Pikja droing blong Noa we i stap aot long bigfala sip, i kam long Sam Lawlor

31 Jenuware –6 Febwari

Jenesis 6–11; Moses 8

“Noa I Kasem Gladhat long Ae blong Lod”

Plante taem, ol stori long ol skripja oli save tijim yumi plante lesen long saed blong spirit. Taem yu stap rid abaot Bigfala Wota we i ron, mo Taoa blong Babel, lukaotem insperesen abaot olsem wanem yu save putum yu insaed long ol storian ia.

Raetemdaon Ol Filing mo Tingting blong Yu

Ol jeneresen blong ol pipol we oli stap ridim Baebol, oli kasem insperesen aot long stori blong Noa mo Bigfala Wota ia we i bin ron. Be yumi, we yumi stap laef long ol las dei, yumi gat wan spesel risen blong lukaot gud long stori ia. Taem we Jisas Kraes i bin tijim olsem wanem blong stap rere from Seken Kaming blong Hem, Hem i bin talem: “Olsem we i bin hapen long ol taem blong Noa, bae i olsem tu long taem we Pikinini blong Man bae i kam” (Joseph Smith—Matthew 1:41). Antap long hemia, ol sentens we oli tokbaot taem blong Noa, olsem “kam nogud tumas” mo “stap faet mo oli stap kilim man i ded,” i tokbaot stret taem blong yumi tedei (Jenesis 6:12–13; Moses 8:28). Stori blong Taoa blong Babel, i luk tu se i blong taem blong yumi tedei, we i tokbaot hae tingting, we afta i gat tingting i fasfas mo seraot long medel blong ol pikinini blong God.

Ol stori ia blong bifo, oli impoten tumas, i no from se oli soem yumi se fasin nogud i stap kambak bakegen truaot long histri. Moa impoten, oli tijim yumi wanem blong mekem abaot hemia. “Noa i kasem gladhat long ae blong Lod” (Moses 8:27) i nomata ol fasin nogud we i bin stap raon long hem. Mo ol famli blong Jared mo brata blong hem oli tanem olgeta longwe long Lod, mo oli bin lidim olgeta oli stap longwe long fasin nogud long Babel (luk long Ita 1:33–43). Sapos yumi stap askem yumiwan olsem wanem blong kipim yumiwan mo ol famli blong yumi oli stap sef long taem blong yumi tedei from ol fasin blong giaman, stil mo fasin nogud, nao bae ol stori ia we yumi save gud long ol insaed long japta ia, bae oli tijim yumi plante samting.

Ol Aedia blong Skripja Stadi blong Yuwan

Jenesis 6; Moses 8

Yes hem i tru. Yumi stap sef taem yumi folem profet blong Lod.

Tangkyu long gospel ia we i kambak, mo from hemia, yumi save moa abaot Noa bitim wanem we i stap long OlTesteman. Translesen blong Josef Smit we i bin kam tru long insperesen long saed blong Jenesis 6, we oli faenem long Moses 8, i soemaot se Noa i bin wan long ol hae profet blong God. God i bin odenem hem mo i bin sendem hem i kam blong prijim gospel blong Jisas Kraes; hem i bin wokbaot mo toktok wetem God, mo God i bin jusum hem blong putumbak ol pikinini blong God long wol afta long Bigfala Wota (luk tu long Teachings of Presidents of the Church: Joseph Smith [2007], 104, 201). ?Wanem nao yu lanem abaot ol profet aot long ol eksperiens blong Noa?

Taem yu rid abaot dei blong Noa, maet bae yu luk ol semmak samting long taem blong yumi tedei. Eksampol:

• Moses 8:18, 20–21, 23–24 (fasin blong sakemaot ol wokman blong God)

• Moses 8:21 (lukaotem blong gat hae nem mo laekem ol samting blong wol ia)

• Moses 8:22 (ol rabis tingting we oli mekemap mo ol tingting wei nogud)

• Moses 8:28 (spolem man mo vaelens)

?Wanem nao ol tijing blong ol profet tedei abaot gospel ia blong Jisas Kraes we i save kipim yu yu sef long wol ia blong tedei? Taem yu stap ridim ol eksperiens blong Noa, ?wanem nao i givim insperesen long yu blong yu stap folem ol profet blong Lod tedei?

Luk tu long Mosaea 13:33; Doktrin mo Ol Kavenan 21:4–7.

Jenesis 9:8–17

Ol token o simbol ia, oli helpem yumi tingbaot ol kavenan blong yumi wetem Lod.

Wan saen, wan simbol, o wan “token” i save ripresentem ol kavenan blong gospel (Jenesis 9:12) Eksampol: tingbaot olsem wanem bred mo wota blong sakramen, o wota blong baptaes i mekem yu tingting long ol tabu trutok we oli go wetem ol kavenan blong yu. Folem wanem we i stap long Jenesis 9:8–17, wanem nao wan renbo i save mekem yu yu tingting long hem? ?Wanem nao Josef Smit Translesen, Jenesis 9:21–25 (insaed long Baebol apendiks) i ademap long andastaning blong yu? ?From wanem Lod i wantem yu blong tingbaot Hem mo ol kavenan we yu bin mekem?

Luk tu long Gerrit W. Gong, “Always Remember Him,” Liahona, May 2016, 108–11.

Jenesis 11:1–9

Wan wei ia nomo blong kasem heven, hem i blong stap folem Jisas Kraes.

Babel blong bifo, o Babilon, longtaem i kam, oli bin yusum olsem wan simbol blong fasin nogud mo fasin olsem hemia blong wol ia (luk long Revelesen 18:1–10; Doktrin mo Ol Kavenan 133:14). Taem yu stap stadi long Jenesis 11:1–9, tingting hevi long ol niu tingting we profet Momon i givim, we hem i bin raetem se Setan nao “i putum insaed long hat blong ol pipol blong bildim wan taoa we i hae inaf blong oli save go long heven” (Hileman 6:28; luk tu long ol ves 26–27). ?Wanem woning nao stori blong Taoa blong Babel i givim long yu?

Luk tu long Ol Sam 127:1.

Pikja droing blong Taoa blong Babel we i kam long David Green

Ol Aedia blong Famli Skripja Stadi mo Haos Naet

Jenesis 6–8.Olsem wanem nao yu save yusum stori blong bigfala sip blong Noa blong tijim famli blong yu se, blong stap folem profet i save kipim yumi i sef long saed blong spirit “Noah and His Family,” insaed long Old Testament Stories). Maet famli blong yu i save wok tugeta blong bildim wan simpol pleiplei bot wetem pepa o ol blok. Taem yu stap ridim Jenesis 6–7, yu save komperem se taem yumi stap sef insaed long bot i semmak olsem taem yumi folem profet yumi save stap sef. Yufala i save toktok raon long toktok blong profet we i jes kamaot i no long taem mo raetem ol toktok blong hem long bot blong yufala.

?Wanem moa nao God i bin givim long yumi we maet yu save komperem long bigfala sip ia we i bin sevem famli blong Noa? Ol risos ia oli save givim sam ansa, be i gat plante narawan moa: 2 Nifae 9:7–13; Doktrin mo Ol Kavenan 115:5–6; mo mesej blong Presiden Russell M. Nelson “Blong Kam Ol Lata-dei Sent we Oli Givim Eksampol” (Liahona, Nov 2018, 113–14).

Moses 8:17.?Hem i minim wanem blong Spirit blong Lod i “wok” wetem yumi 1 Nifae 7:14; Doktrin mo Ol Kavenan 1:33). ?Wetaem nao yumi bin gat eksperiens ia we Spirit i stap wok wetem yumi?

Jenesis 9:8–17.Maet bae ol yangfala pikinini oli laekem blong droem o kalarem wan renbo taem yufala i stap tokbaot wanem nao renbo i ripresentem Josef Smit Translesen, Jenesis 9:21–25 [insaed long Baebol apendiks]). Maet bae yufala i wantem toktok raon tu long ol samting we oli stap helpem yumi tingbaot ol kavenan blong yumi, olsem sakramen, we i stap helpem yumi tingbaot kavenan blong baptaes blong stap folem Jisas Kraes Doktrin mo Ol Kavenan 20:75–79).

Jenesis 11:1–9.Bae i save help blong ridim Ita 1:33–43 taem famli blong yu i stap stadi long Jenesis 11 mo i lanem abaot Taoa blong Babel. ?Wanem nao yumi save lanem aot long ol famli blong Jared mo brata blong hem we i save helpem famli blong yumi blong save stap sef long saed blong spirit, i nomata ol fasin nogud insaed long wol ia? ?Wanem nao sam moa lesen we yumi lanem aot long Noa mo famli blong hem taem oli bin stap fesem wan semmak jalenj? (Luk long Moses 8:13, 16–30).

Blong gat moa aedia blong stap tijim ol pikinini, luk long aotlaen blong wik ia insaed long Kam Folem Mi—Blong Praemeri.

Wan singsing: “Follow the Prophet,” Children’s Songbook, 110–11, (ves 3).

Stap Kam Antap long Stadi blong Yuwan

Serem testemoni blong yu. Taem yu serem wanem we yu lanem aot long ol skripja, yu stap blesem ol narawan, be tu, yu mekem se andastaning blong yu i kam moa dip. ?Wanem yu filim, tru long insperesen, blong yu serem wetem famli, fren o ol wod memba blong yu, aot long ol skripja ia?

Wan droing blong bigfala sip blong Noa we i kam long Adam Klint Day