“Ol Tingting blong Kipim long Maen: Kavenan Ia,” Kam Folem Mi—Blong Wanwan Man, Woman mo Famli: OlTesteman 2022 (2021)
“Ol Tingting blong Kipim long Maen: Kavenan Ia,” Kam Folem Mi—Blong Wanwan Man, Woman mo Famli: 2022
Ol Tingting blong Kipim long Maen
Kavenan Ia
Truaot long OlTesteman, oltaem bae yu ridim toktok ia kavenan. Tedei, yumi stap tingting long ol kavenan olsem ol tabu promes yumi mekem wetem God, be long wol blong bifo, kavenan i wan pat blong ol pipol oli wok tugeta. Blong oli save stap sef mo blong save stap laef, pipol oli nidim blong trastem olgeta wanwan, mo ol kavenan i wan wei blong mekem tras ia i sef i stap.
Mekem se, taem God i toktok long Noa, Ebraham, o Moses abaot ol kavenan, Hem i invaetem blong gat wan rilesensip blong tras wetem Hem. Wan long ol bes eksampol blong kavenan we yumi save long hem insaed long OlTesteman i wan long olgeta we God we i mekem wetem Ebraham mo Sera—mo afta i riniu wetem laen blong tufala Aesak mo Jekob (oli singaotem tu, Isrel). Oltaem yumi singaotem hemia Kavenan blong Ebraham, be long OlTesteman oli save long hem olsem “kavenan”nomo. Bae yu luk se OlTesteman i stamba stori blong pipol we oli luk olgeta olsem ol man we olgeta nao oli gat raet blong kasem kavenan ia—ol kavenan pipol.
Kavenan blong Ebraham i gohed blong stap impoten tedei, speseli long ol Lata‑dei Sent. ?From wanem? From se yumi tu, yumi ol kavenan pipol, i nomata se yumi ol stret o no daerek laen blong Ebraham, Aesak, mo Jekob ( luk long Galesia 3;27–29). From risen ia nao, hem i impoten blong andastanem se kavenan blong Ebraham i wanem, mo olsem wanem i aplae long yumi tedei.
?Wanem Ia i Kavenan blong Ebraham?
Ebraham i wantem “stap olsem wan moa bigfala disaepol blong stret mo gud fasin” (Ebraham 1:2), mekem se God i invaetem hem long wan kavenan rilesensip. Ebraham i no faswan blong wantem hemia, mo hem i no faswan blong kasem wan kavenan. Hem i lukaotem “ol blesing blong ol papa blong hem (Ebraham 1:2)—ol blesing we oli givim long Adam mo Iv mo afta long olgeta, oli givim long olgeta we oli lukaotem ol blesing ia wetem strong tingting.
Kavenan blong God wetem Ebraham i promesem ol naesfala blesing: graon we i kam long papa, ol pikinini blong hem bae oli plante, gat raet long ol odinens blong Prishud, mo wan nem we bae oli givim ona long hem long ol jeneresen we bae i kam. Be stamba lukluk blong kavenan ia i no stap nomo long ol blesing we Ebraham mo ol famli blong hem bae oli kasem, be tu, bae oli stap long ol blesing blong ol narafala pikinini blong God. “Bambae yu kam olsem wan rod blong mi blong mi blesem plante man,” God i talemaot, “Mi bambae mi yusum yu blong blesem ol man blong olgeta narafala kantri long wol” (Jenesis 12:2–3)
?Kavenan ia, i givim o i no givim long Ebraham, Sera, mo laen blong tufala, wan spesel ples long medel blong ol pikinini blong God? Yes, be nomo sapos yumi lukluk long wei ia se hem i wan spesel janis blong blesem ol narawan. Famli blong Ebraham oli stap blong save “tekem seves ia mo prishud ia i go long evri nesen,” blong serem “ol blesing blong Gospel, we oli ol blesing blong fasin blong sevem man, we i laef we i no save finis.” (Ebraham 2:9, 11).
Kavenan ia i blesing ia we Ebraham i bin wantem tumas. Afta we hem i kasem ol blesing ia, insaed long hat blong hem, Ebraham i talem: “Wokman blong yu i bin lukaotem yu wetem strong tingting, mo naoia mi faenem yu” (Ebraham 2:12).
Hemia i taosen yia i pas finis, be kavenan ia, oli putumbak finis long dei blong yumi (luk long 1 Nifae 22:8–12). Mo naoia i stap hapen long laef blong ol pipol blong God. Yu save luk, kavenan ia we i bin hapen i stap kam moa strong long ol las dei ia taem wok blong God i stap progres, i stap blesem ol famli truaot long wol. Mo eniwan we, olsem Ebraham, i wantem blong kam wan bigfala disaepol blong stret mo gud fasin, eniwan we i wantem blong lukaotem Lod, i save kam pat blong hem.
?Kavenan blong Ebraham I Minim Wanem long Mi?
Yu yu wan pikinini blong kavenan. Yu bin mekem wan kavenan wetem God taem yu bin kasem baptaes. Yu stap riniu kavenan ia evri taem yu tekem mo kakae sakramen. Mo yu bin mekem ol tabu kavenan long tempol. Tugeta, olgeta kavenan ia oli mekem yu tekpat long kavenan blong Ebraham, we fulwan blong kavenan ia, i stap insaed long ol odinens blong tempol. Olsem we Presiden Russell M. Nelson i tijim: “Long en, insaed long tabu tempol, yumi save kam joen wetem hem we i gat raet long ol blesing blong wan famli we i no save finis, olsem oli bin promesem long Ebraham, Aesak Jekob, mo ol laen blong olgeta.”1
Tru long ol kavenan mo ol odinens ia, yumi save kam ol pipol blong God (luk long Eksodas 6:7; Dutronome 7:6; 26:18; Esekiel 11:20). Yumi kam defren long wol ia we i stap raon long yumi. Ol kavenan blong yumi i mekem i posibol long yumi blong stap ol disaepol blong Jisas Kraes we yumi tru mo yumi komitim yumi. “Ol kavenan blong yumi ,” Presiden i Nelson eksplenem, “oli fasem yumi i go long Hem mo givim long yumi paoa olsem hemia blong God.”2 Mo taem God i blesem ol pipol blong Hem wetem paoa blong Hem, i mekem olsem i kam wetem wan invitesen mo Hem i wantem se olgeta ia bae oli blesem ol narawan—se bae oli “stap olsem wan blesing” long “evri famli blong wol.”
Hemia i save ia we i gud tumas, we oli givim i kam long yumi from kavenan ia blong Ebraham we i bin kambak tru long Profet Josef Smit. Mekem se, taem yu rid abaot ol kavenan ia insaed long OlTesteman, no tingting nomo long rilesensip blong God wetem Ebraham, Aesak, mo Jekob. Tingting tu abaot rilesensip blong Hem wetem yu. Taem yu rid abaot promes blong wan laen we oli no save kaontem namba blong ol pipol insaed long hem (luk long Jenesis 28:14), yu no tingting nomo long ol milian man, we tedei, oli singaotem Ebraham papa blong olgeta. Tingting tu long promes blong God long yu abaot ol famli we oli no save finis, mo blong gat pikinini long taem we i no save finis (luk long Doktrin mo Ol Kavenan 1:1–4; 132:20–24). Taem we yu rid abaot promes blong wan graon we i kam long papa, yu no tingbaot nomo graon ia nomo we God i promesem Ebraham. Tingbaot selestial ples blong wol ia —wan promes graon we i kam long papa i go long olgeta we “tingting blong olgeta i stap daon,” we “[oli] trastem Lod” (Matiu 5:5; Ol Sam 37:9, 11; luk tu long Doktrin mo Ol Kavenan 88:17–20). Mo taem yu rid abaot promes ia, se ol kavenan pipol blong God bae oli blesem “evri famli blong wol ia” (Ebraham 2:11), no tingbaot nomo seves blong Ebraham o ol profet we oli kamaot long laen blong hem. Tingbaot wanem yu save mekem—olsem wan kavenan disaepol blong Jisas Kraes—blong kam wan blesing long ol famli raon long yu.