Adam mo Iv, i kam long Douglas Fryer

10– 16 Jenuware

Jenesis 3–4; Moses 4–5

Foldaon blong Adam mo Iv

Taem yu stap stadi long Jenesis 3–4 mo Moses 4–5, tingting long wanem nao Lod i stap traem blong tijim yu long hem. Raetemdaon ol trutok ia mo ol filing mo tingting blong yu long saed blong spirit, mo tingting long hem truaot long wik.

Raetemdaon Ol Filing mo Tingting blong Yu

Long fes ples, stori blong Adam mo Iv bae i luk olsem wan samting nogud. Oli sakemaot Adam mo Iv long naesfala Garen blong Iden. Oli putum tufala long wan wol we i fulap long ol harem nogud mo ded (luk long Jenesis 3:16–19). Mo tufala i seperet long Papa blong tufala long Heven. Be from se ol trutok i bin kambak tru long Josef Smit long buk blong Moses, yumi save stori blong Adam mo Iv i wan stori blong givim hop—mo i impoten long plan blong God blong ol pipol blong Hem.

Garen blong Eden i wan naes ples. Be Adam mo Iv i nidim wan samting i moa bitim ol samting raon long tufala. Oli nidim—mo yumi nidim—wan janis blong gro. Blong lego o kamaot long garen blong Eden i, olsem wan fas step blong go kasem God mo blong kam olsem Hem. Hemia i minim blong fesem fasin blong go agens, mekem ol mistek, lanem blong sakem sin, mo trastem Sevya, we atonmen blong hem i mekem i posibol blong yumi gro mo “glad long fasin blong pemaot man” (Moses 5:11). Taem yu ridim abaot Foldaon blong Adam mo Iv, no tingting nomo long wanem i hapen be long wanem bae i hapen—be no long paradaes we Adam mo Iv i lusum, be long glori we joes blong tufala i letem yumi blong kasem.

Ol Aedia blong Skripja Stadi blong Yuwan

Jenesis 3:1–7; Moses 4; 5:4–12

Foldaon i bin pat blong plan blong God blong sevem ol pikinini blong Hem.

Adam mo Iv i karem ded long bodi mo ded long saed blong spirit i kam long wol. I bin karem tu ol hadtaem, harem nogud, mo sin. Hemia i luk olsem ol risen blong harem nogud blong tingbaot Foldaon ia. Be Foldaon ia i bin pat blong plan blong Papa long Heven blong sevem mo mekem ol pikinini blong Hem i kam olsem wan god tru long “sakrifaes blong Wan Stret Pikinini Ia Nomo blong Papa” (Moses 5:7). Taem yu stap stadi long Jenesis 3:1–7; Moses 4; 5:4–12, ?wanem trutok nao yu save faenem we bae i helpem yu blong andastanem Foldaon ia mo olsem wanem nao Atonmen blong Kraes i winim? Ol kwestin olsem oli save help:

• ?Olsem wanem nao Foldaon ia i bin tajem laef blong Adam mo Iv? ?Olsem wanem nao i tajem laef blong mi?

• ?From wanem nao Adam mo Iv i mekem ol sakrifaes ia? ?Ol sakrifaes ia oli simbol blong wanem? ?Wanem nao mi save lanem aot long ol toktok blong enjel long ol ves ia?

• ?From wanem nao Adam mo Iv “i bin glad” afta long Foldaon ia? ?Wanem nao mi lanem aot long histri ia abaot plan blong God blong pemaot mi tru long Jisas Kraes?

From Buk blong Momon mo ol narafala lata‑dei revelesen. yumi gat wan spesel lukluk long Foldaon ia. Eksampol, tingting long wanem profet Lihae i bin tijim ol famli blong hem abaot Adam mo Iv long 2 Nifae 2:15–27. ?Olsem wanem nao ol tijing blong Lihae oli mekem i klia abaot wanem i hapen long Garen blong Iden mo i helpem yumi blong andastanem from wanem i impoten?

Luk 1 Korin 15:20–22; Mosaea 3:19; Alma 12:21–37; Doktrin mo ol Kavenan 29:39–43; Ol Toktok blong Bilif 1:3; Dallin H. Oaks, “The Great Plan,” Liahona, May 2020, 93–96; Dallin H. Oaks, “Opposition in All Things,” Liahona, May 2016, 114–17; Jeffrey R. Holland, “Where Justice, Love, and Mercy Meet,” Liahona, May 2015, 104–6.

Stap Lego Garen blong Iden, i kam long Annie Henrie Nader

Jenesis 3:16; Moses 4:22

?Wanem nao i minim blong Adam i “rul ova” long Iv?

Skripja ves ia samtaem ol man oli andastanem i rong. Oli tekem blong minim se i oraet blong wan hasban i save mekem nogud long waef blong hem. Long dei blong yumi, ol profet long Lod oli tijim se wan hasban i blong prisaed long hom long stret mo gud fasin; hem i luk waef blong hem olsem wan stret patna semmak long hem (luk long “Famli: Wan Ofisol Toktok I Go Long Wol” [ChurchofJesusChrist.org]). Elda Dale G. Renlund mo Sista Ruth Lybert Renlund i eksplenem se wan hasban we fasin blong hem i stret mo gud “bae i lukaot blong i givhan, bae hem i luksave rong mo lukaotem fogivnes; bae hem i kwik blong givim pres, bae hem i mas lukaot long wanem ol famli memba oli wantem; bae hem i filim bigfala responsabiliti blong lukaotem, ‘evri samting we oli nidim long laef mo blong protektem’ famli blong hem, bae hem i tritim waef blong hem wetem bigfala respek mo respektem ol tingting mo ol filing blong waef blong hem. … Bae hem i blesem famli blong hem” (The Melchizedek Priesthood: Understanding the Doctrine, Living the Principles [2018], 23).

Moses 5:4–9, 16–26

God bae i akseptem ol sakrifaes blong mi sapos mi givim olgeta sakrifaes ia wetem wan hat we i gud mo i wantem blong stap obei.

Adam mo Iv oli bin lanem abaot ol sakrifaes blong ol animol oli ol simbol blong sakrifaes blong Kraes we i pem praes blong sin “mo tufala i bin talemaot evri samting ia long ol boe mo ol gel blong tufala” (Moses 5:12). Taem we yu stadi long Moses 5:4–9, 16–26, tingting long defren fasin blong tufala boe blong tufala, Ken mo Ebel, long ol sakrifaes ia. ?From wanem Lod i bin akseptem sakrifaes blong Ebel be i no blong Ken?

?Wanem kaen sakrifaes Lod i askem long yu? ?I gat eni samting we i stap long Moses 5:4–9, 16–26 we i jenisim wei we yu tingting abaot ol sakrifaes ia?

Luk tu long Ol Sam 4:5; 2 Korin 9:7; Omnae 1:26; 3 Nifae 9:19–20; Moronae 7:6–11; Doktrin mo Ol Kavenan 97:8; Jeffrey R. Holland, “Luk Smol Sipsip blong God,” Liahona, Mei 2019, 44–46.

Ol Aedia blong Famli Skripja Stadi mo Haos Naet

Jenesis 3; Moses 4.?Wanem nao yu save mekem blong helpem ol famli blong yu blong oli andastanem moa gud Foldaon blong Adam mo Iv? Yu save kopi ol pikja blong “Adam mo Iv” (insaed long OlTesteman Stori) mo katemaot olgeta. Afta yufala i save wok tugeta blong putum ol pikja ia long oda blong toktok raon long eksperiens blong Adam mo Iv. ?From wanem i bin gat wan Foldaon long plan blong Papa long Heven abaot plan blong sevem man? Wajem vidio blong “The Fall” (ChurchofJesusChrist.org) Hem i save helpem yu ansa long kwestin ia.

Moses 4:1 4?Wanem nao yu lanem abaot God.Jisas Kraes mo Setan aot long ol ves ia? ?From wanem fasin blong mekem joes i impoten long plan blong God mo Setan i wantem blong spolem plan ia?

Moses 5:5– 9.?Wanem nao God i bin komandem Adam mo Iv blong mekem blong helpem tufala blong tingbaot Sevya?? ?Wanem nao God i bin givim long yumi blong helpem yumi blong tingbaot Sevya?

Moses 5:16–34.?Wanem nao i minim blong stap “man blong lukaotem brata blong mi”? ?Olsem wanem nao yumi save lukaotem gud wanwan long yumi olsem ol famli?

Blong gat moa aedia blong stap tijim ol pikinini, luk long aotlaen blong wik ia insaed long Kam Folem Mi—Blong Praemeri.

Wan singsing: “Choose the Right Way,” Children’s Songbook, 160–61.

Stap Kam Antap long Stadi blong Yuwan

Yusum ol tul blong help blong stadi long skripja. Taem yu stadi olgeta skripja, yusum ol futnot, Topical Guide, Bible Dictionary, Gaed long Ol Skripja,mo ol narafala tul blong help blong stadi blong karem sam moa save.

We I Semmak Olsem, i kam long Walter Rane