“17–23 Jenuware Jenesis 4; Moses 6–5: ‘Tijim Olgeta Samting Ia long Ol Pikinini blong Yu, Mo Yu No Holemtaet Wan Samting,’” Kam Folem Mi—Blong Praemeri: OlTesteman 2022 (2021)
“17–23 Jenuware Jenesis 5; Moses 6,” Kam Folem Mi—Blong Praemeri: 2022
Gud Moa bitim Paradaes, i kam long Kendal Ray Johnson
17–23 Jenuware
Jenesis 5; Moses 6
“Tijim olgeta samting ia long ol pikinini blong yu, mo yu no holemtaet wan samting”
Stat rere blong tij taem yu ridim Jenesis 5 mo Moses 6. Taem yu mekem olsem, lisin long ol tingting mo filing we i kam long Tabu Spirit abaot wanem ol pikinini oli nid blong lanem.
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Long ol smol pepa raetem sam ki toktok we i save helpem ol pikinini blong tingbaot wan samting oli lanem long hom long wik ia o long wan lesen blong Praemeri we i pas finis. Mekem ol pikinini oli jusum wan ki toktok wan afta wan long wanwan taem. Taem oli jusum wan toktok finis, invaetem eni pikinini blong serem wan samting we oli bin lanem we i go stret wetem ki toktok blong olgeta.
Tijim Doktrin: Ol Smol Pikinini
God i save helpem mi blong mekem ol had samting.
God i singaotem Inok blong prijim gospel, hem i wari se bae hem i no save mekem. Be God i helpem hem blong mekem ol bigbigfala samting.
Samfala Aktiviti we Yu Save Mekem
-
Askem ol pikinini blong serem wan taem we oli askem olgeta blong mekem wan samting we i had o i mekem oli fraet blong mekem. Serem stori blong Inok we God i singaotem hem blong kam wan profet, faenem long Moses 6:27, 31–34 (luk tu long “Enoch the Prophet,” insaed long Old Testament Stories). Mekem i klia gud se nomata we Inok i no filim rere blong kam wan profet, God i promes blong helpem hem. Helpem ol pikinini blong andastanem sam wei we God i helpem yumi taem oli askem yumi blong mekem ol had samting.
-
Serem sam eksampol long ol skripja long taem we God i helpem ol pipol blong mekem ol had samting—eksampol, Noa i bildim bigfala sip, Deved i faet wetem Kolet, Amon i stap protektem sipsip blong king o Samuel man blong Leman we i stap prij. (Blong karem ol pikja mo skripja refrens, luk long Gospel Art Buk, ol namba 7, 19, 78, 81.) Serem wan eksperiens we taem Lod i helpem yu mekem wan samting we i had.
Gospel i tijim mi olsem wanem blong gobak long Papa long Heven.
God i tijim Adam wanem yumi nid blong mekem blong gobak long Hem—gat fet, sakem sin, kasem baptaes, mo kasem presen ia we i Tabu Spirit. ?Olsem wanem nao yu save helpem ol pikinini blong lanem moa abaot ol samting ia?
Samfala Aktiviti we Yu Save Mekem
-
Faenem o dro ol pikja blong ripresentem fet, sakem sin, baptaes mo presen ia we i Tabu Spirit (luk long aktiviti pej blong wik ia). Putum ol pikja ia long wan laen we i stap lid i go long wan pikja blong Jisas Kraes. Ridim Moses 6:52 long ol pikinini mo askem olgeta blong stanap kolosap long stret pikja taem oli harem ol toktok we pikja ia i ripresentem (long ves ia, toktok ia “bilif” oli yusum blong tokbaot “fet”).
-
Singsing ol singsing we i tijim ol prinsipol insaed long Moses 6:52, olsem “Faith,” “Help Me, Dear Father” (ves 2), “When I Am Baptized,” mo “The Holy Ghost” (Children’s Songbook, 96–97, 99, 103, 105). Helpem ol pikinini blong andastanem se, blong stap mekem ol samting we singsing ia i stap tijim, bae i helpem yumi blong gobak stap wetem Papa long Heven.
Papa long Heven i wantem ol papa mo mama blong tijim ol pikinini blong olgeta.
Long taem blong Adam mo Iv, oli bin komandem ol papa mo mama blong tijim ol pikinini blong abaot gospel. ?Olsem wanem nao yu save leftemap tingting blong ol pikinini blong lisin mo folem ol stret mo gud tijing blong ol papa mo mama blong olgeta?
Samfala Aktiviti we Yu Save Mekem
-
Ridim Moses 6:58 i go long ol pikinini mo soem pikja blong famli blong Adam mo Iv long aotlaen blong wik ia long Kam Folem Mi—Blong Wanwan Man, Woman mo Famli. Helpem ol pikinini blong ripitim sentens “tijim olgeta samting long ol pikinini blong yu, mo yu no holemtaet wan samting” Eksplenem se God i wantem evri papa mo mama blong folem eksampol blong Adam mo Iv blong tijim ol pikinini blong olgeta abaot Jisas Kraes mo gospel blong Hem. Askem ol pikinini wanem nao oli save mekem taem ol papa mo mama blong olgeta o ol narafala man oli tijim gospel long olgeta.
-
Helpem ol pikinini blong majem ol pikja blong olgetawan i go long ol papa mo mama blong olgeta o ol pikja blong ol bebi animol i go long ol adalt animol. ?Olsem wanem ol papa mo mama oli stap helpem ol pikinini blong olgeta? ?Wanem nao oli tijim long olgeta? Askem ol pikinini blong dro ol pikja blong ol famli blong olgeta long taem we ol papa mo mama oli tijim ol pikinini, olsem stap ridim skripja tugeta, stap prea tugeta o kakae tugeta.
Pikjafamli we i stap stadi long skripjaOl papa mo mama mas tijim gospel long ol pikinini blong olgeta.
Stap Tijim Doktrin: Ol Bigfala Pikinini
God i save helpem mi blong mekem ol had samting.
Nomata we Inok i filim se hem i no inaf, God i helpem hem blong mekem koling blong Hem olsem wan profet. God i save helpem tu ol pikinini we yu stap tijim blong mekem ol had samting.
Samfala Aktiviti we Yu Save Mekem
-
Ridim Moses 6:26–34 wetem ol pikinini. ?From wanem Inok i filim se hem i no save prijim gospel? (luk long Moses 6:31). ?Olsem wanem nao God i helpem Inok? (luk long Moses 6:32–34; 7:13).
-
Invaetem ol pikinini blong talem nem blong sam samting we i had, blong ol pikinini we oli gat sem yia olsem olgeta, blong oli mekem (olsem blong komplitim wan homwok blong skul, stap soem kaen fasin long olgeta we oli no stap kaen, o blong talem trutok taem oli mekem wan mistek). Helpem ol pikinini blong faenem ol sentens long Moses 6:32–34 we i save helpem olgeta. Askem ol pikinini blong serem wan taem we God i helpem olgeta blong mekem wan samting we i had. Mo tu, serem ol eksperiens blong yuwan.
Fet, sakem sin, baptaes mo kasem Tabu Spirit i mekem mi rere blong gobak stap wetem God.
Adam mo Inok i bin tijim ol pipol blong olgeta ol fas prinsipol mo ol odinens blong gospel: fet, sakem sin, baptaes mo kasem presen ia we i Tabu Spirit (luk tu long Ol Toktok Blong Bilif 1:4). ?Wanem nao yu save mekem blong helpem ol pikinini blong andastanem olsem wanem ol prinsipol mo ol odinens ia i impoten long laef blong olgeta?
Samfala Aktiviti we Yu Save Mekem
-
Askem ol pikinini blong ridim Moses 6:52, 57 blong faenemaot ol prinsipol mo ol odinens blong gospel we i stap long namba fo toktok blong bilif.
-
Raetem nambafo toktok blong bilif long bod mo invaetem ol pikinini blong ridim. Afta rapemaot wan o tu toktok, mo askem olgeta blong ridim bakegen, mo stap fulumap ol toktok we i no stap we oli save tingbaot. Ripitim fasin ia kasem taem ol pikinini oli lanem toktok blong bilif ia.
-
Invaetem ol pikinini blong raetem wan sot toktok abaot fet, sakem sin, baptaes o kasem presen ia we i Tabu Spirit—wan samting we oli save serem wetem ol famli blong olgeta. Wanwan toktok ia i save gat wan skripja, wan eksperiens, mo wan testemoni. Long toktok ia oli save eksplenem tu olsem wanem wanwan prinsipol ia i save helpem yumi blong gobak stap wetem Papa long Heven.
Papa mo mama, tufala i gat fas wok ia blong tijim ol pikinini blong tufala.
God i trastem ol papa mo mama blong stap olsem ol fas tija blong gospel insaed long famli blong olgeta. ?Olsem wanem nao yu save leftemap tingting blong ol pikinini blong sapotem ol papa mo mama blong olgeta long ol wok blong olgeta?
Samfala Aktiviti we Yu Save Mekem
-
Askem wan pikinini blong ridim Moses 6:58. ?Wanem komanmen nao we Papa long Heven i givim long ol papa mo mama long ves ia? Soem pikja blong Adam mo Iv we tufala stap tijim ol pikinini blong tufala (luk long aotlaen blong wik ia long Kam Folem Mi—Blong Wanwan Man, Woman mo Famli), mo askem ol pikinini blong tokbaot wanem we oli luk long pikja ia. Leftemap tingting blong olgeta abaot ol impoten trutok blong gospel we oli bin lanem long ol famli blong olgeta.
-
Helpem ol pikinini blong raetem ol tangkyu not i go long ol papa mo mama blong olgeta o mekem plan long ol simpol wei blong soem tangkyu blong olgeta i go long papa mo mama blong olgeta. Sing wan singsing abaot ol famli olsem “Love Is Spoken Here” (Children’s Songbook, 190–91). ?Olsem wanem yumi save helpem ol papa mo mama blong yumi blong krietem wan hom we lav i stap oltaem.
Stap Leftemap Tingting blong Lanem Samting long Hom
?Olsem wanem yu save helpem ol pikinini blong gohed blong stap lanem samting aotsaed long klas? Yu save leftemap tingting blong olgeta blong tingbaot stori blong Inok taem oli fesem wan had samting long wik ia.
Stap Kam Antap long Fasin blong Yumi blong Stap Tij
Yusum ol aktiviti pej. Taem ol pikinini oli stap kalarem ol aktiviti pej, luklukbak long ol prinsipol insaed long lesen. Ridim ol toktok long pej long ol pikinini sapos i posibol.