“14–20 Febwari. Jenesis 18–23: ‘?Yutufala I Ting se I Gat Samting I Stap we I Strong Tumas, Mi Mi No Save Mekem?’“ Kam Folem Mi—Blong Wanwan Man, Woman mo Famli: OlTesteman 2022 (2021)
“14–20 Febwari. Jenesis 18–23,” Kam Folem Mi—Blong Wanwan Man, Woman mo Famli: 2022
Sara mo Aesak, i kam long Scott Snow
14–20 Febwari
Jenesis 18–23
“?Yutufala I Ting se I Gat Samting I Stap we I Strong Tumas, Mi Mi No Save Mekem?”
Ridim mo tingting hevi long Jenesis 18–23, mo raetemdaon ol filing mo tingting blong yu. Yu save yusum ol aedia we oli stap long aotlaen ia blong helpem yu blong stadi long ol japta ia, mo yu save kasem insperesen blong lukaotem sam narafala mesej insaed long ol skripja we Lod i gat, we oli speseli blong yu.
Raetemdaon Ol Filing mo Tingting blong Yu
Laef blong Ebraham, we i fulap long ol taem we i save brekem hat mo i save tajem hat, i pruf ia blong wan trutok we Ebraham i bin lanem long wan visen—se yumi stap long wol ia blong testem yumi blong “luk sapos bae [yumi] mekem evri samting we Lod blong [yumi] bae i givim oda long [yumi]” (Ebraham 3:25). ?Bae Ebraham hemwan bae i save pruvum se hem i fetful? ?Bambae hem i gohed blong gat fet long promes ia blong God se bae hem i kasem wan bigfala famli laen afta long hem, iven we hem mo Sara i no gat yet pikinini, be tufala i olfala finis? Mo taem bae Aesak i bon, ?bae bilif blong Ebraham i save stap strong tru long wan samting we man i no ting nating long hem—oda ia blong givim boe blong hem olsem sakrifaes, mo tru long boe ia nao God i promesem blong mekem kavenan ia kamtru? Ebraham i bin pruvum se hem i fetful. Ebraham i bin trastem God, mo God i bin trastem Ebraham. Long Jenesis 18–23, yumi faenem ol stori aot long laef blong Ebraham mo ol narawan, we oli save pusum yumi blong tingting long paoa blong yumiwan blong stap bilivim ol promes blong God, blong ronwe long fasin nogud mo neva lukluk i gobak, mo blong trastem God i nomata long wanem sakrifaes blong mekem.
Ol Aedia blong Skripja Stadi blong Yuwan
Lod i mekem ol promes blong Hem oli kamtru long stret taem we Hem i wantem.
Lod i bin mekem ol bigfala promes long olgeta fetful, be samtaem, ol situesen blong laef blong yumi i save mekem se yumi save askem yumiwan olsem wanem ol promes ia bae oli save kamtru. Ebraham mo Sara, maet tufala i bin filim olsem plante taem. ?Wanem nao yu lanem aot long eksperiens blong olgeta? Bae i save help blong statem stadi blong yu taem yu luklukbak long wanem we Lod i bin promesem long Ebraham long Jenesis 17:4, 15–22. ?Wanem nao Ebraham mo Sara i mekem? (Luk tu long Josef Smit Translesen, Jenesis 17:23 [insaed long Jenesis 17:17, futnot b]; Jenesis 18:9–12). ?Olsem wanem nao Lod i bin ansa blong helpem olgeta blong gat moa bigfala bilif long ol promes blong Hem? (Luk long Jenesis 18:14).
?Wanem nao yu faenem insaed long ol ves ia we i helpem yu blong bildimap fet blong yu? ?Wanem ol narafala eksperiens—insaed long laef blong yu o laef blong wan narawan—we i bin mekem fet blong yu i kam strong moa se, Lod bambae i mekem ol promes blong Hem oli kamtru long yu long wan taem mo wan wei we i blong Hem?
Luk tu long Doktrin mo Ol Kavenan 88:68.
Lod i givim komanmen long yumi blong ronwe long fasin nogud.
?Wanem lesen nao yu yu lanem abaot fasin blong ronwe long fasin nogud taem yu stap ridim abaot Lot mo famli blong hem? Eksampol: ?wanem i kam long maen blong yu abaot wanem ol enjel oli bin talem mo mekem, blong helpem Lot mo famli blong hem blong ronwe long taem we Lod bae i prapa spolem ples? (Luk long Jenesis 19:12–17). ?Olsem wanem nao Lod i helpem yu mo famli blong yu blong ronwe, o faenem wan sef ples aot long ol rabis paoa insaed long wol ia?
Blong kasem moa abaot ol sin blong Sodom mo Gomora, luk long Esikel 16:49–50 mo Jud 1:7–8.
Luk tu long Josef Smit Translesen, Jenesis 19:9–15 (insaed long Baebol apendiks).
Stap Ronwe long Sodom mo Gomora, i kam long Julius Schnorr von Carolsfeld
?Wanem nao waef blong Lot i bin mekem we i rong?
Elda Jeffrey R. Holland i tijim:
“I luk se, wanem i bin rong wetem waef blong Lot, i we, hem i no bin jes stap lukluk i gobak; insaed long hat blong hem, hem i bin wantem gobak. I luk se bifo hem i bitim ol baondri blong siti ia, hem i stap misim wanem we Sodom mo Gomora i stap givim long hem. Hem i no bin gat fet. Hem i bin gat tu tingting long paoa blong Lod blong givim long hem wan samting we i gud moa bitim wanem we hem i bin gat finis. …
“Long evri pipol blong evri jeneresen, mi singaot i go: ‘Tingbaot waef blong Lot’ [Luk 17:32]. Fet, hem i blong fiuja. Fet, i blong bildimap yu antap long wanem we i pas finis, be i no blong wantem stastap long wanem we i pas finis. Fet i trastem se God i gat ol bigfala samting i stap blong wanwan long yumi, mo we, i tru we Kraes i Hae Pris we i tekem ol gudgudfala samting ya oli kamtru’ (Hibrus 9:11)” (“The Best Is Yet to Be,” Ensign, Jan. 2010, 24, 27).
Fasin ia, we Ebraham i glad blong givim Aesak olsem sakrifaes, i semmak olsem God mo Pikinini blong Hem.
Yumi no save evri risen from wanem God i bin givim komanmen long Ebraham blong givim Aesak olsem wan sakrifaes; yumi save nomo se i bin wan tes blong testem bilif blong hem long God (luk long Jenesis 22:12–19). Taem yufala i stap ridim Jenesis 22:1–19, ?wanem nao yu lanem aot long eksperiens blong Ebraham?
Fasin ia, we Ebraham i glad blong givim Aesak olsem sakrifaes, i “ripresentem God mo Wan Stret Pikinini Ia Nomo blong hem” (Jekob 4:5). Taem yu stap tingting hevi long ol semsemmak samting bitwin tes blong Ebraham mo ofring blong God we i Papa, we i givim Pikinini blong Hem olsem wan sakrifaes from yumi, ?wanem filing nao yu gat long Papa blong yu long Heven?
I gat ol samting we oli semsemmak bitwin Aesak mo Sevya. Tingting blong ridim Jenesis 22:1–19 bakegen, mo lukaotem ol samting ia we oli semsemmak.
Luk tu long “Akedah (The Binding)” (vidio), ChurchofJesusChrist.org.
Ol Aedia blong Famli Skripja Stadi mo Haos Naet
-
Jenesis 18:14.?I gat ol stori aot long ol skripja, aot long famli histri blong yu, o aot long laef blong yuwan we yu save serem, we oli bin tijim yu se i no gat wan samting i had tumas long Lod?
-
Jenesis 18:16–33.?Wanem nao yu lanem abaot fasin blong Ebraham aot long ol ves ia? ?Olsem wanem nao yumi save folem eksampol blong hem? (Luk tu long Alma 10:22–23.)
-
Jenesis 19:15–17.Olgeta ves ia oli save helpem ol memba blong famli blong yu blong rere from ol taem we bae oli nidim blong ronwe long ol situesen we oli nogud. ?Wanem nao sam long ol situesen ia? Eksampol: maet bae yu gat wan storian abaot ol media we oli no stret, o temtesen ia blong gosip. ?Olsem wanem yumi save ronwe long ol kaen situesen olsem?
-
Jenesis 21:9–20.?Wanem nao i kasem tingting blong famli blong yu abaot wanem we God i mekem long Haga mo Ismael afta we Sara mo Ebraham i sakemaot tufala?
-
Jenesis 22:1–14.?Olsem wanem yu save helpem ol famli blong yu blong luk wanem i joenem stori blong God we i givim oda long Ebraham blong givim Aesak olsem sakrifaes, mo stret sakrifaes blong Sevya we i pem praes from ol sin? Yu save soem ol pikja blong Ebraham mo Aesak, mo Taem we Oli Hangem Kraes long Kros (luk long “Abraham and Isaac,” insaed long Old Testament Stories) long sem taem we ol memba blong famli oli toktok raon long ol semsemmak samting we oli luk bitwin tufala taem ia. Mo tu, yu save singsing wan hym o wan singsing abaot sakrifaes blong Sevya, olsem “He Sent His Son” (Children’s Songbook, 34–35), mo lukaotem ol sentens we oli tokbaot sakrifaes blong Sevya.
?Wanem sakrifaes nao oli askem yumi olsem wan famli? ?Olsem wanem ol sakrifaes ia oli tekem yumi i go kolosap moa long God?
Blong gat moa aedia blong stap tijim ol pikinini, luk long aotlaen blong wik ia insaed long Kam Folem Mi—Blong Praemeri.
Wan singsing: “God Loved Us, So He Sent His Son,” Hymns, no. 187.
Stap Kam Antap long Stadi blong Yuwan
Lisin long Spirit Taem yu stap stadi, luklukgud long ol tingting mo filing blong yu, iven sapos yu luk se oli no go wetem wanem we yu stap ridim. Olgeta tingting mo filing ia, maet oli ol stret samting ia we God i wantem yu blong save.
Pikja droing blong Ebraham mo Aesak, i kam long Jeff Ward