pikja blong wol mo mun

3–9 Jenuware.

Jenesis 1–2; Moses 2–3; Ebraham 4–5

“Long Stat, God I Bin Krietem Heven mo Wol Ia”

Taem yu stadi Jenesis 1–2, Moses 2–3, mo Ebraham 4–5, tingbaot ol pikinini we yu tijim, mo tingting hevi long wanem ol trutok we yu save helpem olgeta blong andastanem aot long ol japta ia.

Raetemdaon Ol Filing mo Tingting blong Yu

serem pikja bokis

Invaetem Ol Pikinini blong Serem Wanem Oli Gat

Invaetem ol pikinini blong serem wan samting we Papa long Heven mo Jisas Kraes i krietem, we oli tangkyu from. Stap soem ol pikja aotlaen blong wik ia long Kam Folem Mi—Blong Wanwan Man, Woman mo Famli i save givim sam aedia long olgeta.

tijing pikja bokis

Tijim Doktrin: Ol Smol Pikinini

Moses 2

Jisas I Bin Mekem Wol Ia

Blong save abaot kriesen, i save helpem ol pikinini blong filim lav blong God mo mekem fasin blong olgeta blong stap glad from wol i kam moa bigwan. ?Olsem wanem yu save mekem fasin blong stap lanem abaot Kriesen i givim insperesen long yu?

Samfala Aktiviti we Yu Save Mekem

• Soem long ol pikinini ol samting we i ripresentem ol defren taem blong Kriesen (olsem oli tokbaot long Moses 2; luk tu long “Jesus Christ Creates the Earth,” long Old Testament Stories), mo helpem ol pikinini blong tingting long ol aksen we i go wetem ol pikja ia. Eksampol. Oli save sarem ol fingga blong olgeta blong ripresentem drae graon o muvmuvum han blong olgeta olsem ol wef blong wota (luk long Moses 2:9–10). Serem testemoni blong yu se Jisas Kraes i mekem ol samting ia from Hem mo Papa long Heven i lavem yumi.

• Singsing long wan singsing abaot ol samting we Jisas Kraes i bin krietem blong yumi, olsem “The World Is So Lovely” (Children’s Songbook, 233). Askem ol pikinini blong oli droem ol pikja blong ol kriesen we singsing ia i stap tokbaot.

  mekem wan blangket we oli somap tugeta aot long ol pikja we i soem ol defren pat blong kriesen

  Creation, i kam long Joan Hibbert Durtschi

Moses 2:26–27

Oli krietem mi folem fasin mo pikja blong God.

Taem ol pikinini oli andastanem se oli krietem olgeta folem fasin mo pikja blong God, bae oli save developem filing ia blong tritim gud mo respektem bodi blong olgetawan mo ol narawan.

Samfala Aktiviti we Yu Save Mekem

• Helpem ol pikinini blong ripitim ol toktok ia “Mo mi, God, mi bin mekem man i folem pikja blong miwan” plante taem (Moses 2:27). Eksplenem se Papa long Heven i krietem bodi blong yumi blong i luk olsem blong Hem. Invaetem ol pikinini blong poenem ol pat blong bodi blong olgeta o singsing wan singsing abaot bodi blong yumi olsem “Head, Shoulders, Knees, and Toes” (Children’s Songbook, 275).

• Invaetem ol pikinini blong aktemaot ol samting we oli save mekem wetem bodi blong olgeta, mo afta ol nara pikinini bae oli traem talem wanem ia oli stap mekem. Invaetem ol pikinini blong serem from wanem oli glad from bodi blong olgeta.

• Droem wan pikja blong wan bodi long pepa mo katkatem olgeta i go long ol pat blong mekem i kam wan pasel gem. Pasemaot ol pat ia i go mo letem ol pikinini oli wok tugeta blong putum tugeta ol pat ia blong mekem wan bodi. Askem ol pikinini blong serem wanem oli save mekem wetem wanwan pat blong bodi ia. Serem testemoni blong yu se bodi blong yumi, oli bin krietem i folem fasin mo pikja blong God.

Moses 3:2–3

Sabat dei, i tabu.

Ol pikinini we oli mekem i kam wan fasin blong olgeta, blong kipim Sabat dei i tabu taem oli yang, olgeta ia bae oli save kipim komanmen ia taem we laef bae i kam bisi moa mo fulap long ol wari.

Samfala Aktiviti we Yu Save Mekem

• Ridim Moses 3:2–3, mo askem ol pikinini blong lisin blong save wanem God i bin mekem long namba seven dei. Karem ol pikja (o mekem ol simpol droing) blong ol samting we yumi stap mekem long Sandei blong mekem i wan tabu dei mo ol samting we yumi stap mekem long ol narafala dei. Letem ol pikinini oli seraotem ol pikja long tu hip, wan blong Sandei mo wan blong ol nara dei. Testifae from wanem i impotem blong kipim Sabat dei i tabu.

• Sam dei bifo klas, invaetem wan pikinini mo papa mo mama blong hem blong kam rere blong serem ol samting we oli stap mekem long famli blong olgeta blong kipim Sabat dei i tabu. Invaetem ol pikinini blong oli serem wanem ol famli blong olgeta i stap mekem.

tijing pikja bokis

Stap Tijim Doktrin: Ol Bigfala Pikinini

Moses 2

Jisas Kraes i bin krietem wol ia folem daereksen blong Papa long Heven.

Yu save yusum Moses 2 blong helpem ol pikinini blong luk se stamba tingting blong krietem wol ia, i pat blong plan blong God. Taem yu ridim ol japta ia, ?wanem ol aedia we i kam long maen, we i save helpem testemoni blong ol pikinini abaot kriesen i kam moa strong?

Samfala Aktiviti we Yu Save Mekem

• Helpem ol pikinini blong tingbaot ol taem we oli bin mekem samting folem daereksen blong wan nara man. Eksampol. Maet oli bin mekem wan resipi blong kaekae we papa o mama o wan brata o sista blong olgeta i bin gaedem olgeta blong mekem. Raetem ?Huia i krietem wol? long bod mo invaetem ol pikinini blong faenem ol ansa long Moses 2:1. Testifae se Jisas Kraes i bin krietem wol ia folem daereksen blong Papa long Heven.

• Asaenem wanwan pikinini ol ves long Moses 2 we i go wetem wan long ol dei blong kriesen mo askem olgeta blong droem wan pikja blong ol samting we Papa long Heven mo Jisas Kraes i krietem long dei ia. Askem ol pikinini blong holem ol pikja blong olgeta mo stanap folem oda blong ol dei blong Kriesen, mo afta invaetem wanwan pikinini blong tijim evri narafala pikinini wanem i hapen long ol dei we oli bin asaenem long olgeta. ?Wanem nao yumi lanem abaot Papa long Heven mo Jisas Kraes aot long stori blong Kriesen?

Moses 2:26–27

God i krietem Adam mo Iv folem fasin mo pikja blong God.

Wol bae i givim plante giaman mesej long ol pikinini abaot bodi blong olgeta. Doktrin insaed long Moses 2:26–27 i gat bigfala paoa blong pusum yumi blong respektem mo kea long bodi blong yumi.

Samfala Aktiviti we Yu Save Mekem

• Ridim tugeta Moses 2:26–27. ?Wanem nao ol ves ia oli stap tijim yumi abaot bodi blong yumi? Soem vidio “God’s Greatest Creation” (ChurchofJesusChrist.org), o plei long gem ia “Your Body Is a Temple” (Friend, Aug. 2019, 24–25). Yu save ridim tugeta ol kwot we i go wetem long mesej blong Presiden Russell M. Nelson “Your Body: A Magnificent Gift to Cherish” (New Era, Aug. 2019, 2–7) we bae i helpem ol pikinini blong gat fasin blong talem tangkyu long Papa long Heven from bodi blong olgeta.

• Droem wan pikja blong wan bodi long bod mo invaetem ol pikinini blong jusum wan pat blong bodi mo raet long saed blong pat ia, from wanem oli tangkyu long hem. Soem tangkyu blong yu from bodi blong yu mo testifae se oli krietem yumi folem fasin mo pikja blong God.

Jenesis 2:2– 3

Sabat dei, i tabu.

Ol pikinini bae oli mas eksplenem long ol fren blong olgeta from wanem oli tritim Sandei i defren long ol nara dei. Jenesis 2:2–3 i tijim from wanem Sabat dei i wan tabu dei. ?Wanem nao yu save mekem blong helpem ol pikinini andastanem moa gud mo eksplenem doktrin ia?

Samfala Aktiviti we Yu Save Mekem

• ?Olsem wanem taem yumi kipim Sabat dei i tabu i soem lav blong yumi mo respek long Papa long Heven mo Jisas Kraes? Helpem ol pikinini blong mekem wan rolplei long ol situesen we, olgeta oli eksplenem long wan fren from wanem oli jusum blong mekem ol samting we i givim ona long Papa long Heven mo Jisas. Askem olgeta blong yusum skripja ia Jenesis 2:2–3 long eksplenesen blong olgeta.

• Givim wan minit long ol pikinini blong oli raetem wan lis blong plante samting we oli save tingting long hem, we oli save mekem blong mekem Sabat i wan tabu dei. Invaetem ol pikinini blong serem lis blong olgeta mo leftemap tingting blong olgeta blong ademap i go long lis blong olgeta wanem ol nara wan oli serem we olgeta i nogat. Askem ol pikinini blong tekem lis ia i go long hom blong olgeta mo lukluk bak long hem taem oli nidim ol aedia blong ol gud samting blong mekem long Sabat.

stap lanem samting pikja bokis

Stap Leftemap Tingting blong Lanem Samting long Hom

Helpem ol pikinini blong oli tingbaot olsem wanem oli save mekem wan aktiviti wetem famli blong olgeta we i semmak long wan we yufala i bin mekem long klas. Maet yu wantem helpem olgeta blong raetem wan not blong stap rimaenem olgetawan.

Stap Kam Antap long Fasin blong Yumi blong Stap Tij

Letem ol pikinini oli soem wanem oli krietem. Taem ol pikinini oli stap bildimap samting, dro, o kalarem wan samting we i go wetem stori o prinsipol we oli stap lanem, fulap taem bae oli tingbaot prinsipol ia. Leftemap tingting blong olgeta blong yusum ol kriesen blong olgeta blong tijim ol famli blong olgeta. (Luk long Teaching in the Savior’s Way, 25.)

aktiviti pej: Jisas Kraes i bin krietem wol ia.