Love One Another, i kam long Emma Donaldson Taylor

24–30 Jenuware

Moses 7

“Lod i bin Singaotem Pipol blong Hem, Saeon

Stat blong rere taem yu stap ridim Moses 7. Kam Folem Mi—Blong Wanwan Man, Woman mo Famli i save helpem yu andastanem japta ia mo ol aedia andanit ia i save givim ol aedia long olsem blong tijim ol pikinini.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Tekem sam minit blong letem ol pikinini ol luklukbak wetem yu wanem oli save abaot profet Inok—wetem evri samting we oli bin lanem long lesen blong las wik. Sapos i help olsem, soem wan pikja we i stap long aotlaen blong wik ia long Kam Folem Mi—Blong Wanwan Man, Woman mo Famli.

Tijim Doktrin: Ol Smol Pikinini

Moses 7:18

God i wantem yumi blong lavlavem yumi wanwan.

Ol ves ia oli tokbaot ol fasin blong ol pipol long Saeon. ?Olsem wanem yu save helpem ol pikinini blong statem blong developem ol fasin ia?

Samfala Aktiviti we Yu Save Mekem

• Serem stori blong ol pipol blong Inok insaed long “Enoch the Prophet” (long Old Testament Stories), o letem ol pikinini oli talem stori ia long toktok blong olgetawan mo yusum pikja blong Inok long aotlaen blong wik ia long Kam Folem Mi—Blong Wanwan Man, Woman mo Famli. Yu save singsing wetem ol pikinini long seken ves blong singsing ia “Follow the Prophet” (Children’s Songbook, 110–11).

• Helpem ol pikinini blong tingbaot ol aksen we i go wetem sentens ia “wan hat mo wan maen” (Moses 7:18). Eksplenem se sentens ia i minim se ol pipol blong Inok oli lavem mo oli kaen long wanwan long olgeta. Invaetem olgeta blong yusum aktiviti pej blong wik ia blong dro wan wei we oli save soem lav.

• Singim wan singsing we i abaot fasin blong stap lavlavem wanwan long yumi olsem “Lav long Hom” (STSP, pej 31). pej 31) Karem ol pikja we i soem ol ki sentens insaed long singsing blong helpem ol pikinini blong lanem ol toktok. Askem ol pikinini blong serem ol wei we oli save soem lav long wanwan long olgeta long Praemeri mo long ol hom blong olgeta. Afta, mekem ol pikinini oli rolplei ol aedia blong olgeta.

Yumi mas traehad blong gat “wan hat mo wan maen” (Moses 7:18).

Moses 7:28–33

God i kea abaot ol pikinini blong hem.

Yu save helpem ol pikinini oli lanem se Papa long Heven mo Jisas Kraes, Tufala i kea bigwan abaot yumi mo ol aksen blong blong yumi.

Samfala Aktiviti we Yu Save Mekem

• Helpem ol pikinini blong tingting long ol samting we i mekem Papa long Heven i hapi. Ridim Moses 7:28 wetem ol pikinini mo eksplenem se Papa long Heven i harem nogud from se ol pipol oli mekem plante rabis fasin (luk long ol ves 32–33).

• Letem ol pikinini blong dro wan hapi fes long wan saed blong pepa mo wan sore fes long nara saed blong pepa. Talem nem blong sam gudfala aksen, olsem blong talem wan prea, mo nogud aksen olsem blong no stap talem trutok, mo askem ol pikinini blong holem i go antap wan fes we i hapi o sore fes blong soem olsem wanem Papa long Heven mo Jisas Kraes bae oli filim abaot wanwan joes blong yumi.

• Invaetem ol pikinini blong plei wan gem we oli rolplei ol samting we oli save mekem we i mekem Papa long Heven i hapi. Askem ol pikinini blong talemaot wanem aksen olgeta ia oli stap mekem. Serem long wanwan pikinini wanem we yu bin luk we oli mekem we i mekem Papa long Heven i hapi.

Moses 7:59–67

Jisas bae i kambak long wol ia.

Long visen blong hem, Inok i bin luk ol dei blong tedei, mo tu, Seken Kaming blong Sevya. ?Olsem wanem yu save helpem ol pikinini blong lukluk i go fored from Seken Kaming blong Sevya?

Samfala Aktiviti we Yu Save Mekem

• Askem ol pikinini blong pikjarem long maen blong olgeta se wan spesel visita i stap kam blong visitim olgeta. ?Wanem nao bae oli mekem blong rere from visita ia? Serem ol toktok blong Inok long Moses 7:60: “bae mi kam long ol las dei.” ?Wanem nao samfala wei we yumi save rere from Jisas blong kambak bakegen?

• Soem ol pikja blong ol taem we Jisas i kamkamaot long ol pipol (luk long Gospel Art Buk, ol namba 60, 82, 83, mo 84). ?Wanem nao ol pipol oli stap mekem long ol pikja ia? ?Olsem wanem nao maet ol pipol oli filim taem oli bin mitim Jisas? Letem ol pikinini blong serem olsem wanem oli filim abaot Jisas taem we bae Hem i kam bakegen?

• Singim wan singsing abaot Seken Kaming blong Sevya olsem “When He Comes Again” (Children’s Songbook, 82–83), mo askem ol pikinini wanem bae i hapen taem Jisas bae i kam bakegen.

Stap Tijim Doktrin: Ol Bigfala Pikinini

Moses 7:18–21, 62–63, 68–69

Yumi save kam wan olsem ol pipol blong Saeon i bin mekem.

Taem yu ridim abaot Saeon, tingting bak long ol eksampol blong stap wan we yu bin luk. ?Olsem wanem yu save helpem ol pikinini blong lanem blong kam wan olsem ol pipol blong Inok oli bin mekem?

Samfala Aktiviti we Yu Save Mekem

• Askem ol pikinini blong lukaotem ol toktok we i tokbaot ol pipol blong Inok we oli save olgeta tu olsem Saeon, taem oli stap ridim Mosaea 7:18. Raetem ol toktok ia olsem ol topik antap long bod, mo invaetem ol pikinini blong raetem anda long wanwan topik ia, ol samting we oli save mekem blong oli kam moa olsem ol pipol blong Inok. Afta oli serem, askem ol pikinini olsem wanem oli save mekem hom blong olgeta i kam moa olsem Saeon. Maet oli save faenem sam aedia long 4 Nifae 1:15–18.

• Askem ol pikinini blong kaontem hamas taem toktok ia: “Saeon” oli kamaot long Moses 7:18–21, 62–63, 68–69. Wanwan taem we toktok ia i kamaot, helpem ol pikinini blong poenemaot wanem ves i talem abaot Saeon (luk tu long Gaed long Ol Skripja “Saeon,” olskripja.ChurchofJesusChrist.org). ?Olsem wanem yumi save kam moa olsem ol pipol we oli tokbaot insaed long ol ves ia?

• Yusum aktiviti pej blong wik ia blong helpem ol pikinini tingabaot ol wei we oli save stap olsem “wan hat mo wan maen” (luk long Moses 7:18).

Moses 7:28–37

God i krae from ol pikinini blong Hem.

?Olsem wanem yu save helpem ol pikinini blong faenemaot se God i kea abaot yumi mo ol aksen blong yumi?

Samfala Aktiviti we Yu Save Mekem

• Askem ol pikinini wanem nao i mekem se God i krae (luk long Moses 7:28–31). Invaetem ol pikinini blong lukaotem long Moses 7:32–33, 37 blong ol ansa. ?Wanem nao ol ves ia oli stap tijim yumi abaot olsem wanem God i filim abaot ol pikinini blong Hem? ?Olsem wanem yumi save se God i lavem yumi? Serem testemoni blong yu abaot lav blong God long yumi.

• Sakem wan smol plastik blong bin o wan balong i go long wan pikinini. Askem pikinini ia blong talem finisim sentens ia “Mi save mekem God i hapi tru long …” mo afta sakem balong ia long wan narafala pikinini. Ripitim olsem kasem evri pikinini i gat janis blong hem.

Moses 7:60–67

Jisas Kraes bae i kambak bakegen long ol las dei ia.

Taem yu ridim abaot Seken Kaming long Moses 7:60–67, tingting long olsem wanem blong tijim ol pikinini long hemia long wan wei we i givim glad.

Samfala Aktiviti we Yu Save Mekem

• Ridim tugeta Moses 7:60–67, mo helpem ol pikinini poenemaot ol samting we Lod i talem we bae i hapen long ol las dei. Askem olgeta wijwan long ol taem ia we oli stap lukluk fored from mo from wanem.

• Invaetem ol pikinini blong tokbaot wan taem we oli bin wet from wan man blong kam visit o blong kambak long hom. ?Ol pikinini oli bin filim olsem wanem? ?Wanem nao oli bin mekem blong stap rere? ?Olsem wanem nao yumi save rere blong luk Jisas bakegen?

• Soem wan pikja blong Seken Kaming blong Sevya (eksampol, luk long Gospel Art Buk, namba 66). Letem ol pikinini blong dro pikja blong olgetawan abaot Seken Kaming folem wanem we oli bin ridim long Moses 7:60–67.

Stap Leftemap Tingting blong Lanem Samting long Hom

?Olsem wanem nao yu save leftemap tingting blong ol pikinini mo famli blong olgeta blong gohed blong lan insaed long OlTesteman long hom. Eksampol: oli save serem wan samting we oli bin droem o kalarem long Praemeri olsem pat blong wan lesen blong haos naet.

Stap Kam Antap long Fasin blong Yumi blong Stap Tij

Helpem ol pikinini blong stap aktiv. “Taem yu stap tijim ol pikinini, letem olgeta blong bildimap samting, dro, kala, raet mo krietem wan samting. Ol samting olsem oli no ol aktiviti blong pleiplei nomo be—oli impoten long fasin blong lanem samting” (Teaching in the Savior’s Way, 25).