“18–24 Epril. Eksodas 18– 20: ‘Bambae Mifala I Mekem Olgeta Samting we Hae God I Talem,’” Kam Folem Mi—Blong Wanwan Man, Woman mo Famli: OlTesteman 2022 (2021)
“18–24 Epril. Eksodas 18–20,” Kam Folem Mi—Blong Wanwan Man, Woman mo Famli: 2022
Wan maonten, o bigfala hil long Ijip we oli stap biliv se hem i Bigfala Hil blong Sinae.
18–24 Epril
Eksodas 18–20
“Bambae Mifala I Mekem Olgeta Samting we Hae God I Talem”
Sista Michelle Craig i bin tijim, “Olsem ol fetful disaepol blong [Jisas Kraes], yu save kasem ol insperesen mo revelesen blong yuwan, we oli go wetem ol komanmen blong Hem we oli stret blong yuwan(“Paoa long Saed blong Spirit,” Liahona, Nov 2019, 21). Raetemdaon ol tingting mo filing we oli kam long Spirit, taem yu stap stadi long Eksodas18–20.
Raetemdaon Ol Filing mo Tingting blong Yu
Ol man blong Isrel oli gohed long longfala wokbaot blong olgeta long Ijip go kasem daon long hil blong Sinae i fulap wetem merikel—Lod i kamaot long olgeta wetem paoa, lav, mo sore. Nomata long hemia, Lod i gat ol blesing i stap blong olgeta we i go bitim hemia we i karemaot olgeta long Ijip mo hem i givim kakae mo wota long olgeta blong ansarem ol nid blong olgeta long saed blong bodi. Hem i wantem olgeta blong oli kam ol kavenan Pipol blong hem, “ol nambawan man blong Hem,” mo wan “tabu pipol ” (Eksodas 19:5-6). Tedei, ol blesing blong kavenan ia i go bitim wan kantri o pipol. God i wantem evri pikinini blong Hem blong kam ol kavenan pipol blong Hem, blong obei long voes blong [Hem] mo kipim kavenan blong [Hem] (Eksodas 19:5), from se Hem i soem sore blong Hem long “ol taosen man we oli lavem [Hem] mo stap obei long ol komanmen blong [Hem]” (Eksodas 20:6).
Ol Aedia blong Skripja Stadi blong Yuwan
Yumi save help blong tekem hevi wok ia blong stap mekem wok blong Lod.
Taem yu stap ridim kaonsel we Moses i kasem long palika blong hem Jetro, tingting hevi long olsem wanem yu save kam ol “man we ol man oli trastem olgeta” (samtaem oli save transletem olsem ol man blong talem “trutok”) we oli tokbaot long ves 21 ?Olsem wanem yu save help blong “givhan long [ol lida blong Jos blong oli] no hadwok tumas”? (ves 22). Eksampol, ?Olsem wanem kaonsel ia i go wetem givhan hadwok blong yu?
Yu maet tingting se bae yu, evri taem, olsem Moses, stap traem blong mekem plante samting. ?Olsem wanem kaonsel ia blong Jetro hem i blong yu tu?
Luk tu long Mosaea 4:27; Henry B. Eyring, “The Caregiver,” Liahona, Nov. 2012, 121–24.
Blong stap givhan long ol narawan i wan wei we yumi save tekpat long wok ia blong Lod.
Ol kavenan pipol blong Lod oli ol rij samting blong Hem.
Tingbaot, i minim wanem long yu blong stap olsem “nambawan man” blong Lod (Eksodas 19:5). Presiden Russell M. Nelson i givim wan eksplenesen long toktok ia: “Insaed long OlTesteman, Hibru toktok blong peculiar oli transletem olsem segullah, we i minim, ‘propeti we i gat valiu,’ o ‘rij samting’ … Blong oli luksave yumi olsem ol wokman blong Lod olsem ol nambawan pipol blong hem i wan oda we i hae moa,” (“Children of the Covenant,” Ensign, May 1995, 34). ?Olsem wanem nao taem yu save se blong kipim olgeta kavenan blong yu i mekem yu wan “nambawan man” i save afektem wei we yu stap laef long hem?
Luk tu long Gerrit W. Gong, “Yumi blong Kavenan,” Liahona, Nov. 2019, 80–83.
I nid blong rere blong save gat ol eksperiens we oli tabu.
Lod i bin talem long Moses se ol pikinini blong Isrel oli nidim blong oli rere bifo oli save “mekem wosip long [God]” (Eksodas 19:10–11, 17) mo kipim wan kavenan wetem Hem (luk long Eksodas 19:5). ?Wanem nao yu save mekem blong yu save stap rere from ol tabu eksperiens insaed long laef blong yu, olsem blong stap go long tempol, o stap tekem mo kakae sakramen? ?Wanem nao yu save mekem moa fulwan blong rere from ol kaen eksperiens ia? Tingting long sam nara aktiviti long saed blong spirit, we i nidim blong yu rere, mo tingting hevi long olsem wanem wei we yu yu stap rere long hem,i save afektem yu long ol eksperiens we yu stap gat.
God i gat bigfala sore.
Taem yu stap ridim Eksodas 20, tingting blong teknot long wijwan long Ol Ten Komanmen nao yu yu filim se yu stap obei, mo wijwan nao yu filim se yu nid blong putum moa fet blong obei long hem. Yu save yusum wan komanmen blong wok long hem, mo afta, stadi long hem long moa ditel taem yu stap ridim ol skripja we oli go wetem long Gaed long Ol Skripja long olskripja.ChurchofJesusChrist.org) o ol mesej blong konfrens (luk long seksen blong topics long conference.ChurchofJesusChrist.org). Tingting blong putum insaed long ol stadi blong yu, ol blesing we oli kam long olgeta we oli stap obei long komanmen. ?Olsem wanem nao ol blesing ia oli soem sore blong God mo lav we Hem i gat long yu?
Luk tu long Carole M. Stephens, “Sipos Yufala I Lavem Mi, Bambae Yufala I Save Obei long Ol Tok blong Mi,” Jeneral Konfrens, Okt 2015.
Hem i impoten blong putum Lod i kam faswan long laef blong mi.
Blong stap ridim Eksodas 20:1–7 i save pusum yu blong tingting abaot ol fas samting we oli sapos blong kam insaed long laef blong yu—yu save raetemdaon olgeta tu long wan lis. ?Wanem ol samfala “god” o “pikja” (Eksodas 20:3–4) we yu save gat temtesen blong putum i kam fastaem long God? ?Olsem wanem blong stap putum Lod i kam faswan i stap helpem yu wetem ol nara impoten samting insaed long laef blong yu? ?Wanem hem i save insperesen long yu blong mekem se yu lukluk moa long Papa long Heven mo Jisas Kraes?
Luk tu long Dallin H. Oaks, “I No Gat Ol Narafala God,” Jeneral Konfrens, Okt 2013.
Ol Aedia blong Famli Skripja Stadi mo Haos Naet
-
Eksodas 18:8–12.?Wanem risal nao testemoni blong Moses abaot fasin we God i mekem olgeta i kam fri, i mekem long Jetro? ?Wanem ol bigfala samting we Lod i bin mekem blong famli blong yumi? ?Hu nao yumi save serem eksperiens blong yumi wetem? ?Olsem wanem nao yumi save holemtaet ol eksperiens ia blong ol fiuja jeneresen?
-
Eksodas 18:13–26.Ol ves ia oli save givim insperesen long famli blong yu blong tingting abaot seves we ol lokol lida blong Jos, olsem bisop, ol yut lida, o ol Praemeri tija oli stap givim. ?Wanem responsabiliti nao oli gat, we, i save “hevi tumas” (Eksodas 18:18) blong wan i stap mekem hemwan? ?Wanem yumi save mekem blong help blong karemaot ol hevi wok ia?
-
Eksodas 20:3–17.Tingting long wan wei we i gat mining blong toktok raon long Ol Ten Komanmen olsem wan famli. Eksampol: yu save raetem ol komanmen we oli stap long Eksodas 20:3–17 long ten longfala pis pepa. Afta, ol memba blong famli oli save putum olgeta long tufala grup ia: (1) stap ona long God (2) stap lavem ol narafala man (luk tu long Matiu 22:36–40). Tingting blong stap jusum wan komanmen o tu evri dei long wik ia mo toktok raon long hemia tugeta long moa ditel. Eksampol: ?Olsem wanem taem yumi stap obei long komanmen ia i mekem famli blong yumi i kam strong moa? ?Olsem wanem Sevya i bin obei long hemia?
-
Eksodas 20:12.Blong andastanem gud moa Eksodas 20:12, bae i help sapos famli blong yu i lukluk mining blong toktok ia “ona”. Afta, ol memba blong famli oli save mekem wan lis blong ol samting we yumi save mekem blong givim ona long papa mo mama blong yumi. Maet bae yu wantem singsing wan singsing abaot fasin blong givim ona long papa mo mama, olsem “Quickly I’ll Obey” (Children’s Songbook, 197), mo afta, yusum sam long ol aedia insaed long lis blong yu blong raetem sam niu ves long singsing ia.
Blong gat moa aedia blong stap tijim ol pikinini, luk long aotlaen blong wik ia long Kam Folem Mi—Blong Praemeri.
Wan singsing: “Keep the Commandments,” Children’s Songbook, 146–47.
Stap Kam Antap long Stadi blong Yuwan
Faenem wan taem we i stret long yu. Plante taem, i isi moa blong lanem samting aot long ol skripja taem we yu save stadi ol skripja we i no gat noes o man i stap stopem yu. Faenem wan taem we i stret long yu, mo mekem bes blong stadi oltaem long sem taem ia long evri dei.
Pikja droing blong Moses we i stap holem Ol Ten Komanmen, we i kam long Sam Lawlor