3–9 Jenuware

Jenesis 1–2; Moses 2–3; Ebraham 4–5

“Long Stat, God I Bin Krietem Heven mo Wol Ia”

Iven sapos yu bin ridim abaot Kriesen finis, oltaem, i gat fulap moa we yu save lanem aot long olgeta skripja. Prea from Tabu Spirit i save lidim yu blong helpem yu blong faenem wan niu save.

Raetemdaon Ol Filing mo Tingting blong Yu

From se wol raon long yumi i naes tumas, i had tumas blong tingbaot taem wol ia i “stap nating nomo,we i nogat wan samting,” “emti mo i nogat man long hem” (Jenesis 1:2; Abraham 4:2). Wan samting we stori long Kriesen i tijim yumi long hem i we God, i save mekem wan samting we i naes tumas long wan samting we i no oganaes. Hemia i save help blong tingbaot taem laef i stap long trabol. Papa long Heven wetem Jisas Kraes oli ol Krieta, mo wok blong Tufala wetem yumi i no finis yet. Oli save mekem laet i saen long taem blong tudak long laef blong yumi. Oli save mekem yumi stanap strong long medel blong ol strong win blong laef. Oli save komandem ol samting, mo sapos yumi obei ol toktok blong Tufala olsem ol samting ia, Oli save jenisim yumi kam wan kriesen we i naes tumas. Hemia i pat long wanem i minim blong mekem man, i tekem fasin blong God (luk long Jenesis 1:26). Yumi gat bigfala janis ia long kam olsem Hem: stret evriwan, we i gat glori, kasem wan bodi we i selestial.

Blong wan sot stori blong Jenesis, luk long “Jenesis” insaed long Bible Dictionary.

Ol Aedia blong Skripja Stadi blong Yuwan

Jenesis 1: 1–2; Moses 2: 2–25; Ebraham 4: 4–25

Anda long daereksen blong Papa long Heven, Jisas Kraes i krietem wol ia.

Elda D. Todd Christofferson i talem: “I nomata long evri smol samting we oli talem abaot olsem wanem oli krietem wol ia, yumi save se hem i no wan aksiden, be God Papa nao i givim daereksen long Jisas Kraes” (“Why Marriage, Why Family,” Liahona, May 2015, 51). I gat fulap we oli no save olsem wanem nao oli krietem wol ia. Tingting hevi long wanem yu lanem abaot Kriesen aot long wanem God i soemaot tru long revelesen insaed long Jenesis 1:1–25; Moses 2:1–25; mo Ebraham 4:1–25. ?Wanem nao yu luk long stori ia we i semmak? ?Wanem nao yu luksave se i defren? ?Wanem nao ol tingting blong yu abaot Papa long Heven mo Jisas Kraes taem yu stap ridim abaot Kriesen?

Luk tu long Doktrin mo Ol Kavenan 101:32– 34.

Kriesen i kam long Joan Hibbert Durtschi

Jenesis 1:27–28; 2:18–25; Moses 3:18, 21–25; Ebraham 5:14–19

Mared bitwin wan man mo wan woman, God nao i odenem.

“Adam mo Iv i joen tugeta long mared blong wan taem we i no save finis tru long paoa [blong] prishud we i no save finis” (Russell M. Nelson, “Lessons from Eve,” Ensign, Nov. 1987, 87). ?From wanem hemia i wan impoten trutok blong save? Tingting hevi long hemia taem yu stap rid long Jenesis 1:27–28; 2:18–25; Moses 3:18, 21–25; mo Ebraham 5:14–19. Sapos yu wantem blong lanem moa abaot mared insaed long plan blong God, rid mo tingting hevi long ol risos ia we oli stap andanit ia. ?Wanem nao ol risos ia i mekem blong yu wantem blong mekem mared blong yu i kam gud long fiuja?

Luk tu long Matiu 19:4–6; 1 Korin 11:11; Linda K. Burton, “We’ll Ascend Together,” Liahona, May 2015, 29–32; “Famli: Wan Ofisol Toktok I Go Long Wol,” ChurchofJesusChrist.org.

Jenesis 2: 2–3; Moses 3: 2–3; Ebraham 5: 2–3

God i bin blesem mo mekem Sabat dei i tabu.

God i bin mekem Sabat dei i tabu, mo Hem i askem yumi blong kipim i tabu. Elda David A. Bednar i tijim, “Sabat dei i taem blong God, wan tabu taem we oli putum i stap blong stap wosipim Hem, mo blong kasem mo tingbaot bigfala promes blong Hem” (“Ol Nambawan Promes we Oli Gud Tumas,” Jeneral Konfrens, Okt 2017). ?Olsem wanem nao yu save yusum toktok ia mo Jenesis 2:2–3; Moses 3:2–3; o Ebraham 5:2–3 blong stap eksplenem long wan man from wanem yu jusum blong givim ona long Sabat dei? ?Olsem wanem nao Lod i blesem yu taem yu kipim dei blong Hem i Tabu?

Luk tu long Aesea 58:13–14; Doktrin mo Ol Kavenan 59:9–13; “The Sabbath Is a Delight” (vidio), ChurchofJesusChrist.org.

Ol Aedia blong Famli Skripja Stadi mo Haos Naet

Jenesis 1:1–25; Moses 2:1–25; Ebraham 4:1–25.?Olsem wanem nao bae yu mekem fasin blong lanem abaot Kriesen i kam wan gud taem blong famli blong yu? Yu save tekem famli i go aotsaed long haos mo lukaotem defren kaen samting we oli mekem long taem blong wanwan dei we oli stap krietem wol, olsem ol sta, ol tri, o ol animol. Yu maet soem tu, ol pikja blong samting we oli krietem long wanwan dei blong kriesen mo invaetem wanwan famli memba blong putum ol pikja ia long oda afta we yu ridim stori blong Kriesen tugeta. ?Wanem nao ol kriesen ia i stap tijim yumi abaot Papa long Heven mo Jisas Kraes?

Jenesis 1; Moses 2; Ebraham 4.Wan wei blong talem stori blong kriesen i blong invaetem ol famli blong yu blong faenemaot hamas taem long Jenesis 1 o Moses 2 God i singaotem ol samting we Hem i mekem “gud.” ?Wanem nao hemia i givim tingting long yumi olsem wanem yumi tritim kriesen blong God—hemia i minim yumi wan tu? ?Wanem nao yumi lanem long fasin blong toktok insaed long abaot ol samting we oli stap tekem ples long taem ia? Ebraham 4

Jenesis 1:26–27; Moses 2:26–27; Ebraham 4:26–27.?From wanem hem i impoten blong yumi save se oli krietem ol man folem pikja blong God? ?Olsem wanem i save jenisim wei we yumi filim abaot yumiwan, ol narafala man, mo God?

Sapos yu gat smol pikinini, yu wantem blong rid tugeta long Moses 2:27 mo plei wan gem we i simpol: Soem wan pikja we i soem Papa long Heven mo Jisas Kraes, olsem long picture 90 insaed long Gospel Art Book (2009), mo askem wan famli memba blong poenem wan pat bodi blong Papa long Heven mo Jisas Kraes. Mo afta ol narafala famli memba i save poenem long sem bodi pat long bodi blong olgeta.

Jenesis 1:28; Moses 2:28; Ebraham 4:28.Mifala i stap talemaot se komanmen blong God long ol pikinini blong Hem blong kam plante mo fulumap wol ia, i stap yet naoia (“Famli: Wan Ofisol Toktok I Go long Wol,,” ChurchofJesusChrist.org). Ol famli memba oli save mekem wan sot drama blong eksplenem ol bilif blong yumi abaot komanmen ia long olgeta ia we oli no save trutok ia o olgeta we oli bilif i defren.

Jenesis 1:28; Moses 2:28; Ebraham 4:28.?Wanem nao i minim “blong gat paoa … ova long evri samting we i laef mo i stap muvmuv long wol”? (luk tu long Doktrin mo Ol Kavenan 59:16–21). ?Olsem wanem nao famli blong yumi i save mekem responsabiliti blong yumi blong lukaotem wol ia?

Blong gat moa aedia blong stap tijim ol pikinini, luk long aotlaen blong wik ia insaed long Kam Folem Mi—Blong Praemeri.

Wan singsing: “My Heavenly Father Loves Me,” Children’s Songbook, 228–29.

Stap Kam Antap long Fasin blong Yumi blong Stap Tij

Yusum ol skripja ia long laef blong yumi. Afta we yu ridim wan skripja, invaetem ol memba blong famli blong oli yusum long laef blong olgeta. Eksampol: ?Olsem wanem nao bae yumi save yusum Moses 3:1–3 blong kipim Sabat Dei i tabu long wanwan wik? (Luk long Teaching in the Savior’s Way, 21.)

Kriesen Ia, i kam long Annie Henrie Nader