“17–23 Jenuware. Jenesis 5; Moses 6: ‘Yu Tijim Olgeta Samting long Ol Pikinini blong Yu mo Yu No Holemtaet Wan Samting,’” Kam Folem Mi—Blong Wanwan Man, Woman mo Famli: OlTesteman 2022 (2021)
“17–23 Jenuware. Jenesis 5; Moses 6,” Kam Folem Mi—Blong Wanwan Man, Woman mo Famli: 2022
Moa Gud Bitim Paradaes, i kam long Kendal Ray Johnson
17–23 Jenuware
Jenesis 5; Moses 6
“Yu Tijim Olgeta Samting long Ol Pikinini Blong Yu, mo Yu No Holemtaet Wan Samting”
Taem yu stap ridim mo tingting hevi long Jenesis 5 mo Moses 6, raetemdaon ol filing mo tingting we yu kasem long saed blong spirit. ?Wanem mesej nao yu faenem we oli moa impoten long yu mo famli blong yu?
Raetemdaon Ol Filing mo Tingting blong Yu
Plante samting we oli stap long Jenesis 5 i wan lis blong ol jeneresen bitwin Adam mo Iv mo Noa. Yumi stap ridim plante nem, be yumi no stap lanem tumas samting abaot olgeta. Afta, yumi rid abaot Inok, sikis jeneresen stat long Adam i kam daon, mo oli tokaot wetem wan toktok ia we i no gat eksplenesen long hem: “Oltaem long laef blong hem, hem i stap fren gud wetem God, nao God i tekemaot hem long wol ya we i laef yet, mo ol man oli no moa luk hem bakegen” (Jenesis 5:24). Yes, i mas gat wan stori biaen long ol toktok ia. Be i no gat wan eksplenesen moa, mo lis long ol jeneresen i gohed bakegen.
Tangkyu tumas, Moses 6 i talemaot ol ditel blong stori long Inok—mo i wan nambawan stori. Yumi lanem se Inok i gat tingting i stap daon, ol samting we hem i no filim sef long hem, wanem paoa we God i luk long hem, mo bigfala wok we hem i bin mekem olsem wan profet blong God. Mo tu, yumi kasem wan moa gud klia pikja blong famli blong Adam mo Iv taem famli ia i progres truaot long ol jeneresen. Yumi stap rid se Setan “i rul bigwan” be tu, yumi rid abaot ol papa mo mama we oli bin tijim ol pikinini long “evri wei blong God” mo abaot “ol man we oli stap prijim stret mo gud fasin, mo oli bin toktok mo profesae” (Moses 6:15, 21, 23). Wanem i impoten tumas, i we yumi lanem abaot doktrin we ol papa mo mama, mo ol prija ia oli bin stap tijim: fet, fasin blong sakem sin, baptaes, mo blong stap kasem Tabu Spirit (luk long Moses 6:50–52). Doktrin ia, semmak olsem prishud we i kam wetem, “i bin stap stat long stat, bae i stap tu long en blong wol” (Moses 6:7).
Ol Aedia blong Skripja Stadi blong Yuwan
Wan profet i wan sia.
Taem yu stap ridim Moses 6:26–36, ?wanem nao yu lanem abaot ol ae, tudak, mo blong stap luk samting? Long taem blong Inok, ?huia nao “ae blong olgeta oli nomo save luk longwe”? ?From wanem ol pipol ia oli no bin luksave trutok? ?Wanem nao Inok i bin luksave? ?Wanem nao i bildimap bilif blong yu se ol profet blong tedei oli ol sia? (Luk long ves 36; Gaed long Ol Skripja, “Sia,” olskripja.ChurchofJesusChrist.org).
God i singaotem yumi blong mekem wok blong Hem nomata ol samting we yumi no save mekem.
Hem i hapen se bae yumi filim se ol samting we Lod i bin singaotem yumi blong mekem, oli bigwan tumas. Iven Inok i bin filim olsem taem we Lod i bin singaotem hem i kam wan profet. Taem yu stap ridim Moses 6:26–36, lukaotem from wanem Inok i bin filim we wok i bigwan tumas, mo wanem we Lod i bin talem i bin givim hem paoa long tingting. Insaed long ol ves 37–47, lukaotem ol wei we Lod i bin sapotem Inok mo i bin givim Inok paoa blong i mekem wok long Hem (luk tu long Moses 7:13). Yu save komperem eksperiens blong Inok wetem hemia blong ol nara profet we oli bin filim se oli no naf, olsem Moses (luk long Eksodas 4:10–16), Jeremaea (luk long Jeremaea 1:4–10), Nifae (luk long 2 Nifae 33:1–4), mo Moronae (luk long Ita 12:23–29). ?Wanem nao yu filim se God i wantem yu blong lanem aot long ol skripja ia abaot wok ia we Hem i bin givim long yu blong mekem?
Luk tu long Jekob 4:6–8.
Doktrin blong Kraes i stamba blong plan blong God blong fasin blong sevem man.
From se yumi gat buk blong Moses, yumi save se God i bin stap tijim ol pikinini blong Hem long olsem wanem blong faenem fogivnes mo faenem fasin blong pemaot man, stat long stat. Insaed long ol skripja, ol tijing ia, samtaem oli singaotem doktrin blong Kraes (luk long 2 Nifae 31:13–21). Taem yu stap stadi long Moses 6:48–68, luklukgud blong faenem wanem yumi mas save mo mekem blong Lod i pemaot yumi. Maet bae yu faenem se i help blong stap raetemdaon wan sot toktok blong yuwan long wanem we Inok i bin tijim. ?From wanem hem i impoten blong save se ol trutok ia oli bin stap tijim finis stat long taem blong Adam mo Iv ? ?Wanem nao yumi filim insperesen blong go mekem olsem risal blong stadi blong yu long ol tijing ia?
“Yu tijim olgeta samting long ol pikinini blong yu, mo yu no holemtaet wan samting.”
Oli bin tijim Adam mo Iv long ol bigfala trutok ia blong gospel blong Jisas Kraes. Be ol toktok blong Lod long Moses 6:27–28 i mekem i klia se, long ol jeneresen bifo jeneresen blong Inok, i bin gat plante pipol we oli nomo bin stap laef folem ol trutok ia. Lod i bin wantem Inok blong putumbak ol trutok ia we oli bin lus—wetem komanmen ia we Hem i bin givim faswan long Adam: “Yu tijim olgeta samting long ol pikinini blong yu, mo yu no holemtaet wan samting.” (Moses 6:58). Taem yu stap ridim Moses 6:51–62, ?wanem nao yu lanem abaot Jisas Kraes? ?Wanem nao yu faenem we bae i impoten tumas long jeneresen ia we i stap kam antap? ?Wanem nao yu save mekem blong help blong ol trutok ia oli kasem ol fiuja jeneresen?
Papa mo mama i mas tijim gospel long ol pikinini blong tufala.
Ol Aedia blong Famli Skripja Stadi mo Haos Naet
-
Jenesis 5; Moses 6:5– 25, 46.Sapos yufala i ridim abaot “buk blong histri” we famli blong Adam mo Iv oli bin kipim, bae i save givim insperesen long famli blong yu blong mekem wan buk blong histri blong olgetawan. Toktok raon, olsem wan famli, long saed blong wanem blong putum insaed. Ating yu gat ol foto, ol stori, o ol pepa we oli kamaot long histri blong famli blong yu. Maet bae yu jusum blong putum insaed long ol samting we oli stap hapen naoia long famli blong yu. ?Wanem nao bae ol fiuja jeneresen oli tekem se ol samting ia oli gat valiu? Yufala i save toktok raon tu long wei we ol sentens ia “tru long spirit blong insperesen” (Moses 6:5) mo “paten we fingga blong God i bin givim” (Moses 6:46) oli save soem rod blong hadwok from. Tingting blong sevem ol infomesen we oli kamaot long buk blong histri blong yu long FamilySearch.org.
-
Moses 6:53–62.?Olsem wanem nao bae yumi stap ansarem kwestin blong Adam we i stap long Moses 6:53? ?Wanem ansa yumi faenem insaed long ol ves 57–62
-
Moses 6:59.?Hem i minim wanem blong “bon bakegen insaed long kingdom blong heven”? ?Wanem nao yumi save mekem blong gohed blong stap bon bakegen truaot long ol laef long yumi? Blong kasem help, luk long Alma 5:7–14, 26; Gaed long Ol Skripja, “Bon Bakegen, Bon long God” olskripja.ChurchofJesusChrist.org; David A. Bednar, “Always Retain a Remission of Your Sins” (Liahona, May 2016, 59–62).
-
Moses 6:61.?Wanem nao yumi lanem abaot Tabu Spirit aot long ves ia?
-
Moses 6:63.?Wanem sam samting we oli “testifae abaot Kraes”? (luk tu long 2 Nifae 11:4). Tingting blong stap invaetem ol memba blong famli blong oli serem samting we oli luk “long ol heven” o “long wol ia” we i helpem olgeta blong lanem abaot Jisas Kraes. Eksampol: ?Olsem wanem ol tri, ol ston, o san i mekem yumi tingbaot Sevya? ?Ol taetol ia, “wota we i stap laef” o “bred blong laef” oli stap tijim wanem long yumi abaot Hem?(Jon 4:10–14; 6:35).
Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Wan singsing: “Talem Se Mi Redi blong Go, Masta,” STSP, pej 46.
Stap Kam Antap long Stadi blong Yuwan
Lukaotem ol simbol. Insaed long ol skripja, ol samting o ol taem we oli hapen, oli save ripresentem o stap olsem simbol, long saed long spirit, blong ol trutok ia. Ol simbol ia, oli save mekem andastaning blong yu abaot doktrin i kam bigwan moa. Eksampol ?Wanem nao yu lanem aot long ol simbol we oli ol ae mo graon long Moses 6:35?
Adam mo Iv, Tufala I Tijim Ol Pikinini blong Tufala, i kam long Del Parson