“23–29 Mei. Josua 1–8; 23–24: ‘Tingting blong Yu I Mas Strong, Mo Yu No Mas Fraet, Yu Mas Stanap Strong Oltaem,’” Kam Folem Mi—Blong Praemeri: OlTesteman 2022 (2021)
“23–29 Mei. Josua 1–8; 23–24,” Kam Folem Mi—Blong Praemeri: 2022
Pikja droing blong Moses we i stap odenem Josua, i kam long Darrell Thomas
23–29 Mei.
Josua 1–8; 23–24
“Tingting blong Yu I Mas Strong, Mo Yu No Mas Fraet, Yu Mas Stanap Strong Oltaem”
Taem yu stap ridim Josua 1–8 mo 23–24, rekodem tingting mo filing blong yu long saed blong spirit. ?Wanem nao yu save mekem blong faenemaot wanem nao ol pikinini we yu stap tijim oli nidim blong lanem aot long ol japta ia?
Raetemdaon Ol Filing mo Tingting blong Yu
Invaetem Ol Pikinini blong Serem Wanem Oli Gat
Droem wan pikja long bod abaot wan samting insaed long stori long Josua 1–8; 23–24, mo luk sapos ol pikinini oli save talem stret wanem stori i kamaot long hem. Eksampol: yu save droem wan reva o wol blong wan bigtaon.
Tijim Doktrin: Ol Smol Pikinini
Mi save tingbaot ol skripja long dei mo naet.
Lod i bin talem long Josua se sapos hem i tingting longtaem long ol skripja mo folem ol kaonsel insaed long olgeta, bae hem i save gat sakses blong stap lidim ol laen blong Isrel i go long promes graon. ?Wanem nao yu save mekem blong tijim ol pikinini abaot ol bigfala blesing we oli kamaot long ol skripja?
Samfala Aktiviti we Yu Save Mekem
-
Givim long wanwan pikinini wan pikja o wan droing blong san mo mun. Ridim long olgeta skripja ia Josua 1:8: “Tingting longtaem [long ol skripja] dei mo naet.” Eksplenem se tingting longtaem i minim blong tingting dip abaot wan samting. Ripripitim sentens ia plante taem, mo invaetem ol pikinini blong leftemap san taem yu talem “dei” mo mun taem yu talem “naet.” Askem ol pikinini blong ripitim ol toktok ia wetem yu.
-
Askem ol pikinini blong talem nem blong ol samting we oli stap mekem long deitaem mo ol samting we oli stap mekem long naet-taem. Talem long olgeta se oli talem long Josua blong tingbaot ol skripja long deitaem mo naet-taem. Helpem olgeta blong tingting long ol stori mo ol tijing aot long ol skripja we bae oli save tingting long ol long deitaem mo naet-taem. Invaetem olgeta blong droem wan pikja blong olgetawan o famli blong olgeta taem oli stap stadi long ol skripja. ?From wanem oli laekem blong stadi long ol skripja? ?Olsem wanem nao oli kasem blesing taem oli stap mekem olsem?
Mi mas kasem baptaes blong go insaed long kingdom blong heven.
Stori blong Josua we i stap lidim ol laen blong Isrel tru long Jodan reva i go long promes graon, i givim wan janis blong tijim ol pikinini se yumi mas baptaes blong i go insaed long kingdom blong heven.
Samfala Aktiviti we Yu Save Mekem
-
Luklukbak long infomesen blong stori blong ol pikinini blong Isrel we oli stap krosem Jodan Reva blong go insaed long promes graon (luk long “Profet Josua” insaed long Ol Stori long OlTesteman). Afta soem wan pikja blong Jisas Kraes we i baptaes, mo talem long ol pikinini se Jisas i baptaes long semmak reva. Invaetem ol pikinini blong serem ol samting we oli save abaot baptaes blong Jisas.
-
Singsing long wan singsing abaot taem we Jisas i baptaes wetem ol pikinini olsem hemia “Baptism” (Children’s Songbook, 100–101). Helpem olgeta blong talemaot wanem nao singsing ia i tijim yumi abaot Jisas taem Hem i bin baptaes, mo from wanem yumi mas folem eksampol blong Hem. Letem ol pikinini blong oli serem ol filing blong olgeta abaot taem oli bin baptaes. Tokbaot wanem nao ol pikinini oli save mekem naoia blong rere blong baptaes taem yia blong olgeta i kasem eit.
Yumi mas baptaes blong go insaed long kingdom blong heven.
Mi save jusum blong wok blong Jisas Kraes.
Faenol mesej blong Josua i go long ol pipol, i we, oli gat joes blong gohed blong wok blong Lod o lego Hem. Wetem semmak lav we Josua i gat long ol pipol blong Hem, yu save leftemap tingting blong ol pikinini we yu tijim blong jusum blong wok blong Lod “long dei ia.”
Samfala Aktiviti we Yu Save Mekem
-
Askem long ol pikinini blong tokbaot sam long ol joes we oli mekem tedei. Ridim, long ol pikinini, aot long Josua 24:15: “Yufala i jusum tedei huia bae yufala i wok blong hem; … be mi, wetem ol famli blong mi, bambae mifala i biaen long Hae God nomo.” ?Olsem wanem nao ol pikinini oli stap jusum blong wok blong Lod tedei? ?Wanem sam wei we yu save jusum blong wok blong Hem evri dei?
-
Singsing tugeta wan singsing abaot fasin blong stap mekem ol gudfala joes, olsem hemia “Choose the Right Way” (Children’s Songbook, 160–61). ?Olsem wanem nao yumi filim taem yumi jusum blong wok blong Jisas Kraes? Invaetem ol pikinini blong droem ol pikja blong olgetawan taem oli stap mekem wan samting blong wok blong Lod. Serem wan stori blong laef blong yu, o aot long wan magasin blong Jos we i abaot fasin blong stap jusum blong wok blong Lod.
Stap Tijim Doktrin: Ol Bigfala Pikinini
“Tingting blong yu i mas strong, mo yu no mas fraet, yu mas stanap strong oltaem.”
Afta we Josua i bin lida blong ol laen blong Isrel, Lod i leftemap tingting blong hem taem hem i stap talem, “Tingting blong yu I Mas Strong, mo yu No Mas Fraet, yu Mas Stanap Strong Oltaem” (Joshua 1:6). ?Wanem nao ol pikinini oli save lanem aot long Josua abaot olsem wanem blong stap strong mo no seksek long Lod?
Samfala Aktiviti we Yu Save Mekem
-
Invaetem ol pikinini blong faenem sentens we oli ripitim insaed long Josua 1:6, 9, mo 18, mo raetem antap long bod (luk tu long ves 7). Helpem ol pikinini blong tingting long ol samting we i mekem se yumi nidim mesej ia semmak olsem we Josua i bin nidim. Olsem wan klas, luklukbak long sam stori insaed long Josua 1–4; 6 (luk tu long “Profet Josua” mo “Rehab mo Ol Spae” insaed long Ol Stori long OlTesteman), mo askem ol pikinini blong talemaot olsem wanem ol pipol long stori ia oli bin soem strong paoa long tingting mo paoa.
-
Invaetem ol pikinini blong tokbaot wan narafala man we oli save we hem i strong mo gat strong paoa long tingting. Leftemap tingting blong olgeta blong oli raetemdaon wan samting we oli laekem blong mekem blong stap strong mo gat moa fasin blong strong paoa long tingting long Kraes.
Mi save tingting longtaem long ol skripja long dei mo long naet.
Wan wei we Lod i helpem Josua blong rere blong fesem ol jalenj i blong leftemap tingting blong hem blong “tingting longtaem” long ol skripja “dei mo naet.” ?Olsem wanem nao kaonsel ia i blesem ol pikinini we yu stap tijim?
Samfala Aktiviti we Yu Save Mekem
-
Invaetem ol pikinini blong raetemdaon hamas taem oli spenem long wan nomol dei long ol defdefren aktiviti. Afta, invaetem olgeta blong ridim Josua 1:8, mo stap lukaotem wan samting we yumi evriwan i nidim blong mekem evri dei. Askem olgeta blong faenem ol toktok mo ol sentens insaed long ves ia we i tijim yumi abaot ol blesing blong stap stadi long ol skripja. ?Olsem wanem taem yumi stap tingting longwan long ol skripja i helpem yumi blong gat sakses long ol narafala samting we yumi mekem evri dei?
-
Invaetem ol pikinini blong ridim tugeta ol skripja ia: Josua 1:8; 1 Nifae 15:23–24; 2 Nifae 31:20; 32:3; Jekob 4:6; Hileman 3:29–30. Askem ol pikinini blong faenem wan toktok o sentens insaed long wanwan ves ia we i tijim olgeta abaot paoa blong stap stadi long ol skripja. ?Wanem nao ol gol we oli save putum blong skripja stadi blong olgeta wanwan?
Mi save jusum blong wok blong Jisas Kraes.
Long medel blong ol faenol toktok blong Josua i go long ol laen blong Isrel, i gat wan prea blong “jusum … tedei huia bae yufala i wok blong hem.” Tingting hevi long olsem wanem kaonsel ia i save blesem ol pikinini we yu tijim.
Samfala Aktiviti we Yu Save Mekem
-
Invaetem ol pikinini blong krietem wan posta mo yusum sam ki toktok mo sentens insaed long Josua 24:15. Letem olgeta oli serem ol posta blong olgeta mo eksplenem from wanem oli jusum ol toktok ia. ?Olsem wanem nao yumi soem long God se yumi jusum blong wok blong Hem?
-
Invaetem ol pikinini blong tingting long sam situesen we bae oli mas disaed blong jusum God bitim ol narafala samting. Askem olgeta blong tingting long wanem nao bae oli save mekem. ?From wanem hem i impoten blong “jusum … tedei” bitim we blong wet long wan situesen blong i girap? ?Olsem wanem nao bae yumi kasem blesing taem yumi mekem raet joes?
Stap Leftemap Tingting blong Lanem Samting long Hom
Invaetem ol pikinini blong jusum wan samting we yufala i bin tokbaot we bae oli wantem blong serem wetem famli blong olgeta. Leftemap tingting blong olgeta blong tingting long wan wei we oli save serem long wik we i stap kam.
Stap Kam Antap long Fasin blong Yumi blong Stap Tij
Helpem ol pikinini blong oli kam blong lanem samting long wan moa gud wei. Stamba tingting blong yu blong tijim ol pikinini i no jes blong serem trutok nomo wetem olgeta. Yu mas helpem olgeta tu blong oli developem fasin blong dipen long olgetawan blong stap ol man blong lukaotem trutok.