Pikja droing blong Josef blong Ijip we i stap long kalabus, i kam long Jeff Ward

7–13 Maj.

Jenesis 37–41

“Hae God I Stap Wetem Josef”

Taem yu stap ridim Jenesis 37–41, prea se Tabu Spirit bambae i helpem yu blong luk olsem wanem ol skripja ia oli go wetem laef blong yu. Raetemdaon ol save we yu kasem.

Raetemdaon Ol Filing mo Tingting blong Yu

Samtaem, ol nogud samting oli hapen long ol gudfala pipol. Laef i stap tijim lesen ia i klia long yumi, mo i semmak long laef blong Josef, boe blong Jekob. Hem i bin tekem kavenan we God i bin mekem wetem ol papa blong hem, be ol brata blong hem oli no bin laekem hem nating, mo oli bin salem hem olsem wan slef. Hem i no bin wantem blong putum daon fasin blong hem blong stanap strong mo stap ones, taem we waef blong Potifa i bin kam temtem hem, mekem se oli sakem hem i go long kalabus. I luk se, moa hem i stap fetful, moa i fesem ol had samting. Be evri hadtaem ia, oli no wan saen we God i no agri wetem. Wanem we i stap, i we, tru long evri samting ia “Lod i bin stap wetem hem” (Jenesis 39:3). Laef blong Josef i blong soemaot impoten trutok ia: God bae i no lego yumi. “Blong stap folem Sevya bae i no karemaot ol tes blong yumi,” Presiden Dieter F. Uchtdorf i tijim. “Be bae i karemaot ol fanis bitwin yu mo help we Papa blong yu long Heven i wantem givim long yu. God bae i stap wetem yufala” (“A Yearning for Home,” Liahona, Nov. 2017, 22).

Ol Aedia blong Skripja Stadi blong Yuwan

Jenesis 37:1–28; 39; 41:9– 45

“Lod i bin stap wetem Josef” long hadtaem blong hem.

Bakegen mo bakegen, gud samting i stap kamaot long Josef, be Lod i neva lego hem. Taem yu stap ridim stori blong Josef, tingting hevi long ol kwestin olsem ia: “Wanem nao Josef i bin mekem blong stap kolosap long Lod long ol taem blong tes blong hem? ?Long wanem wei nao Lod i bin “stap wetem hem”?(Jenesis 39:2–3, 21, 23).

Yu save askem ol semmak kwestin abaot laef blong yu. ?Wanem pruf nao yu bin luk, we i soem se Lod i no bin lego yu long taem we yu stap fesem hadtaem? Tingting long hao yu save serem ol eksperiens blong yu wetem ol memba blong famli mo ol fiuja jeneresen (luk long 1 Nifae 5:14). ?Wanem nao yu save mekem blong mekem yuwan i rere blong stap fetful taem we yu stap fesem ol tes long fiuja?

Luk tu long Jon 14:18; Rom 8:28; Alma 36:3; Doktrin mo Ol Kavenan 121:7–8; D. Todd Christofferson, “Glad Ia blong Ol Sent,” Liahona, Nov 2019, 15–18.

Jenesis 37:5–11; 40; 41:1–38

Sapos mi stap fetfulwan, Lod bae i lidim mi mo bae i givim insperesen long mi.

Elda David A. Bednar i tijim: “ol revelesen oli kam long ol defren wei, olsem eksampol, ol drim, ol visen, ol storian wetem ol mesenja blong heven, mo insperesen” (“The Spirit of Revelation,” Liahona, May 2011, 88). Lod i bin yusum ol drim blong soemaot ol trutok long Josef, jif wokman blong King blong Ijip, mo man blong bekem bred, mo King blong Ijip. Lod i bin soemaot tu long Josef olsem wanem blong talem mining blong ol drim ia. ?Wanem nao yu save lanem aot long Jenesis 37:5–11; 40:5–8; 41:14–25, 37–38 abaot fasin blong stap kasem mo andastanem revelesen we i kam long Lod? Eksampol: ?Wanem nao yu save lanem aot long eksampol blong Josef taem i had blong andastanem revelesen? (Luk long Jenesis 40:8; 41:16).

Josef I Stap Talem Mining blong Drim blong Jif Wokman mo Man blong Bekem Bred, i kam long François Gérard

Tingting hevi long olsem wanem Lod i stap talemaot tingting blong Hem long yu tru long revelesen. ?Wanem nao yu stap mekem blong folem revelesen ia we Lod i bin givim long yu? ?Olsem wanem nao yu stap askem moa blong Hem i soem rod long yu?

Luk tu long Russell M. Nelson, “Revelesen blong Jos, Revelesen blong Laef blong Yumi,” Liahona, Mei 2018, 93–96; Michelle Craig, “Paoa long Saed blong Spirit,” Liahona, Nov 2019, 19–21.

Jenesis 38; 39:7–20

Wetem help blong Lod, yumi save ronwe long temtesen.

Taem yu fesem temtesen, eksampol blong Josef i save leftemap tingting blong yu, mo i save givim paoa long yu. Taem yu stap ridim eksperiens blong hem long Jenesis 39, luksave ol samting we Josef i bin mekem blong stanap agensem temtesen. Eksampol:

• Hem i no akseptem ol samting we waef blong Potifa i bin stap askem (ves 8).

• Hem i bin luksave se blong mekem sin bae i mekem God mo ol narawan oli harem nogud (ol ves 8–9).

• Hem “i no wantem” temtesen ia i nomata se hemia i bin gohed evri dei (ves 10).

• “Be hem i ronwe long kot blong hem, i resis, i go afsaed long haos” (ves 12).

Wetem eksampol blong Josef we i stap long maen blong yu, tingting blong mekem wan plan blong stap longwe mo stanap agensem temtesen. Eksampol, yu save tingting abaot wan temtesen we yu stap fesem, mo raetemdaon ol situesen blong stap longwe long olgeta, mo mekem wan plan blong stap dipen long Papa long Heven taem we temtesen ia i kam antap (luk long 2 Nifae 4:18, 27–33).

Temtesen:

Ol situesen blong stap longwe long olgeta:

Plan blong folem:

Stori ia abaot paoa blong Josef taem we hem i bin stap fesem temtesen, i kam afta long wan defren stori abaot bigfala brata blong hem, Juda, we i stap long Jenesis 38. ?Wanem nao ol japta 37, 38, mo 39, sapos yu putum olgeta tugeta, oli tijim yu abaot jastiti o fasin blong stap klin long saed blong seks?

Luk tu long 1 Korin 10:13; 1 Nifae 15:23–24; 3 Nifae 18:17–18.

Ol Aedia blong Famli Skripja Stadi mo Haos Naet

Jenesis 37.Sapos yu yu bin wan long ol brata blong Josef, ?wanem nao bae yu mekem blong kipim fasin blong stap jalus i no spolem ol rilesensip wetem hem? ?Olsem wanem nao bae i help yumi blong toktok wetem ol toktok blong pis long wanwan long yumi? (ves 4).

Jenesis 39.Ol vidio ia “The Refiner’s Fire” and “After the Storm” (ChurchofJesusChrist.org) i tokbaot ol eksperiens blong ol pipol we oli faenem paoa taem oli tanem olgeta i go long Lod long taem blong ol tes blong olgeta. Mebi yu save wajem wan long olgeta mo tokbaot wanem nao Josef i save talem sapos bae hem i mekem wan vidio abaot eksperiens blong hem. Tugeta yufala i save singsing “I’m Trying to Be Like Jesus” (Children’s Songbook, 78–79) mo lukaotem ol advaes we famli blong yu i save serem wetem Josef taem we hem i stap fesem ol tes blong hem.

Jenesis 39:7–12.Blong stap ridim ol ves ia i save givim wan janis blong toktok raon long loa blong jastiti wetem famli blong yu. Hemia sam risos we oli save help wetem toktok storian ia: Jekob 2:28; Alma 39:3–9; “Stap Klin long Saed blong Seks” (insaed long Blong Ol Yut Oli Kam Strong [2011], 35–37); “Sexual Intimacy Is Sacred and Beautiful” (insaed long Help for Parents [2019], AddressingPornography.ChurchofJesusChrist.org).

Jenesis 41:15–57.?Wanem nao yumi stap lanem aot long ol ves ia abaot wei we Lod i stap blesem ol pipol blong Ijip tru long Josef? ?Wanem nao yumi save lan abaot fasin blong rere from ol fiuja imejensi? Toktok raon long wanem yu save mekem blong yu rere gud moa olsem wan famli. Blong gat sam aedia, luk long Gospel Topics, “Emergency Preparedness,” topics.ChurchofJesusChrist.org.

Blong gat moa aedia blong stap tijim ol pikinini, luk long aotlaen blong wik ia insaed long Kam Folem Mi—Blong Praemeri.

Wan Singsing: “Jesus Is Our Loving Friend,” Children’s Songbook, 58.

Stap Kam Antap long Stadi blong Yuwan

Yusum Ol Skripja Ia long Laef blong Yu Taem yus stap rid, tingting long wei we ol stori mo ol tijing insaed long ol skripja we oli save aplae long laef blong yu. Eksampol: ?olsem wanem nao fetful fasin blong Josef long Ijip i save givim insperesen long yu blong stap fetful long Lod, i nomata long wanem hadtaem we i stap?

Pikja droing blong ol brata blong Josef we oli stap tekem kot blong hem i go, i kam long Sam Lawlor