“Ol Tingting blong Kipim long Maen: Stap Ridim OlTesteman,” Kam Folem Mi—Blong Wanwan Man, Woman mo Famli: OlTesteman 2022 (2021)
“Ol Tingting blong Kipim long Maen: Kavenan Ia,” Kam Folem Mi—Blong Wanwan Man, Woman mo Famli: 2022
Ol Tingting blong Kipim long Maen
Stap Ridim OlTesteman
Faenem Mining blong Yuwan
?Olsem wanem yu stap filim, taem yu stap tingting long janis ia blong stadi long OlTesteman long yia ia? ?Wantem save moa? ?No save? ?Fraet? Evri filing ia oli save andastanem. OlTesteman i wan long ol olfala raeting long wol we oli kolektem, mo i save mekem tugeta man mo woman i glad mo fraet long sem taem. Ol raeting ia oli kam kalja blong bifo we i luk olsem se i blong wan defren ples mo samtaem i luk defren o iven wan filing we i no stret. Be yet long ol raeting ia yumi luk ol pipol oli gat ol eksperiens we i semmak, mo yumi luk save ol stamba blong gospel we i kam olsem wan witnes blong tabu fasin blong Jisas Kraes mo gospel blong Hem.
Yes, pipol olsem Ebraham, Sera, Hanna, mo Daniel oli laef long wan laef, we i defren long yumi. Be olgeta tu oli gat eksperiens ia blong gat wan famli we i stap glad mo famli we i no agri bitwin olgeta, i gat taem blong gat fet mo taem we oli no save wanem i stap hapen, mo taem blong gat sakses mo taem oli foldaon—olsem yumi evriwan i stap go tru long hem. Be hemia we i moa impoten, hem i oli putum fet blong olgeta long wok, sakem sin, mekem ol kavenan, gat ol eksperiens long saed blong spirit, mo oli neva givap long ol hadwok blong olgeta blong obei long God.
Sapos yu stap tingting se yu mo famli blong yu i save faenem wan mining blong yuwan insaed long OlTesteman long yia ia, putum long maen blong yu se famli blong Lihae mo Saraea i mekem i semmak. Nifae i werem ol stori abaot Moses mo ol tijing blong Aesea, taem ol brata blong hem i nidim blong oli leftemap tingting blong olgeta o korektem olgeta o lukluk blong olgeta. Taem we Nifae i talem se, “Sol blong mi i glad long ol skripja” (2 Nifae 4:15), hem i stap tokbaot ol skripja ia we naoia i pat blong OlTesteman.
Stap Lukaotem Sevya
Sapos yu stap tingting se yu mo famli blong i save kam moa kolosap long Kraes taem yufala i stap stadi long OlTesteman , putum long maen blong yufala se Sevya Hemwan i invaetem yumi blong mekem olsem. Taem we Hem i talem long ol lida blong Ol Jiu, “Ol Skripja oli … stap tokbaot mi” (Jon 5:39), Hem i stap tokbaot ol raeting ia we yumi singaotem OlTesteman. Blong faenem Sevya long wanem yu ridim, yu mas tingting hevi wetem fasin we i save wet longtaem mo askem blong Spirit i lidim yu. Samtaem ol refrens abaot Hem i go stret long poen, olsem long wanem Aesea i talem “!Wan pikinini boe bambae i bon long mifala! , !Pikinini ya, bambae yu yu givim long mifala: …nem blong bambae oli singaot hem se … Pikinini ya blong King we Hem i Stamba blong Pis”.(Aesea 9:6). Long ol narafala ples, Sevya i ripresentem wan samting we i moa naes, tru long ol saen mo ol samting we i ripresentem—eksampol, tru long wanem oli soemaot olsem ol sakrifaes blong animol (luk long Levitikas 1:3–4) o stori blong Josef we i fogivim ol brata blong hem mo sevem olgeta long taem we i nogat kakae.
Be sapos yu stap lukaotem bigfala fet long Sevya taem yu stap stadi long OlTesteman,bae yu faenem. Ating hemia bae i gol blong stadi blong yu long yia ia. Prea se bae Spirit i lidim yu blong faenem mo lukluk moa long ol toktok, ol stori mo ol profesi we bae i save karem yu i kam kolosap moa long Jisas Kraes
OlTesteman Profet, Judith A. Mehr
Holem Taet Wetem Tabu Fasin.
Yu no ting se OlTesteman bae i givim wan ful mo stret histri abaot ol man mo woman. Hemia i no wanem ol stret man we oli raetem storian ia mo olgeta we i putum tugeta oli traem blong mekem. Bigfala lukluk blong olgeta i blong tijim samting abaot God—abaot plan blong Hem blong ol pikinini blong Hem, abaot wanem i minim blong stap olsem ol pipol blong kavenan blong Hem, mo abaot olsem wanem blong faenem fasin blong pemaot man taem we yumi no folem ol kavenan we yumi mekem. Samtaem oli mekem i go wetem ol bigfala taem we i hapen long bifo olsem we oli andastanem—wetem ol stori blong ol laef blong ol bigfala profet. Jenesis i wan eksampol blong hemia, olsem ol buk blong Josua, Jajes, mo Fas mo Seken King. Be ol narafala man we oli raetem OlTesteman oli no traem nating blong storian long saed blong histri. Be, oli tij tru long wok blong at olsem raetem wan poem mo raetem ol toktok. Ol Sam mo Ol Proveb i stret long lis ia. Mo i gat ol naesfala toktok blong ol profet, stat long Aesea go kasem Malakae, we oli tokbaot ol tok blong God i go long Isrel blong bifo—mo, tru long merikel blong Baebol, oli stap gohed blong toktok long yumi tedei.
?Evri profet ia, ol man blong raetem poem, mo olgeta we oli putum tugeta ol buk ia, oli bin save se taosen yia afta, bae ol pipol raon long wol bae oli ridim ol toktok blong olgeta? Yumi no save. Be yumi sapraes se hem i wanem we i hapen stret. Ol nesen oli girap mo foldaon, ol siti we oli bin winim olgeta, ol king oli laef mo afta oli ded, be OlTesteman i stap longtaem long olgeta evriwan, stat long wan jeneresen i go kasem wan nara jeneresen, stat long man blong raet go kasem wan nara man blong raet, long wan translesen go long nara translesen. I tru sam samting i bin lus mo oli bin jenisim sam samting, be yet long sam wei oli bin holemtaet plante samting.1
Hemia i jes sam long ol samting blong putum long maen blong yu taem yu stap ridim OlTesteman long yia ia. Ating God i holemtaet ol raeting ia blong bifo from se Hem i save yu mo wanem yu stap go tru long hem. Ating Hem i rere long wan mesej blong yu long saed blong spirit long ol toktok ia, wan samting we bae i mekem yu kam moa kolosap long Hem, mo bildim fet blong yu long plan blong Hem mo Pikinini blong Hem we Hem i Lavem. Ating bae Hem i lidim yu i go long wan ves o wan tingting we bae i blesem wan man we yu save long hem—wan mesej we yu save serem wetem wan fren, wan memba blong famli, o wan memba blong Jos. I gat plante wei. ?Hemia i no wan gud samting blong tingting long hem?
Ol Buk insaed long OlTesteman
Long fulap Kristin vesen blong OlTesteman, ol buk ia oli oganaesem olgeta i defren long olsem wanem oli putum olgeta long fas koleksen. So, taem Baebol blong Hibru i putum ol buk ia long tri grup—loa, ol profet,mo ol raeting—fulap long ol Kristin Baebol i putum ol buk ia long fo grup; loa (Jenesis–Dutronome), histri (Josua–Esta), ol buk blong poem (Job–Sing blong Solomon), mo ol profet (Aesea–Malakae).
?From wanem ol grup ia oli impoten? From se blong save wanem kaen buk nao yu stap stadi long hem i save helpem yu blong andastanem olsem wanem blong stadi long hem.
Hemia i wan samting we yu save putum long maen blong yu taem yu stat blong ridim “loa” o ol fas faef buk blong OlTesteman. Ol buk ia, we oli bilivim se Moses i raetem, ating oli pasem i go long fulap man blong raet mo man blong putum tugeta ol buk ia longtaem finis. Be yet, ol buk blong Moses oli ol toktok blong God we i kam long insperesen, iven sapos oli—olsem eni narafala wok blong God we i givim long ol man long wol ia—we oli ol man we oli no stret evriwan (long Moses 1:41; Ol Toktok blong Bilif 1:8 Ol toktok blong Moronae, we i stap tokbaot ol rekod blong Buk blong Momon we i tabu, we hem i help blong putum tugeta, we i wan bigfala help long ples ia: “Mo nao, sapos i gat sam samting we i no stret oli ol mistek blong ol man; taswe, no toktok agensem ol samting blong God” (taetol pej blong Buk blong Momon.) Long narafala toktok, wan buk blong skripja, i no nid blong i no gat mistek blong man insaed long hem blong mekem se i stap olsem toktok blong God.