Pikja blong Noa we i stap lego bigfala sip, i kam long Sam Lawlor

31 Jenuware–6 Febwari

Jenesis 6–11; Moses 8

“Noa I Kasem Gladhat long Ae blong Lod”

Stap lanem abaot ol animol long bigfala sip blong Noa mo longfala Taoa blong Babel i save kam wan gud taem blong ol pikinini. Be tingbaot se ol stori ia oli mas hapen blong save tijim ol trutok we oli no save finis. Wetem plante prea, tingting long ol trutok we God i wantem ol pikinini blong lanem.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Bifo yu stat blong tijim ol stori insaed long Jenesis 6–11 mo Moses 8 long ol pikinini givim olgeta janis blong tijim wanwan long olgeta, wanem oli save abaot Noa mo bigfala sip o Taoa blong Babel.

Tijim Doktrin: Ol Smol Pikinini

Jenesis 6:14–22; 7–8; Moses 8:16–30

Blong stap folem profet bae i blesem mi mo famli blong mi.

Taem ol pikinini oli lanem blong folem ol profet, bae oli kasem blesing mo bae oli stap sef long saed blong spirit, semmak olsem ol famli blong Noa we oli bin stap sef long bigfala wota.

Samfala Aktiviti we Yu Save Mekem

• Long toktok blong yuwan, talem stori blong Noa mo bigfala sip (luk long “Noah and His Family,” insaed long Old Testament Stories; luk tu long “Follow the Prophet,” Children’s Songbook, 110–11, ves 3). Helpem ol pikinini blong aktem ol pat blong stori—eksampol, aktem blong yusum wan tul blong bildim bigfala sip o wokabaot olsem ol animol we oli stap go insaed long bigfala sip.

• Ridim long ol pikinini Moses 8:19–20, mo poenemaot gud wanem Lod i komandem Noa blong mekem. Helpem ol pikinini blong oli andastanem se Noa i bin wan profet, mo we famli blong hem i bin sef long bigfala wota we i ron from se oli folem hem. Askem ol pikinini sapos oli save huia profet blong yumi tedei. Soem wan pikja blong Noa, mo helpem ol pikinini blong ripitim nem blong hem.

• Karem i kam long klas ol pikja o sam samting we i ripresentem ol tijing blong profet tedei, olsem skripja o pikja blong wan tempol. Letem wanwan pikinini i jusum wan aetem, mo talem wanem oli save abaot aetem ia. Eksplenem long olgeta wanem nao ol aetem ia oli ripresentem. Leftemap tingting blong olgeta blong dro wan pikja blong olgetawan we oli stap obei long wanem we profet i bin tijim. Serem testemoni blong yu abaot ol blesing, blong stap folem ol profet.

Jenesis 9:15–16

God bae i kipim ol promes blong Hem long yumi.

Hem i impoten blong ol pikinini oli save se God i kipim ol promes blong Hem, speseli taem oli rere blong mekem ol kavenan wetem Hem taem oli baptaes.

Samfala Aktiviti we Yu Save Mekem

• Invaetem ol pikinini blong dro ol pikja blong renbo. Ridim long olgeta Jenesis 9:15–16, mo askem olgeta blong lisin long toktok ia tingbaot. Invaetem olgeta blong holem i go antap ol renbo blong olgeta taem oli harem toktok ia. Eksplenem se ol renbo oli rimaenem yumi long ol promes blong God we i stap blong yumi.

• Toktok wetem ol pikinini abaot sam long ol promes blong God—eksampol, yumi save gobak stap wetem Papa long Heven sapos yumi folem Jisas Kraes o God bae i sendem Tabu Spirit blong kamfotem yumi. Serem testemoni blong yu se Papa long Heven i stap harem ol prea blong yumi.

• Yusum ol pikja blong talem long ol pikinini abaot ol kavenan we yumi mekem wetem God olsem ol pikja blong wan pikinini we i baptaes, sakramen, mo wan tempol (luk long Gospel Art Buk, ol namba 104, 108, 120).

Jenesis 11:1–9

Wan wei ia nomo blong kasem Heven i blong folem Jisas Kraes.

Ol pipol blong Babel oli ting se oli save kasem heven taem oli bildim wan taoa bitim blong laef folem gospel blong Jisas Kraes. ?Olsem wanem yu save helpem ol pikinini andastanem se blong stap folem Sevya i wan wei ia nomo blong gobak long Papa long Heven?

Samfala Aktiviti we Yu Save Mekem

• Talem stori blong Taoa blong Babel long ol toktok blong yuwan, o ridim stori we i stap insaed long “The Tower of Babel” (long Old Testament Stories). Leftemap tingting blong ol pikinini blong helpem yu blong serem wanem oli save abaot stori ia.

  

  Pikja blong Taoa blong Babel, i kam long David Green

• Letem ol pikinini blong bildim wan taoa yusum ol wud o ol nara samting. Afta soem long ol pikinini wan pikja blong Sevya, mo askem olgeta wijwan rod blong gobak long Papa long Heven—?stap bildim wan taoa o stap folem Jisas Kraes? Invaetem ol pikinini blong tokbaot ol samting we oli save mekem blong folem Sevya.

Stap Tijim Doktrin: Ol Bigfala Pikinini

Jenesis 6:14–22; 7–8; Moses 8:16–30

Blong stap folem profet bae i blesem mi mo famli blong mi.

Ol pikinini oli stap groap long wan rabis wol, semmak long sam wei long taem blong wol blong Noa. Eksperiens blong Noa i save givim hop long olgeta se bae oli save faenem sefti long saed blong spirit taem oli folem ol profet.

Samfala Aktiviti we Yu Save Mekem

• Helpem ol pikinini blong jusum ol ves aot long Jenesis 6:14–22; 7–8 we oli save soem long wan droing. Yusum ol droing blong olgeta blong tijim stori blong Noa. Askem ol pikinini blong serem wanem oli lanem aot long stori ia.

• Soem wan pikja blong Noa (luk long Gospel Art Buk, ol namba 7–8) mo ol profet blong tedei. Helpem ol pikinini blong lukaotem long Moses 8:16, 19–20, 23–24 blong faenem ol samting we Noa i i bin tijim we ol lida blong yumi long Jos tedei oli stap tijim. ?Olsem wanem nao yumi kasem blesing taem yumi stap obei ol tijing ia?

• Serem wan samting we profet blong yumi tedei i jes tijim i no long taem i pas. Askem ol pikinini blong oli raetem wan samting we profet i bin tijim long pis blong pepa, mo helpem olgeta blong arenjem ol pis pepa ia i kam long wan sep blong wan bigfala sip. ?Olsem wanem ol tijing ia i olsem bigfala sip we Noa i bildim?

Jenesis 9:15–17

Yumi nid blong tingbaot ol kavenan blong yumi.

Taem yumi baptaes, yumi mekem kavenan wetem God blong obei ol komanmen blong Hem. Long Jenesis 9:15–17, renbo i wan saen blong rimaenem yumi long kavenan blong God. Ol ves ia i save givim insperesen long ol pikinini blong lukaotem ol wei blong tingbaot ol kavenan blong olgeta wetem God.

Samfala Aktiviti we Yu Save Mekem

• Soem long ol pikinini wan samting we yu gat we i rimaenem yu long wan samting we i impoten long laef blong yu, olsem wan ring blong mared, wan pikja o wan jenol. Letem ol pikinini blong serem eksampol blong olgetawan. Ridim tugeta Jenesis 9:15–17 (luk tu long Josef Smit Translesen, Jenesis 9:21–25 [long Baebol apendiks]). ?Wanem nao Papa long Heven i wantem yumi blong stap tingbaot taem yumi luk wan renbo?

• Rimaenem ol pikinini long ol kavenan we oli bin mekem taem oli bin kasem baptaes mo we oli mekem i kam niu evri taem oli tekem sakramen (luk long Mosaea 18:8–10; Doktrin mo Ol Kavenan 20:77, 79). Letem ol pikinini oli krietem wan samting blong rimaenem olgeta long ol kavenan blong olgeta.

Jenesis 11:1–9

Wan wei ia nomo blong kasem Heven i blong folem Jisas Kraes.

Maet ol pipol tedei oli no traem blong bildim ol taoa blong save kasem Heven, plante oli traem blong faenem pis mo hapines taem oli folem ol nara rod bitim hemia we Jisas Kraes i putum i stap. ?Olsem wanem nao bae yu yusum stori blong Taoa blong Babel blong tijim prinsipol ia?

Samfala Aktiviti we Yu Save Mekem

• Askem ol pikinini blong serem wanem oli save abaot stori blong Taoa blong Babel (luk long Jenesis 11:1–9). Insaed long Hileman 6:28, from wanem nao ol pipol blong Babel oli bildim taoa? ?From wanem blong bildim taoa ia i wan rong wei blong blong kasem heven? ?Wanem advaes bae yumi save givim long ol pipol blong Babel?

• Invaetem ol pikinini blong lukaotem insaed long 2 Nifae 31:20–21 mo Hileman 3:28 blong faenem stret wei blong kasem heven. Serem testemoni blong yu abaot Sevya Jisas Kraes.

Stap Leftemap Tingting blong Lanem Samting long Hom

Invaetem ol pikinini blong tingbaot ol wei we oli save tijim ol famli blong olgeta abaot ol stori we oli bin lanem long Praemeri. Eksampol, oli save yusum ol pikja we oli droem o aktiviti pej blong wik ia.

Stap Kam Antap long Fasin blong Yumi blong Stap Tij

Lukaotem blong andastanem ol pikinini we yu stap tijim. Taem yu tijim ol pikinini, lisin gud long ol kwestin blong olgeta, komen blong olgeta mo ol stori o ol prinsipol we i luk olsem se i gat bigfala mining long laef blong olgeta. Blong stap save ol samting ia bae i helpem yu blong lukluk plante long ol nid blong olgeta.