Lavlavem Wanwan long Yufala, i kam long Emma Donaldson Taylor

24–30 Jenuware

Moses 7

“Lod I bin Singaotem Ol Pipol blong Hem Saeon”

Taem yu stap ridim Moses 7, raetemdaon ol filing mo tingting blong yu long saed blong spirit. Taem yu mekem olsem, i soem se yu tekem wan gudfala valiu blong folem Lod mo we yu wantem blong risivim moa wei blong Hem.

Raetemdaon Ol Filing mo Tingting blong Yu

Truaot long histri, ol pipol oli bin traem blong kasem wanem we Inok mo ol pipol blong hem oli bin mekem: blong bildim wan sosaeti we i no gat fasin blong stap pua mo i no gat vaelens long hem. Olsem ol pipol blong God, yumi tu, yumi wantem sem samting ia. Yumi singaotem se yumi stap bildimap Saeon, mo i tekem tu—antap long fasin blong stap kea long olgeta we oli pua mo stap promotem pis—blong mekem ol kavenan, blong stap tugeta long stret mo gud fasin, mo stap kam wan wetem wanwan long yumi, mo wetem Jisas Kraes, “King blong Saeon” (Moses 7:53). From wok ia blong stap stanemap Saeon i stap gohed long dei blong yumi tedei, i help blong askem: ?Olsem wanem nao Inok i bin mekem hemia? ?Olsem wanem nao oli bin kam blong gat “Wan hat mo wan maen” (Moses 7:18) i nomata fasin nogud we i bin stap raon long olgeta? Long medel blong ol plante ditel we oli stap long Moses 7 abaot Saeon, i gat wan we i blong ol Lata-dei Sent: Saeon i no jes wan siti—hem i weaples nao hat mo spirit blong yu i stap. Saeon, olsem we Lod i bin tijim, hem i “olgeta we hat blong olgeta i klin gud” (Doktrin mo Ol Kavenan 97:21). So maet bes wei blong bildimap Saeon, hem i blong stat wetem hat blong yumiwan mo ol hom blong yumi.

Ol Aedia blong Skripja Stadi blong Yuwan

Moses 7:16–21, 27, 53, 62–69

Ol hadwok blong Inok oli wan paten blong bildimap Saeon insaed long ol laef blong yumiwan.

From se Moses 7 i wan rekod blong olsem wanem olgeta we oli stap folem God oli gat sakses blong bildimap Saeon, japta ia i save givim instraksen mo givim insperesen long yumi tedei taem yumi stap traehad blong mekem semmak samting. Tingting blong stap yusum wan tebol olsem hemia blong raetemdaon wanem we yu lanem abaot Saeon aot long Moses 7:16–21, 27, 53, 62–69.

Ves	?Wanem nao yu lanem abaot Saeon?	?Wanem tingting nao hemia i givim long yu abaot ol hadwok blong yu blong bildimap Saeon?
Ves 7:18	?Wanem nao yu lanem abaot Saeon? Ol pipol blong Saeon oli “gat wan hat mo wan maen.	?Wanem tingting nao hemia i givim long yu abaot ol hadwok blong yu blong bildimap Saeon? Yumi nid blong stap wan olsem ol famli mo olsem wan Jos.
Ves 7:21	?Wanem nao yu lanem abaot Saeon? “Afta sam taem, we Lod i tekem [Saeon] i go insaed long heven.”	?Wanem tingting nao hemia i givim long yu abaot ol hadwok blong yu blong bildimap Saeon? Blong stap bildimap Saeon i wan rod we i go sloslo.
Ves	?Wanem nao yu lanem abaot Saeon?	?Wanem tingting nao hemia i givim long yu abaot ol hadwok blong yu blong bildimap Saeon?
Ves	?Wanem nao yu lanem abaot Saeon?	?Wanem tingting nao hemia i givim long yu abaot ol hadwok blong yu blong bildimap Saeon?

Moses 7:18–19, 53

Ol pipol blong God oli mas traehad blong oli “gat wan hat mo wan maen.”

Moses 7:18–19 i mekem wan lis blong ol impoten fasin blong ol pipol we Lod i singaotem olgeta Saeon. ?Long tingting blong yu, from wanem nao i nid blong gat fasin ia blong bildimap Saeon? ?Olsem wanem nao, Saeon, olsem we oli tokabaot long japta ia, i defren long ol nara grup we oli stap wan, o ol nara oganaesesen long wol ia? Taem yu stap tingting hevi long kwestin ia, maet yu save tingting abaot ol toktok ia blong Jisas Kraes we oli stap long ves 53: “Mi mi Mesaea, King blong Saeon.” ?Hem i minim wanem blong gat Jisas Kraes olsem King blong yumi? ?Olsem wanem nao Hem i stap helpem yumi blong developem ol fasin blong Saeon?

Luk tu long Filipae 2:1–5; 4 Nifae 1:15–18; Doktrin mo Ol Kavenan 97:21; 105:5.

Yumi mas traehad blong “gat wan hat mo wan maen” (Moses 7:18).

Moses 7:21, 23–24, 27, 69

?Wanem nao i bin hapen long taon ia blong Inok?

Ol toktok ia “tekem i go insaed” (Moses 7:21, 23), “hae antap” (Moses 7:24), “tekem i go insaed” (Moses 7:27), mo “ronwe” (Moses 7:69) oli tokbaot Saeon mo ol pipol blong Inok we oli jenis i kam niu mo God i tekem olgeta oli go long heven. Ol pipol we oli jenis i kam narafala, “oli jenis, we oli no save haremsave bodi i soa, o ded” olsem olgeta we bae bodi i ded (Gaed long Ol Skripja, “Jenis I Kam Niu,” “Saeon,” olskripja.ChurchofJesusChrist.org; luk tu long 3 Nifae 28:4–9, 15–18, 39–40).

Moses 7:28–69

God i stap krae from ol pikinini blong Hem.

Sam pipol oli luk God olsem wan man we i stap longwe, we i no save harem nogud long filing blong Hem from ol samting we oli stap hapen long yumi. Be Inok i bin luk wan visen, we long hem, God i stap krae from ol pikinini blong Hem. Taem yu stap ridim Moses 7:28–40, lukaotem ol risen from wanem nao God i stap krae. Blong stap tingbaot visen blong Inok, we i eksplenem klia insaed long Moses 7:41–69, ?wanem pruf nao yu faenem we i soem se God i “gat sore mo i gat kaen fasin blong oltaem” (Moses 7:30; luk long ol ves 43, 47, mo 62 blong kasem samfala eksampol).

Moses 7:62

Long ol las dei, God bambae i pulum olgeta we Hem i bin jusum oli kam tugeta long wan ples.

Ves 62 i tokbaot ol samting we bae oli hapen long ol las dei. Tingting se, ol sentens olsem ia, oli save minim wanem: “Mo stret mo gud fasin, bae mi sendem i kamdaon aot long heven; “bae mi sendem trutok i go long wol,” “stret mo gud fasin mo trutok bae i swipim wol olsem wan bigfala wota.” ?Wanem nao ol sentens ia oli tij abaot wok blong God long ol las dei?

Ol Aedia blong Famli Skripja Stadi mo Haos Naet

Moses 7:18–19.Blong helpem ol memba blong famli blong luk wanem i minim blong gat “wan hat,” maet bae yu save mekem wan hat aot long pepa, mo yu katkatem i go olsem ol pisis blong pasol, mo yu mekem inaf blong wanwan memba blong famli i gat wan pis. Maet ol memba blong klas oli save raetem nem blong olgeta long pis we oli holem, mo afta, oli wok wetem wanwan long olgeta blong putumbak hat ia i go tugeta. Taem oli stap komplitim pasol ia, yu save tokbaot ol samting we yu lavem abaot wanwan memba blong famli.

Moses 7:28–31, 35.?Wanem nao yumi lanem abaot God aot long ol ves ia?

Moses 7:32.?From wanem God i givim fridom blong mekem joes long yumi? ?Wanem nao bae yumi talem long wan we i stap filim se ol komanmen blong God oli putum sam limit long fridom blong mekem joes? Sapos yufala i ridim 2 Nifae 2:25–27 bae i save ademap sam moa samting long toktok storian.

Moses 7:59–67.Taem we famli blong yu i stap ridim Moses 7:59–67, traem makem, o raetemdaon sam samting we Lod i stap talem long Inok abaot ol las dei—eksampol, we God bae i “karem i kam wanples, olgeta we [Hem i] jusum (ves 62) mo bambae i gat “ol bigfala hadtaem long medel blong ol nogud man” (ves 66). ?Olsem wanem yumi save gat fet mo hop i nomata we fasin nogud i stap long ol las dei? Olsem pat blong toktok storian, tingting blong ridim ol toktok ia we oli kam long Elda Ronald A. Rasband: “Gat hop, ol brata mo sista. Yes, yumi stap long denja taem, be taem yumi stap long kavenan rod, yumi no nid blong fraet. Mi blesem yufala se taem yufala i mekem olsem, bae tingting i no trabol from taem we yumi stap laef long hem, o ol trabol we bae oli stap kam. Mi blesem yufala blong jusum blong stanap long ol tabu ples mo no muvmuv. Mi blesem yufala blong biliv long ol promes blong Jisas Kraes, se Hem i stap laef, Hem i stap lukaot long yumi, i kea long yumi, mo i stanap long saed blong yumi” (“Yufala I No Mekem Tingting blong Yufala I Trabol,” Liahona, Nov 2018, 18)

Blong gat moa aedia blong stap tijim ol pikinini, luk long aotlaen blong wik ia insaed long Kam Folem Mi—Blong Praemeri.

Wan singsing: “Lav long Hom,” Singsing Tabu Mo Singsing Blong Pikinini, pej 44.

Stap Kam Antap long Fasin blong Yumi blong Stap Tij

Save luk samting. Sapos yu rili lukluk long wanem i stap hapen long laef blong ol pikinini blong yu, bae yu faenem ol gudgudfala taem blong save tij. Ol toktok mo ol kwestin blong ol pikinini blong yu truaot long dei, oli save stap olsem wan signol we i talem abaot wan taem blong tij. (Luk long Teaching in the Savior’s Way, 16.)

Siti blong Saeon we I Jenis I Kam Niu, i kam long Del Parson