Pikja blong Ebraham mo Sara i kam long Dilleen Marsh

7–13 Febwari.

Jenesis 12–17; Ebraham 1–2

“Blong Mi Stap Olsem Wan Moa Bigfala Disaepol blong Stret mo Gud Fasin”

Tingbaot se i no nid—o iven posibol—blong go tru evri samting long aotlaen ia. Letem Spirit i lidim yu i go long ol prinsipol mo ol aktiviti we bae i gat moa mining long ol pikinini we yu tijim.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Invaetem ol famli blong ol pikinini we yu tijim blong lanem abaot Ebraham mo Sara long wik ia we i pas. Askem ol pikinini blong serem wan samting we oli save abaot Ebraham mo Sara

Tijim Doktrin: Ol Smol Pikinini

Ebraham 1:18; 2:8

Jisas Kraes i save lidim mi tru long han blong Hem.

Ebraham i wantem blong stap stret mo gud no mata ol famli blong hem oli ol nogud man. Lod i talem hem, “Bambae mi lidim yu tru long han blong mi” (Abraham 1:18). Olsem we God i promes blong helpem Ebraham, Hem i save lidim ol pikinini we yu tijim taem bae oli wantem blong jusum raet.

Samfala Aktiviti we Yu Save Mekem

• Ridim long ol pikinini Ebraham 1:18 mo 2:8, mo invaetem ol pikinini blong lisin long wan pat blong bodi we tugeta ves ia i talem. ?Olsem wanem bae yumi filim blong gat Jisas Kraes i lidim yumi tru long han blong Hem mo blong gat han blong Hem blong i lukaotem yumi? Testifae se Jisas i lidim yumi tru long Spirit blong Hem we i stap gaedem yumi.

• Yusum “Abraham and Sarah” insaed long Old Testament Stories) blong helpem ol pikinini blong andastanem se ol pipol raon long Ebraham oli stap mekem ol nogud samting be Ebraham i wantem blong mekem wanem i raet mo Lod i bin helpem hem. ?Olsem wanem nao Papa long Heven mo Jisas Kraes i helpem yumi taem yumi traem blong jusum raet? Singim wan singsing we i go wetem prinsipol ia olsem “Tijim Mi blong Folem Laet” (STSP, 66).

• Soem sam pikja blong Sevya (luk long Gospel Art Buk ol namba 38, 39, 40, mo 41), mo helpem ol pikinini blong luk ol samting we Hem i mekem wetem han blong Hem. ?Wanem nao yumi save mekem wetem han blong yumi blong helpem ol narafala man?

Jenesis 13:5–12

Mi save stap olsem wan we i putum pis.

Taem we ol man blong lukaot long animol blong Ebraham mo Lot oli stap raorao long olgeta from ples blong gras we ol animol oli stap kakae long hem, nao Ebraham i givim wan tingting blong stopem raorao mo givim pis. Yu save yusum eksampol ia blong givim insperesen long ol pikinini blong stap olsem wan we i putum pis.

Samfala Aktiviti we Yu Save Mekem

• Serem wetem ol pikinini stori insaed long Jenesis 13:5–12, mo invaetem olgeta blong aktem stori ia. Letem wanwan pikinini i gat janis blong aktem se hem i Ebraham, Lot, mo ol man blong lukaot long ol animol. Talemaot sam wei we oli save folem eksampol blong Ebraham blong stap olsem wan we i putum pis, olsem blong mekem wanwan i gat janis blong pleiplei wetem doli wetem wan fren. Invaetem olgeta blong rolplei ol eksampol ia.

• Ridim Matiu 5:9, mo eksplenem se Jisas i wantem yumi blong stap ol man blong putum pis. Helpem ol pikinini blong tingting long wanem oli save mekem blong stap olsem ol man blong putum pis long hom blong olgeta mo wetem ol fren. Invaetem olgeta blong droem wan pikja blong olgetawan olsem wan we i putum pis. Askem ol pikinini blong serem olsem wanem oli filim taem oli ol man blong putum pis olsem Jisas Kraes.

Jenesis 15:1–6; 17:1–8; Ebraham 2:9–11

Hem i impoten blong kipim ol promes blong mi.

Blong stap lanem abaot ol kavenan we God i bin mekem wetem Ebraham mo Sara i save helpem ol pikinini andastanem wanem i minim blong kipim ol promes. Hemia i save helpem olgeta tu blong rere blong mekem mo kipim ol kavenan.

Samfala Aktiviti we Yu Save Mekem

• Askem ol pikinini sapos oli save wanem i wan promes o kavenan. Invaetem olgeta blong serem ol eksperiens blong taem we oli bin mekem wan promes o wan i bin mekem wan promes wetem olgeta. Sapos i help plante, serem sam eksampol blong yuwan. Helpem ol pikinini andastanem se Ebraham mo Sara, tufala i promes blong obei long God. Jusum sam sentens insaed long Jenesis 15:1–6; 17:1–8; Ebraham 2:9–11 blong serem sam long ol blesing we God i promesem long olgeta. Maet hemia i gat tu “Ebram, yu no fraet: Bambae mi mi stap blokem gud yu,” “Bambae yu stamba blong ol man blong plante ples,” o “Mi bambae mi yusum yu blong blesem ol man blong olgeta narafala kantri long wol”

• ?Wanem samfala simpol promes we ol pikinini ol save mekem mo kipim long taem blong klas? Eksampol, askem olgeta blong promes blong stap long ol jea blong olgeta blong sam minit o putum gud ol jea blong olgeta long en blong klas. Serem wetem olgeta wan taem we yu bin mekem wan promes mo kipim mo invaetem olgeta blong serem eni eksperiens we oli bin gat. Helpem olgeta blong andastanem se bae oli mekem ol promes wetem Papa long Heven taem oli baptaes mo taem oli go long tempol.

Stap Tijim Doktrin: Ol Bigfala Pikinini

Ebraham 1:12–17

Papa long Heven i harem mo ansarem ol prea blong mi.

Taem we laef blong Ebraham i stap long denja, hem i singaot long God mo hem i bin sef.[God i protektem hem] Ol pikinini we yu tijim maet oli save gat ol eksperiens blong olgetawan abaot prea we oli save serem.

Samfala Aktiviti we Yu Save Mekem

• Soem pikja ia An Angel Saves Abraham (ChurchofJesusChrist.org), mo invaetem ol pikinini blong serem wanem oli save abaot stori we pikja ia i soem, hemia long Ebraham 1:12, 15–17. Askem ol pikinini blong ridim ol ves ia mo serem ol samting we oli lanem abaot prea.

• Invaetem ol pikinini blong serem ol eksperiens taem Papa long Heven i bin ansarem ol prea blong olgeta, mo yu, yu serem wan long ol eksperiens blong yu.

Jenesis 13:5–12

Mi save stap olsem wan we i putum pis.

Yumi evriwan i fesem ol situesen we i traem yumi blong stap kros mo raorao. Tingting long olsem wanem stori blong Ebraham mo Lot i save helpem ol pikinini blong stap wan blong mekem pis long ol kaen situesen olsem.

Samfala Aktiviti we Yu Save Mekem

• Raetem Ol Stamba Man long Stori, Taem mo Ples, Problem, mo Ansa long bod. Invaetem ol pikinini blong ridim Jenesis 13:5–12 mo talemaot ol pat blong stori we i stap long bod. Helpem ol pikinini blong tingting long ol situesen we oli save stap olsem wan blong mekem pis, taem wan i traem blong rao o faet. Afta invaetem olgeta blong rolplei long olsem wanem oli save stap wan blong mekem pis long ol situesen ia.

• Helpem ol pikinini blong faenem ol topik ia “Pis” mo “Pis, Wan we I Mekem” insaed long Gaed long Ol Skripja (olskripja.ChurchofJesusChrist.org). Invaetem wanwan pikinini blong jusum wan skripja abaot pis mo serem wanem hem i lanem wetem olgeta long klas. Helpem olgeta blong tingbaot sam eksampol blong Sevya we i bin stap wan blong mekem pis, olsem insaed long Luk 22:50–51. ?Olsem wanem nao yumi save folem eksampol blong Hem?

  

  Lot’s Choice, © Providence Collection/licensed from goodsalt.com

Jenesis 17:1–8; Ebraham 2:8–11

Mi save kipim ol kavenan we mi mekem wetem Papa long Heven.

Blong stap tijim ol pikinini abaot kavenan we God i bin mekem wetem Ebraham mo Sara i save helpem olgeta blong tingbaot ol kavenan blong olgetawan.

Samfala Aktiviti we Yu Save Mekem

• Invaetem ol pikinini blong ridim Jenesis 17:1–8 mo Ebraham 2:8–11 mo mekem tu lis we i gat: wanem Lod i askem Ebraham blong mekem, mo wanem Lod i promes blong givim sapos hem i mekem. ?Wanem nao yumi lanem abaot Lod aot long ol ves ia?

• Soem wan pikja blong wan man we i kasem baptaes (luk long Gospel Art Buk, ol namba 103, 104). Askem ol pikinini blong mekem wan lis blong ol promes we wan man i mekem taem i baptaes mo ol promes we God bae i givim. Givim wan tingting long ol pikinini blong lukluk insaed long Mosaea 18:10; Doktrin mo Ol Kavenan 20:37, 77, 79 blong i save help. ?Wanem nao yumi save mekem blong kipim ol kavenan we yumi bin mekem taem yumi baptaes.

Stap Leftemap Tingting blong Lanem Samting long Hom

Sendem wan pis not i go hom wetem ol pikinini blong leftemap tingting blong famli blong olgeta blong luksave taem we ol pikinini blong olgeta oli stap ol man blong mekem pis, stap kipim ol promes o stap mekem wan nara samting we yu bin tokbaot long klas.

Stap Kam Antap long Fasin blong Yumi blong Stap Tij

Ol pikinini oli laekem blong muvmuv. Wanwan taem bae ol pikinini oli gat plante paoa blong muvmuv olbaot mo mekem ol samting we i pulum tingting blong olgeta aot long taem blong stap lan, be yu save yusum paoa blong olgeta ia olsem wan pat blong stap lanem samting. Invaetem olgeta blong aktemaot wan stori o mekem ol aksen we i go stret wetem ol toktok insaed long wan singsing o skripja. (Luk long Teaching in the Savior’s Way, 25–26