Pikja droing blong Ebraham mo Sarae i kam long Dilleen Marsh

7–13 Febwari

Jenesis 12–17; Ebraham 1–2

“Blong Mi Stap Olsem Wan Moa Bigfala Disaepol blong Stret mo Gud Fasin”

Taem yu stap rid abaot Ebram mo Sarae (we afta oli singaotem Ebraham mo Sara) mo famli blong tufala, tingting hevi long ol eksampol blong olgeta we oli save givim insperesen long yu. Raetemdaon ol tingting mo filing blong yu abaot wanem yu save mekem blong “stap olsem wan moa bigfala disaepol blong stret mo gud fasin” (Ebraham 1:2).

Raetemdaon Ol Filing mo Tingting blong Yu

From kavenan ia we God i bin mekem wetem hem, God i bin singaotem hem “papa blong olgeta we oli fetful” (Doktrin mo Ol Kavenan 138:41) mo “Fren blong God” (Jemes 2:23). Plante milian man mo woman tedei oli stap givim ona long hem olsem stret bubu blong olgeta, mo sam narawan, oli bin adoptem olgeta insaed long famli blong hem tru long fasin blong jenisim laef long gospel blong Jisas Kraes. Yet, Ebraham i wan man we i kamaot long famli we i gat trabol—papa blong hem, we i bin lego tru wosip long God, i bin traem blong mekem Ebraham i mekem sakrifaes long ol giaman god. I nomata long hemia, Ebraham i wantem “stap olsem wan moa bigfala disaepol blong stret mo gud fasin” (Ebraham 1:2), mo histri blong laef blong hem i soem se God i bin givim ona long wanem hem i bin wantem. Laef blong Ebraham i stap olsem wan testemoni se, i nomata wanem i famli histri blong wan, be fiuja blong hem i save fulap wetem hop.

Ol Aedia blong Skripja Stadi blong Yuwan

Ebraham 1:1–19

God bambae i blesem mi from bilif blong mi mo stret mo gud tingting blong hat blong mi.

Olsem plante long yumi, Ebraham i bin laef long wan envaeromen we i nogud, be yet, hem i bin wantem blong hem i stap stret mo gud. Presiden Dallin H. Oaks i bin tijim hamas i impoten blong gat ol stret mo gud tingting long hat: “Olsem we hem i impoten blong mas lego evri tingting blong wantem mekem sin, laef we i no save finis i askem moa long hemia. Blong kasem ples blong yumi we i no save finis long fiuja, bae yumi wantem, mo wok from ol kwaliti we yumi nid blong gat, blong kam wan man o woman we i no save finis. … Sapos yumi luk se hemia i had tumas—mo i tru se hem i no wan isi rod long eniwan long yumi—nao yumi mas stat blong wantem, insaed long hat blong yumi, ol kaen kwaliti ia, mo askem long Papa blong yumi long Heven we i gat lav, blong givhan wetem ol filing blong yumi [luk long Moronae 7:48]” (“Desire,” Liahona, May 2011, 44–45). Taem yu stap ridim Ebraham 1: 1–19, tingting long hao nao ol ves ia oli soem wanem we Presiden Oaks i bin tijim. Ol kwestin olsem oli save help:

• ?Wanem nao Ebraham i bin wantem, insaed long hat blong hem, mo wanem nao hem i bin stap lukaotem? ?Wanem nao hem i bin mekem blong soemaot bilif blong hem?

• ?Wanem nao yu wantem tumas, insaed long hat blong yu? ?I gat eni samting we yu harem se yu mas mekem blong mekem ol tingting blong hat blong yu oli klin evriwan?

• ?Wanem jalenj nao Ebraham i bin fesem from ol stret mo gud tingting blong hat blong hem? ?Olsem wanem nao God i bin helpem hem?

• ?Wanem mesej ol ves ia oli gat blong talem long ol memba blong famli we oli no wantem stret mo gud fasin?

Luk tu long Matiu 7:7; “Deliverance of Abraham” (vidio), ChurchofJesusChrist.org; “Educate Your Desires, Elder Andersen Counsels” (ChurchofJesusChrist.org).

Ebraham 2:10–11

?Huia i stap insaed long kavenan blong Ebraham?

Taem we Lod i bin mekem kavenan blong Hem wetem Ebraham, Hem i bin promesem se kavenan ia bambae i gohed long laen blong Ebraham we bae oli kam afta long hem, o bae i stap wetem “laen” blong hem, mo “hamas long olgeta we bae oli akseptem Gospel ia, bae … [Hem i ] kaontem olgeta olsem laen blong [Ebraham]” (Ebraham 2:10–11). Hemia i minim se ol promes blong kavenan blong Ebraham i blong ol memba blong Jos tedei, i nomata se oli kamaot long stret laen blong Ebraham, o hem i adoptem olgeta i kam insaed long famli blong hem tru long baptaes mo tru long fasin blong jenisim laef long gospel blong Jisas Kraes (luk long Galesia 3:26–29; Doktrin mo Ol Kavenan 132:30–32). Blong God i kaontem yumi olsem laen blong Ebraham, wanwan i mas obei long ol loa mo ol odinens blong gospel.

Jenesis 12:1–3; 13:15–16; 15:1–6; 17:1–8, 15–22; Ebraham 2:8–11

Kavenan blong Ebraham i blesem mi mo famli blong mi.

From se evri memba blong Jos oli stap insaed long kavenan blong Ebraham ia, bae yu wantem spendem sam taem blong tingting hevi long from wanem kavenan ia i gat mining insaed long laef blong yu. Raetemdaon ol tingting blong yu abaot olgeta kwestin ia:

?Olsem wanem nao, ol promes we yumi faenem insaed long Ebraham 2:8–11 oli blesem mi mo famli blong mi? (luk tu long Jenesis 12:1–3; 13:15–16).

?Wanem nao mi lanem abaot kavenan blong Ebraham we i stap long Jenesis 15:1–6; 17:1–8, 15–22?

?Mi save mekem wanem blong filim insperesen blong go mo mekem i kamtru, promes ia blong “evri famli blong wol ia bae i kasem blesing”? (Ebraham 2:11).

Yu save tekem se, sam long ol fasfala blesing we God i bin promesem long Ebraham mo Sara, olsem blong kasem wan graon blong promes mo blong tufala i papa mo mama blong wan bigfala laen, oli gat ol samting we oli semsemmak we i blong taem we i no save finis. Hemia i tekem tu wan ples insaed long selestial kingdom (luk long Doktrin mo Ol Kavenan 132:29) mo mared we i no save finis wetem wan famli laen we i no save finis Doktrin mo Ol Kavenan 131:1–4; 132:20–24, 28–32). Presiden Russell M. Nelson i bin tijim se, “insaed long tempol yumi save stap kasem ol bigfala blesing blong yumi, semmak olsem laen blong Ebraham, Aesak mo Jekob” (“The Gathering of Scattered Israel,” Liahona, Nov. 2006, 80).

Luk tu long Josef Smit Translesen, Jenesis 15:9–12; 17:3–12 (insaed long Baebol apendiks); Bible Dictionary, “Abraham, covenant of”; “Ol Tingting blong Kipim long Maen: Kavenan Ia,” insaed long risos ia.

Ol Aedia blong Famli Skripja Stadi mo Haos Naet

Jenesis 13:5–12.?Wanem nao Ebraham i bin mekem blong krietem pis insaed long famli blong hem? Maet ol memba blong famli oli save praktis blong stap olsem wan man blong mekem pis, semmak olsem Ebraham, taem oli stap rol plei long wei blong stretem ol raorao we i save girap insaed long famli blong yu.

Jenesis 13:16; 15:2–6; 17:15–19.?Olsem wanem yu save helpem famli blong yu i andastanem promes ia blong Lod long ol ves ia—se i nomata we Ebraham mo Sara oli no bin gat pikinini yet, be bae laen blong tufala bae i kam bigwan i semmak long das blong wol, ol sta long skae, o sanbij long solwota (luk tu long Jenesis 22:17). Maet yu save soem ol memba blong famli wan kontena we i gat sanbij, o yufala i save lukluk long ol sta, o yusum wan pikja we i kam wetem aotlaen ia. ?Olsem wanem nao bae yumi save trastem ol promes blong God iven taem we yumi luk se bae i no posibol blong i hapen?

Jenesis 14:18–20.?Wanem nao yumi lanem abaot Melkesedek aot long Josef Smit Translesen, Jenesis 14:25–40? (insaed long Baebol apendiks; luk tu long Alma 13:13–19). ?Olsem wanem nao yumi save stanemap “stret mo gud fasin” olsem we Melkesedek i bin mekem? (ves 36). ?Wanem samting moa abaot seves blong Melkesedek, i save givim insperesen long yumi?

Melkesedek i blesem Ebram, i kam long Walter Rane

Jenesis 16.Blong stap rid abaot Haga, bae i wan janis blong toktok raon long wei we Lod i helpem yumi taem yumi harem se oli mekem nogud samting long yumi. Yu save poenemaot se “Ismael,” i minim “God i stap harem.” ?Wetaem nao yumi bin filim se Lod i bin harem mo i bin helpem yumi taem yumi filim i nogud? (luk long Jenesis 16:11).

Blong gat moa aedia blong stap tijim ol pikinini, luk long aotlaen blong wik ia insaed long Kam Folem Mi—Blong Praemeri.

Wan singsing: “I Want to Live the Gospel,” Children’s Songbook, 148.

Stap Kam Antap long Fasin blong Yumi blong Stap Tij

Stap oltaem, mo stap blong oli save toktok long yu. “Sam long ol gudfala taem blong tij, oli stat wetem wan kwestin, o wan wari insaed long hat blong wan memba blong famli. … Letem ol memba blong famli blong yu oli save, tru long ol toktok mo ol aksen blong yu, se yu yu wantem tumas blong lisin long olgeta. (Luk long Teaching in the Savior’s Way, 16.)

God i bin promesem se laen blong Ebraham mo Sara, bae namba blong hem i semmak “olsem ol sta long heven” (Jenesis 22:17). Stap Tingting Hevi long Promes blong God, i kam long Courtney Matz.