Sao Paolo Brasil Tempol

2–8 Mei

Eksodas 35–40; Levitikas 1; 16; 19

Tabu Fasin long Lod

Taem yu stap prea mo stadi long ol skripja blong wik ia, tingting long ol pikinini we yu stap tijim. Tabu Spirit i save helpem yu blong save wijwan trutok oli nidim blong lanem, mo olsem wanem yu save tijim ol trutok ia long olgeta.

Raetemdaon Ol Filing mo Tingting blong Yu

serem pikja bokis

Invaetem Ol Pikinini blong Serem Wanem Oli Gat

Putum nem blong wanwan pikinini insaed long wan kontena. Askem wan pikinini blong pikimap wan long ol nem ia, mo invaetem pikinini ia we oli jusum nem blong hem blong serem wan samting we hem i jes stap lanem aot long OlTesteman. Toktok wetem ol pikinini abaot, olsem wanem nao, ol samting we oli stap lanem, i helpem olgeta blong kam moa kolosap long Jisas Kraes. Gohed olsem kasem taem we evri pikinini i gat janis blong serem wan samting.

tijing pikja bokis

Tijim Doktrin: Ol Smol Pikinini

Eksodas 36:1

Mi save help wetem wok blong Lod.

Ol yangfala pikinini oli gat ol presen long saed blong spirit we oli save yusum blong tekpat long wok blong Lod long wol ia. ?Olsem wanem yu save helpem ol pikinini blong oli gat wan strong filing blong wantem blong serem wanem we Lod i bin givim long olgeta?

Samfala Aktiviti we Yu Save Mekem

• Ridim Eksodas 36:1 long ol pikinini, mo askem olgeta blong lisin long wanem we Lod i bin givim long Bejalehel mo Oholiab blong helpem olgeta blong bildim “wan tabu haos” (tabenakol). Talem long wanwan pikinini abaot wan presen long saed blong spirit we hem i gat (i gud blong yu askem long papa mo mama blong olgeta). Testifae se God i bin “putum” ol presen long saed blong spirit insaed long wanwan long ol pikinini blong Hem.

• Talem long ol pikinini from wanem yu wantem blong help wetem wok blong Lod. Helpem olgeta blong tingbaot ol wei we oli save tekpat tu (olsem blong stap lanem abaot wan pupu blong bifo, stap tokbaot Jisas long wan man, o blong givim seves long wan memba blong famli). Raetem ol aedia blong olgeta long ol pis pepa, putum olgeta insaed long wan kontena mo invaetem wanwan pikinini blong jusum wan mo aktemaot wanem aksen we i stap long pis pepa.

Eksodas 40:17–34

Mi save filim tabu fasin long Lod long ol tabu ples.

Lod i komandem ol pikinini blong Isrel blong bildim wan tabenakol mekem se Hem i save “stap long medel blong olgeta” (Eksodas 25:8). Yu save helpem ol pikinini oli lanem abaot ol tabu ples we God i givim long yumi tedei blong helpem yumi filim tabu fasin long Hem.

Samfala Aktiviti we Yu Save Mekem

• Soem wan pikja blong tabenakol blong taem bifo (luk long aotlaen blong wik ia insaed long Kam Folem Mi—Blong Wanwan Man, Woman mo Famli). Askem ol pikinini blong faenem ol defdefren pat blong tabenakol insaed long pikja, olsem kandel stan o ol olta mo eksplenem se ol samting ia oli mas stap blong helpem ol laen blong Isrel blong tingbaot Lod (blong moa infomesen, luk long Eksodas 40:17–34). ?Wanem nao tabu ples we yumi gat tedei we i helpem yumi blong tingbaot Lod?

• Soem wan pikja blong tempol mo ridim Eksodas 25:8 long ol pikinini. Eksplenem se long dei blong yumi, God i givim long yumi ol tabu ples we i mekem se yumi save stap kolosap long Hem. Helpem ol pikinini blong mekem lis blong sam long ol ples ia. Askem ol pikinini olsem wanem oli filim taem oli tingbaot ol tabu ples ia. Serem long olgeta se, yumi tu, yumi save filim kolosap long God taem yumi prea, i nomata weaples yumi stap long hem.

• Finisim aktiviti pej ia wetem ol pikinini. Taem yu stap mekem, singsing long wan singsing wetem olgeta abaot tempol olsem “I Love to See the Temple” (Children’s Songbook, 95).

  Rom Itali Tempol

  Olsem tabenakol blong taem blong bifo, tempol i poenem yumi i go long Sevya.

tijing pikja bokis

Stap Tijim Doktrin: Ol Bigfala Pikinini

Eksodas 35:20–29; 36:1

God i bin givim long yumi ol presen long saed blong spirit blong helpem wok blong Hem.

Evriwan long ol pikinini blong Papa long Heven oli gat samting blong givim long wok blong Hem. Ol pikinini we yu tijim, bae oli nidim help blong yu blong luksave olsem wanem oli save yusum ol presen blong olgeta long saed blong spirit blong helpem wok blong God.

Samfala Aktiviti we Yu Save Mekem

• Soem wan pikja blong tabenakol (luk long aotlaen blong wik ia insaed long Kam Folem Mi—Blong Wanwan Man, Woman mo Famli). Askem ol pikinini wijwan tul we maet oli nidim blong save bildim tabenakol. Wetem ol pikinini, ridim Eksodas 35:20–29, mo askem olgeta blong lukaotem olsem wanem nao Lod i bin givim ol tul we oli bin nidim. Testifae se wanwan long ol pikinini oli gat wan samting blong givim long wok blong Lod.

• Askem ol pikinini blong ridim Eksodas 36:1 blong faenemaot wanem we Lod i bin givim long olgeta we Hem i bin singaotem olgeta blong help bildimap tabenakol. Invaetem ol pikinini blong serem wanem oli filim we Lod i bin givim long olgeta blong help bildimap kingdom blong Hem (givim sam tingting sapos i gat nid). ?Olsem wanem nao yumi save yusum ol samting ia blong blesem ol narafala man?

Eksodas 40:17–33

Mi save kam moa olsem Jisas Kraes mo Papa long Heven.

Tabenakol i no letem nomo ol pikinini blong Isrel blong gat tabu fasin blong God i stap wetem olgeta, be i tijim tu olgeta ol samting we oli save mekem blong kam moa olsem God.

Samfala Aktiviti we Yu Save Mekem

• Invaetem ol pikinini blong yusum Eksodas 40:17–33 blong poenemaot ol samting we oli pat blong tabenakol, mo faenem sam long olgeta insaed long wan pikja blong tabenakol blong taem bifo (luk long aotlaen blong wik ia insaed long Kam, Folem Mi—Blong Wanwan Man, Woman mo Famli). Invaetem ol pikinini blong droem ol pikja blong tabenakol blong olgetawan. Tokbaot olsem wanem wanwan pat blong tabenakol i save tijim abaot Sevya o Papa long Heven. Eksampol: ak blong testemoni i save mekem yumi tingbaot ol komanmen blong God; olta i save mekem yumi tingbaot sakrifaes blong Jisas Kraes; kandel stan i save mekem yumi tingbaot se Sevya i Laet blong Wol mo sam moa bakegen.

• Askem ol pikinini blong ridim Eksodas 25:8 blong faenemaot from wanem Lod i wantem ol pikinini blong Isrel oli bildim wan “tabu ples” (o tabenakol). Helpem ol pikinini blong raetem lis blong ol ples mo ol situesen we yumi save filim se Lod i stap. ?Olsem wanem nao ol ples ia oli helpem yumi blong kam moa olsem Papa long Heven mo Jisas Kraes?

Levitikas 1:1–4

Tru long Atonmen blong Jisas Kraes, mi save kasem fogivnes.

Ol sakrifaes blong ol animol we oli stap tekem ples insaed long OlTesteman, oli stap hapen blong tijim ol pikinini blong Isrel abaot fogivnes we i posibol nomo tru long Atonmen blong Jisas Kraes.

Samfala Aktiviti we Yu Save Mekem

• Soem ol pikja blong Jisas Kraes long Getsemane mo long kros (luk long Gospel Art Buk, ol namba 56, 57). Eksplenem se Lod i komandem ol pikinini blong Isrel blong mekem ol sakrifaes blong tijim olgeta se oli save kasem fogivnes from ol sin blong olgeta tru long Atonmen blong Jisas Kraes. Wetem ol pikinini, ridim Levitikas 1:1–4, mo invaetem olgeta blong lukaotem ol toktok o sentens we i mekem olgeta oli tingbaot sakrifaes blong Jisas Kraes.

• Soem wan pikja blong Jisas Kraes we i stap visitim ol pipol long Ol Amerika (olsem long Gospel Art Buk, namba 82). Eksplenem se, afta we oli krusifaem Jisas Kraes mo Hem i girap bakegen long ded, Hem i tijim ol pipol long Amerika from wanem oli nomo nid blong mekem sakrifaes blong ol animol. Ridim tugeta 3 Nifae 9:19–20, mo askem ol pikinini wanem oli komandem yumi blong mekem sakrifaes wetem. ?I minim wanem blong givim wan sakrifaes wetem wan hat we i fulap wetem sore mo wan spirit we i wantem blong sakem sin? Traem talem se oli save lukaotem toktok ia: “Wan Hat we I Fulap Wetem Sore” insaed long Gaed long Ol Skripja (olskripja.ChurchofJesusChrist.org) blong kasem help blong ansarem kwestin ia. Invaetem olgeta blong tingting hevi long olsem wanem oli save givim wan hat we i fulap wetem sore mo wan spirit we i wantem sakem sin.

stap lanem samting pikja bokis

Stap Leftemap Tingting blong Lanem Samting long Hom

Invaetem ol pikinini blong askem Papa long Heven long wik ia, abaot wei we Hem i wantem olgeta blong tekpat long wok blong Hem insaed long famli blong olgeta.

Kam Antap long Fasin blong Yumi blong Stap Tij

Poenem long ol pikinini, rod ia we i go long Papa long Heven mo Jisas Kraes. Stamba tingting blong yu i blong mas helpem ol pikinini we yu tijim blong mekem fet blong olgeta i kam moa strong long Papa long Heven mo Jisas Kraes. ?Wanem nao yu save mekem blong oli save andastanem olsem wanem blong stap laef folem gospel bae i helpem olgeta blong kam moa olsem Papa mo Pikinini?

aktiviti pej: Mi save filim se Lod i stap long ol tabu ples