28 Febwari–6 Maj

Jenesis 28–33

“Tru, Ples Ya, Hae God I Stap long Hem”

Taem yu stap ridim Jenesis 28–33, tingting hevi long olsem wanem ol stori mo ol prinsipol long ol japta ia i save blesem ol pikinini we yu stap tijim.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Invaetem ol pikinini blong sakem mo rolem wan balong i go long olgeta wanwan. Taem ol pikinini oli kasem balong, askem olgeta blong serem wan samting we oli stap lanem aot long OlTesteman long hom o long Praemeri.

Tijim Doktrin: Ol Smol Pikinini

Jenesis 28:10–22

Ol Kavenan i helpem mi blong gobak long Papa long Heven.

Long wan drim, Jekob i luk wan lada we i stap lid i go long heven. Ol step long lada i save ripresentem ol kavenan we yumi mekem wetem God from se ol kavenan ia i helpem blong mekem yumi rere blong gobak long ples we Hem i stap long hem.

Samfala Aktiviti we Yu Save Mekem

• Ridim Jenesis 28:12–13 long ol pikinini. Eksplenem se ol step long lada i ripresentem ol kavenan we i helpem yumi gobak long Papa long Heven. Invaetem ol pikinini blong mekem se oli stap klaem long wan lada taem yu stap tokbaot ol taem we yumi promes blong obei long God olsem taem ia we yumi baptaes, tekem sakramen o blong go long tempol. Helpem ol pikinini blong oli tingting long sam wei we oli save rere blong mekem ol kavenan taem oli baptaes.

• Ridim Jenesis 28:15 long ol pikinini mo tokbaot bigwan ol toktok ia “Mi bambae mi stap wetem yu” mo “Bambae mi no save lego yu.” Eksplenem se God i bin promes blong stap wetem yumi oltaem taem yumi traem blong stap jusum raet. Helpem ol pikinini blong tingting long ol samting oli save mekem blong filim se oli stap kolosap long Papa long Heven mo Jisas Kraes.

Jenesis 29:16–28

Mi mas oltaem kipim ol promes blong mi.

Jekob i agri blong wok blong Leban blong seven yia mekem se hem i save maredem gel blong Leban, Rejel. Jekob i kipim agrimen ia be Leban i no bin kipim. Tingting blong yusum stori ia blong tijim ol pikinini impoten saed blong kipim ol promes blong yumi.

Samfala Aktiviti we Yu Save Mekem

• Ridim Jenesis 29:18, 20 long ol pikinini mo eksplenem se Jekob i folem promes blong hem blong wok seven yia blong Leban mekem se hem i save maredem Rejel, no mata hemia wan longfala taem blong wok (luk tu long “Jacob and His Family,” insaed long Old Testament Stories). Helpem ol pikinini blong tingting long ol promes we maet oli mekem long ol nara man. ?From wanem hem i impoten blong kipim ol promes blong yumi? Helpem olgeta blong andastanem se wan kavenan hem i wan tabu promes bitwin God mo wanwan long yumi. Serem testemoni blong yu se Papa long Heven mo Jisas Kraes i oltaem kipim ol promes blong Tufala.

• Singsing tugeta mo toktok raon long wan singsing abaot fasin blong stap ones olsem: “I Believe in Being Honest” o “Stand for the Right” (Children’s Songbook, 149, 159).

Jenesis 33:1–4

Papa long Heven mo Jisas Kraes oli save helpem mi blong lavem famli blong mi.

Plante pikinini oli save olsem blong kros long wan brata o sista blong olgeta. Stori blong olsem wanem Jekob mo Esao i winim kros we tufala i bin gat long tufala i save givim insperesen long olgeta.

Pikja blong Jekob mo Esao i sakem han blong tufala i goraon long tufala, mo holem tufala, i kam long Robert T. Barrett

Samfala Aktiviti we Yu Save Mekem

• Helpem ol pikinini blong tingbaot from wanem Esao i kros long Jekob (luk long Jenesis 27:41 o “Jacob and Esau,” insaed long Old Testament Stories). Askem ol pikinini blong soem long yu wan fes we i kros. Eksplenem se afta plante yia, Jekob i fraet blong visitim Esao. Askem ol pikinini blong soem long yu wan fes we i fraet. ?Wanem nao yumi mas mekem taem yumi fraet? Invaetem ol pikinini blong mekem olsem se oli stap prea taem bae yu stap ridim wanem Jekob i bin talem long prea blong hem (luk long Jenesis 32:11). Afta ridim insaed long Jenesis 33:4 wanem i hapen taem Esao i luk Jekob. Askem ol pikinini blong soem long yu se fes blong Jekob mo Esao i luk olsem wanem taem we tufala i luk tufala bakegen.

• Soem wan pikja blong Jekob mo Esao we yu faenem insaed long aotlaen ia. Letem ol pikinini ol tokbaot wanem oli luk long pikja. Talem long olgeta se tufala brata ia i bin kros kros long tufala, be tufala i bin jusum blong fofogivim tufala. Helpem ol pikinini blong oli tingting long olsem wanem oli save soem moa lav long wan insaed long famli blong olgeta, olsem we Jekob mo Esao tufala i bin soem long tufala.

Stap Tijim Doktrin: Ol Bigfala Pikinini

Jenesis 28:10–22

Ol kavenan i helpem mi blong gobak long Papa long Heven.

Yu save yusum drim blong Jekob we i bin luk lada i stap go antap long heven blong tijim ol pikinini se blong stap kipim ol kavenan blong yumi i mekem yumi stap rere blong go insaed long ples we God i stap long hem.

Samfala Aktiviti we Yu Save Mekem

• Invaetem ol pikinini blong ridim Jenesis 28:10–15 mo afta droem wan pikja blong drim blong Jekob. Askem olgeta blong serem ol pikja blong olgeta. Eksplenem se lada ia i ripresentem wan rod blong Jekob blong gobak long God. ?Wanem nao God i bin givim long yumi blong helpem yumi blong gobak long Hem? (luk long aktiviti pej blong wik ia). Rimaenem ol pikinini long ol kavenan blong olgeta we oli mekem taem oli baptaes. ?Olsem wanem nao kavenan ia i tekem yumi kam kolosap moa long God?

• Soem wan pikja blong tempol mo raetem long bod ol ki sentens aot long Jenesis 28:15–17, olsem: “Bambae mi stap wetem yu ,” “Tru, ples ya, Hae God i stap long hem,” “Haos blong God ya,” o “Hemia doa blong heven ya” Invaetem ol pikinini blong faenem ol sentens ia. Talem long ol pikinini abaot wei we tempol mo ol kavenan blong tempol i helpem yu filim kolosap long Lod.

Jenesis 29:16–30

Mi biliv blong mas stap ones.

Jekob i bin kipim promes blong hem blong givim seves long Leban blong seven yia be Leban i trikim hem. ?Olsem wanem nao yu save yusum stori ia blong helpem ol pikinini blong andastanem olsem wanem i impoten blong mas stap ones iven sapos ol narawan oli no ones.

Samfala Aktiviti we Yu Save Mekem

• Ridim tugeta Jenesis 29:16–30, mo helpem ol pikinini blong talem long wan sot toktok abaot ol samting we i bin hapen insaed long ol ves ia. ?Wanem nao aksen blong Jekob taem Leban i trikim hem? ?Wanem nao yumi save lanem aot long stori ia?

• Long bod raetem ?Wanem i hapen taem yumi no ones? mo ?Wanem i hapen taem yumi ones? Invaetem ol pikinini blong faenem ol ansa taem oli stap ridim “Fasin blong Stap Ones mo Fasin blong Stap Strong mo Tru” (insaed long Blong Ol Yut Oli Kam Strong [2011], 19).

Jenesis 32:6–11; 33:1–4

Papa long Heven mo Jisas Kraes oli save helpem mi blong lavem famli blong mi.

Esao i kros long Jekob, mo Jekob i fraet blong luk Esao bakegen nomata we tufala i stap seperet blong 20 yia. Be Jekob i bin prea from help, mo Esao i save winim kros blong hem. ?Olsem wanem yu save yusum stori ia blong tijim ol pikinini se i impoten blong stap lavem ol famli blong yumi?

Samfala Aktiviti we Yu Save Mekem

• Askem ol pikinini wanem oli tingbaot long saed blong rilesensip blong Jekob mo Esao (luk long Jenesis 27:41 o “Jacob and Esau,” insaed long Old Testament Stories). Eksplenem se afta we tufala i seperet blong 20 yia, Jekob i stap go blong mitim Esao bakegen. Ridim tugeta Jenesis 32:6–11. ?Jekob i bin filim olsem wanem? ?Wanem nao hem i bin mekem blong kasem help? Testifae se yumi save askem Papa long Heven from help taem famli rilesensip blong yumi i had. Ridim tugeta Jenesis 33:1–4 blong faenemaot olsem wanem Lod i ansarem prea blong Jekob?

• Serem wan eksperiens blong yuwan o wan stori aot long Magasin blong Jos we i soem bigfala lav insaed long famli blong yumi. Invaetem ol pikinini blong oli serem ol eksperiens blong olgeta tu. ?Wanem nao yumi save mekem taem wan memba blong famli i kros long yumi? Blong lanem abaot wanem we Sevya i bin tijim yumi blong mekem, luk long Matiu 5:43–45.

Stap Leftemap Tingting blong Lanem Samting long Hom

Invaetem ol pikinini blong serem aktiviti pej blong wik ia wetem ol famli blong olgeta blong helpem olgeta lanem mo tingbaot drim blong Jekob.

Stap Kam Antap long Fasin blong Yumi blong Stap Tij

Yusum ol pikja blong helpem ol pikinini blong andastanem ol stori long skripja. Ol pikinini oli save lanem samting gud moa taem oli lukluk long ol pikja blong ol stori long skripja o ol tijing. O, eksampol, yu save soem pikja we i stap long aotlaen blong wik ia insaed long Kam Folem Mi—Blong Wanwan Man, Woman mo Famli.