Adam mo Iv, i kam long Douglas Frye

10–16 Jenuware

Jenesis 33–4; Moses 4–5

Foldaon blong Adam mo Iv

Tingbaot ol pikinini we yu stap tijim taem yu stadi long Jenesis 3–4 mo Moses 4–5. Luklukgud long ol tingting mo filing we yu kasem; oli save lidim yu i go long ol niu aedia blong stap tij.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Soem wan pikja blong Adam mo Iv (luk long aotlaen blong wik ia insaed long Kam Folem Mi—Blong Wanwan Man, Woman mo Famli), mo askem ol pikinini blong stanap mo serem wan samting we oli luk long pikja o tingbaot abaot stori ia.

Tijim Doktrin: Ol Smol Pikinini

Jenesis 3; Moses 4

Adam mo Iv oli bin folem plan blong Papa long Heven.

Helpem ol pikinini blong andastanem wanem i bin hapen insaed long Garen blong Iden mo olsem wanem hemia i help blong mekem plan blong God we i plan blong fasin blong sevem man, i hapen. ?Wanem nao oli ol blesing we yumi gat from joes we Adam mo Iv i bin mekem?

Samfala Aktiviti we Yu Save Mekem

• Blong talem i sot stori blong Foldaon blong Adam mo Iv, yusum “Adam and Eve” (long Old Testament Stories). Helpem ol pikinini blong andastanem se joes blong Adam mo Iv blong kakae long frut, i pat blong plan blong Papa long Heven.

• Givim wan pikja long wanwan pikinini we i ripresentem wan samting long stori blong Adam mo Iv (olsem wan tri, wan snek, wan Garen o Jisas Kraes). Askem olgeta blong oli holem ol pikja blong olgeta i go antap long stret taem, taem yu stap talem stori mo ridim ol sentens long Moses 4. Ol aktiviti blong wik ia tu oli save help.

  

  Leaving Eden, i kam long Annie Henrie Nader

Moses 4:1–4

Mi save jusum raet.

Long Moses 4:3, yumi lanem se Setan i “wantem blong prapa spolem gud fridom blong man blong mekem joes, we mi, Lod God, mi bin givim long hem,” ?Olsem wanem nao yu save helpem ol pikinini blong talem tangkyu from paoa ia blong save jus bitwin raet mo rong?

Samfala Aktiviti we Yu Save Mekem

• Tokbaot sam joes we yu bin mekem tedei long ol pikinini, mo helpem olgeta blong tingbaot ol joes we oli bin mekem. Ridim long olgeta Moses 4:3: “Fridom blong man blong mekem joes, we mi, Lod God, mi bin givim long hem.” Eksplenem se ves ia i tijim yumi se God i bin givim paoa ia long yumi blong mekem ol joes. Talemaot wetem fasin blong talem tangkyu, se yu save jusum raet mo testifae se ol pikinini tu, oli save jusum wanem i raet.

• Serem sam simpol eksampol blong wan pikinini we i stap mekem wan raet joes o wan rong joes mo askem ol pikinini blong talemaot sapos joes ia i raet o rong (maet oli save stanap, holem ol saen o leftemap han blong olgeta). Serem testemoni blong yu se Papa long Heven bae i helpem yumi blong jusum raet mo invaetem ol pikinini blong serem ol filing blong olgeta tu.

• Helpem ol pikinini blong oli tingting long ol gud joes we oli save mekem blong folem Jisas Kraes. Singsing tugeta wan singsing blong stap mekem ol gudfala joes olsem “Choose the Right Way” (Children’s Songbook, 160–61). Talem long ol pikinini abaot wan taem we yu bin mekem wan gudfala joes, mo tokbaot filing blong yu from joes blong yu.

Moses 5:4, 8

Mi save prea long Papa long Heven

“?Wanem nao ol pikinini we yu tijim oli nid blong save abaot prea? ?Wanem nao yu faenem insaed long ol ves ia we i helpem olgeta?

Samfala Aktiviti we Yu Save Mekem

• Ridim Moses 5:4 long ol pikinini. Helpem olgeta blong andastanem se taem Adam mo Iv i lego Garen blong Iden, oli nomo save stap wetem Papa long Heven bakegen, be tufala i save prea i go long Hem. Eksplenem se yumi prea i go long Papa long Heven long nem blong Jisas Kraes (luk long Moses 5:8). ?Wanem sam samting yumi save talem long Papa long Heven long ol prea blong yumi?

• Askem ol pikinini blong soem long yu ol aksen blong prea we oli stap mekem taem oli stap prea. Yu save soem tu wan pikja blong wan man we i stap prea (luk long Gospel Art Buk, ol namba 111–12) blong tijim ol pikinini se blong putum hed blong yumi i go daon, foldem han blong yumi mo klosem ae blong yumi i save helpem yumi blong stap revren taem yumi stap prea.

• Serem wan eksperiens blong yuwan wetem prea o testemoni blong yu long prea. Singsing wetem ol pikinini wan singsing abaot prea, olsem “A Child’s Prayer” (Children’s Songbook, 12–13).

Stap Tijim Doktrin: Ol Bigfala Pikinini

Jenesis 3; Moses 4; 5:10–11

Foldaon blong Adam mo Iv i bin pat blong plan blong God.

Sapos Adam mo Iv i bin stap stap long Garen blong Iden, bae tufala no bin gat pikinini mo no save progres blong kam olsem Papa long Heven. Yumi tangkyu long joes blong tufala blong kakae long frut from joes ia i mekem i posibol laef blong yumi long wol ia mo janis blong yumi blong kasem laef we i no save finis.

Samfala Aktiviti we Yu Save Mekem

• Invaetem ol pikinini blong wok tugeta blong talem stori blong Foldaon blong Adam mo Iv long toktok blong olgetawan. Serem ol ves ia long Jenesis 3 blong helpem olgeta.

• Helpem ol pikinini blong faenem insaed long Moses 4:22–25, 29; 5:10–11 ol risal we Adam mo Iv i kasem from oli kakae frut (luk tu long 2 Nifae 2:19–25). ?From wanem joes blong tufala i wan blesing long yumi? ?Olsem wanem nao Sevya i winim sin mo ded?

Moses 4:1–4

Mi gat paoa blong jusum raet o rong.

Ol pikinini we yu stap tijim ?oli luksave se fridom blong joes i wan gudfala presen blong mekem joes bitwin raet o rong? ?Olsem wanem nao stori blong Adam mo Iv i helpem olgeta blong glad long presen ia?

Samfala Aktiviti we Yu Save Mekem

• Tingting long wan simpol samting blong yusum long lesen olsem olgeta eksampol ia blong soem hamas i impoten blong mekem joes blong yumiwan: Invaetem ol pikinini blong kalarem aktiviti pej blong wik ia, be givim long olgeta wan kala nomo blong yusum. ?From wanem bae i moa gud blong gat ol joes long situesen ia? Ridim tugeta Moses 4:1–4 blong tokbaot from wanem ol joes oli impoten long plan blong God.

• Invaetem ol pikinini blong serem wan eksperiens blong olgetawan taem we oli mas jusum bitwin raet mo rong. Letem olgeta toktok raon long ol risal blong wanwan joes we i posibol blong hapen.

Moses 5:4–15

From Jisas Kraes, Mi save sakem sin mo laef wetem God bakegen.

Papa long Heven i sendem Jisas Kraes blong sevem yumi aot long ol samting we yumi mas fesem from Foldaon. Tru long atonmen mo sakrifaes blong Hem, Jisas i mekem i posibol blong yumi save laef bakegen afta long ded mo fogivim ol sin blong yumi taem yumi sakem sin.

Samfala Aktiviti we Yu Save Mekem

• Raetem tu topik long bod: From se Adam mo Iv mo From se Jisas Kraes. Helpem ol pikinini blong poenemaot ol risal blong Foldaon taem yu ridim tugeta Moses 4:25; 6:48; Rom 5:12; 2 Nifae 2:22–23. Letem olgeta raetem wanem oli lanem anda long fas topik. Afta helpem olgeta poenemaot olsem wanem Jisas Kraes i winim sin mo ded taem yu ridim tugeta Moses 5:8–11, 14–15; 6:59; Alma 11:42. Letem olgeta raetem wanem oli lanem anda long seken topik. ?From wanem yumi talem tangkyu from Jisas Kraes?

• Soem wan vidio abaot Atonmen blong Sevya olsem long “Because of Him” (ChurchofJesusChrist.org). Invaetem ol pikinini blong serem olsem wanem nao oli filim abaot Jisas Kraes.

• Sam dei bifo klas, askem sam pikinini blong jusum wan skripja o wan singsing abaot Atonmen blong Sevya blong serem long klas. Leftemap tingting blong ol pikinini blong tokabaot from wanem oli laekem. Singsing wan o moa singsing tugeta.

Stap Leftemap Tingting blong Lanem Samting long Hom

Invaetem ol pikinini blong serem aktiviti pej blong wik ia wetem ol famli blong olgeta mo tokbaot ol blesing we yumi gat from Foldaon blong Adam mo Iv.

Stap Kam Antap long Fasin blong Yumi blong Stap Tij

Lukaotem insperesen blong yuwan. No tekem se ol aotlaen ia oli ol instraksen we yu mas folem taem yu stap tij. Be, yusum olgeta olsem wan ples blong kasem sam aedia blong givim laet long insperesen blong yuwan taem yu stap tingting hevi long ol nid blong ol pikinini we yu stap tijim. (Luk long Teaching in the Savior’s Way, 7.)