Moses mo smol tri wetem faea

Moses mo Smol Tri Wetem Faea, i kam long Harry Anderson

21–27 Maj

Eksodas 1–6

“Mi Stap Tingbaot Promes Ya blong Mi Yet”

Statem stadi blong yu wetem wan prea, mo askem help blong faenem ol mesej we oli stap long Eksodas 1–6 we yu save yusum insaed long laef blong yu mo long seves blong yu long kingdom blong God.

Raetemdaon Ol Filing mo Tingting blong Yu

Invitesen blong stap laef long Ijip i bin sevem famli blong Jekob. Be afta long plante handred yia, ol laen blong olgeta oli bin kam slef mo wan niufala king blong Ijip i bin mekem nogud long olgeta, mo “hem i no bin save Josef” (Eksodas 1:8). Bae i stret nomo long Ol Man Isrel blong askem olgetawan from wanem God i bin letem hemia i hapen long olgeta, ol kavenan pipol blong Hem. ?Hem i bin tingbaot, kavenan ia we Hem i bin mekem wetem olgeta? ?Oli stil stap olsem ol pipol blong Hem ? ?Hem i bin save luk hamas oli bin stap safa ?

Bae i gat ol taem we yu filim blong askem ol semmak kwestin. Maet yu save tingting se: “God i save wanem nao mi mi stap gotru long hem? ?Hem i save harem ol strong prea blong mi blong askem help? Stori we i stap long Eksodas abaot fasin blong sevem Isrel aot long Ijip i ansarem klia ol kaen kwestin olsem ia: God i no stap fogetem ol pipol blong Hem. Hem i stap tingbaot ol kavenan we Hem i bin mekem wetem yumi mo bae i mekem olgeta oli kamtru long taem mo wei blong Hem Doktrin mo Ol Kavenan 88:68). Hem i talem: “Mi mi Hae God. Mi bambae mi sevem yufala, mi tekemaot yufala long han blong ol man Ijip ya we oli stap mekem yufala i wok slef, mi mekem yufala i fri. Bambae mi leftemap han blong mi blong panisim olgeta long ol panis we i nogud we i nogud, nao bambae mi sevem yufala, mi mekem yufala i fri. “Mi mi Hae God, mo taem mi tekemaot yufala long han blong olgeta, mi mekem yufala i fri, bambae yufala evriwan i luksave we mi mi God blong yufala” (Eksodas 6:6–7).

Blong ridim wan bigfala lukluk long buk blong Eksodas, luk long “Eksodas, book of” insaed long Bible Dictionary.

stadi blong yuwan aekon

Ol Aedia blong Skripja Stadi blong Yuwan

Eksodas 1–2

Jisas Kraes I Man we I Mekem Mi Mi Kam Fri

Wan long ol stamba toktok insaed long buk blong Eksodas, i we God i gat paoa blong mekem ol pipol blong Hem oli fri long fasin blong stap slef. Fasin we Ol Man Isrel oli kam slef, olsem we oli tokbaot long Eksodas 1 bae oli save tekem olsem wan simbol blong stap prisena we yumi evriwan i fesem from sin mo ded (luk long 2 Nifae 2:26–27; 9:10; Alma 36:28). Mo Moses, man we i mekem Ol Man Isrel oli kam fri, bae oli save luk olsem wan we i ripresentem Jisas Kraes Dutronome 18:18–19; 1 Nifae 22:20–21). Ridim Eksodas 1–2 wetem fasin blong komperem samting long maen blong yu. Eksampol: Bae yu luk se Moses mo Jisas, oli bin sevem tufala long ded taem tufala i smol pikinini (luk long Eksodas 1:22–2:10; Matiu 2:13–16) mo tufala tugeta i bin spendem sam taem long waelples bifo tufala i statem seves blong tufala (luk long Eksodas 2:15–22; Matiu 4:1–2). ?Wanem nara niu tingting yu yu lanem aot long Eksodas abaot fasin blong stap slef long saed blong spirit? ?Abaot fasin we Sevya i kam mekem yumi fri?

Luk tu long D. Todd Christofferson, “Fasin blong Pemaot Man,” Jeneral Konfrens, Epril 2013.

Bebi Moses we i stap insaed long basket

Moses insaed long ol longlongfala gras, © Providence Collection/oli karem laesens aot long goodsalt.com

Eksodas 3–4

God i givim paoa long olgeta we Hem i singaotem olgeta blong mekem wok blong Hem.

Tedei, yumi save Moses olsem wan bigfala profet mo lida. Be Moses i no bin luk hemwan long wei ia taem we Lod i bin singaotem hem faswan. Moses i askem hemwan “?huia mi? ?Bae mi go long King blong Ijip?” (Eksodas 3:11). Be Lod i bin save huia Moses—mo huia bae hem i kam. Taem yu stap ridim Eksodas 3–4, tekem not long wei we Lod i talem gud long Moses mo i lukluk long ol wari blong hem. ?Wanem nao yu faenem insaed long ol japta ia we i givim insperesen long yu taem yu no filim i stret o tingting se yu no save mekem wan samting? ?Olsem wanem nao Lod i blesem ol wokman blong Hem wetem moa paoa blong mekem tingting blong hem” Moses 1:1–10, 24–39; 6:31–39, 47). ?Wetaem nao yu bin luk God i stap mekem wok blong Hem tru long yu o ol narawan?

Blong kasem moa abaot laef mo seves blong “Moses” luk insaed long Bible Dictionary o Gaed long Ol Skripja.

Eksodas 5–6

Ol stamba tingting blong Lod bae oli kamtru long taem we Hem i wantem.

I nomata we Moses i bin gat paoa long tingting blong go long fored blong King blong Ijip, olsem we God i bin givim komanmen ia long hem, mo i talem long king blong mekem Ol Man Isrel oli kam fri, King blong Ijip i no letem. Wanem we i stap i we laef blong Ol Man blong Isrel oli had moa. Moses mo Ol Man Isrel oli askem olgetawan se from wanem ol samting oli no bin wokaot gud, iven taem we Moses i bin stap mekem wanem we God i bin askem Hem blong mekem (luk long Eksodas 5:22–23).

?Yu no bin filim samtaem taem yu stap mekem tingting blong God be yu no bin luk sakses we yu bin wantem? Luklukbak long Eksodas 6:1–8, mo lukaotem wanem we Lod i bin talem blong helpem Moses blong gohed. ?Olsem wanem nao Lod i bin helpem yu blong stap strong blong mekem tingting blong Hem?

Eksodas 6:3

?Huia i Jehova?

Jehova i wan long ol nem blong Jisas Kraes mo i stap tokbaot laef blong Sevya bifo i bon i kam long wol ia. Translesen blong Josef Smit i mekem i klia se ol profet ia, Ebraham, Aesak, mo Jekob, oli bin save Lod long nem blong Hem Eksodas 6:3, futnot c). Plante taem, taem we sentens ia “Lod” i bin kamaot long OlTesteman, i stap tokbaot Jehova ia nao. Insaed long Eksodas 3:13–15, taetol ia “MI STAP WE MI STAP” i tokbaot Jehova tu (luk long Doktrin mo Ol Kavenan 38:1; 39:1).

famli stadi aekon

Ol Aedia blong Famli Skripja Stadi mo Haos Naet

Eksodas 1–2.Samfala woman oli plei ol impoten rol long plan ia blong God blong resemap wan Man blong mekem Ol Man Isrel oli Kam Fri. Olsem wan famli, yu save ridim abaot ol midwaef ia, Sifra mo Pua (Eksodas 1:15–20); mama blong Moses, Jokebed mo sista blong hem, Miriam (Eksodas 2:2–9; Ol Namba 26:59); gel blong king blong Ijip (Eksodas 2:5–6, 10); mo waef blong Sipora (Eksodas 2:16–21). ?Olsem wanem ol woman ia oli bin mekem plan blong God i go fored? ?Olsem wanem ol eksperiens blong olgeta i blong rimaenem yumi long misin blong Jisas Kraes? Yu save putum tugeta ol pikja blong ol woman long famli, mo ol bubu mo serem ol storian abaot olgeta. ?Olsem wanem nao yumi bin gat blesing tru long ol stret mo gud woman? Mesej blong Presiden Russell M. Nelson “Mi Plis long Ol Sista blong Mi” (Jeneral Konfrens, Okt 2015) i save givhan long toktok storian blong yufala.

Eksodas 3:1–6.Taem we Moses i stap kam kolosap long smol tri wetem faea, Lod i talem long hem blong karemaot ol sus blong hem olsem wan saen blong respek. ?Olsem wanem yumi save soem we yumi gat respek long ol tabu ples? Eksampol: ?Wanem nao yumi save mekem blong mekem hom blong yumi i wan tabu ples blong Spirit blong Lod i save stap long hem? ?Olsem wanem nao yumi save soem moa respek long ol narafala tabu ples?

Eksodas 4:1–9.Lod i bin givim long Moses paoa blong mekem trifala merikel olsem ol saen blong soem long ol pikinini blong Isrel se Hem nao i bin sendem Moses i kam. ?Wanem nao ol saen ia oli stap tijim yumi abaot Jisas Kraes?

Eksodas 5:2.?Hem i minim wanem long yumi blong “save” Lod? ?Olsem wanem nao yumi kam blong save Hem? (Eksampol, luk long Alma 22:15–18). ?Olsem wanem rilesensip blong yumi wetem Hem bae i jenisim hat blong yumi blong wantem obei long Hem? ( luk tu long Jon 17:3; Mosaea 5:13).

Blong gat moa tingting blong stap tijim ol pikinini, luk long aotlaen blong wik ia long Kam Folem Mi—Blong Praemeri.

Wan singsing: “Reverence Is Love,” Children’s Songbook, 31.

Stap Kam Antap long Fasin blong Yumi blong Stap Lanem Samting

Kipim wan stadi jenol blong yuwan. Bae yu faenem se i help blong yusum wan jenol o notbuk blong raetemdaon ol tingting, ol aedia, ol kwestin, o ol tingting mo filing we oli kam long yu taem yu stap stadi.

Gel blong king blong Ijip i faenem bebi Moses

Gel blong King blong Ijip i Faenem Moses long Ol Longlongfala Gras, i kam long George Soper