“14–20 Febwari. Jenesis 18–23: “?Yutufala I Ting se I Gat Samting I Stap we I Strong Tumas, Mi Mi No Save Mekem?”” Kam Folem Mi— blong Praemeri: OlTesteman 2022 (2021)
“14–20 Febwari. Jenesis 18–23,” Kam Folem Mi—Blong Praemeri: 2022
Sara mo Aesak, i kam long Scott Snow
14–20 Febwari.
Jenesis 18–23
“?Yutufala I Ting se I Gat Samting I Stap we I Strong Tumas, Mi Mi No Save Mekem?”
Taem yu lukaot blong tij folem nid blong ol pikinini we yu tijim, tingting long ol aedia blong ol bigfala mo ol smol pikinini long aotlaen ia.
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Blong helpem ol pikinini blong serem wanem we oli bin save abaot Jenesis 18–23, soem pikja blong wan o moa samting we i bin hapen aot long ol japta ia, mo askem ol pikinini blong serem wanem oli tingbaot abaot stori ia.
Tijim Doktrin: Ol Smol Pikinini
Mi save trastem God blong kipim ol promes blong Hem.
Nomata we God i bin promes se Sara mo Ebraham bae tufala i gat wan pikinini boe, taem tufala i go olfala, i luk olsem se bae promes ia i no hapen. ?Olsem wanem yu save yusum stori ia blong helpem ol pikinini blong gat fet se God bae i oltaem kipim ol promes blong Hem.
Samfala Aktiviti we Yu Save Mekem
-
Talem long wan sot stori abaot promes blong God long Ebraham mo Sara se bae tufala gat wan pikinini mo we promes ia bae i hapen (luk long Jenesis 17:15–19; 18:9–14; 21:1–7). O invaetem wan kapol blong tufala i werem ol klos olsem Ebraham mo Sara mo talem stori blong tufala. Helpem ol pikinini andastanem se Ebraham mo Sara oli olfala tumas blong gat ol pikinini. Askem olgeta ol kwestin insaed long Jenesis 18:14, “?Yutufala i ting se i gat samting i stap we i strong tumas, Mi Mi no save mekem?” Testifae se Lod i save mekem i hapen ol promes blong Hem, iven sapos i luk olsem se i no posibol.
-
Mekem wan promes long ol pikinini we bae yu mekem i hapen long en blong klas (eksampol, se bae yu letem olgeta blong kalarem wan pikja). Truaot long klas, rimaenem olgeta long promes blong yu, mo afta, mekem i hapen. Eksplenem se Lod i oltaem kipim ol promes blong Hem.
-
Askem ol pikinini blong serem wan taem we oli mas wet from wan samting we oli wantem tumas. Wetem ol pikinini, singim wan singsing we i testifae long ol promes blong God olsem “Keep the Commandments” (Children’s Songbook, 146–47). Helpem ol pikinini blong oli talemaot ol samting we God i promes long yumi sapos yumi stap fetful.
-
Soem wan pikja blong baptaes o blong sakramen (luk long Gospel Art Buk, ol namba 103, 104, 107, 108). Helpem ol pikinini blong lanem abaot ol promes we yumi mekem wetem God, mo wanem God i promesem blong givim taem yumi kipim ol promes blong yumi, taem yumi baptaes mo tekem sakramen. (luk long Stap Tru long Fet, 19–22.)
Ebraham i obei long Lod.
I bin had tumas long Ebraham blong folem komanmen we i blong sakrifaesem pikinini boe blong hem. Tingting hevi long olsem wanem yu save yusum stori ia long wan stret taem blong leftemap tingting blong ol pikinini blong obei long God iven long ol hadtaem o oli no save stret risen blong ol komanmen blong Hem.
Samfala Aktiviti we Yu Save Mekem
-
Soem wan pikja blong Ebraham mo Aesak (luk long stadi aotlaen blong wik ia insaed long Kam Folem Mi—Blong Wanwan Man, Woman mo Famli), mo yusum blong talem stori blong Ebraham mo Aesak (luk tu long “Abraham and Isaac,”insaed long OlTesteman Stories). Soem wan pikja blong Jisas Kraes mo toktok long ol pikinini abaot olsem wanem stori blong Ebraham mo Aesak i save rimaenem yumi long sakrifaes we Papa long Heven mo Jisas Kraes i bin mekem from yumi.
-
Plei wan simpol gem we i nidim ol pikinini blong folem ol daereksen. Eksampol, ol daereksen ia i save lid i go long wan pikja blong Sevya we i haed insaed long klasrum. ?Wanem nao samfala samting we Papa long Heven i askem yumi blong mekem? Helpem ol pikinini blong andastanem se blong kipim ol komanmen blong Hem bae i helpem yumi blong go bak laef wetem Hem mo Jisas Kraes bakegen.
Stap Tijim Doktrin: Ol Bigfala Pikinini
Lod i mekem ol promes blong Hem i hapen iven sapos i luk olsem se i no posibol.
Oli bin talem long Ebraham mo Sara se bae tufala gat wan pikinini boe, be luk olsem se i no posibol—Ebraham i gat 100 yia, mo Sara i gat 90 yia (luk long Jenesis 17:17). God i mekem i hapen ol promes blong Hem, mo stori ia i save helpem ol pikinini we yu tijim blong mekem fet blong olgeta i kam moa strong long ol promes blong God long olgeta.
Samfala Aktiviti we Yu Save Mekem
-
Raetem wanwan toktok we i stap long fas sentens blong Jenesis 18:14 long wan nara pis blong pepa mo givim wan long wanwan pikinini. Afta askem ol pikinini long klas blong putum ol toktok ia long stret oda. Ridim Jenesis 18:9–14; 21:1–7 wetem ol pikinini blong faenem wan eksampol aot long laef blong Sara mo Ebraham taem we Lod i bin mekem wan samting we i luk se i no posibol. ?Wanem nao yumi save lanem aot long eksperiens blong Sara mo Ebraham we i save leftemap tingting blong yumi blong trastem ol promes blong God?
-
Soem ol pikja blong ol skripja stori we God i bin mekem wan samting we i luk se bae i no hapen o we i had (eksampol, luk long Gospel Art Buk, ol namba 7, 8, 25, 26). Askem ol pikinini blong serem wanem oli save abaot ol samting we i hapen long ol pikja ia mo helpem olgeta blong luk olsem wanem Lod i bin mekem ol promes blong Hem i kam tru long wanwan eksampol ia. Serem olsem wanem Lod i bin kipim ol promes blong Hem long laef blong yu o long laef blong ol pipol we yu save ( sam eksampol blong ol promes blong Lod, luk long Malakae 3:10; Jon 14:26–27; Doktrin mo Ol Kavenan 89:18–21). Letem ol pikinini oli serem sam eksampol we i semmak, we oli save.
Mi save ronwe long fasin nogud.
Stori blong Lot mo famli blong hem oli stap ronwe long wan nogud siti, i save givim insperesen long ol pikinini we yu tijim blong ronwe long ol paoa blong rabis fasin long laef blong olgeta.
Stap Ronwe long Sodom mo Kumora., i kam long Julius Schnorr von Carolsfeld
Samfala Aktiviti we Yu Save Mekem
-
Mekem i kam sot stori long Jenesis 19:15–26 mo eksplenem se famli blong Lot i bin stap laef long wan siti we i nogud, mo ol enjel oli wonem olgeta blong aot long ples ia. Ridim tugeta ol ves ia 15–17, 26, mo helpem ol pikinini blong tingting abaot wanem hemia i minim long olgeta tedei blong “yufala i resis” aot long rabis fasin mo “yufala i no lukbak long ples ya” (ves 17).
-
Soem wan pikja blong Sevya, mo askem ol pikinini blong putum wan step i go from pikja ia taem oli serem wan samting we oli save mekem blong ronwe long fasin nogud, mo kam moa kolosap long Kraes.
-
Toktok raon long ol situesen we maet wan fren i invaetem ol pikinini blong mekem wan samting we oli save se i no raet. ?Olsem wanem yumi save “ronwe” long ol situesen ia? ?Wanem nao yumi save talem long fren blong yumi ia?
Papa long Heven i bin sendem Pikinini blong Hem, we i sakrifaesem Hemwan from yumi.
Taem yu stap tij abaot Ebraham we i agri blong sakrifaesem Aesak, stap rere blong ansarem wanem ol pikinini oli filim. Yusum stori ia blong helpem ol pikinini blong mekem lav mo glad blong olgeta long sakrifaes blong Sevya i kam moa strong.
Samfala Aktiviti we Yu Save Mekem
-
Blong helpem ol pikinini lan long stori insaed long Jenesis 22:1–14, ridim ol ves ia long olgeta mo invaetem olgeta blong droem ol pikja blong wanem we yu stap ridim. ?From wanem komanmen blong Lod blong sakrifaesem Aesak i bin wan had samting blong Ebraham blong kipim? ?Wanem nao yumi lanem abaot Ebraham long stori ia?
-
Yusum ol pikja blong Ebraham mo Aesak mo blong taem Jisas I Hang long Kros (luk long Gospel Art Buk, ol namba 9, 57) blong luk wanem i semmak o defren long stori insaed long Jenesis 22 wetem sakrifaes blong Sevya (luk long Matiu 27:26–37). ?Wanem nao yumi save lanem abaot Papa long Heven mo Jisas Kraes aot long stori blong Ebraham mo Aesak mo long saed blong taem we Jisas i hang long kros?
-
Soem vidio blong “For God So Loved the World” (ChurchofJesusChrist.org), o sing tugeta wan singsing abaot sakrifaes blong Sevya olsem “He Sent His Son” (Children’s Songbook, 34–35). Invaetem ol pikinini blong tokbaot olsem wanem sakrifaes blong Jisas i soem lav blong Papa long Heven from yumi.
Stap Leftemap Tingting blong Lanem Samting long Hom
Invaetem ol pikinini blong serem wetem ol famli blong olgeta abaot wan taem we God i blesem olgeta taem oli obei wan long ol komanmen blong Hem.
Stap Kam Antap long Fasin blong Yumi blong Stap Tij
Leftemap tingting blong gat fasin blong stap kwaet. Olsem we i nid, maet bae yu rimaenem ol pikinini blong stap revren. Yu save mekem hemia taem yufala i singsing wetem kwaet fasin o mekem saon nomo blong wan singsing o blong soem pikja blong Jisas