Pikja blong Josef blong Ijip insaed long kalabus, i kam long Jeff Ward

7–13 Maj.

Jenesis 37–41

“Lod I Stap wetem Joseph”

?Wanem ol trutok insaed long Jenesis 37–41 we ol pikinini long klas blong yu oli nid blong andastanem gud moa? Luklukgud long ol tingting mo filing we yu kasem taem yu stap rere blong tij.

Raetemdaon Ol Filing mo Tingting blong Yu

Invaetem Ol Pikinini blong Serem Wanem Oli Gat

Givim smol taem long ol pikinini blong droem samting we oli bin lanem abaot gospel ia long hom o long Jos. Askem ol pikinini blong serem mo tokbaot ol samting we oli droem.

Tijim Doktrin: Ol Smol Pikinini

Jenesis 37

Mi save stap kaen long famli blong mi.

Ol brata blong Josef oli jalus long hem mo oli tritim nogud hem. ?Olsem wanem nao yu save helpem ol pikinini blong oli andastanem olsem wanem i impoten blong stap kaen long ol narawan, speseli olgeta memba blong famli?

Samfala Aktiviti we Yu Save Mekem

• Blong talem stori blong Josef mo ol brata blong hem aot long Jenesis 37, yu save yusum ol pikja insaed long Kam Folem Mi—Blong Wanwan Man, Woman mo Famli o “Joseph in Egypt” (insaed long Old Testament Stories). Letem ol pikinini oli help blong talem wanem oli save abaot stori ia. Askem olgeta ol kwestin olsem, “?Olsem wanem nao ol brata blong Josef oli no kaen long hem? Helpem ol pikinini blong tingting long ol samting we ol brata blong Josef oli save mekem blong soem lav long Josef. ?Wanem yumi mas mekem taem yumi filim kros long ol memba blong famli blong yumi?

• Soem pikja blong wan famli (luk long Gospel Art Buk, namba 112), o invaetem ol pikinini blong droem ol pikja blong famli blong olgeta. Askem olgeta blong serem ol wei we oli save stap kaen long ol memba blong famli blong olgeta.

• Singim tugeta wan singsing blong stap lavem famli blong yumi olsem “A Happy Family” (Children’s Songbook, 198). ?Wanem nao yumi save mekem blong helpem ol famli blong yumi stap hapi?

• Letem ol pikinini oli kalarem aktiviti pej blong wik ia mo long spes we i stap ia, droem wan pikja blong ol memba blong famli we oli stap kaen.

Jenesis 37:18–28; 39:20–23

God i save helpem mi taem ol nogud samting i hapen.

Plante nogud samting i hapen long Josef be hem i jusum blong kipim ol komanmen, mo Lod i bin stap wetem hem. Ol yang pikinini oli save lanem hemia se God i wantem blong helpem olgeta long taem blong hadtaem long laef blong olgeta.

Samfala Aktiviti we Yu Save Mekem

• Tokbaot sam long ol had samting we i hapen long Josef (luk long Jenesis 37:23–28; 39:20; o “Joseph and His Dreams” mo “Joseph in Egypt,” insaed long Old Testament Stories). Afta yu talem long ol pikinini abaot wanwan hadtaem we Josef i bin fesem, invaetem olgeta blong ripitim toktok ia “Lod i stap wetem Josef” (Jenesis 39:2).

• Serem ol pikja blong Sevya we i stap helpem ol pipol we oli stap fesem ol jalenj (luk long Gospel Art Buk, ol namba 40–43). Invaetem ol pikinini blong serem olsem wanem Sevya i bin stap helpem ol pipol. Serem testemoni blong yu se Lod i save helpem yumi taem ol nogud samting i hapen long yumi.

• Singim wan singsing abaot lav mo kea blong Sevya long yumi, olsem “Jesus Is Our Loving Friend” (Children’s Songbook, 58). Serem wan eksperiens taem yu bin filim lav blong God long wan taem we i gat tumas jalenj. Soem wan pikja blong Jisas mo invaetem ol pikinini blong serem olsem wanem oli filim abaot Hem.

Jenesis 41:15–36, 47–57

God i save wonem mi abaot denja.

God i helpem Josef blong andastanem se drim blong King blong Ijip oli wan woning blong mekem oli rere from ol hat taem we i stap kam long fiuja. Helpem ol pikinini andastanem se God i save wonem olgeta abaot denja, mo denja long saed blong spirit.

Josef i stap talem mining blong drim blong man blong lukaot waen mo man blong mekem bred blong king, i kam long François Gérard

Samfala Aktiviti we Yu Save Mekem

• Putum ol pikja blong ol kaekae raon long rum, mo invaetem ol pikinini blong karem olgeta i kam tugeta blong “storem” olgeta long wan kontena. Yusum aktiviti ia blong talem long ol pikinini abaot olsem wanem God i bin wonem King blong Ijip blong rere from wan taem we kaekae bae i nomo gat (luk long Jenesis 41:15–36, 47–57). Letem ol pikinini oli droem ol pikja blong ol samting we King blong Ijip i drim long olgeta mo afta yusum ol pikja blong olgeta blong tijim ol famli blong olgeta long hom.

• Soem wan pikja blong profet we i stap laef. Talem long ol pikinini abaot ol tijing o woning blong God we i bin givim long yumi tru long hem. Eksplenem se bae yumi kasem blesing mo proteksen taem yumi folem profet. Invaetem ol pikinini blong aktem ol samting we oli save mekem blong folem kaonsel blong profet.

Stap Tijim Doktrin: Ol Bigfala Pikinini

Jenesis 39:1–3, 20–23; 41:38

Sapos Mi mi stap fetful, God bae i helpem mi long ol had taem.

No mata Josef i bin gat plante had taem blong tes long laef blong hem, hem i stap fetful mo “Hae God i stap wetem Josef” (Jenesis 39:3). Ol eksperiens blong hem i save helpem ol pikinini blong filim gud se God i save helpem olgeta long ol taem blong tes long laef ia.

Samfala Aktiviti we Yu Save Mekem

• Askem ol pikinini blong faenem ol toktok o sentens insaed long Jenesis 39:1–3, 20–23; 41:38 we i soem se God i bin stap wetem Josef long ol had taem blong hem. Sapos i posibol, invaetem ol pikinini blong mekem wan smol saen blong stap soem wan long ol sentens we oli bin faenem. Leftemap tingting blong olgeta blong tekem ol saen blong olgeta i go hom blong rimaenem olgeta se bae Lod i stap wetem olgeta long ol taem blong tes long laef ia.

• Invaetem ol pikinini blong serem tingting blong olgeta abaot sentens ia “Hae God i stap wetem Josef” i minim (Jenesis 39:2). Invaetem olgeta blong serem ol eksperiens long taem we oli bin filim se Lod i bin stap wetem olgeta o famli blong olgeta long wan had taem. Serem ol semmak eksperiens blong laef blong yu.

Jenesis 37:3–28

Mi save stap hapi taem ol gud samting i hapen long ol narafala man.

Fasin blong stap jalus i lidim ol brata blong Josef blong mekem ol joes we i nogud tumas. Ol rong joes blong olgeta i mekem Josef i harem nogud mo brekem hat blong papa blong olgeta. Stori ia i save helpem ol pikinini blong jusum stap hapi taem Lod i stap blesem ol narafala man.

Samfala Aktiviti we Yu Save Mekem

• Invaetem ol pikinini blong lukluk bak long Jenesis 37:3–11 mo droem ol pikja blong kot blong Josef mo tufala drim blong hem. ?Olsem wanem nao ol brata blong Josef oli filim abaot Josef? ?Olsem wanem nao olgeta oli save mekem Josef long wan narafala wei? Toktok raon long from wanem i impoten blong stap hapi taem ol gud samting i hapen long ol narafala pipol.

• Askem ol pikinini blong serem sam situesen we maet wan man i save jalus long wan narafala man. Singim tugeta wan singsing abaot fasin blong stap soem lav long ol narafala man olsem “Love One Another” (Children’s Songbook, 136–37). Tokbaot bigwan se Papa long Heven i save helpem yumi blong karemaot ol fasin blong stap jalus mo putum lav i tekem ples blong jalus.

Jenesis 39:7–12

Wetem help blong Lod, Mi save ronwe long temtesen.

Taem ol pikinini we yu tijim oli fesem ol temtesen truaot long laef blong olgeta, oli save kasem paoa aot long eksampol blong Josef blong stap ronwe long temtesen.

Samfala Aktiviti we Yu Save Mekem

• Soem wan pikja blong waef blong Potifa (luk long Gospel Art Buk, namba 11), mo serem stori insaed long Jenesis 39:7–12. ?Olsem wanem Josef i stap longwe long temtesen? Helpem ol pikinini faenem ol toktok insaed long Jenesis 39:7–12 we i ansarem kwestin ia—eksampol, Josef i save se blong stap wetem waef blong Potifa i wan “sin agensem God” (ves 9).

• Invaetem ol pikinini blong tingting long ol situesen we ol pikinini semmak yia long olgeta we oli fesem temtesen blong mekem ol rong joes. Askem olgeta blong mekem rolplei long olsem wanem oli save folem eksampol blong Josef long ol situesen olsem—eksampol, ?wanem sam wei we yumi save tingbaot God taem yumi fesem temtesen?

• Soem tu magnet [stil] we i ripresentem God mo Setan, mo wan smol aean samting olsem wan pepa klip we i ripresentem yumi. Yusum ol magnet blong soem se taem yumi stap kam moa kolosap long God, paoa blong Hem long yumi i kam strong moa mo i semmak taem yumi stap kam kolosap moa long Setan. ?Wanem yumi save mekem blong kam kolosap long God? ?Olsem wanem Tabu Spirit i save helpem yumi?

Stap Leftemap Tingting blong Lanem Samting long Hom

Invaetem ol pikinini blong serem ol wei blong komplitim ol sentens ia “Mi save kam olsem Josef tru long .” Askem olgeta blong serem wetem ol famli blong olgeta olsem wanem oli komplitim ol sentens ia.

Stap Kam Antap long Fasin blong Yumi Blong Stap Tij

Invaetem ol pikinini blong serem wanem oli gat Taem yu toktok raon long gospel prinsipol ia, askem ol pikinini blong serem ol tingting blong olgeta, ol filing, mo ol eksperiens. Bae yu faenem se oli gat plante niu tingting we i gat plante mining.