27 Disemba–2 Jenuware

Moses 1; Ebraham 3

“Hemia I Wok mo Glori blong Mi”

Taem yu stap ridim wanem God i talem long Moses mo Ebraham, tingting hevi long wanem Hem bae i talem long yu tu.

Raetemdaon Ol Filing mo Tingting blong Yu

Baebol i stat wetem ol toktok ia “Bifo we bifo olgeta, God i mekem skae mo graon” (Jenesis 1:1). ?Be wanem nao i bin stap long ples ia bifo long “Bifo we bifo olgeta”? Mo ?from wanem God i krietem evri samting ia? Tru long Profet Josef Smit, Lod i mekem ol kwestin ia oli gat klia ansa.

Eksampol, Hem bin givim rekod blong visen blong Ebraham we i luk se i gat ol spirit we oli stap “bifo wol i bin stap” (luk long Ebraham 3:22–28). Lod i bin givim long yumi wan translesen we i kam long insperesen o wan revisen long ol fasfala sikis japta blong Jenesis, we oli singaotem buk blong Moses—we i no stat wetem “bifo we bifo olgeta.” Be, i stat wetem eksperiens we Moses i gat we i givim hem sam save long stori blong Kriesen we yumi evriwan i save long hem. Tugeta, ol skripja blong ol lata dei ia i wan gud ples blong statem stadi blong yumi blong OlTesteman from se oli tokbaot sam stamba kwestin we i save givim long yumi save ia abaot:?Huia God? ?Huia yumi? ?Wanem nao i wok blong God?, mo ?wanem nao ples blong yumi insaed long wok ia? Ol toktok long stat blong ol japta long Jenesis, yumi save luk ansa blong Lod long wanem Moses i bin askem: “Gat sore long wokman blong yu, O God, mo talemaot long mi long saed blong wol ia,mo ol pipol we oli stap laef long hem, mo tu, long saed blong ol heven” (Moses 1:36).

Ol Aedia blong Skripja Stadi blong Yuwan

Moses 1

Olsem wan pikinini blong God, mi gat wan tabu wok.

Presiden Dieter F. Uchtdorf i tijim: “Fulap long ol samting we yumi konfius long hem long laef ia, i kam from yumi no save stret nomo se huia yumi” (“The Reflection in the Water” [Church Educational System fireside for young adults, Nov. 1, 2009], ChurchofJesusChrist.org). Papa long Heven i save hemia, mo Setan tu i save. Fas mesej we God i givim long Moses i tekem tu ol trutok ia “yu yu boe blong mi” mo “yu yu ripresentem Wan Stret Pikinini blong Mi Ia Nomo” (Moses 1:4, 6). Long wan narafala wei, Setan i luk Moses olsem wan “pikinini blong man” nomo (Moses 1:12). ?Hao nao bae laef blong yu mo ol desisen blong yu i defren sapos yu tingting long yuwan olsem we Setan i wantem blong yu tingting long hem abaot yuwan, se yu yu olsem wan “pikinini blong man” nomo? ?Olsem wanem taem we yu save mo tingbaot se yu wan pikinini blong God, i blesem laef blong yu?

Wanem nao ol ves o ol toktok long Moses 1 i givim long yu, wan save se yu, yu pikinini blong God mo yu gud inaf?

Kraes mo Kriesen, i kam long Robert T. Barrett

Moses 1:12–26

Mi save stanap agensem fos blong Setan.

Olsem we Moses 1 i soemaot klia se, i no minim se ol eksperiens long saed blong spirit we i gat paoa bae i no stopem yumi blong fesem ol temtesen. Be, wan long ol wei blong Setan i traem blong temtem yumi blong gat tu tingting long ol eksperiens ia o long wanem yumi lanem long olgeta. Taem yu stap ridim ansa blong Moses i go long Setan long ves 12–26, ?wanem nao yu lanem we i save helpem yu blong stap tru long testemoni we yu bin kasem? ?Wanem nao i helpem yu blong stanap agensem Setan mo ol narafala temtesen? (eksampol, luk long ves 15 mo 18).

Folem wanem we yu lanem, yu save mekem plan blong stanap agensem temtesen. Eksampol, yu save finisim ol toktok ia: “Taem we mi gat temtesen ia blong , bae mi .”

Luk tu long Matiu 4:1–11; Hileman 5:12; Gary E. Stevenson, “Yu No Trikim Mi,” Liahona, Nov. 2019, 93–96; “I Am a Son of God” (vidio), ChurchofJesusChrist.org.

Moses 1:27–39; Ebraham 3

Wok mo glori blong God i blong helpem mi kasem laef we i no save finis.

Afta we hem i luk visen blong God abaot Kriesen, Moses i askem wan kwestin long Lod se: “Talem long mi … from wanem ol samting ia oli olsem ia” (Moses 1:30). ?Wanem nao i tajem yu abaot ansa blong Lod long Moses 1:31–39?

Ebraham tu i gat eksperiens blong gat visen, we oli raetemdaon long Ebraham 3. ?Wanem nao yu faenem insaed long ol ves ia 22– 26 we i save help blong ansa long kwestin blong Moses?

Tingting blong raetemdaon ol trutok we Moses mo Ebraham i lanem long ol visen blong wanwan long tufala abaot God, abaot olgetawan, mo abaot stamba tingting blong kriesen blong God. ?Olsem wanem ol trutok ia oli jenisim wei we yu luk yuwan mo wol raon long yu?

Luk tu long Dieter F. Uchtdorf, “You Matter to Him,” Liahona, Nov. 2011, 19–22; Gospel Topics, ““Premortality,” topics.ChurchofJesusChrist.org.

Ebraham 3:24–26

?I gat ol narafalawan be i no Ebraham nomo we oli “bin jusum [olgeta bifo we oli] bon?

“Long laef bifo long wol ia, God i bin jusum sam spirit blong mekem wok blong Hem. Hemia oli singaotem jusum o odenem wan bifo laef blong wol ia. … Doktrin ia blong odinesen bifo finis i kam, i blong evri memba blong Jos ia, be i no blong Sevya nomo mo ol profet blong Hem nomo” (Gospel Topics, “Foreordination,” topics.ChurchofJesusChrist.org).

?Olsem wanem nao yumi gat ol buk blong Moses mo Ebraham?

Buk blong Moses i fas pat blong blong Baebol we Josef Smit i kasem insperesen blong transletem. Buk blong Ebraham i kamaot long Josef Smit taem hem i stap wok wetem ol skrol blong ol man Ijip. Ol buk ia, oli faenem olgeta insaed long Perel we I Gat Bigfala Praes, we i givimaot moa infomesen abaot Moses, Ebraham, mo ol narafala profet we oli no faenem olgeta long Baebol. Blong lanem moa abaot ol buk ia, luk long “Josef Smit Translesen Apendiks” (Ol Tul blong Stadi, ChurchofJesusChrist.org/study/scriptures/jst?lang=bis) mo “Translation and Historicity of the Book of Abraham” (Gospel Topics, topics.ChurchofJesusChrist.org).

Ol Aedia blong Famli Skripja Stadi mo Haos Naet

Moses 1:2–6; Ebraham 3:11–12.Yu save invaetem wan memba blong famli blong lukaotem ol toktok long singsing ia “Mi Pikinini blong God” (STSP pej 58) we i go wetem ol trutok we oli tijim long ol skripja ia.

Moses 1:4, 30-39?Bae famli blong yu i glad blong lukluk long sam long “ol samting we [God] i mekem wetem han blong hem”? (ves 4). Maet yufala i save ridim sam long ol ves ia long wan ples blong pleplei o stap aotsaed long naet andanit long ol sta. Yu save tokbaot from wanem God i krietem wol mo abaot olsem wanem yumi save tekpat long “wok blong Hem mo glori blong [Hem]” (ves 39).

Moses 1:18?Wanem advaes yumi save serem wetem wanwan long yumi blong helhelpem yumi blong save “jaj bitwin” God mo Setan? (Luk tu long Moronae 7:12–18; Doktrin mo Ol Kavenan 50:23–24.)

Ebraham 3:24–26Yu save givim wan jalenj wok long ol memba blong famli be long semtaem bae oli gat wan gud taem wetem, we bae i letem olgeta oli save pruvum olgeta se bae oli save folem instraksen, olsem foldem wan pepa plen o folem wan resipi. ?Olsem wanem aktiviti ia i semmak long stamba tingting blong yumi long wol ia olsem we oli talem long ol ves ia?

Blong gat moa aedia blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “Mi Pikinini blong God,” STSP, pej 58.

Stap Kam Antap long Stadi blong Yuwan

Lukaotem ol trutok blong gospel. Insaed long olgeta skripja, samtaem ol trutok blong gospel, oli talemaot klia; long sam nara taem, oli kamkamaot tru long wan eksampol o wan stori. Askem yuwan: “?Wanem trutok we i no save finis nao oli stap tijim insaed long ol ves ia?”

Moses I Winim Setan, i kam long Joseph Brickey