wanem oli save mekem blong stap kaen long ol pat blong aksen ia.

• Singim wetem ol pikinini wan singsing abaot fasin blong stap kaen olsem long “Kindness Begins with Me” o “Mi Traem blong Kam Olsem Jisas” (Liahona, Epril 2012, 64). Invaetem ol pikinini blong lisin long ol toktok ia “fasin blong stap kaen” (o wan toktok we i semmak) mo stanap taem oli harem. ?Olsem wanem nao yumi save soem fasin blong stap kaen? Aktiviti pej blong wik ia i save helpem yumi blong toktok raon long topik ia.

Jenesis 25:29–34

Mi save jusum ol samting we oli moa impoten.

From se Esao i fasbon pikinini long famli blong hem, hem i mas kasem ol spesel wok mo ol spesel janis we oli singaotem raet blong fasbon. Wan dei taem Esao i hanggri, hem i salem raet blong hem i go long brata blong hem Jekob from sam kaekae. Stori ia i save tijim ol pikinini se yumi sapos blong jusum ol samting we i save stap longtaem bitim we blong jusum ol samting blong glad from blong sot taem nomo.

Samfala Aktiviti we Yu Save Mekem

• Karem i kam long klas sam samting we i save helpem yu blong talem stori blong Esao we i stap salem raet blong hem olsem wan bol glas mo wan pikja blong wan we i stap kasem prishud blesing. Invaetem ol pikinini blong yusum ol samting ia taem oli talem long yu wanem oli save abaot stori ia.“Jacob and Esau” (insaed long Old Testament Stories) i save help. Ridim tugeta Jenesis 25:34, mo eksplenem se huia we i gat raet ia bae i gat ol spesel janis mo ol wok blong kea long evri famli.

• Soem long ol pikinini tu pikja: wan we i gat wan samting we i gat bigfala praes o valiu long saed blong spirit (olsem wan tempol) mo wan blong wan samting we i givim glad blong sot taem nomo (olsem wan gem, doli blong pleiplei, o wan swit kaekae). Askem olgeta blong jusum wijwan long ol samting ia we bae i helpem yumi blong gobak long Papa blong yumi long Heven. Ripitim wetem ol nara pikja.

• Singim wan singsing abaot mekem ol gudfala joes olsem “Choose the Right Way” (Children’s Songbook, 160–61) wetem ol pikinini. Testifae se yumi kasem blesing mo stap hapi taem yumi jusum raet.

tijing pikja bokis

Stap Tijim Doktrin: Ol Bigfala Pikinini

Jenesis 24:1–28

Bae mi kasem blesing taem mi stap tekem aksen wetem fet mo soem fasin blong stap kaen long ol narawan.

Wokman blong Ebraham i soem fet taem hem i trastem God blong i lidim hem blong faenem wan woman blong Aesak. Rebeka i soem fasin blong stap kaen long wei we hem i tritim wok man blong Ebraham. ?Olsem wanem nao yu save helpem ol pikinini we yu tijim blong folem ol eksampol blong wok man blong Ebraham mo Rebeka?

Samfala Aktiviti we Yu Save Mekem

• Ridim Jenesis 24:1–28 tugeta mo helpem ol pikinini blong talemaot ol eksampol blong fet mo fasin blong stap kaen (lukaotem ol eksampol long, ol ves 12–14 mo 17–20). ?Olsem wanem nao wokman blong Ebraham mo Rebeka i kasem blesing taem tufala i stap soem fet mo fasin blong stap kaen?. Raetem long bod Yumi save soem fet tru long … mo Yumi save soem fasin blong stap kaen tru long … , mo invaetem ol pikinini blong givim ol tingting long ol wei we oli save komplitim ol sentens ia.

• Long ol smol pis blong pepa, raetem ol samting we wok man blong Ebraham i bin talem mo bin mekem insaed long Jenesis 24:1–28. Invaetem wanwan long ol pikinini blong jusum wan smol pis blong pepa mo wok tugeta blong talem se huia i bin talem o mekem ol samting ia (oli save lukluk i go long skripja sapos oli nidim help). ?Wanem nao stori ia i stap tijim yumi abaot fasin blong stap kaen? ?Wanem nao stori ia i tijim long yumi abaot fet? Ol nara eksampol blong fasin blong stap kaen mo fet oli faenem insaed long Jenesis 24:29–33, 58–61.

• Invaetem ol pikinini blong tingting long wan aksen blong soem fasin blong stap kaen we oli bin luk. Invaetem olgeta blong raetemdaon mo serem wetem olgeta long klas o wetem ol famli blong olgeta long hom. ?Olsem wanem nao yumi filim taem wan man i kaen long yumi?

Jenesis 25:21–34

Bae mi mekem ol samting we i no save finis i moa impoten bitim ol samting we i blong sot taem nomo.

Esao i bin jusum blong givimaot wan samting we i gat bigfala valiu we i raet blong hem, from wan samting we i no gat bigfala valiu we i sam bred mo wan bol klas blong sup. Taem yu stap ridim ol ves ia, tingting hevi long olsem wanem nao yu stap helpem ol pikinini blong putum ol samting we i no save finis we i impoten i kam faswan.

Samfala Aktiviti we Yu Save Mekem

• Ridim tugeta stori blong Jekob mo Esao insaed long Jenesis 25:21–34. Taem yu ridim, invaetem wanwan pikinini blong jusum wan samting blong droem aot long stori ia. Afta invaetem olgeta blong yusum ol pikja blong olgeta blong talem stori long toktok blong olgetawan. Sapos oli nidim help blong save wanem i wan raet, leftemap tingting blong olgeta blong ridim “Raet blong Fasbon” insaed long Gaed long Ol Skripja (ChurchofJesusChrist.org/study?lang=bis). Invaetem ol pikinini blong pikjarem long maen blong olgeta se Esao i askem advaes blong yumi, se bae hem i salem raet blong hem blong wan supsup mo bred; ?wanem nao bae yumi talem long hem?

• Talem abaot wan taem we yu bin sakrifaesem wan samting we i gud blong wan samting we i gat moa bigfala valiu. O soem vidio: “Continue in Patience” (ChurchofJesusChrist.org). ?Olsem wanem nao stori blong yu o stori long vidio i go wetem joes we Esao i mekem insaed long Jenesis 25:29–34? Helpem ol pikinini blong tingting long ol blesing we Papa long Heven i wantem blong givim long olgeta (olsem wan testemoni we i strong, ol tempol blesing o laef we i no save finis wetem Hem). Leftemap tingting blong olgeta blong tingting long ol samting we bae oli agri blong sakrifaesem blong mekem se oli save kasem ol blesing we i gat moa valiu.

learning icon

Stap Leftemap Tingting blong Lanem Samting long Hom

Invaetem ol pikinini blong tingting long wan gol we oli save putum blong olgetawan abaot wan prinsipol we oli bin lanem long Praemeri tedei. Eksampol, oli save putum wan gol blong stap kaen long ol narafala man long hom.

Stap Kam Antap long Fasin blong Yumi Blong Stap Tij

Ol pikinini oli laekem blong serem wanem we oli stap lanem. I nomata se oli yang, ol pikinini oli save mekem ol famli memba blong olgeta oli kam strong moa. Leftemap tingting blong olgeta blong serem wetem ol famli memba blong olgeta ol samting we oli bin lanem long Praemeri. (Luk long Teaching in the Savior’s Way, 30

aktiviti pej: Mi save stap kaen long ol narafala man