Red Si ia

4–10 Epril

Eksodas 14–17

“!Yufala i mas stanap strong! Tedei Bambae Yufala I Luk Ol Samting we Hae God Bambae I Mekem blong Sevem Yumi!”

God i komandem Moses blong i raetem abaot ol eksperiens blong hem “Yu mas raetemdaon stori blong faet ya tede long wan buk, blong ol man oli no save fogetem mo yu mas talemaot tu” long Josua (Eksodas 17:14). Semmak. Olsem taem we yu stap raetemdaon ol eksperiens blong yu long saed blong Spirit, bae i helpem yu mo olgeta famli blong yu we yu lavem, blong oli save tingbaot ol gudfala blesing blong Lod.

Raetemdaon Ol Filing mo Tingting blong Yu

Ol man blong Isrel oli fas. Red Si i stap long wan saed, mo ol ami blong King blong Ijip oli stap kam kolosap long narasaed. Ronwe blong olgeta long Ijip, i luk olsem se, bae i blong sot taem nomo. Be God i gat wan mesej blong ol man blong Isrel se hem i wantem olgeta blong tingbaot blong ol jeneresen we i stap kam: “!Yufala i no fraet!. … Hae God bambae i faet long saed blong yufala (Eksodas 14:13–14).

Stat long taem ia, taem ol pipol blong God i nidim fet mo strong tingting, oltaem bae oli save tingbaot taem ia we i wan merikel blong mekem Isrel i kam fri. Taem we Nifae i wantem blong givim insperesen long ol brata blong hem, hem i talem, “Bae yumi stap strong olsem Moses; from i tru tumas we hem i bin toktok long ol wota blong Red Si, mo ol wota oli bin seraot i go long ples ia mo long ples ia, mo ol papa blong yumi oli bin kam tru, oli kamaot long kalabus, long drae graon.” (1 Nifae 4:2). Taem we King Limhae i wantem ol pipol blong hem we oli stap olsem ol prisena blong “leftemap hed blong [olgeta], mo stap glad,” hem i rimaenem olgeta long sem storian ia (Mosaea 7:19). Taem we Alma i wantem blong testifae long pikinini boe blong hem abaot paoa blong God, hem tu i tokbaot stori ia (luk long Alma 36:28). Mo taem i nidim blong yumi kam fri—taem yumi nid blong gat smol moa fet, taem yumi nidim blong “mas stanap strong mo luk ol samting we Hae God bambae i mekem blong sevem yumi”—yumi save tingbaot olsem wanem “Long dei ia, we Hae God i sevem Isrel aot long han blong ol man Ijip” (Eksodas 14:13,30).

Sam Aedia blong Skripja Stadi blong Yuwan

Eksodas 14

God i gat paoa blong sevem mi.

Taem yu stap rid long Eksodas 14: 1–10, tingting olsem wanem ol man blong Isrel oli filim taem oli luk ami blong King blong Ijip oli stap kam kolosap. Maet yu filim se yu nidim wan merikel blong save winim had jalenj we yu stap go tru long hem. ?Wanem yu lanem aot long Eksodas 14: 13-31 we i save helpem yu blong lukaotem God blong i sevem yu long laef blong yu? ?Wanem nao yu lanem abaot ol wei we God i givim blong sevem man aot long ol had taem? Tingting hevi long olsem wanem yu bin luk paoa blong Hem blong sevem man long laef blong yu.

Luk tu long Doktrin mo Ol Kavenan 8:2–3; L. Tom Perry, “The Power of Deliverance,” Liahona, May 2012, 94–97; Ol Map blong Baebol, namba. 2, “Isrel I Aot long Ijip mo I Go long Kenan.”

Eksodas 15:22–27

Lod i save mekem ol samting we i konkon i kam swit.

Taem yu stap rid long Eksodas 15:22–27 abaot longfala wokabaot blong ol man Isrel i go long lan blong promes, tingbaot ol samting long laef blong yu we i luk olsem se i konkon” olsem wota blong Mara. Tingting long ol kwestin ia taem yu stap tingting hevi long ol ves ia: ?Olsem wanem nao Lod i save mekem ol konkon samting long laef blong yu i kam swit? ?Wanem valiu nao ol eksperiens ia i gat long laef blong yu? ?Wanem nao ol ves 26 mo 27 talem abaot Lod i stap blesem yumi taem yumi lisin long voes blong Hem?

Eksodas 15:23–27; 16:1– 15; 17:1– 7

Mi save trastem Lod, i nomata sapos ol hadtaem.

Bae yumi gat temtesen blong stap tokbaot nogud Ol Man Isrel from se oli bin stap komplen taem we ol situesen blong olgeta i bin kam had, nomata afta evri samting we God i bin mekem blong olgeta. Be taem yu stap ridim Eksodas 15:23–27; 16:1–15; 17:1–7, Tingabaot sapos yu neva bin mekem semfala samting olsem. ?Wanem nao yu lanem aot long ol eksperiens blong Ol Man Isrel ia we i save helpem yu blong no stap komplen tumas mo i helpem yu blong trastem God moa fulwan? Eksampol: ?Wanem i defren taem yu luk ol hadtaem we Ol Man Isrel mo Moses oli bin fesem?? ?Wanem nao ol ves ia oli tijim yu abaot God?

Luk tu long 1 Nifae 2:11–12; “Sin of Murmuring” (vidio), ChurchofJesusChrist.org.

Mana we i bin kam long God, i bin fidim Isrel long saed blong bodi; yumi nidim tu blong kakae long saed blong spirit evri dei. Fresco i kam long Leopold Bruckner

Eksodas 16

Mi mas lukaotem kaekae long saed blong spirit evri dei.

I gat plante lesen long saed blong spirit we yumi save lan long hem from ol merikel blong mana, we i stap long Eksodas 16 Lukluk gud long ful instraksen we Ol Man Isrel oli bin kasem abaot wei blong hipimap, yusum, mo putum gud mana ia (luk long Eksodas 16:16, 19, 22–26). ?Wanem nao yu faenem insaed long ol instraksen ia we i blong yu yusum taem we, evri dei, yu stap lukaotem kaekae long saed blong spirit?

Luk tu long Jon 6:31–35, 48–58 mo olgeta vidio ia: “Daily Bread: Pattern,” “Daily Bread: Experience,” mo “Daily Bread: Change” (ChurchofJesusChrist.org).

Eksodas 17:1–7

Jisas Kraes i strong ston mo wota blong mi we i stap laef, long saed blong spirit.

Tingbaot Sevya taem yu stap ridim Eksodas 17:1–7. ?Long wanem wei nao, long yu, Jisas Kraes i stap olsem wan strong ston? (luk long Ol Sam 62:6–7; Hileman 5:12). ?Long wanem wei nao Hem i stap olsem wota? (luk long Jon 4:10–14; 1 Korin 10:1–4; 1 Nifae 11:25).

Ol Aedia blong Famli Skripja Stadi mo Haos Naet

Eksodas 14:13–22.Maet bae ol memba blong famli blong yu oli laekem blong traem “seraotem” wota insaed long wan glasbol o insaed long sink blong swim, semmak olsem we Moses i bin seraotem Red Si. Helpem olgeta blong andastanem se Red Si, bae i no save seraot sapos i no gat paoa blong God. ?Olsem wanem nao yumi bin luk paoa blong God insaed long laef blong yumi mo insaed long laef blong ol bubu blong yumi?

Eksodas 15:1–21.Afta we oli krosem Red Si long wan merikel wei, Ol Man Isrel oli bin singsing wan singsing blong presem God we oli save olsem singsing blong Moses, we oli faenem insaed long Eksodas 15:1–21. Olsem wan famli, luklukgud insaed long ol ves ia blong faenem ol sentens we oli stap testifae abaot wanem we God i bin mekem blong Ol Man Isrel, mo tu, faenem sam moa sentens we oli gat mining. Afta long hemia, yufala i save singsing wan hym we i save mekem famli blong yu i tingbaot wanem we God i bin mekem blong yufala.

Eksodas 16:1–5; 17:1–7.Stap ridim Eksodas 16:1–5 mo 17:1–7 i save lidim wan toktok raon abaot Sevya olsem Bred blong Laef, Wota we i Givim Laef, mo olsem Strong Ston blong yumi. ?Olsem wanem ol stori ia oli stap mekem yumi tingbaot wanem we Jisas Kraes i bin mekem blong yumi? Olsem pat blong toktok storian blong yufala, yufala i save ridim Jon 4:10–14; 6:29–35, 48–51; Hileman 5:12; Doktrin mo Ol Kavenan 20:77, 79.

Eksodas 17:8–16.Yufala i save aktem stori blong Eron mo Huru we tufala i stap holem ol han blong Moses mo toktok raon long hao nao hemia i simbol blong wei blong sastenem olgeta we God i bin singaotem olgeta blong lidim yumi. Mo tu, yu save komperem eksampol blong Eron mo Huru wetem Ol Man Isrel we oli stap komplen agensem Moses (we oli tokbaot truaot long ol japta 15–17). ?Wanem nao sam long olgeta wei we yumi save helpem mo sastenem ol lida blong yumi? ?Wanem blesing oli kam long yumi mo ol lida blong yumi taem yumi mekem olsem?

Blong gat moa aedia blong stap tijim ol pikinini, luk long aotlaen blong wik ia insaed long Kam Folem Mi—Blong Praemeri.

Wan singsing: “Ridima blong Isrel,” STSP, pej 5.

Stap Kam Antap long Stadi blong Yuwan

Lukaotem ol niu wei blong yu blong lukluk ol samting long saed blong spirit. Long stadi blong yuwan mo famli stadi, yu no stop long ol ves ia we oli haelaetem long ol stadi aotlaen ia. Maet Lod i gat ol mesej blong yu we oli stap long ol japta ia, we oli no tokbaot long ples ia. Wetem prea, lukaotem insperesen.

Pikja droing blong Moses i seraotem Red Si i kam long Robert T. Barrett