27 Disemba–2 Jenuware.

Moses 1; Ebraham 3

“Hemia I Wok mo Glori blong Mi”

Taem yu ridim wanem we God i bin talem long Moses mo Ebraham, tingting long wanem bae Hem i wantem blong talem long ol pikinini we yu stap tijim. ?Olsem wanem bae yu helpem ol pikinini blong oli filim lav ia we Hem i gat long olgeta?

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Samtaem wan singsing i save helpem ol pikinini blong tingbaot wanem oli stap lanem. Plei o mekem saon blong sam not blong singsing ia “Mi Pikinini blong God” (STSP, pej 58), mo ol pikinini bae oli traem blong talemaot wanem taetol blong singsing ia. Helpem ol pikinini blong tingbaot ol wei we papa mo mama blong olgeta mo ol nara wan i “lidim [olgeta], gaedem [olgeta],” mo “helpem [olgeta] blong faenem rod.”

Tijim Doktrin: Ol Smol Pikinini

Moses 1:1–4, 6

Mi mi Pikinini blong God.

?Wanem nao yu lanem aot long skripja ia Moses 1:1–4, 6 abaot rilesensip blong yu wetem Papa long Heven? ?Olsem wanem nao yu save helpem ol pikinini blong lanem wanem i minim blong stap olsem wan pikinini blong God?

Samfala Aktiviti we Yu Save Mekem

• Ridim long ol pikinini wanem we God i talem long Moses: “Yu yu Pikinini blong mi” (Moses 1:4). Invaetem wan pikinini blong kam long fored blong rum mo askem ol pikinini blong ripitim toktok ia wetem yu,“[Nem blong pikinini ia long fored] mo talem yu yu wan pikinini blong God.” Ripitim sentens ia blong wanwan pikinini long klas.

• Soem sam pikja blong ol pikinini, mo askem ol pikinini long klas sapos ol pikinini ia oli ol pikinini blong God. Tokbaot bigwan se evriwan i wan pikinini blong God. Afta mekem wanwan long ol pikinini oli lukluk long wan mira, mo testifae se olgeta oli ol pikinini blong God tu.

• Singsing “Mi Pikinini blong God” (STSP, pej 58) wetem ol pikinini. Mekem ol pikinini oli kalarem aktiviti pej blong wik ia, mo yusum blong lukluk bak long ol trutok we singsing ia tijim.

  

  Kraes mo Kriesen i kam long Robert T. Barrett

Ebraham 3:22–28

Mi bin laef wetem Papa long Heven bifo mi bon i kam long wol ia.

Blong save abaot laef blong yumi bifo laef long wol ia, i save givim insperesen long yumi blong mekem ol joes we i hang long ol trutok we i no save finis. Taem yu stap stadi long Ebraham 3:22–28, tingting long olsem wanem bae yu tijim ol pikinini abaot aedentiti blong olgeta we i no save finis.

Samfala Aktiviti we Yu Save Mekem

• Yusum “About the Old Testament” (insaed long Old Testament Stories) blong tijim ol pikinini abaot laef bifo laef long wol ia. Afta, invaetem ol pikinini blong talem stori ia bakegen long yu. ?From wanem Papa long Heven i sendem yumi i kam long wol ia? Helpem ol pikinini blong faenemaot wan ansa taem yu stap rid long olgeta Ebraham 3:25.

• Singsing wetem ol pikinini wan singsing abaot plan blong God we Hem i gat blong yumi (olsem: “I Will Follow God’s Plan” [Children’s Songbook, 164–65]). Helpem olgeta blong andastanem ol trutok we i no save finis, we ol toktok blong singsing ia i tijim.

Moses 1:39

Papa long Heven i wantem mi blong gobak laef wetem Hem bakegen.

?Olsem wanem ol trutok insaed long Moses 1:39 i bin blesem laef blong yu? ?Wanem nao yu save mekem blong helpem ol pikinini oli eksperiensem ol blesing ia tu?

Samfala Aktiviti we Yu Save Mekem

• Poenemaot ol sentens ia: “hemia i wok blong mi” mo “laef we i no save finis” long Moses 1:39, mo helpem ol pikinini blong ripitim ol sentens ia. Talem long ol pikinini abaot wok we yu stap mekem evri dei. Tijim olgeta se wok blong Papa long Heven i blong helpem yumi kasem laef we i no save finis, we i minim blong kam olsem Hem mo blong stap laef wetem Hem bakegen.

• Invaetem wan papa o mama blong kam long klas mo tokbaot olsem wanem hem i filim taem wan pikinini i kambak hom afta we hem i go long wan nara ples (eksampol, long skul o long misin), o serem ol filing blong yu we u bin gat long taem blong ol eksperiens ia. Yusum eksampol ia blong tijim ol pikinini olsem wanem Papa long Heven i wantem tumas blong yumi blong go bak long Hem.

Stap Tijim Doktrin: Ol Bigfala Pikinini

Moses 1:4, 30, 37–39; Ebraham 3:22–28

Mi mi Pikinini blong God, mo Hem i wantem helpem mi blong gobak long Hem.

Moses 1:4, 37–39 mo Ebraham 3:22–28 oli tijim ol gudgudfala trutok abaot rilesensip blong yumi wetem God mo stamba tingting blong Hem we i blong sendem yumi i kam long wol ia. Tingting hevi long olsem wanem bae yu helpem ol pikinini blong lanem ol trutok ia.

Samfala Aktiviti we Yu Save Mekem

• Rid wetem ol pikinini Moses 1:4, 37–39 mo Ebraham 3:24–25. Givim ol janis long olgeta blong askem ol kwestin mo serem ol fevret toktok o sentens aot long ol ves ia. ?Wanem nao yumi lanem aot long ol ves ia abaot Papa long Heven mo yumi wanwan?

• Soem long ol pikinini sam long ol pikja blong ol plante kriesen blong Papa long Heven. Ridim Moses 1:30, mo eksplenem se Moses i askem God abaot stamba tingting blong ol kriesen ia. Helpem ol pikinini blong luklukgud long ves 39 blong faenem ansa blong God. Testifae se stamba tingting blong God i blong helpem wanwan pikinini blong kasem laef we i no save finis.

• Helpem ol pikinini blong tingting long ol situesen we oli mas jusum blong mekem o no mekem “evri samting we Lod, God blong olgeta bae i givim oda long olgeta;” (Ebraham 3:25). Letem olgeta praktisim o toktok raon long ol ansa we i stret long ol situesen ia. ?Olsem wanem nao Sevya i stap helpem yumi taem yumi mekem wan rong joes?

Moses 1:12–26

Mi save stap longwe long ol temtesen blong Setan.

Taem yu stadi Moses 1:12–26, lukaotem ol samting we Moses i bin mekem blong stap longwe long Setan. ?Olsem wanem nao eksampol blong Moses i save helpem ol pikinini taem oli fesem ol temtesen?

Samfala Aktiviti we Yu Save Mekem

• Talem long wan sot stori, ol eksperiens blong Moses long Moses 1:12–26 long toktok blong yuwan o askem wan long ol pikinini blong mekem (luk long vidio “I Am a Son of God” [ChurchofJesusChrist.org]). Invaetem ol pikinini blong lukaot insaed long ol ves blong lanem olsem wanem Moses i bin save winim Setan. (Sapos oli nidim help, maet yu save poenem olgeta i go long ol ves olsem: ol ves 13, 15, 18, 20–22, 26.)

• Karem wan bokis blong ol tul (o ol pikja blong ol tul) mo raetem long wanwan tul ol wei we yumi save winim temtesen (olsem blong stap prea, singsing wan hym, stap ridim ol skripja o givim seves long ol narawan). Letem wanwan pikinini i pikimap wan tul mo tokbaot wan situesen we aksen ia, we oli raetem long tul ia i save helpem yumi blong stap longwe long temtesen. Ridim tugeta ol ves 25–26, mo testifae se God bae i helpem yumi taem yumi stap fesem ol temtesen.

Ebraham 3:22–28

Mi bin laef wetem Papa long Heven bifo mi bon i kam long wol ia.

Ol ves ia i stap tokbaot visen blong Ebraham long laef bifo laef long wol ia, we i save helpem ol pikinini blong ansarem ol kwestin olsem “?Wea ples nao mi kam long hem?” mo “?From wanem mi stap long wol ia?” ?Olsem wanem yu save helpem olgeta blong faenem ol ansa?

Samfala Aktiviti we Yu Save Mekem

• Long bod, raetem ol kwestin we i go wetem Ebraham 3:22–28, olsem ?Wanem i bin hapen long laef blong yumi bifo yumi bon i kam long wol ia? ?Huia i bin stap longwe? ?From wanem oli krietem wol ia? Invaetem ol pikinini blong ridim ol ves ia blong faenem ol ansa.

• Sapos i gat wan niu bebi long wod blong yu, invaetem papa mo mama blong hem blong karem hem i kam long klas mo serem ol filing blong olgeta long taem we oli welkamem pikinini ia i kam long wol. (Yu save soem wan pikja blong wan niu bebi we i jes bon i kam long wol.) Toktok wetem ol pikinini abaot wea ples nao spirit blong pikinini ia i bin stap long hem bifo hem i kam long wol ia. ?From wanem i impoten long bebi ia blong lanem se hem i wan pikinini blong God?

• Singsing long ol singsing abaot plan blong God long yumi, olsem “I Know My Father Lives” o “I Will Follow God’s Plan” (Children’s Songbook, 5, 164–65). Invaetem ol pikinini blong dro ol pikja we i go wetem ol toktok ia. Letem olgeta oli yusum ol pikja blong olgeta blong tijim wanwan long olgeta ol trutok aot long ol singsing ia.

Stap Leftemap Tingting blong Lanem Samting long Hom

Tingting long ol samting we i mekem pikinini i lan long Praemeri klas we i save leftemap tingting, sapotem o givim paoa long olgeta taem oli stap lan long hom. Eksampol, yu save invaetem ol pikinini blong serem aktiviti pej blong wik ia wetem ol famli blong olgeta.

Stap Kam Antap long Fasin blong Yumi blong Stap Tij

Ol pikinini oli stap lanem samting long plante fasin. Ol pikinini oli stap glad blong lanem samting tru long ol niu mo defren eksperiens. Yusum ol aktiviti we bae i letem oli muv olbaot, oli yusum evri sens blong olgeta, mo oli traem ol niufala samting. (Luk long Teaching in the Savior’s Way, 25–26